「增輝」壽宴

早陣子和朋友去左深水埗的「増輝」食生日晚飯, 好彩當日並唔多人, 仲有位比你揀, 我地點左：

1) 干炒牛河：感覺有少許油膩, 並不如食評網般形容得o甘出色
2) 口水雞 (例牌)：都幾辣, 不過雞肉好嫩滑
3) 辣酒煮花螺 (起左筷才 "醒起" 影相)：花螺略嫌細隻, 感覺不太辣, 可惜粉絲太多兼辣酒汁頗辣
4) 清炒西蘭花：清清地的一味餸, 我鍾意
5) 豉油皇蝦碌：蝦肉夠新鮮彈牙, 豉油皇惹味, 略咸
6) 鬼馬油炸鬼：墨魚肉油炸鬼, 少許熱氣, 不過卻彈牙出色

以上 6款美食, 另有白飯及汽水, 一共 $433, 並唔便宜呀!! 多謝晒朋友仔
http://www.openrice.com/restaurant/sr2.htm?shopid=13433

「半自動洗衣機」之 狂想

記得上一世紀 (19 世紀) 我的小時候, 一般家庭主婦採用洗衫板 和 勞工皂 (又名粗皂) 洗衣服的, 直至後期「半自動洗衣機」面世後, 媽媽會先用雙手初步清洗衣服污漬, 再將 "濕淋淋" 的衣服放進 半自動洗衣機 內清洗。

半自動洗衣機 有別於現在沿用的 全自動洗衣機, 它的洗衣滾筒又大又圓, 而且是 "向橫" 式旋轉 (運作時, 就似是一個巨型漩渦般), 不是全自動式的 "上下" 旋轉, 而且機頂蓋總係帶一點點透明膠的, 讓你可以從外看到裏面的運作。小時候最愛望住它 "轉呀轉"、"轉呀轉".....直至頭暈眼花為止, 感覺好得意! (卻又好傻仔)

靜靜雞話個秘密你地知啦.........小時候的我非常頑皮, 曾經在玩捉迷藏的時候, 嘗試企在椅子上, 跨進洗衣機的滾筒內 (想匿埋), 誰知.........腳只跨了一半, 媽媽就從屋外回到家中, 我因為走避不及, 所以「仆崩鼻」(跌倒) 兼 「食籐條炆豬肉」! 因為媽媽覺得走進洗衣機內匿埋的行為太危險, 如果兄姊稍一不慎誤動了機器, 我便會慘成「肉醬」, 又或者關上機頂蓋活生生的「焗死」。

半自動洗衣機 所 產生的漩渦, 其實恰似是人生一樣, 就好比你每天活在職場 (戰場) 之中, 往往身不由己的做事, 無能力反抗無理的事, 「焗」住要隨波逐流。 當機會一到, 你可以暫時離開戰場休息, 抖足精神才再次投入那個漩渦 (半自動洗衣機) , 不是麼?

所以該慶幸自己有機會去逃離那個半自動洗衣機的折磨, 而不是坐著氣餒啊!

早來了的生日禮物

考完最後一個試的當晚, 約左朋友仔食餐好的 "慶功", 兼替我預祝生日, 我地選擇了銅鑼灣的「峰壽司」, 由於當日我不在狀態 (考試之前見眼瞓, 飲左杯咖啡提神, 點知........."long" 住左個胃, 食唔落野)

晚餐比我預期中食得多左, 而且食物質素仲好好添! 我同朋友仔一共食左 14 碟壽司, 其中有 4-5 碟由我包辦, 其餘的就靠朋友仔的「食力」啦...........總之一個字「勁」!!!!

今年朋友仔送左一樣我的至愛比我 (為食豬的我), 就係 Jenny 出品的 8 款口味曲奇餅, 仲配上聖誕鐵罐添! 令我可以在聖誕節期間同我 「至錫果幾個」一齊分享添, 真係體貼。

朋友仔, 多謝晒你啊!

**PS: 果杯咖啡真係 "超抵飲", 考試當晚至翌日早上, 完全瞓唔著覺, 但係個人又好疲累喎, 激死我!

「當旺」啊

踏入秋冬季 除左係進補, 就梗係 "婚宴" 的好日子啦, 所以今年真係超級旺場!!! (可能因為 "閏月" 關係, 又可能因為人們以為 2009 = 長長久久)

最近出席了一個婚宴, 每位來賓坐位的餐碟上也放有一份 "回禮小禮物" (如上圖的白色小索繩袋, 幾靚), "禮物袋" 內有一塊曲奇、一塊迷你小燈 (等新娘入場時攪氣氛) 及 一張紫色的抽張卡 (每名賓客有其獨立號碼)

當新娘進場、律師即場証婚時, 我的肚就不停的 "打鼓" 贈慶, 因為全日只食了一碗 "紫菜四寶河粉" 咋! 之一晚又因為 "咖啡" 關係瞓唔著, 超累!!

終於等到 "戲肉" 啦!! 就係「食」的時間, 老實講食物稱不上好, 但亦唔算差, 只係 "條斑" 老左 D, 好鞋!

咦........司儀出場又攪氣氛了, 原來會在全場賓客之中抽出 9 位幸運兒 (每位均有不同的禮物, 如：保礦力水特、運動襪 等等), 結果.......我憑住號碼 "185" 中左獎, 獎品係超級實用而我又喜愛的 「成人八達通 連 $150 儲值金額」(獎品在圖中的利是封內, 儲值金額 連 八達通按金總值 $200 蚊, 「意頭」仲好好添 ─── 「易發」)

哈哈........超好彩, 今期我開始「當旺」了, 年尾一於執返個 "尾彩" 先。

生命線

你試o下攞起支筆, 隨意在紙上畫上 "一條橫線", 然後再在線上隨意的 "加上一點"：

而家試o下將你畫的線 「隨意的」放在螢光幕上 (和我畫的) 重疊起來, 你見到什麼?

假如那條橫線代表你的「生命線」, 每個人畫的線長短都不一樣, 因為你和我的起點 (出生) 和 終點 (離世) 也不一樣, 相對線的長度 (壽命) 亦不會一致。

至於 "那一點" 代表著什麼?

假設它代表著「一件在你生命中會發生的事」又或者 「生命中必會遇上的一個人」, 你和我畫那一點的位置亦不同, 代表著它在我地生命中不同的時間上出現。

當橫線重疊時, 而你我的 "那一個圓點" 要交疊 (疊上) 係好難 (或然率近乎零)。

無論在於任何一個層面 (親情、友情、愛情、事業), 引申出人和人在生命之中能夠遇上確屬有緣和難得, 因此更應該珍惜緣份。 因為你同我永遠不知道我地的「生命線」有多長, 它不是確實的由我地來畫 (控制), 對嗎?

同你分享以下歌曲的某些詞 (紅色的), 希望你地永遠都快樂!

我說過要你快樂( 主唱：吳國敬)

生命似 無數連續細小故事
即使傷心了一次 再有更多夢兒
想著你 才會明白許多世事得
不到的一些愛 卻永遠埋藏深處
今天生活似寫意 我也似忘掉往事 (你說過要我快樂)
你那影子退出了 誰人知 在我心中的愛意

我說過要你快樂 讓我擔當失戀的主角 (你說過要快樂)
改寫了劇情 無言地飄泊
我說過要你快樂 換你一生開心的感覺
原諒我 原諒我 求原諒我 (曾開心過)

今日我 還有許多許多故事
當中一位女主角 與我有些相似
消逝了 時間磨滅許多往事
得不到的一些愛 卻永遠埋藏深處

「電話」之 青蔥回憶錄

** 溫馨提示：假如讀緊此文章的你曾經活在七、八十年代, 你對它可能 "極有共鳴" , 保証令你會心微笑啊!

早前在網上讀到一篇文章, 撮取了部份 "抵死啜核" 的內容同你地分享：
**************************************

在七、八十年代，所謂「電話」，只是「固網電話」，亦即是只有在家中的那個黑色還要撥輪的電話，才可以用來電話通訊。當年那些固網電話，若是「按鍵式」而不是「撥輪式」的，已經算是先進。當然，是當年的香港。

那時，更加沒有什麼互聯網、手提電話。當年，「陀」住部「call機」，已經很威。

現在的年青人，您可否知道，您們現在是多麼幸福？現在您要媾女，既可以「笠」人手電號碼，又可以「扮不經已」用SMS，再怕醜可以不見面在MSN吹水兼吹簫。

我們以前那個年代，就是取得條女屋企電話號碼，還要做關羽過五關斬六將，致電時既要避開條女的老竇又要避開老母，更甚還要再避開小器無拖拍的家姐，或豬事八掛口疏疏兼隨時爆料給老竇老母的小弟弟。

最慘，是一屋一電話。駁得通，也傾不長。背後，總不時有怪叫聲。

**************************************

哈哈.........似曾相識呢????? 類似的情況有無出現在你的青蔥歲月呀? 那個年代的家長比較保守, 總係怕子女在求學時期談戀愛, 因此對於致電找子女的「異性」採取 "更嚴密" 的監控 和 過濾。

其實人類不是男的, 就是女的, 難道異性就不可作「普通朋友」嗎?

常言道：「人生得一知己, 死而無憾」, 何解還要拘泥於性別的關係而預設障礙呢? 假若對方和自己志同道合, 想法又接近, 如果礙於 "性別" 關係, 而不能作「普通朋友」又或者「交心朋友」, 不是很可惜嗎?

我記得當時要致電班中的男生問功課時 (因為男生的數理學科普遍較叻, 而我較弱), 都要請哥哥 "出口" 幫忙 (利用佢的男性聲音, 才會令對方的父母放下戒心), 相反哥哥亦需要我地的幫忙 (如果要揾女同學)。

其實一切只係當時的人民質素太保守 及 致電者 和 接電者 要避免 "不必要的麻煩", 才出此下策吧!

不得不嘆句：「現代的年青人是何等幸福啊! 因為時代的變遷, 父母都比較開明之餘, 通訊又十分發達 (甚至一人一手提電話) 不用作出以上的鬼祟行為, 但卻少了一份集體回憶啊!」

家有「二寶」, 問你好唔好?

常言道：「家有一老, 如有一寶」

那麼我的家有兩老, 咪即係有「二寶」囉!!

自小體弱多病, 食得藥多攪到個人都 "燥" 底, 還不時失控的 "發兩老脾氣", 其實心裏暗暗 "知衰", 可惜 "把口太硬" (下不了台)。好彩........佢地都無怪我, 作為一家人, 佢地總係用無限的愛去包容著我。

媽媽成日自責：「點解生得你體質o甘差, 令你成日要食藥、還要四處尋醫那麼受罪?」 雖然爸爸不曾將話說出口, 但我知道佢的想法也許亦然。

每一次聽到媽媽的嗟嘆申訴, 我的心裏也不好受, 怪自己點解o甘唔爭氣, 要花錢、花時間、花心機去調理 (有時又要受 D 醫生的古怪脾氣), 又令父母擔心, 實在不孝!! (自己的心情其實都好難過, 又不能將感受坦然告之, 只有獨個往肚裏吞, 日子久了, 或多或少總有著一點點的氣餒、一次次的希望 及 失望, 還有一層層的壓力)

凡事向好方面去想 ─── 又不是患上什麼世紀絕症, 又不是無命快死了!

父母生我出來「四肢健全, 樣貌正常」(至少不是兔唇 BB) 已屬萬幸了, 還祈求什麼? 而家自己有時間、有積蓄 及 有心去調理身體就更係一種福氣。「天將降大任於斯人也, 必先苦其心志, 勞其筋骨, 餓其體膚」上天就係要磨練我的意志, 鍛鍊我的身體 同 訓練我的毅力, 讓我從艱辛之中明白 "健康" 的 "得來不易", 那麼我才會學懂珍惜它。

最近.......針炙師調理身體開始有一點點眉目了, 比以往健康左少少, 再加埋........

老頭子專誠為我去街市買雞, 老媽子又為我煲「補身雞湯」比我鞏固體質, 飲過以後手腳及身體暖和得多了, 較容易入睡, 而且臉色也比之前紅潤了!

其實我個心好 warm (溫暖) 又好感動, 不過亦好慚愧!! 似乎該係我去孝順佢地, 而唔係由佢地來服侍我, 奈何「食療」E 家o野我所知不多, 廚藝亦不及佢地叻! 希望努力的加把勁繼續 保重、鍛鍊 同 調理身體, 讓它一直好下去, 不讓他們擔心。(KK 也明言好羨慕我有 "補身雞湯" 飲呢!!)

曾經天真的我幻想過「總有愛我的人願意與我一起共患難 (去面對問題)」, 奈何佢地在考驗當中 "肥佬" 了, 而真正考試合格的, 原來一直就在我身邊默默的守候著我 (而我從不用刻意去尋覓)。

「二寶」多謝你地的寵愛, 無論我野蠻發睥氣, 無論我體弱要你地照顧 (自覺負累了你, 比左好多麻煩你, 每天要煲這煮那), 又要你地為我操心, 可是你地總無悔的 "傍" 住我走, 從不丟下我一個。

送比「二寶」最愛的那一首歌, 你倆就如歌詞中的待我一樣

陪著你走 ── 主唱：盧冠廷
http://www.youtube.com/watch?v=IJfw85_M_ZY&feature=channel_page

誰說　時間片刻變陳舊
全為我分秒亦停留
因我　身邊有你緊握我的手
愛　誰說永不會長壽
陪著你一生到白頭
都能　把心中星星閃得通透

陪著你走　一生一世也不分
天天編出兩雙足印　過千山過千海
如果　走到這世界邊端
我倆已是無力前行
跟我一起飛去

陪著你走　一生一世也不分
天天編出兩雙足印　過千山過千海
如果　走到這世界邊端
我倆已是無力前行
跟我一起飛去

請你陪我同路去

心動

心動是...............

一種感覺
一套電影
一首歌

是一些甜蜜美好、令人回味的東西。


記得年青時第一次睇電影「心動」(金城武、梁詠琪 及 莫文蔚主演的)。 嘩..........好有同感呀!! 原來少年時代的 pupply love (兩小無猜式戀愛) 就係o甘架啦! 盲目得令人無從解釋, 只係單靠 "眼緣" 去尋覓對方, 就令你心生好感之餘, 還相信此乃上天註定的緣份, 從不會去計算對方的種種, 如：學歷、家底等等。

那時候真的純情得可愛, 不過那種「心動」的感覺可能只是屬於「喜歡」, 而談不上「愛」, 怎麼卻會令人長大後都留下深刻的印象呢? 因為那是情竇初開的你「第一次的心動」, 除了家人以外, 生命裏第一次感受到一個異性在你心中留下了位置 (位置還超越了你的好朋友、好姊妹添), 多奇怪 而又甜蜜 (又 "羅羅攣" ) 的一種感受原來就係「心動」。

那一首主題曲都好好聽啫, 歌詞同劇情都好配合! 人生中就係要有著一點點的遺憾, 才令你學懂珍惜, 才倍覺身邊的更珍貴。原來封塵已久的舊記憶並不是已經消失, 只是被你 "壓縮" 了並埋藏於心底, 偶然翻出來細味一返, 都覺得當時傻瓜得來, 又甜蜜可笑, 卻又帶點無奈, 也許.......這就是「人生」的五味 (甜酸苦辣咸)。

隨著年紀漸長, 「心動」的感覺越來越少 (正所謂：「食鹽多過你食米, 有咩未試過? 值得令人心動」) 不過都啱的, 因為年紀大而又運動少, 心情適宜常常保持平靜, 總好過心動時, 心情忐忑不安, 令血液泵得 "時快時慢" , 容咩易會爆血管架? 都係留返比 D 後生仔女好了, 哈哈!!!!

人生雖然帶著一點點的無奈 (遺憾), 但希望你在 "合上雙眼走之時", 會發現原來「心動」確曾在你心中出現過, 那仍是值得回味的記憶, 而且我恭喜你, 因為你的一生之中不致太平坦, 生活才不枉過啊!


《心動》 http://www.youtube.com/watch?v=mpjdKn7bCkY
歌手：林曉培 作曲：黃韻玲 填詞：林夕 編曲：黃韻玲

有多久沒見你　以為你在哪裡
原來就住在我心底　陪伴著我的呼吸
有多遠的距離　以為聞不到你氣息
誰知道你背影這麼長　回頭就看到你

過去讓它過去　來不及　從頭喜歡你
白雲　纏繞著藍天　
如果不能夠永遠走在一起
也至少給我們懷念的勇氣　擁抱的權利
好讓你明白　我心動　的痕跡

總是想再見你　還試著打探你　消息
原來你就住在我的身體　守護我的回憶

新記芝士撈丁

途經灣仔 "職訓局" 附近, 一於去「新記」食o下馳名的 "豬頸肉芝士撈丁" 先, 舖頭雖然開o係 "橫街窄巷", 下午時份 (四點零左右) 依然多人喎, 舖頭牆 及 玻璃窗上 貼滿了 "食品介紹" 同埋 "明星照片" 來招徠, 似有萬二分的號召力!

唔講o甘多, 試o下食物質素先.........點左一客 "豬頸肉芝士撈丁" (跟餐奉送熱飲一杯), 我選了 "汪阿姐" (熱咖啡)


"豬頸肉芝士撈丁" 最好食的地方在於 "芝士醬汁" 香濃惹味" 又唔太漏, 食完一碗剛剛好, 超滿足! 豬頸肉算多而且大塊, 感覺有點漏 (肥膩), 一丁麵軟硬適中, 熱咖啡奶味太重, 但窩心的用保溫杯盛載, 令它無o甘快攤凍, 就加多它 "兩分" 啦!

整體而言, 此店比起尖沙咀的分店美味得多, 坐位亦較舒適, 服務更見殷勤。美味的套餐盛惠 $36 (無加一)

食飽飽, 帶住滿足愉快的心情上戰場 (去試場應考)!

「諗多左啦」

最近睇見 IKEA 傢俬的兩個攪笑廣告：

1) 一名女子在傢俬店員前 "拋生藕, 放生電", 目的旨在讓傢俬店員暈其大浪, 收佢平 D
2) 一名外貌看似 "兇悍" 的男子不斷的擺姿態恐嚇傢俬店員, 希望對方因懾服害怕而計平左

廣告結尾係：其實傢俬店一向都係平售傢俱, 大家「諗多左啦」, 根本不需攪o甘多花臣!

****************************************

娛樂圈中, 早前出現過「雙林爭城」(模特兒 "熊黛林" 同 奀星 "王秀琳" 爭奪 "郭富城"), 幾方人馬一直靠傳媒在隔空罵戰, 事件擾攘了數周。 雖然事件可能係無中生有, 但最重要的係佢地霸佔左幾星期的娛樂版版面, 報紙雜誌又可利用此則新聞 "煲" 足幾星期, 何樂而不為?

最後郭先生向傳媒講：「可能王小姐 "諗多左啦"!」而令事件告一段落

真的只係王小姐 "諗多左了嗎"?

俗話說：「一隻手掌拍唔響」 會否有人作過某 d 過份熱情的行為, 才令人有誤會呢?

****************************************

現實之中 「會錯意」係一件 "幾瘀" (頗尷尬) 的事, 所以有時候, 即使你隱約 "感到" 某些東西存在, 卻又繼續的 "扮唔知", 直至到事件逐漸 "明朗化", 再進一步被確認, 你才敢承認。

可能人越大, 面皮越薄啦! 其次的係.......你怕「會錯別人意」, 別人又怕 「自己諗多左」, 彼此都在等待........不敢前行多一步, 最終可能大家都在苦等, 等待機會在眼前溜過!

其實「諗多左」又點啫??? 關唔關所有人事先? 你知我知咪得囉, 可能因為大膽的表示, 對方收到你的試探後, 作出相對的回應, 最後卻係「諗啱左」呢?

都市人的反思

作為 「都市人」的你, 停一停, 問一問自己：「我在幹著什麼呢? 究竟每天營營役役的辛苦工作, 最終是為了什麼?」

「為了供樓」
「為了供養父母」
「為了另一半生活更安定」
「為了養孩子」
「為了揾更多錢 (才有安全感」
「為了籌備將來的退休生活」

每個人總會為著某個目的才會 「為五斗米而折腰」, 而此目的就成為了你的 "推動力"。

在 "時間巨輪"、"物質旋渦" 同 "壓力洪流" 的夾攻之下, 你.........總有累、氣餒的時候, 此時如果有個肩膊及避風港給你暫避, 替你打氣, 是何等幸福的一件事。細心的想一下, 又會否因為自己的慾望太多, 總係不斷的追求, 才會迫得自己喘不過氣呢?

最怕的係夜深人靜, 需要赤裸裸去面對自己情感的時候, 你才發現原來「我比從前更寂寞」, 因為在時間洗禮之下 (生活迫令你每天戴著厚面具做人), 你再不是從前的自己, 已經不再單純, 不再天真, 甚至有一點點陌生, 又帶一點恐怖。

早前睇「超級巨聲」, 愛上了這一首歌, 它的歌詞蠻有意思, 參賽者亦演繹得出色, 帶出了那一份悲慘同無奈, 希望大家會對自己的生活作出反思 (人的慾望總是無止境的, 要學懂控制它 及 珍惜擁有的), 偶爾宣洩一下自己的負面情緒, 才不致活得太疲累!

當你努力工作, 以為得到「全世界」的時候, 原來靜下來想想, 你 "失去的" 竟比 "得到的" 更加多!

我比從前更寂寞 (原唱：楊坤) http://www.youtube.com/watch?v=6s3h75cHs2Y (聽歌按)

坐在很熟悉的機場　等待飛向別的地方
又換了床　熄了燈光
為何夜裡還睡不香

*夢最多的男人最忙　沒夢做了又很緊張
得到越多　折磨越多
這不是我要的生活

天沒亮　我很難過　拿著電話不知給誰撥
得到了　所謂的太多　我卻比從前越來越寂寞*

（間奏）
夢最多的男人最忙　沒夢做了又很緊張
得到越多　折磨越多
這不是我要的生活

天沒亮　為何我這麼難過　拿著電話不知給誰撥
得到了　所謂的太多　我卻比從前越來越寂寞

我對著　鏡子裡的人發火　那簡單的我到底那去了
得到了 想要的結果　我卻比從前越來越寂寞

Repeat *

今年甩難了

2009 年快將完結, 一眨眼便發現 "今年過得真係快"。

過埋 "聽日" (11 號) 我便甩難了, 因為今年的最後一個考試都結束啦, 然後就係我「聖誕」去玩的好時機了, 好o野....................(我望到頸都長)

等我比 d 心機考埋它, 然後 "全力" 去計劃 "去玩大計", YEAH!!!!! (心中禁不了的興奮)

風的意義

首先在此祝 朋友 E 「生日快樂、身體健康、事事順意」, 生日晚飯留待我考試以後才補食吧!


踏入秋天、冬天的季節, 我實在有點不情願。雖然夏天的的炎熱到想死 (30 幾度), 又或者下大雨濕淋淋的討厭, 但我始終愛活在夏天的氣候多一點。

最近天氣介乎於 15-20 度左右 (新界地方低幾度), 只可惜常常刮起大風, 令身處 "寒舍" 的我更感凍凍, 所以成日要以 "食多 D 野" 又或 "出街" 來禦寒。

在煦和的陽光之下走上街, 身體立即暖和得多, 好舒服啊! 冷不防幾陣 "強風" 迎面刮起, 頭髮凌亂得似個 "癲婆" 一樣 (頭髮被吹得仲癲過上圖的狗狗耳仔), 細看之下, 大樹的樹葉並無左搖右擺, 認真 "耐人尋味", 奇怪的係我地的頭被風狂吹, 甚至吹到有點頭痛。

心中浮起了：「樹欲靜而風不息, 子欲養而親不再」再望向我隔離的媽媽。

睇住佢同我一路被風 "癲吹" 低下, 搖晃的向前走, 那一刻我同自己講：「我該趁而家有機會, 好好的孝順佢 (不是只在物質上, 心意上亦然), 不要令將來遺憾, 也想令佢開心一點。」

今天的「怪風」帶給我這一個新的意義 及 訊息, 朋友你又同意嗎?

媽媽御准的 「紋身」

早前同媽媽用 "Henna" (指甲花粉) 染髮, 可能因為第一次用它來染髮, "染髮糊仔" 開得唔夠好, 所以染髮的效果都唔太好 (白髮只係變左金啡色, 我覺得幾 young 幾型架, 當然媽媽唔會接受啦)。

之後我用左剩餘的 "染髮糊仔" 作「彩繪紋身」(臨時性的, 只要日子耐 d , 用水沖洗之下便會甩色)。我先用保鮮紙包妥 "染髮糊仔", 然後用橡筋紥好紙口, 再用扣針在袋咀的位置刺一下, 手中用力 "唧" 一下, "染髮糊仔"立即一條幼幼的走出唧咀, 我便開始在身上 "劃公仔"。

一下子的功夫後, 你睇o下............完成了, 第一次 "在身上畫公仔" 又無圖睇, 效果都唔錯啦! 我只待它在腳上 "1 小時" 便沖洗, 所以顏色太淺色 (洗兩日已經甩左好多色), 如果想顏色 keep 耐 d, 我相信要好似網友講 "留在身上 6 小時或以上" 才可。

下次我會再進步的, 睇住黎啦!

「塔利班」黨羽

家中最近犯上 "動土煞" (樓下的行人路及馬路挖地換水管), 弄得滿天塵埃兼非常嘈吵, 鑑於 E 排有幾個考試快將進行, 所以走左去公共圖書館的自修室溫習。

我有一個 "小習慣", 就係當專注讀書考試的時候, 總喜歡把頭髮束起 及 夾起前額的留海, 就似日本卡通片中戴上 "加油" 的打氣布帶模樣。

束起頭髮後, 圖書館的中央冷氣總有點凍, 又怕被 "陣風" 吹親 "後尾枕" (耳背及後頸) 而冷病, 好彩......我有「小法寶」, 就係用 "長披肩" 當作頸巾 及 頭巾, 將它包住 "後尾枕", 感覺就會暖和一點, 頭髮又不礙阻視線溫習。

你睇.........我似唔似「塔利班」的黨羽呀? 又或者有宗教背景的 「印尼妹」?
原來戴上頭巾的我都幾嬌俏架, 等我第日去 印尼 或者 中東 地方旅行時作o甘的裝束先, 可能會被我識返個「異地靚仔」呀!! 哈哈.............

少年十五十六時

人人都經歷過「少年十五十六」的時候, 那時的青蔥歲月, 無憂無慮, 幾名志同道合的小伙子對將來滿有憧憬, 亦預備好接受各式各樣的挑戰。就似 "大無畏" 的 "清兵" 般, 只管向前衝!!

那時候甚至會輕佻浮燥, 給人一副做事 "唔認真" 的感覺, 大家又愛互相嘲弄, 你串我、我玩你、人人把口 "浪" 過油, 什麼「唔........ 我好鬼掛住你的」、「o爺.......你好衰架, 我唔制!!」等等隨時說出口而毫不尷尬 (即使係普通男女朋友都係o甘, 玩咋嘛)!

長大過後, 人變得成熟了! 知道有些事情、有些說話是需要負責任的, 因此不敢妄動的作出來、說出口。

究竟是人想得多了 (城府深了, 思想複雜左)? 還是我地而家知醜、不再是少年十五十六時呢 (年青不再)?

還看今天的 "後生仔女", 不難發現當中有一點點自己年青時的影子, 尤其是那天真無憂的笑容, 彷彿看到昨天的自己。

感性的我

藝員陳鴻烈的離世 (享年 66 歲), 令我覺得原來年過 30 歲, 也許已經是走了 "人生" 的一半路程, 不禁想起了許多, 更覺感性。

回望前半生, 有什麼覺得遺憾? 有什麼事如果可以重來, 一定不會作那個選擇? 有什麼事是想作而不敢做? (無勇氣) 不想令自己往後遺憾嗎? 便要好好計劃一下現在, 有些事不用想得太周詳, 想幹便幹吧 (比 D 勇氣啦)! 最重要係開心 同埋 唔傷害人。

突然想起了一首 "好冷門" 的 "舊歌", 當時欣賞它是因為覺得某些詞好有意思 (尤其係紅色的詞), 今日重溫它感覺更強烈, 也許因為 "人有了經歷", 所以更深刻感受到詞的內容, 送比你地, 希望你不要帶著遺憾而走：

在我心中有你 - 馬怡靜
作曲：馬怡靜｜填詞：林振強

曾跟你將雨絲輕輕放在舌上
和你望向紅葉披起風和夜滑翔
曾跟你聽潮和浪拍在沙上二重唱
曾因你在　因此找到方向

＊生　原是沒有劇本的某部戲　
愛　從沒有戲軌　它不能預備　
你　是個難忘掉意外　
長令故事精采 無論你最終也別離　

戀　原來沒結局 都可繼續美　
愛　仍是愛得真　即使難順利　
人　原來未離別過我　
仍在我夢裡親我
無論我在那天那地　在我心中有你＊

仍喜愛將雨絲輕輕放在舌上
仍愛望向紅葉披起風和夜滑翔
仍喜愛聽潮和浪拍在沙上二重唱
仍感你在　因此不致沒方向

REPEAT＊
在我心中有你　在我心中有你

回憶 ─── 粉紅色的甜夢

天橋上迎面走來一對男女, 女的非常令人注目, 因為佢手上.........持有「巨型粉紅色棉花糖」, 那是我兒時的至愛。

思緒瞬間返回從前, 原來小時候體質虛弱的我, 因為氣管唔好, 痰多又氣喘, 呼吸不順, 在媽媽的照顧之下, 要我嚴厲的戒絕 「各式各樣的糖果」, 那是小孩子的至愛啊!! 我只有怪可憐卻又無奈的接受。而軟綿綿的棉花糖卻帶比我另一種回憶：

記得兒時走過某天橋, 總會有個伯伯在 "即整即賣" 棉花糖的, 每次媽媽帶我地幾兄妹走過也會 "幫襯" , 而每次也是買兩枝棉花糖.........因為我咳, 無我份!! 當時我好唔開心, 都唔明白已經戒絕晒糖果, 而且經常要打針食藥, 唯病情亦未見好轉, 都唔知要戒糖果到幾時? 唉........

兄姊知道我的苦況, 於是我地實行了「作反大計劃」, 首先媽媽買了兩枝棉花糖, 一枝由哥哥手持, 而另一枝由 KK 揸住, 然後哥哥行上前和媽媽傾計 (旨在分散她的注意力), 而 KK 則只需揸住棉花糖繼續往前慢行, 再由 "動作敏捷" 的我伸手去撕 KK 的棉花糖偷食, 嘩...........一食落口, 棉花糖即刻溶o係口, oh my god..........那感覺好正啊! 好似一口食左一啖輕飄飄而甜蜜蜜的雲彩。

其實在 E 個「作反大計劃」當中, 最令我滿足的不只 「棉花糖」(物質) 的本身, 還有：

1) 年紀輕輕卻有周全的計劃 (當時我讀幼稚園 或 小一、二咋)
2) 幾兄妹之間的默契 (有晒部署的分工合作)
3) 偷食得來的刺激, 令我份外覺得棉花糖香甜 (隔離飯香就係o甘解囉!!! 因為自己無, 才倍覺珍貴)
4) 瞞騙到媽媽的滿足感 (我想媽媽其實是 "知道" 的, 不過由得我地幾個小鬼曳曳吧!)
5) 品蕾終於嘗試到 "苦盡甘來" 的滋味 (食o甘多藥, 食少少糖都得o瓜, 太任性了!!)

即使偷食過後, 因為咳而要多服幾次藥, 也是值得的 (自己都心甘命抵)。

粉紅色的甜美回憶, 總是美麗的, 也滿載著我們成長的腳印, 即使今天大家已經長大, 甚至為人父母, 每當想起這一幕, 也不禁為當天的頑皮而失笑!

江川手打烏冬專門店

下午時份在旺角肚仔餓, 點算好呢?

去左「江川手打烏冬專門店」食野, 店內以籃白色作裝修主調, 好有海洋的感覺。點左一客下午茶 A 餐 (唔連飲品)：义燒湯烏冬 (蕃茄湯底)

湯烏冬一端上桌, 嘩!! 香味撲鼻, 蕃茄湯底幾醒胃喎! 义燒肥瘦適中, 容易o趙, 烏冬麵的口感同坊間買的差不多, 只係略帶煙韌!

店中 "標榜" 手打烏冬, E 個烏冬盛惠 $29 (不用加一), 都幾貴啊!

今年的見証

過往寫網誌, 總是隨心所想的而寫, 每每睇見親朋好友留言, 感覺暖在心頭, 又可在此平台和佢地交流, 深感歡暢。

可惜人越大越多事忙, 佢地的留言已不覆見。而我也改變了作風。

講緊的係以前 "一想到念頭" 就寫文章的心態轉了 (每每一日幾篇, 又或者頓然幾天一篇), 變成了而家的 "一日一篇", 所以.......有時即使 "癮起" (大把念頭), 也會先寫好文章, 留待日後再上載, 感覺尤如散文作家般懷有 「存貨」 (感覺有點飄飄然)

話o甘快又踏入 12 月, 仲有唔夠一個月, 2009 年便會結束, 就此可見 2009 年只有 365 天, 而網誌亦是 365 篇。

多謝睇緊此文的「你」一路以來的默默支持!

「O 仔媽媽」生日快樂

今日係 「O 仔媽媽」生日的大日子, 記得三年前, 我還送上短訊：「今年不送你生日禮物了, 想必你已經收到 "一生之中最滿足" 的禮物 ─── O 仔, 祝你生日快樂」

O 仔媽媽, 到刻下為止 "O 仔" 仍是 "最拉你心肝" 的禮物嗎? 縱使佢有頑皮, 令你激心的時候, 但係當你想到自己懷胎十月, 辛苦工作受氣才養大佢的時候, 你的氣便立即消了, 對嗎?

其實 "天下父母心" 從來都是如此, 不論我地曾經如何任性的做錯事、耍脾氣, 只有在父母面前, 仍是那長不大的 "乖孩子", 總會被原諒和接納的。

多謝你為 「家」的付出, 也感激你包容 O 仔 和 O 仔爸一切的心胸。

生活催促你我長大, 縱使我地相識於微時, 刻下仍有想撒嬌的念頭, 但現實告訴我地已經榮升了 「長輩」, 要在「後輩」跟前以身作則的教育啊 (身教)! 迫使我地不得不 "作乖乖模範", 多可笑!

願你今年活得比去年更好、更順境, 也祝福你身體健康, O 仔常伴你左右孝順著你。 生日快樂!

「螺」命之苦

還記得我的 「宿霧 "受傷" 之旅」嗎? (第一及第三天：傷手指、第二天：撞瘀腳、第四天：灼傷背)

唔經唔覺已經一個月了, 傷手 (受傷的手) 早已甩掉了焦, 只剩下疤痕 (要搽去疤膏或待時日沖淡傷痕)、腳的瘀傷早已散掉, 已經唔痛了, 只係.........背脊的灼傷有一點點 「濕滯」。

背脊的傷口太深 (KK 睇過說 "灼傷了皮膚的真皮層"), 所以即使已經 "結左焦", 傷口也久久未癒, 而且似乎有點發炎的跡象。最後 (已過一個月) 要勞煩針炙師用 "三角針" 幫傷口放血、 拔火罐 (把內裏的熱毒" 吸出來 (醫師說因為傷口內藏 "熱毒", 所以發炎, 久久未能好)。而且還做左四次添 (一星期內分四日做), 痛死我啦! (在已結焦的傷口上, 不斷用粗針去 「插、插、插...」爛它, 等它流血, 再用拔罐吸住它, 受了傷的皮膚被扯至想死........, 為著快 D 好返, 無辦法啦!)

KK 同 媽媽幫我搽消炎膏時也說：「你的個口好深, 雖然已經結左焦, 但個奄 (焦) 既厚又硬, 就好似 「花螺」果塊奄一樣的質感, 好恐怖! 點解整得o甘傷架?」

想知道「花螺」果塊奄係點樣的嗎? 就如下圖囉..........認真「螺」(攞) 我命! (下圖已經受傷一個月兼放左一次血架啦, 否則傷口更嚴重)。
雖然今次認真 "唔好彩", 不過想深一層, 好彩在受傷之前拍下幾張 "靚靚泳衣影後照" 咋! 否則.....最後一天灼傷了, 萬一有疤痕, 日後拍 "泳衣影後" 便唔靚囉! 算係「不幸中之大幸」啊!

Big Mac 之 私房「大煲粥」

爹地媽咪跟朋友仔去左兩日一夜的旅行, 哈哈......屋企我話晒事, 仲唔可以「作反」嗎? (記得細個碰上雷同情況時, 一定會開心到 "爆燈", 因為佢地一定放下 "飯錢" 比我地 "食自己", 於是平日 "無機會" 食的野就可以擦餐勁, 如: Pizza (薄餅))

原本今次我的 "鬼馬作反美食計" 係.......食 廉價牛扒 + 廉價紅酒的 (自己入廚, 不是在外吃), 不過........礙於背脊的傷口 (怕食牛會發炎)、 同埋將近考試的關係 (需要 "的起心肝" 苦讀, 不便花太多時間備餐 及 不便飲酒), 最終都係打消了 E 個 "作反" 大計。

取而代之的就係容易整並方便的美食啦! 當然我唔會煮 "即食麵" o甘待簿自己的, 預備了以下材料：
1) 水 (四大湯碗)
2) 白米 (二個小量杯)
3) 粟米羹 (一盒)
4) 淮山、薏米、茨實粉 (一湯羹)
5) 食鹽 (少許)

打開煲蓋煲滾以上材料後, 轉中細火再煲多 5 分鐘, 落鹽及攪勻, 然後關上煲蓋 (密封) "焗" 45 分鐘, 得左!! 立即食又得, 等一陣先食亦得!! 哈哈........味道仲..............好好味添! 清清地又健康呢!
以上的「大煲粥」 (粟米粥) 就係我 28 號的晚餐 及 29 號的 早、午餐了, 成本係..........零, 因為取材於家中的存貨, 呵呵!

「放血」降火?

早前天氣嚴寒, 終於 "作感冒" 流鼻水了!

針炙師把脈後說：「你 E 度 (手指背脊肺部) 確實受了一點風寒, 所以 "作感冒", 而 E 度 (手指腰部) 卻帶一點熱。哎呀!! E 排 D 粒粒 (面上的暗瘡) 犀利左好多啊!」之後如常的施針, 並吩咐一陣額外多加一項醫療過程。(當時我唔清楚要加什麼程序, 因為醫師講的國語, 我唔係 "百分百" 聽得懂)

完成如常程序後, 我被安排坐在一張櫈上, 束起頭髮, 護士消毒我的 雙耳 及 頸椎 (近背部的位置), 當時我唔明白究竟要做什麼, 我以為只是在頸椎附近 "拔火罐" (拔走體內的寒氣, 感染到的風寒), 點知...............

醫師拿針快速的在我 "耳頂" 及 "內耳匡" 刺左 "10 幾o下" (每隻耳), 然後又在 頸椎 位 刺下 "10 幾o下", 立即 feel 到有血在雙耳及頸椎流出來 (尤其係對耳呀, 血液流到耳珠時, 勁似「血紅寶石耳環」啊!), 護士再將 "拔罐" 放在頸椎處。

待一會後 (大概 10 分鐘), 護士幫我用紙巾將雙耳的血 擠壓 及 清理, 然後除去拔罐, 護士說：「放血療法係可以清除體內的火 (熱氣), 而拔罐則可以去除濕氣寒氣。」

相關資料：http://www.healthcare2u.com/cm_point1.html
熱 證 用 瀉 熱 法 ， 對 於 熱 病 邪 熱 亢 盛 ， 火 氣 有 餘 者 ， 宜 用 速 刺 瀉 法 ， 不 留 針 或 點 刺 放 血 等 法 ， 以 泄 熱 火 。

對久治不愈的疑難雜症，善用剌血療法，“剌血”又稱“放血”，對頑固性疾病往往垂手可愈之功，據稱：久病必瘀，怪病必瘀，重病必瘀，痛病必瘀，難病必 瘀，凡疾病數次針炙未見病情改善時，必有瘀血阻閉氣機，當在相關區域或穴位剌絡放血，使惡血邪氣盡出，久年沉痀常立見奇效。正所謂去一分瘀血，多一分生 機。

完事以後雙耳還是紅紅腫腫的, 部份傷口還會流少少血, 紅腫久久不散! 原來「放血療法」都幾恐怖 (令人幾驚, 可能因為我事前未知道程序, 無心理預備吧!) 同埋它用的 "針" 和之前的又不一樣喎, 係短 D 粗 D 的 「放血針」, 所以感覺 "痛 D 囉"!

別了「閆器」

睇左電視劇「畢打自己人」已有一段日子了, 當中「閆器」身為富人卻生性孤寒又貪小便宜, 令人忍笑不禁。而且演員陳鴻烈 那 "唔純正" 的 廣東話發音令人印象難忘, 真的有點似 "香港富豪李 x 誠" (大果位) 的影子。

估不到某天回家後, 媽媽說：「飾演 "閆器" 一角的 演員陳鴻烈心臟病逝世了!」

記得一年多前我曾經在沙田的某博物館見過 陳鴻烈 真人, 以佢的年紀來講, 真的 "很型"!!

因為佢的外形 "挺直" (完全沒有半點 "寒背" 及 "縮水"), 而且氣宇軒昂, 有著 "上等人" (少爺仔) 的傲氣, 那份自負 及 自信的氣質, 不是坊間的年青男演員可媲美的。 就如女演員 "梁舜燕" 及 "林小湛" 一樣擁有高雅的氣質, 即使年紀大了, 那份風韻依然存在。

反而 陳鴻烈 年青時 (飾演大反派上位時) 的照片, 那時候真的 "唔靚仔" (兼一面邪氣的奸樣), 難怪現實之中被同期的演員 "岳華" (樣貌戇直、飾演忠派的) 奪得 "鄭佩佩" 的芳心。

http://www.takungpao.com.hk/news/09/09/26/UHK-1147892.htm

岳華與陳鴻烈原來曾經是情敵？陳鴻烈滿有自信地說：「如果要追女仔，我相信不會輸給誰吧？我跟岳華當年也不是想像中那麼老友，反而跟王羽最談得來。」

曾是情敵
由於當年他們合演《大醉俠》時都是新人，而女主角鄭佩佩也是新人，彼此是俊男美女，自然互相傾慕。岳華本性正直，陳鴻烈比較靈動，鄭佩佩夾在他們中間，那是很有劇情的，後來還加上個王羽，成為三王一后，鄭佩佩成了天之驕女。岳華現在是不大願意提起當年事，而鄭佩佩也曾對岳華有過歉疚，但一切成過去了。

除了 「閆器」一角以外, 佢演 "金枝慾孽" 中 "林保怡" 的阿爹 "孫清華" 也令人難忘, 尤其是演父子情的對手戲, 真的令觀眾睇得異常投入, 咬牙切齒的戥佢肉緊, 替佢心痛。

佢的走確實可惜, 真的懷念那位有型的男演員啊!

我為貓狂

早前睇左舞台劇《我為貓狂》, 故事揉合楝篤笑的表演形式和爆笑劇本，道出一幕幕幽默抵死的人貓大戰，令觀眾回味著照顧貓貓 (寵物) 時的點滴辛酸, 有爆笑位亦有感動位。

內容大致：兩個女子湊一隻貓，一個立亂表演場地帶位員鍾淑慧，一個有潔癖的驗屍官孔寶如﹝人稱恐怖姨姨﹞，一個錫到貓貓燶，一個鬧到貓貓懵；兩個分別揸電筒和揸刀搵食的女子，惡鬥一隻在地盤紙皮箱拾回來的疑似名種貓，在鬧市的唐樓中，上演連場人貓故事！

最深刻的地方：
1) 幫寵物改名 - 唔係淨係你為佢起名便可, 仲要睇佢 "應" 唔 "應" 你 (接唔接受)。

2) 可愛的 BB - 任何的 BB 都會露出可愛相, 包括貓貓狗狗, BB 期過後, 你還愛佢嗎?

3) 霎時衝動 - 唔少人因為唔同的原因 (需要) 而養寵物, 請先自問「你有足夠的時間、愛心 同 耐性嗎?」 千祈唔好因為滿足自己一時的私慾, 就誤左寵物的命途啊!

4) 最佳良伴 - 唔少主人在日久生情低下, 也會當了寵物為 「良朋知己 及 家人」, 總愛與佢分享心底話, 所以佢地就係主人的 "忠實 而 守密" 的聽眾。

5) 黯然、解脫 - 寵物也有衰老 (生病) 及 離世的一天, 動物界中, 部份會選擇 "離家出走", 在外等待生命的結束 (為的可能是 "不令主人傷心"), 睇到這一幕, 我的心 "乸住乸住" o甘, 誰知.........舞台上的螢幕卻播出短片, 內容係從貓貓的角度去安慰女主人。

貓貓：「媽媽, 你不要難過, 其實我只係外星派來的使者, 為著收集地球人的情報, 每當你見我雙手經常按來按去, 其實我在發密碼, 報告收集到的情報。命運巧合的令我遇上你, 多謝你一路以來的照顧, 你不用擔心將來, 因為你將會碰上好人, 活得比而家更幸福, 你也不用掛念住我 或 感到難過, 你要努力的活在當下, 因為我地的終點也是一樣, 只係換個地方再相見。 佛地魔!!! (劇中的女主人覺得講: 「我愛你」太肉麻, 所以就以 「佛地魔」去比喻那存在又不能宣之於口的感覺。)」

如果你有飼養過寵物, 無論那是否貓貓, 你一樣會感受到 E 套劇帶出的訊息。**註：我覺得海報上的 「黃詠詩」激似 「薛海琪」呀!

朋友欣賞劇後：「我睇到貓貓病入膏肓離家出走時, 我個心唔係幾舒服啊! 如果我養左一頭寵物 "十幾年", 要面對 E 一日時真係好難過, 我又會問自己 "何必要養呢"?」

我：「o甘又唔係o甘講喎! 依你o甘講法, 父母早知佢地會比我們先離世 (照常理), 照顧不了我地一世, 佢地又何必要生我地呢? (那豈不是全人類絕後?) 就如劇中所講：我地該是 "活在當下", 管其他的那麼多幹麼? (至少叫做 "相處過"、"快樂過", 無憾己!)」

吉慶果

早前去朋友新居拜訪, 唔好意思 "兩手 fing fing" 前去, 於是問朋友新居需要什麼?

朋友說：「我想要一棵可放在桌上的小植物, 有 "果實" 兼易種的 (意頭關係), 放在廳中的櫃頂作裝飾」

於是我地大家就 "合股" 買貨啦, 當日由朋友 I 及我負責到花墟買植物, 以我貧乏的種植知識, 知道一般有果實的植物都 "唔細棵" 架喎, 點算呢? 會有 D 咩野選擇呢?

終於我地選擇了 "吉慶果", 貪其橙橙綠綠色的 "夠喜慶", 而且似是易打理 同埋 外型價錢皆合理。 我地仲額外加錢 "轉左個靚花盆" 添! 總計：吉慶果 $68 、花盆 $25、開花花肥 $10 (折實共收 $100)

店主說：「大約 4-7 日左右澆一次水 (視乎花泥的濕度), 要淋至盆底有水滲出為止才叫做 "澆夠水", 間唔中比它曬o下太陽。 當 "果實" 全部掉下時 (結果期完結) 才開始施 "開花肥", 一星期一次, 每次澆一圈, 直至再結果為止。」

網友的 "吉慶果" 進化過程
http://blog.qooza.hk/AmyMo525?eid=9353035&mute

港島尋食記

星期六下午一點大夥兒在筲箕灣地鐵站集合, 由朋友帶路去 "東大街" 覓食 (大部份都係飲食雜誌或 節目介紹過的 "名店"), 再去參觀朋友的新居 (杏花村), 稍作休息及逗留, 就坐地鐵去西灣河, 再買 "出名" 的 "雞蛋仔" 上去另一位 "坐月" 的朋友家中探訪 及 玩 BB。

短短四個小時內, 個口幾乎 "未停過" 食野, 結果回程歸家時 "肚太漲", 要致電叫媽媽 "不用煮我飯" (只食少許餸便夠了)。 等我帶大家睇o下我地食過 D 咩野啦! 不過因為當日的店都 "幾多人" (坐得少少迫, 所以好多都無影相呀)

第一站：http://www.openrice.com/restaurant/sr2.htm?shopid=15987
安利魚蛋粉 - 魚蛋魚片河 及 牛腩河 (自製雙併) 各 $18
此店 "好巴閉", 要攞籌等位架! 牆上仲有 "好多名人藝人" 的簽名添! 同一條街有其他店舖用 "安利" 作招徠 (企圖混水摸魚, 如：安利大排檔)。

魚蛋魚片夠爽口, 河粉幾滑, 服務生態度良好。


第二站：http://www.openrice.com/restaurant/sr2.htm?shopid=31025
Wow! Budger - 芝士焗薯皮 及 薯仔脆炸蝦 各 $18
此店面積細細, 大約只有 15 個坐位, 店員算多但 "煮食架撐" 似乎較少, 好似有幾位客人 order 同一款食品 (需要焗爐的), 結果也要分幾次 "出貨", 所以要預左 "等食物製作", 如果趕時間的話, 此店絕不是你的選擇。

芝士焗薯皮味道唔錯, 溫度夠熱之餘, 芝士又夠多, 薯仔脆炸蝦則麻麻地, 只得三件咋!


第三站：http://www.openrice.com/restaurant/sr2.htm?shopid=11325
呂仔記 - 魚肉燒賣 x 2 客 及 辣魚蛋 1 客, 各 $12
此店地方算光猛寬敞, 不過服務生的態度就..........."超級忟" (尤其係人多果陣, 簡直想 "發 d 客" 的脾氣)。 本來仲想食 "糖水" 的, 如：白果腐竹 及 馳名喳喳, 後來因為太飽而告吹, 又不想受氣呢!

傳聞此處最出名的係 "魚肉燒賣" 係用上鱔整的, 同坊間的 "粉團燒賣" 果真不一樣, 無腥味不過有口感。另外魚蛋只係不過不失, 醬汁 OK, 但未算一試難忘的特別。


第四站：http://www.openrice.com/restaurant/sr2.htm?shopid=17984
太安樓雞蛋仔 - 雞蛋仔 $9 及鄰舖的 珍珠奶茶 $9
原來之前阿蘇極力介紹的 "有料雞蛋仔" 係位於西灣河太安樓的, 在排隊途中, 禁不了引誘去鄰舖買珍珠奶茶

阿蘇話它的出色之處係 "每粒雞蛋仔都有餡料" (唔係只得個蛋殼), 又話外脆內軟等等, 不過......我地一致公認它唔特別好食, 只係 "名大於實" (但真係超多人排隊喎), 北角琴行街那檔雞蛋仔仲出色啦! 珍珠奶茶只有奶味, 茶味唔夠香, "side" 料。


第五站：坐月朋友家中 - 愛心豬腳薑
探訪朋友及玩 BB 之餘, 又點可以錯過 "愛心豬腳薑" 呀? 尤其在凍冰冰的天氣下食一碗熱騰騰的豬腳薑補一補 (既驅風又補充膠質), 個人即刻暖返晒!

朋友的豬腳薑煲得好好, 薑唔太辣又夠 "林" (無渣), 豬腳肥瘦適中, 唯舊雞蛋 (索晒薑醋精華果 D "鐵蛋") 該被人食得 "七七八八", 大家碗中的似係 "新蛋" (略遜色), 呷埋啖醋才知 "甜酸" 適中, 正!!! 不過真係...........「超級漏」, 晚飯都慳返呀!

朋友的 B 女係一個 "超多頭髮" 的 B, 佢"雙眼" 及 "人中" 似足爸爸 (雙眼皮超靚啊!), 其他地方就似媽媽, 由於尚未 "滿月" 的關係, 所以依然 "超級愛睡", 只係 "間唔中" 睜開眼睛四圍望, 又向我地笑o下, 好 cute! 我地個個 "輪住" 抱 B 影相 (幾有慈母 feel, 一臉幸福), 可憐小 B 卻淪為我地的 "道具", 任由擺佈。 在此祝佢快高長大, 幸福愉快啦!

爸爸的壽宴

星期日係爸爸的正日生日, 因為 "星期一至五" 有優惠的關係 (亦都因為人流較少, 期望服務會好一點), 所以提早在星期五設壽宴, 今次選擇了 "海港燒鵝海鮮酒家" 的 「龍蝦魚翅全包宴」 $1,498 (星期一至五的價錢) 內容包括：

1) 鴻運乳豬拼盆
2) 芝士焗龍蝦 兩斤半 (伊麵底) [由於爸爸唔食 "芝士", 改為 "上湯"]
3) 蘭花珊瑚雪花蚌
4) 威尼斯海鮮卷
5) 竹笙海皇燴魚翅
6) 清蒸生猛大海斑 (一條)
7) 金菇瑤枉扒豆苗 (後來因 "豆苗" 售罄, 改為 "薑汁炒芥蘭")
8) 海港醬燒雞 (一隻)
9) 腊味糯米包
10) 養顏紅棗糕 (另加 $50 轉做 "壽包" 12 隻, 不過因為 "豆苗改芥蘭", 酒樓只需我地補回 $25)
11) 合時生果
12) 敬送嘉士伯啤酒 2 支 及 橙汁 2 渣

以上套餐供 12 位用, 免茶芥加一 (三席以上不適用)

席間的菜式美味兼大碟, 大海斑更是嫩滑好味, 唯坐位較為迫夾, 食至薑汁炒芥蘭時, 大家已經超級 "捧腹", 因為還要 "留肚" 食 "壽飽" 及 "生果", 於是 "燒雞" 及 "糯米包" 就只好 "打包攜走" 了。

估唔到因為寒流襲港, 這間標榜 "打邊爐" 的酒樓坐無虛席, 幸好一早預訂了位置, 否則只有 "摸門釘" 的份。

已經返學的小姪越來越 "鬼靈精", 經常整古做怪的氹得爺爺嫲嫲笑逐顏開 (基本上佢兩老 "睇住個孫, 唔駛食都夠飽"), 小子真係大家的 "開心果", 節錄佢早前的一則笑話比大家知先：

(早前在小姪家中)
KK：亨仔, 星期五同爺爺食生日飯, 當中有一款包好得意架, 個樣成個 "屎忽" o甘架, 請你食好唔好呀?
亨仔 (狀似幻想 及 思考, 然後面露難色)：唔.......屎忽?? 好核突呀!! 唔食...
KK：唔係喎, 雖然個樣似 "屎忽", 不過好好食架喎! 你唔食呀? o甘我地食架啦!
亨仔：咦.......好臭架!

大家：(哈哈大笑, 都無人教佢o甘答, 估唔到小子面對 "被整蠱" 的反應係o甘架喎, 叻仔!!)

亨仔 (設計對白)：阿爺生日, 我手執手槍表演贈慶, 淨係睇我 "眉宇之間" 的果份英氣 (都唔知點解 佢人仔細細, 條眉成個 "元氣仔" o甘粗), 係唔係好似我爹爹, 亦都好似我阿爺 "後生果陣" 呢? 不過........我靚仔 D!!! 爺爺祝你長壽健康, 生日快樂!

別太認真

最近學懂了一個道理, 就係「凡事不用太認真, 別太在意別人的講法」。

人和人之間, 好多時也喜歡被關愛、被愛錫的感受, 有時候別人對你好一些, 你又氹人多一點, 日子會過得更輕鬆。 不用想太多 (背後的動機), 只需隨遇而安便得了。

遇上別人對你的批評, 耐心聆聽後先反省, 如果覺得自己做對的, 便不用對批評太介懷, 也許彼此的觀點與角度不同。難道別人說你係 「傻子」, 你便真的是「傻子」嗎? 如果自己也認同別人的批評, 那麼便收下金石良言, 好好改進了。

有時候, 我地也許因為空虛、因為妒忌、因為頑皮、因為寂寞, 總會作出一點點淘氣的舉動 或 言語, 如果事事那麼認真對待, 身邊的人會喘不過氣之餘, 自己也要時時警惕自己, 因而好大壓力, 氣氛相對拘謹, 對自己、對事件、對旁人也無一利。

想一想在廣闊的宇宙之中, 你我只屬當中的一點點微塵, 當中的恩、怨、情、愁、愛、恨、榮、辱也只是一件件 "會過去" 的事情, 它總不及你的壽命般長, 所以....由得它過去, 何必太認真的去拘泥於 「面子」 和 「得失」呢? 你刻下著緊追求著的東西, 他日你長眠於黃土之下, 又會剩下什麼?

「今朝有酒今朝醉」即管盡情去享受此刻 「被寵愛、被關顧」的幸福, 不要讓它白白流走啊!

蛇皮果

某次針炙師請我食一款生果, 它並不常見, 外貌還帶點醜, 外殼的紋理尤如蛇皮一樣, 名叫「蛇皮果」, 醫稱說它係印尼的生果, 有清熱作用, 好啱我食喎!

路過花園街的小檔, 又碰上它, 檔販說它係 "化痰止咳" 的, 買左一磅比咳嗽中的爸爸試o下! 價錢 $20 / 磅, $35 / 2 磅。(1 磅只得 6 個咋! 結果抗拒新事物的爸爸並不領情)

雙手用力的把外殼 "壓一壓" (可轉方向再壓, 情況有點似開 "山竹" 一樣), 然後用手撕去外殼 (好易撕, 因為外殼 "好脆"), 就會發現果肉有點似 "蒜頭", 又有點似 "山竹", 它有 3-4 瓣, 果肉內有大核。

果肉的氣味清香, 點形容好呢????

有點似 "大樹菠蘿", 又有點似 "榴槤", 果肉爽口的又帶香甜, 容易入口, 比起山竹肉來講, 山竹的果肉就 "太林", 而且有時會帶酸, 味道還不及 "蛇皮果" 般清香。

網上記載蛇皮果的資料並不多, 只知道它的產地有兩個, 產自印尼的蛇皮果外型較圓 (圖中的該係印尼出品), 味道香甜, 另外泰國出產的蛇皮果外型較長, 顏色較淺, 略帶酸, 部份網友甚至說 "難食"。

如果食它又清熱又化痰此咳, o甘又唔錯喎! 不過價錢就貴少少啦。 我在幻想有天帶住它去行山, 請朋友食! (不過唔係o甘易買得到架, 因為唔係檔檔有得賣)

另類享受

屋主邀請別人到訪家中時會說：「歡迎來到 "寒舍"」, 所講的 "寒舍", 泛指裝修簡陋, 略帶 "寒酸" 的意思。

而我的家就是 "正宗的寒舍" 了, 因為家中的窗門向西北, 每當太陽下山西斜時會曬死, 吹起北風時又會凍死, 寒冷的日子逗留在家中, 比起外出到街上更覺寒冷。

加上 "原裝" 的家居設計 (用上世紀小學時的 "鐵窗", 即係個扶手有一個個洞果款), 並無安裝鋁窗, 北風刮起時, 窗隙滲風, 逗留在窗邊時, 人寒心更寒!!! 此時沖涼就更覺 "受罪", 因為赤裸裸之際, 並無暖氣裝置, 頭上的氣窗雖然關上, 即使大開熱水淋在身上, 但窗隙間的寒風, 也容易令人冷病。

最近 "冷鋒" 襲港, 天氣寒冷, 氣溫低至 10 度以下, 我發現了一樣窩心的 "另類享受", 就係選擇做 第二 或 第三位 沖涼, 因而別人沖涼後, 熱蒸氣還停留於浴室內, 尤如開了少少暖氣一樣, 此時寬衣, 才不致太凍太難受。

古時有人先用體溫瞓暖被窩, 再讓至愛享用, 今日卻有 Big Mac 打頭陣的抵冷沖涼, 再讓媽媽享用溫暖浴室, 哈哈!!!

也許長大後回顧今日, 才發現「正宗的寒舍」係我地的集體回憶啊!

丼 (音:DON / 當) 咖哩專門店

星期日在金鐘返學, 因為課程趕緊, 午飯時間只得 40 分鐘左右 (仲要計埋等 lift、等位、等食物上菜 及 飯後等廁所的時間), 其實 "食野" 的時間無幾多可言。

離開課室後, 我立即走向樓下的 "大 X 樂" 及 "大 X 活" 睇野食啦, 點知........ 店內唔似 "有位坐", 收銀處亦大排長龍, 我知道附近有 "X氣" 壽司店, 不過.....在o甘凍的情況之下, 生冷野唔係我的 "飛佛" (唔係我杯茶), 最後見到 丼 (音:DON / 當) 咖哩專門店有位坐, 於是就揀左 E 間店了。

店內面積雖少, 但十分整潔, 坐位亦唔算迫, 餐牌設計圖片精美, 食物價錢亦唔算貴 (同 "味千" 差不多), 因為天氣太凍的關係, 所以想食飯暖肚, 其實好多 "吉列" 系列的咖哩飯好特色好吸引, 奈何前一晚才 BBQ (怕熱氣), 只好忍手揀左 "蟹皇奄列咖哩飯"。

記得美食節目講過一碟 "好的奄列飯" 係一 D 都唔容易整的, 蛋皮要 100% 包住白飯之餘 (令飯粒完全不外露), 又唔可以整穿個蛋皮, 真係好考廚師的功力架! 圖中的 "奄列飯" 合乎上述標準, 配上咖哩汁 (略嫌不夠香濃) 及 蟹柳 (唔係街市買開果款, 係 "扮" "阿拉斯加蟹腳" 果款蟹柳), 蟹柳味道清清地, 完全被咖哩汁遮蓋, 幸好的是有幾粒 "醒胃" 紅薑, 令味蕾清醒。

奈何本小姐太肚餓了! 只花 10 分鐘左右就將它徹底的 KO (技術性擊倒), 代價係 $45 (免加一)

「偉記」BBQ

週六晚相約同學到元朗「偉記」BBQ 場燒野食 http://www.openrice.com/restaurant/sr2.htm?shopid=17517, 我地在元朗西鐵站坐的士去, 車費大約 $18 (原來只要取回收據, 「偉記」係會比返 $10 / 車費單 你架!) 同學話佢上 open rice (美食搜尋網) 見 「偉記」的人氣幾高, 口碑又好, 所以揀左 E 度。

假日成人入場費 $90, 包一支水 及 一支飲品, 食物任選任燒 (我地一行 8 人只包 "3 包碳", 其中一包o係 "開爐時" 用左, 如果真係 "唔夠碳用", 就只有自費購買 或 趁別人 "燒完野食離場" 後去取)。

烤場大小適中, 坐位又唔算迫, 食物質素良好, 除左一般的 "丸類" 之外, 還有雞中 及 雞全翼、牛扒、豬扒、金沙骨、司華力腸、多春魚、粟米、蕃薯 及 麵包等等。 場內設有 "大螢幕" 及 "大大聲擴音器" (通常播放體育節目) 供食客欣賞, 場中「最最最」特別的係........定時定刻會 "響鑼" (真係舞獅果 D "打鑼" 喎!) 提供 "特別食品" 比食客, 此時大家就一窩蜂的排隊去取, 十分熱鬧, 當晚的 "特別食品" 包括：熱芋頭西米露糖水、雞骨草涼茶、柿子等等。(都幾 "窩心" 呀, 清熱又滋潤)

大家由晚上 7:30 燒到大約 11:30 盡慶而歸, 不過食得太多肉類之餘, 亦非常熱氣, 本週要食得 "清淡" 一點平衡返先。

當晚我的至愛食物係：雞中翼、司華力腸、多春魚 及 粟米

因為我地各人燒野食時也有其 "代表作" (燒得最叻最好食), 所以大家都多左好多 "銜頭", 包括：麵包公主、粟米皇子等, 而我就係傳聞中 "鼎鼎大名"的......雞中翼公主了!! 「"燒....雞翼~~我....鍾..意...食~~"」

"冧死人" 的「情歌皇子」

週末取了上次在宿霧買的小玩意送比姪仔。

睇見佢 "懶" 醒目的手執住它去 "擺甫士" 影相, 不禁失笑!! (或多或少總有一點點他父親年青時的 "冧女" 樣子, 而佢...............難道就是 "青出於藍" 的 「情歌皇子」?)

我期待睇 "長大後" 佢的樣子 同埋 聽佢自彈自唱 "冧死人" 的情歌啊!

新蒲崗的「得龍」

朋友 I 選了新蒲崗的「得龍大飯店」作壽宴場地, 早知道此店的燒鵝出名, 上 open rice (美食搜尋網) 一睇, 才發現更多 "驚人的懷舊菜式"。

我地點了：
1) 豉油皇煎中蝦 ($128)
- 好惹味, D 蝦又大隻又新鮮, 不過食晒一隻之後就覺得 "咸" 左 DD

2) 蝦籽扒柚皮 ($78)
- 一上桌, 蝦籽勁香, 不過我一向 "唔好" 柚皮, 不懂欣賞

3) 失傳古法太爺雞 (半隻) ($108) 「得獎名菜」
- 外型睇落似 "脆皮雞", 實情卻是 "煙燻雞", 雞皮好香 "煙燻" 味, 好特別!

4) 雞蛋焗魚腸 ($70)
- 趁熱食, 好好食, 砵內的用料頗足, 除了魚腸魚肝之外, 還有义燒粒, 粉絲等配料, 用來送飯超正!!

5) 西蘭花泮塘爆雙脆 (珊瑚蚌桂花蚌) ($80)
- 唔特別的一味餸, 純粹叫 "有 D 菜" 落肚

整來睇講, 食物中上水平, 估唔到的係 "服務都好好", 以舊區及舊式飯店來講, 侍應十分有禮, 又自動 "換碟"等。餸菜唔算 "好大碟", 但價錢也算中上水平。是日晚餐 $550

「盲頭烏蠅」怪你過份美麗

星期六一早同媽媽去飲早茶, 那天我 "慒慒o下", 竟然唔記得戴眼鏡就走出街, 出到去才發現 "矇查查", 睇野無左 "焦點", 個人渾渾 "鄧鄧"。 早茶後一同行去街市, 又一起講 "是非" (講緊最近的報章頭條 ─── 警察 (拍拖更) 巡邏時被拍得消閒享樂)。

點知.........談到 "慶起時", 突然被警察截停 "問話".........(我以為係 "查" 身份証), 原來.......當我地邊行邊傾時, 完全妄顧交通燈號, 見 "無車" 便橫過馬路, 最終當然逃不過被 "警告" 及 "抄下資料" 等收傳票的命運啦! (幸好的是警察說：「媽媽年紀大, 就只檢控 "後生" 果個啦」, 不過仲未收到傳票, 唔知係唔係兩個都會被檢控 (被罰款)。

又唔知會罰幾多錢? 聽 D 網友講, 罰款係無定額的, 要待出庭應訊之後, 睇o下個官點樣判喎! (E 樣最麻煩, 又要出庭應訊, 如果 "返緊工" 的, 真的千萬個唔方便啊! 不過網友又話 "可以填寫書面認罪書") 雖然我深知自己犯錯, 不過心情依然有點不爽 (被罰款喎, 梗會唔開心啦), 唯有安慰自己 "當係捐錢做善事", 又或者 "破財擋災" 囉!

也許因為我地 E 兩隻 「盲頭烏蠅」過份美麗, 所以警察先生也禁不住上前認識了! 然後我笑說：「都係 "報應" 呀, 唔應該講 "警察" 壞話」

意大利的 「金船長」

朋友的壽宴設於大角咀大全街的「金船長」, 此店專食意法菜的, 聞說部份菜式更是攞過獎架添!

此店在該區頗有名氣, 好多為食豬也慕名而來, 不過........訂位時卻有一點點 "老土", 明明不是食 "自助餐", 卻要客人 "分時段" 入座, 兩場時間為晚上 6:00-8:30 及 8:30-11:00, 由於要 "等齊人" 放工, 又唔想食得趕頭趕命, 最後只好訂 8:30 的位啦!

對於這一餐的 late dinner (遲來的晚餐), 也許 "過了" 正常的晚餐時間, 所以大家的食慾也一般, 不點太多餸了, 免得 "肥死" 之餘又唔健康!

壽宴餐單:
1) 田園沙律 配 意大利黑醋汁
- 意大利黑醋汁好香濃, 沙律材料新鮮

2) 車仔意粉之 精選 2
- 有超多配料的, 唔記得o甘多, 只記得有芝士 及 墨汁麵, 麵質煙韌, 芝士夠香

3) 海鮮意大利飯
- 好少見意大利飯 (用湯燴熟 d 飯) 係用 "白湯" 的, 一般見 "紅湯" 的居多, 好 "杰" (creamy) 同埋 好重芝士味, 飯粒又有口感 (有o趙頭)

4) 黑松露芝士批薩
- 六個字 ─── 「超正, 不吃不可!!」 好香黑松露味, 又有芝士香, 重有我鍾意批薩的 "軟熟" 口感, 好特別!

5) 意大利奶凍
- 好香 "奶" 味, 芒果尚算清香, 不過我愛 "798" 店內的奶凍多一點。

6) 朱古力心太軟
- 心太軟唔特別, 只係味道唔算太甜 (我鍾意), 估唔到此店會配上雪糕 及 木糠, 又幾搭調 及 好味喎!

7) 法國焦糖布甸
- 出奇地.......原來係凍架喎!! 一般此甜品係 "熱食" 的, 估佢唔到......重好香 "蛋" 味添!

8) 薄荷葉清水 (無相片)
- 免費供應, 完全係因為 "意頭" 因素寫下來的, 一般餐廳會用 "檸檬" 或 "士多啤梨" 浸水比客人, 唯此店卻用上薄荷葉, 好得意!

消費 $420, 食品、環境 及 服務也是 "中上" 水平呀, 值得一試!

和你去冒險

某天針炙後相約了媽媽 及 KK 出來晚飯, 我地最後去左尖沙咀重慶大廈 的 7E 咖哩王 (之前和同事去過了)

當我拖住媽媽走近重慶大廈之際, 一眾南亞裔人士立即一湧而上的圍住我地, 向我地兜搭生意, 又將宣佈單張瘋狂的 "質" 向你, 雖然我已經立即擁緊媽媽肩膀向前行, 但佢也嚇到花容失色了。

好啦.........終於 KK 也到達了, 於是我一手繞住 KK, 又想用另一隻手繞媽媽, 可惜.......從來「三人行」也不是一件易事, 終於........媽媽墮後的緊緊跟住我地, 然後又重覆被人一窩蜂的兜搭攻勢, 好唔容易走過一段路 (超快步速的, 同時間不斷轉頭檢查媽媽狀態, 也叫她緊緊的 "跟緊 D"), 終於到達了 E 座的 lift lobby (電梯大堂)

晚上 8:00 左右, 好彩也不用等位, 可惜的係客人眾多, 店員不允許分開點菜 (order), 我地原想點幾味餸, 食完再加餸 (因為怕餸菜放涼了唔好味), 結果 3 人點了 6 碟食品 + 1 支啤酒 (當 KK 辣到跳舞時的最佳朋友), 埋單 (折左) $221

當我食至一味烤雞時, 雖然它味美, 可惜我口腔的上咢皮膚, 被它的脆硬的外皮刮損了, 長出一大個 "血卜", 超痛兼 "銀" 住個口, 之後全程也食之無味, 無晒 mood (心情), 心情真的大跌 watt!!! 所以已經無心機影相留念了!

綜合而言, 媽媽 同 KK 都覺得食物水準一般 (唔覺得好好食), 可能因為口味唔同, 唔識欣賞它! 而且餸菜又唔夠大碟 (比佢地相像之中細碟), 價錢亦唔係零捨 "抵", 所以 「有下次」的機會不大, 不過最最最..........難忘的卻係「和你闖入重慶大廈去冒險」! (佢地第一次闖入去咋!!)

有時候我覺得 "食物" 好食與否, 不完全在乎食店的包裝 又或者 食物的賣相, 於我來說, 更在乎的係.....同咩野人去食 (一齊分享), 如果係志同道合的, 食物怎也不致 "難食", 如果面對 "無謂人", 佳餚也食之無味啊! 我享受和 "誰" 一起「分享食的時光」 多於 「食物本身」 的意義。

估不到...今次的尋食記竟然成為我地難忘的冒險旅程, 在此由衷的說：「不論前方如何凶險, 我都想緊擁著你地一齊走過, 即使我力有不逮 (雙手只能擁一個), 我也會用我僅餘的能力去照顧你 (頻頻轉頭檢看你, 吩咐你緊隨住我), 不會隨便的拋下你地不理。所以請好好保重身體, 留有體力的緊緊跟隨我的步伐, 也令我不要擔心啊!」(如果下次再有o甘的情況, 我會調返轉 "繞實" 媽媽隻手, 叫 KK 緊隨其後, 因為我相信 KK 的體力及智慧, 足以應付猛烈攻勢有餘) 哈哈.........Sorry!! 媽媽你受驚了!

脊醫

睇針炙治療已經一個療程了 (七次為一個療程), 體質開始有改善, 唯進展不大 (進度慢)。最近醫師介紹我睇脊醫, 檢查一下會否因「頸椎」、「胸椎」又或者「腰椎」出左問題, "翟" 住神經線, 令氣血不通, 經絡因而閉塞, 百病叢生。

最終脊醫檢查過我的脊骨, 徒手幫我推它去復位, 佢說我的「頸椎」有一點瘀血, 「腰椎」有一點移位, 整個過程大約 20 分鐘, 完全唔痛。 我只需配合佢 (放鬆, 不要同佢鬥力), 任由佢推推拉拉 (狀似按摩o甘), 又或者佢叫我雙手放好, 用力的 "抖起" 我 去 "chalk" 返正我的脊骨。

脊醫完成任務以後, 就由針炙師接手治療了, 今次 (第二個療程) 主力從背脊作治療, 用上大量的針在「頸椎」及 「腰椎」施灸拔罐, 身上施針的穴位也和第一個療程的不同, 今次的穴位比較 "痺"、"尺" 和 "痛" (可能因為近住脊椎神經線吧), 除針時出血亦較多 (也許積聚的瘀血較多!)

針炙以來, 體質似乎有點改善, 傷風感冒, 頭暈身慶都少左, 鼻敏感改善左, 希望今次真的將千年病源殲滅, 成為一個健健康康的人啦!

如果唔認識針炙, 根本唔知道原來 「脊骨」對人體的健康有o甘大的影響架!

相關資料 http://www.cda.org.hk/Big5/

脊 骨 神 經 科 學 的 醫 療 本 義著 名 脊 骨 神 經 科 學 療 法 之 父 大 衛 彭 瑪 脊 醫 (Dr. David D. Palmer) 精 闢 地 闡 述 了 脊 骨 神 經 科 學 療 法 的 本 義 ： 「 … 疾 病 ， 主 要 是 相 關 的 神 經 線 在 椎 間 孔 臨 界 點 受 到 干 擾 所 形 成 。 」

大 衛 彭 瑪 脊 醫 (Dr. David D. Palmer)把 發 病 機 理 推 連 至 相 關 的 神 經 線 及 其 相 對 脊 骨 骨 節 ， 並 命 名 為 脊 骨 骨 節 輕 度 移 位 (Subluxation)。

現 代 脊 骨 神 經 科 學 療 法 建 基 於 復 原 性 脊 骨 骨 節 損 傷 (脊 骨 骨 節 輕 度 移 位 )的 理 念 之 上 ， 藉 以 對 治 人 體 廣 泛 性 發 病 機 理 。 現 代 脊 骨 神 經 科 學 療 法 雖 不 自 稱 是 一 門 整 體 或 全 面 療 法 ， 但 它 除 了 彰 顯 生 物 力 學 性 失 調 可 引 發 骨 肌 系 統 失 衡 這 個 理 念 之 外 ， 也 確 實 包 含 了 生 物 力 學 性 失 調 引 發 身 體 其 他 系 統 發 病 的 觀 念 。 而 脊 骨 神 經 科 學 療 法 的 機 制 就 是 回 復 關 節 的 正 常 活 動 能 力 ， 旨 在 促 進 人 體 體 機 平 衡 。

「情」這一個字

最近媽媽迷上了電視劇 ── 「好老婆大聯盟」, 國內又稱 「糟糠之妻俱樂部」, 內容係講多段婚姻關係之中, 發展出婚外情, 然後又牽涉到老爺、子女、大婆、二奶、齊人、情人之間的種種角力。雖然看似係老生常談的劇情, 不過在於編劇及演員的功力之下, 也令人不禁追看。

原來上一代的婚姻生活, 真的對下一代, 甚至下幾代也有深遠的影響, 所以發生婚外情不只是兩夫妻的事, 還是兩個家族的事, 行事前必先要三思啊!

劇中其中一位老公嫌棄成日埋頭照顧家庭的老婆疏於打扮, 令夫妻之間少了情趣, 因而對外發生婚外情兼趕走老婆, 和情人雙宿雙妻。老婆暗自神傷之餘, 努力發展事業又顧及打扮 (因工作關係), 終於引來青年才俊的追求, 老公知道後又向她苦苦痴纏求復合, 對情人卻冷淡對待 (新鮮感過去了)。

現實之中, 雖然人知道 "理智" 是什麼, 不過尤其係講求 "感覺" 的女生, 總會被一個舉動、一句說話而 "感動" 得失去理智, 不加思索的走近另一個人。或許最終也得不到好結果, 你可以說佢蠢, 但也可以認為係天意弄人, 她的命中必需碰上那一位他 (無得怨)。

劇中一位失婚婦人碰上了失婚男人, 發生了感情, 那位男人待婦人如珠如寶, 暱稱她為 「吉億 (男人的名字) 的公主」, 不會介意她的失儀醜態, 還會細心的照顧她所需, 分擔她家中的煩事。和她的前夫對佢的待遇簡直係 "天" 和 "地" 比。

假如你真心愛一個人, 你會欣賞佢的性情, 包容佢的不足 (有時甚至覺得佢的不足係 "可愛" 的, 係需要被你照顧及寵的), 樂於照顧佢感受, 甚至主動的照顧佢家人的需要 (愛屋及烏)。如果你不愛惜一個人, 即使那人為你仆心仆命的付出, 你也不會感到知足, 還會挑剔佢有什麼做得不夠、做得不好! 原來一切皆在於伴侶的 "心態"、"對你珍惜的程度", 而不在於 "事實的真相"。

了解過後, 曾經執迷的你清醒了嗎? 不是叫你輕易的放棄一段感情, 而係該將你的心神用在懂得欣賞你的人身上, 那才是值得! 「情」這一個字千古萬年以來, 教人歡笑、教人感動、教人痛哭、教人累!! 難怪豬八戒常說：「多情自古空餘恨, 此恨綿綿無絕期」

回到起點

人...總有氣餒的時候, 有時靜下來才發現, 一切好似又回到了起點, 就如今天驀然回首, 就似回到了十多廿歲的時候, 難道這幾年來的日子也是白過的嗎? 為何總似長不大, 無變過的一樣啊! 難道這幾年來的努力也是白付出的嗎?

當你開始懷疑自己能力, 想到將近鑽了牛角尖的時候, 你才發現原來 「人生」/ 「際遇」跟「時裝」係同一道理的, 就係.......幾年就來一個循環, 就如股票總有一個個的 "波幅" (關口), 只要調整心理, 咬緊牙關的捱過, o甘你又會「升呢」 (升 level, 好似打機o甘 "過版"), 而它 (關口) 也總會過去的, 不會一直纏繞你。

人的信心總有動搖的時候, 偶爾我地也會在路上感到氣餒, 找個朋友傾訴, 大家互相勉勵, 也是一個唔錯的方法。朋友同我講：「你覺得自己回到起點麼? 那多好!! 一切又可重頭來過, 因為從前的自己 / 日子 係最簡單快樂的。」

原來 "回到起點" 並不代表你白白付出, 白白枉過日子, 即使你不想承認, 那日子始終也確實的存在過、經歷過, 而你.......也因此而成長了。 誠如朋友所言, 樂觀一點去睇, 該慶幸又有機會重頭來過, 睇o下長大後的自己又用那種心態去面對問題, 測試一下自己的能力。 要儲好勇氣去面對挑戰!

回到起點並不可怕, 可怕的是........你的鬥志一沉不起, 放棄自己!

針炙 之 鼻敏感 都有得醫

鼻敏感這個都市病折騰了許多人, 我就係其中一員喇! 旅行回來後, 鼻敏感又來探我啦!

終於針炙師建議我嘗試以針炙來醫治鼻敏感, 佢說：「用支特別的針插入鼻孔, 之後 "放血", 個鼻就會 "通" 好多, 一星期做一次, 通常 d 病人做 3 次以後, 情況就會大有改善」

於是我膽粗粗的姑且一試, 首先佢安排我坐在廁所的洗手盤側邊, 用小電筒照一照, 查看我 "噩高頭" 的鼻孔, 說：「內裏很腫, 左邊鼻孔比右邊的情況更嚴重」

然後吩咐姑娘取針, 當針送來的時候, 我嚇左 "一大跳", 問：「嘩........o甘粗的, 唔係丫嘛? 痛唔痛架?」個身同個頭立即 "向後縮" (心內更想 "打退堂鼓" 添), 下圖係普通針炙用的針 同 醫鼻敏感 (好似鑽咀o甘粗) 的粗針


醫師安慰道：「唔痛架, 只係你會有點驚, 快 d 合上眼啦!」 同時間和姑娘兩人用力的拉回我個頭向前...........

心想：「死梗啦......今次......好驚呀!!」唯有硬住頭皮合上眼, 接受 "被吉" 的酷刑命運啦 (心內又安慰自己, 吉左也許會令病情好一點呢) 轉眼之間鼻孔就各被 "吉" 了一下, 然後聽隨吩咐將頭面向洗手盤垂下, 鮮紅色的血立即密密、一滴一滴的流在面盤上 (我又見識到 "血染的風采" 了), 當血滴乾以後, 我用紙巾再將內裏剩下的鼻血呻出來清理好, 治療就完成了!

休息過後, 呼吸果然通暢得多, 只係偶爾呻鼻水時還有一點點的血絲, 又或是一小團的血塊, 此乃正常現象。原來過程並不十分痛, 感覺似是你的皮膚被手指 "篤" 了一下 (仲無針炙皮膚o甘痛添) 但係要 "接受" 粗針插入鼻孔的那一刻 "驚嚇", 真係少 d 心血都唔得呀!

患有鼻敏感的你, 又夠唔夠膽試o下呢? 治療費每次 $240 (需一星期針一次)

信任

人與人之間的關係 是 建立在 「信任」的因素低下, 試想一下, 嬰兒天生就依賴父母, 父母照顧佢, 應佢的需要, 佢才會在有需要時以 "哭" 來表達所需, 如果.......佢怎麼哭也是無人理會的, 相信幾次之後, 嬰兒再不會以哭來表達自己的訴求! (省返啖氣暖肚好過)

生活上我地也會和別人建立互信關係 (如：朋友、伴侶、褓姆), 你會將生活上的瑣事 (無論開心與否) 也一一同朋友分享, 因為你相信佢地會明白你, 不會出賣你的秘密, 在有需要時更會安慰你。有時候我地甚至會將自己的 "性命" 負託於別人身上 (如：醫生、救生員), 因為你要靠醫生來為你醫病、做手術, 又或者在大海之中, 你要靠救生員來拯救泳術不佳的你。在那生死存亡的關頭, "互信" 就顯得更重要, 因為你會聽佢地的忠告而行動 (就如聽醫生的意見後, 作出適當的治療決定)

世間上不是人人也懷有善心的, 「有心人」或會利用佢地的職權去擺佈你, 以滿足自己的私慾, 後知後覺的你被利用後才發現對方惡行, 感到驚訝 (心想：點解要o甘對我? 點解要揀我?), 你會傷心、感到被欺騙 和 受傷害, 又會暗暗的自責：「點解我會o甘蠢, o甘易信人, 難道自己太天真了嗎?」

有些事, 唔發生都已經發生左, 即使係美夢, 又或是噩夢, 它......總會過去的, 與其為著它而自責感不快, 倒不如拿點勇氣放下它。 不要再抱住它來告誡自己 "不要再輕易信人", 這樣只會為自己築起了圍牆, 雖保護了自己, 但也隔離了關心你的人 (為著「有心人」的惡行而懲罰自己, 不值得!)

雖然前路仍是未知之數, 也許還會荊棘滿途, 但我寧可多儲勇氣, 也想保存赤子之心 ─── 寧願別人負我, 寧可承受會受傷的風險, 也不願關著自己, 苦起面來做人, 我還想像小孩子處率直相處, 相信 "你對我好, 我對你好" 的態度。「我想.......我可以信任別人」!!!

以下的這首歌的歌詞是不少人的寫照, 有時候, 我地會因為怕受傷而躲起來, 收埋了原本的自己, 其實你的心裏會寂寞嗎?

十字架
歌手：謝安琪 作曲：
周博賢 填詞：周博賢 編曲：周博賢

很久的當年 媽媽天天忠告
好心交給人 總可得到好報
過去按這教導埋頭做
可惜隨年長一步 傷口隨年多一度

伸出手攙扶 遭鬆開手警告
交出心戀愛 反得傷心的控訴
厭棄我過份熱情流露
或是仁慈得恐怖 燙手我已怕碰到

彷彿背上十字架捨我救贖未算好
愈奉獻得到結局愈殘酷
教我為免傷勢再會變更槽
圍牆變更高
圍住要自己的去路 防護罩終變成墳墓
將根本的我葬下去獨自老

伸出手攙扶 遭鬆開手警告
交出心戀愛 反得傷心的控訴
厭棄我過份熱情流露
或是仁慈得恐怖 燙手我已怕碰到

彷彿背上十字架捨我救贖未算好
愈奉獻得到結局愈殘酷
教我為免傷勢再會變更槽
圍牆變更高
圍住要自己的去路 防護罩終變成墳墓
將真的我埋葬下去 哀悼裡獨個漸漸老

多想光陰退後到舊時 童年重度
多斬釘截鐵共處態度
我對你好所以你會對我好
心裡沒墳墓 無奈這幸福的國度
已飽經災劫無寸草
今天只得我野地裡在獨舞
要怎麼的上路 祈望一天我能知道