針炙

睇左中醫師調理身子已經有一段日子, 最近發現進度停滯不前, 經朋友介紹下, 又轉睇另一位醫師, E 位醫師, 除了 "把脈" 、"開藥方" 以外, 還有 "最耍家" 的 "針炙", 經佢把脈之後, 得出的結果令我 "大吃一驚" 「心肌供血差、肺虛、肝虛、腎虛、膽虛、脾臟 OK (食量好) 但胃較弱」

嘩........幾乎心、肝、脾、肺、腎都虛喎, 點攪呀!! 醫師仲話我 "可能小時候被嚇親", 所以個膽較虛弱, 問我：「你係唔係好細膽架呢??」哈哈.......講明係 "小時候" 嚇親, 我又點會記得呢? (我還開玩笑的心想：「可能係小時候太頑皮, 經常被父母 "喊打" 的恐嚇管教, 因而 "嚇親" 吧! 記得要向父母取回 "醫藥費" 先」

醫師幫我進行針炙治療, 重點位置在於 "腹腔" (因為器官較多), 另外還有 "頭殼及面部"、"頸椎及脊椎"、"雙手雙腳" 等位置落針。施針後還會在"腹腔" 上用抽真空的 "大拔罐" 吸走濕氣及廢氣, 歷時大約 40-60 分鐘, 完事後肚皮 "頗腫痛", 肚臍四周還冒出類似 "挖沙" 後的紅點添!

雖然自小也打慣針唔怕痛, 不過卻被針炙落針時 "嚇怕", 除了施針多以外 (每次身上共約 50-80 針) , 還會先在"、"頸椎及脊椎" 施針, 然後安頓你躺下, 再在你身上其他地方施針 (即係你係 "翟住" D 針來瞓, 問你驚唔驚? 睇來我又嚇破膽了, 膽又虛啦!) 希望體質漸漸有改善啦!

收費：初次會診 "把脈" $50, 針炙每次 $240, 藥劑 (沖劑) 每日 $60 (好彩我只需針炙, 不需食藥咋!)

Nothing to lose

「Nothing to lose」解作 "無o野蝕" (無損失)!

相信無人天生喜歡 "輸" 的感覺, 所以 "賺" 同 "贏" 都係令人力爭上游的推動力。 有人會努力工作, "贏" 得別人認同、有人喜歡投資去 "賺" 錢。

而在我心目中 "學習" 係一項 Nothing to lose 的事, 試想一下, 如果一樣東西你從不認識它, 然後你去學習它, 令你自己增值, 多一技傍身, 豈不是為自己的生活添上色彩而 "無蝕" 嗎?

有些事情我地不是不懂, 只係唔夠膽去嘗試吧! 那就白白浪費了 "學習的機會", 日後即使再有機會, 也會我地已經 "有心無力", 無能力再作嘗試, 只得空餘恨! 舉個例：從前你懂得踩單車, 但係技術卻因耐無玩而日久生疏, 又怕跌, 即使將來有機會, 也許體能限制 (可能關節唔好), 已經無能力獨自去踩單車了! 又或者玩伴無時間陪伴你左右, 那豈不是很可惜嗎?

趁有空、有志同道合的玩伴、有美好的天色 及 安全的環境下, 一於 "放膽嘗試", 才可衝破自訂的障礙, 發掘更多 "真正的自己" 啊! 即使真的踩唔郁架單車, 無問題........因為你 Nothing to lose 丫嘛! (最多咪坐別人車尾, 至少自己努力嘗試過, 才不會覺得有遺憾, 明白嗎?) 話唔埋當你成功衝破障礙以後, 發現自己原來還有能力去載人添, 幾厲害!

香江七老書畫展

早前去左中環大會堂睇 「香江七老書畫展」(免費入場), 其實我對 "畫" 尚算有興趣欣賞, 對欣賞 "字" 的興趣卻不大, 因為我的文學修養比較低, 至今還未分得清 "行書"、"草書"、"行草"、"隸書"、"楷書"、"篆書" 等字體, 加上每位作者皆有其個人寫字的風格 (總是覺得字體潦草) 實在睇唔明佢地在寫什麼?

"畫" 就比較容易欣賞, 即使修養學歷唔高, 也可隨個人口味去判決喜惡, 而且 "畫" 的主題通常比 "字" 表達得較直接易明。

"香江七老" 包括了 陳森、陳海鷹、羅冠樵、張念平、姜丕中、余寄撫 及 王齊樂, 全部也是白髮蒼蒼, 最 "年青" 的老翁也有 86 歲, 別少看佢地喎! 佢地當中大部份都大有來頭架! 例如係學會會長、名譽顧問 又或者 大學的客籍講師等等。

當中我比較欣賞 陳海鷹 的油畫, 佢畫的人像真的栩栩如生, 即使只運用粗線條, 那神韻 "真實" 得教人難以形容, 難怪佢在「美國的肖像畫家協會國際賽」中被評為 「最出色的三位肖像畫家之一」, 下圖的 "劍蘭" 也是其作品, 感覺好立體、好有層次感啊!
另一位我比較欣賞的作者就係 王齊樂, 當天佢真人也在場, 經常面露笑容, 令人感覺深刻, 佢其中一幅作品更 "挑起" 我欣賞 "字" 的興趣添! 下圖似唔似一幅繪畫當中有著 "一個人舉起一隻執筆的手, 差起腰, 勾起腿" 的圖案呢? 唔睇真 D 都唔覺係一幅字, 原來作者用了 《正直無私》四個字繪成了一幅畫, 佢的創意令我十分佩服。

多謝媽媽的好介紹, 今次的書畫展實在大開眼界啊! 最最最令我佩服的就係作者雖然年邁, 卻不受身體機能退化的影響 (如: 眼朦、手震等) 去作畫, 十分厲害啊!

奧運橋

早前睇見有線阿蘇的節目, 節目中介紹左一條位於銅鑼灣的 「奧運橋」, 特色在於在橋上的每一層梯級之間, 也紀錄了每一間奧運舉辦的地方, 有時因為戰亂關係, 某幾屆的奧運取消了, 在天橋上也一一被紀錄下來。

看節目當日很是好奇, mug 原來香港有一條o甘有教育意義的天橋麼? 唔知o係邊度呢? 我真係大鄉里了!

某天巧合經過銅鑼灣, 竟然被我在聖保祿學校外見到此「奧運橋」, 立即二話不說的拍下來留念, 再走過之, 了左自己一個心願, 亦滿足了好奇心! 如果政府可以將某些大日子、重要事情也用此 "有趣味性" 的方法紀錄 同 教育市民就好了, 那麼學生們讀 "通識" 科就會更易入腦呢!

百年歷史的見証

某天去了有百年歷史的香港大學辦事, 事後四處閒逛, 拍照留念!

多座建築物裏, 有新潮的玻璃幕牆, 亦有古典的紅磚牆, 我尤愛古舊建築, 它充滿了歷史的滄桑味, 令我可以發揮無限的創意 (幻想著古舊建築物內曾有令人心動的故事)。充滿懷舊色彩的拼花地磚, 古舊而笨重的大木門, 還有雕刻精緻的門柄 (龍形模樣), 也令人禁不住著迷啊!

我愛 「張文樂」

最近留意到中銀人壽廣告的 "父女篇", 感覺感動, 廣告中的準爸爸勾劃著未來女兒的個性及模樣, 最深刻的那一句：「我諗......要揾個無條件愛佢的男人, 可能真係只得我一個」 (那一刻, 我心內想起 ─── 如果我爸爸深情的講這一句說話, 嘩.........眼眶立即忍不住紅了, 好感人!)

一直以來, 形容父母子女之間的親情, 總是以母親 (女性) 的角度去描寫, 偶有以男性的角色去表達, 仲要係 "講" 出來添!

如果有興趣的, 就到以下網址睇o下段廣告片啦
http://www.youtube.com/watch?v=HTvFWe9Ct90&feature=player_embedded

廣告結尾的一句更是親情的精髓: 「因為愛, 先至會為對方諗將來」如果你對一段感情、關係唔認真, 你根本不會想負起責任, 也不會考慮將來, 不是麼?

我愛 「張文樂」, 我愛此感動我心的廣告! (片中那 "硬頸" 的小妹妹好可愛呀)

「牽掛」也是一種幸福

記得小時候, 總係發著「荳芽夢」, 有時遇上牽掛想見的人, 心內總是想立即奔向對方 (尤其是發白日夢 ── 暗暗崇拜著的學長 或 靚仔阿 Sir), 那種 "少女情懷總是詩" 的日子過去了, 竟然變得 "烈女" 起來, 遇上牽掛的人, 即使要保持女生的矜持, 但也要盡點綿力去爭取見面, 於是借故出現在對方跟前團團轉, 務求惹起對方的注意。記得那種午夜夢迴, 牽腸掛肚的感受, 著實有點折磨, 但心中卻自虐的喜歡著這一份感覺。

雖然那感覺非常真實, 卻又非筆墨可以形容, 想深一層, 能令你有這一種感覺的 "人", 在你心中的位置一定殊不簡單, 不簡單除了因為 "好感"、"崇拜"、"尊敬" 之外, 還有 "持久"。

以前對於 「牽掛」一詞總係膚淺的想到愛情層面, 今次拜祭先人以後, 竟然浮起了許多點滴, 如：小學興趣班上完成的 "習作" (手織頸巾), 時已至今仍用膠袋包妥, 新淨的存放在婆婆的衣櫃中, 忽然之間........心頭又一陣微暖、一陣心酸, 我知道.......此刻我 「牽掛住佢」!

即使明知 "沒結果" (不能如願的相見), 但原來這一種「牽掛」已經超越了過去我所認識的層面, 似乎我也成長了。 有時候, 能夠有一位對象令你感到「牽掛」, 原來也是一種幸福, 因為這見證了你們之間存在著愛, 尤其是那是持久的愛。(縱使未能在今生的肉體上延續, 但精神上卻永遠撐著你, 直至你老死!)

朋友們, 想一想 「此刻的你幸福麼?」送比你地以下這一首 "王菲" 的 "我願意", 同你地一齊分享思念牽掛的感覺!

﹝我願意◎ 作詞：姚謙﹞

思念是一種很玄的東西　如影隨行
無聲又無息出沒在心底　
轉眼　吞沒我在寂寞裡
我無力抗拒　特別是夜裡　
想你到無法呼吸
恨不能立即　朝你狂奔去　
大聲的告訴你

我願意為你　我願意為你
我願意為你　忘記我姓名
就算多一秒　停留在你懷裡　
失去世界也不可惜

我願意為你　我願意為你
我願意為你　被放逐天際
只要你真心　拿愛與我回應
甚麼都願意　甚麼都願意　為你
我甚麼都願意 甚麼都願意　為你

界線

心理學上話: 每個人也有自己的 「保護圈」, 即係話人和人之間總有著一丁點的距離, 尤其係對陌生人 又 或者唔熟絡的人, 我地總會客氣地保持距離以作觀察, 才會感到有 "安全感"。當對方獲得你的信任以後, 你的「保護圈」才會被佢攻破, 加入至朋友的行列。 至於每個人的「保護圈」亦各有不同, 有人尺度寬鬆一點, 有人則謹慎一點。

談及起 "界線", "男" 同 "女" 天生就有著一條無形的分隔線, 可能因為作為保守守禮的中國人, 自少受到長輩潛移默化的教導下, 知道男女有別, 會堅守著自己的底線之餘 (好好保護自己), 亦不會貿然去衝破別人的防線 (不會作出唐突的舉動), 免得傳送了 "錯誤訊息" 比別人 (免表錯情)。 要好似洋人般的行見面禮 (擁抱、親咀也是等閒事), 在大部份中國人的圈子中, 係少見的, 除非那是比較 "洋化" (現代) 而又彼此相熟的中國人。

即使係愛侶 或 子女, 中國人也比較內歛, 少有向愛侶 或 父母講出: 「我愛你!」 我地不是覺得這份愛是理所當然的事, 只係說出口總似尷尬怪怪的, 領受者或許會心甜, 表情上卻露出窘態 (不適應此等熱情行為)!

雖然說 "界線" 係 "自己訂比自己" 的, 不過人是群體動物, 如果作出大部份人都唔認同的行為, 只有你和對方覺得無問題, 招人閒話, 也是頗怪的事啊!

吃喝玩樂 "深圳" 一天逍遙遊

和朋友相約好去深圳福田區玩o下, 內容大致: 中午在福田口岸集合 → 打保齡球 → 按摩鬆一鬆 → 晚飯 → 返港。

我地集合後先去了 「球王保齡」場打波, 由於無事前訂位, 也要等候一陣才有位, 於是我地在場內玩左一樣 "小朋友" 玩意去攝時間, 場內叫它做 "波比" (如下圖), 係一個有 8 支操控桿的玩意, 參加者要利用它去將個波射入對方的龍門, 也可以用它去作後衛阻擋對方入波, 於是有 4 名成年男女玩到興起,呱呱大叫, 令場內的其他人為之側目!! (一瞬間, 幾名大細路又似回到小時候的模樣啊! 是由衷的 "真開心", 不是商業應酬上的 "假快樂")

切磋保齡球技後, 我地去左 「水都國際健康俱樂部」按摩, 男士們還做埋桑拿、打乒乓球、打桌球添, 女士們就食生果、睇電視 及 小睡片刻, 然後施施然享受 90 分鐘的 "中式按摩", 鬆夠才走人, 消費平均每人 $150 人民幣。

之後就到了今日的 "戲肉" 啦, 我地去左 「水都」旁邊的 「芙蓉樓」食湘菜, 由於佢的菜牌圖片實在 "太吸引", 而且大家的肚仔又打晒鼓, 所以一坐低就忍唔住的 "狂點菜", 等待上菜期間還不停的再細看菜牌, 還說:「哎呀.....早知叫埋 e 樣啦, 個樣好似好正呀!」 (心想: 食得晒再講啦), 我地點左:

1) 芙蓉壹品豆腐: 無咩驚喜, 只係煎釀豆腐
2) 串燒羊肉: 配埋 "孜然粉" (串羊肉的調味粉) 真的一流, 又香又惹味!
3) 茶樹菇燴豬肚: 用鑊仔上菜, 好香芹菜味, 不過茶樹菇同豬肚就唔特別
4) 張飛牛肉: 只係食 "煙韌口感", 無咩味道可言
5) 香辣霸王肘: 極之失望!! 菜牌圖片真的非常吸引, 只可惜....肘子既不香, 亦不辣, 完全唔入味
6) 竹籠糯香骨: 幾得意又飽肚的一味餸, 糯米軟綿有口感, 香骨味道亦唔錯
7) 乾蔥頭浸走地雞: 走地雞偏瘦唔肥膩 (多骨少肉), 雞皮既香又嫩, 略嫌咸左少少
8) 手撕包菜: 清清地的一碟椰菜, 唔特別
9) 另有前菜四小碟 (花生、芽菜、泡菜 同 芹菜辣魚)

整體而言, e 一餐唔算得好好, 不過勝在特別囉! 因為在香港好少食湘菜 (唔平丫嘛!) 全日又玩又食, 唔計上大陸的車費, 大約用左 $300 港幣啦! 也算唔錯的一個旅程!

令人熱血沸騰的表演

欣賞完《Tango-A-Tierra - Argentina》(動地探戈 - 阿根廷) 的表演, 真係令我熱血沸騰啊!

即使你唔識舞蹈, 只看一下上圖就知道表現者的水準有多高, 試想一下當你腳踏高踭鞋, 和男伴跳舞之際, 還要在 "腳板底" 唔著地的情況之下, 雙腿要擺出優美的姿勢, 面帶鬆容的去支撐身體, 真的一點也不容易啊!

今次睇的 Tango (探戈) 同一般的標準舞的探戈略有不同, 因為屬於 "阿根廷" 的風格, 即係沒有固定的舞步, 是一種完全即興創新的舞蹈, 由引帶者決定如何將不同的舞步自然的連接在一起。 阿根廷探戈是由男士主導, 女士追隨的雙人舞, 總帶著纏綿熱情的氣氛。

就如用上大量的 "腿功", 有 "三文治" 舞步, 領舞者雙腳合併, 並緊緊的夾在舞伴前腳兩側。 "勾" 的舞步是舞者敏捷地屈膝, 用自己的腿勾緊舞伴的腿, 還有 "甩腿" 指男女雙方快速的用雙腿朝相反方向前進或後退。

隨住熱情而拍子明快的音樂, 高難度的腿功, 流暢的舞姿 加上 舞者一流的表情, 令人睇得如痴如醉, 中途還附加 男高音歌唱 同 樂隊現場伴奏添, 勁正!! 表演者的舞衣性感而華麗, 女士們露出整條腿 (觀眾大飽眼福), 靈活的游走在男士們的腰間至腳踝, 男士們側靈巧的用雙腳回應著, 加上堅挺的上肢去領導女士們跟隨下一個舞步, 好不威武! (好 man 呀.....)

睇今次這一場表演, 尤如睇緊衣著華麗的男女, 在大眾面前使出本事, 去互相挑逗, 激起對方和觀眾的熱情, 震撼每一顆心! 好厲害啊!!! 歸家途中, 心情久久未能平復, 它真的 「激起」了我的小宇宙, 我要努力運動, 令自己變得苗條 (我尤愛女舞蹈員美麗而柔軟度高的長腿呢.......姿勢真的令 "女生" 的我也帶住 "既羨慕 又 色迷迷的眼光" 去欣賞啊!)

夠鐘再上路了

最近心頭湧起了一首舊歌, 係 "張學友" 的 "歲月流情"

回望這半生　也許是場夢
年月已帶走　幾個秋與冬
淚也倦了 夢也不斷轉眼逝去
生命或許是場空
忘掉了許多　昨天喜與悲
回味每一篇　心中日記
歲月匆匆飄走
徘徊夢裡始終也是你
已失去了不必痛楚
儘管你已別離回憶更多
昨天曾經擁有跟你的片段
人生並沒難過
月兒彎光陰悄別去
明日有那耀眼的艷陽
(明日有那熱暖暖的艷陽)
一生有對或錯
回憶有你伴我走過

最近拜祭了先人, 前塵往事又浮上心頭, 心中又翻起了五味瓶, 百般滋味一湧而上。 當時心內向佢地傾訴, 然後明白了一些道理

人的一生當中出現過很多人, 有的和你情深, 成為了親人、知己, 伴你走過人生的其中一截路, 和你緣淺的卻只是你生命之中的一位過客, 你在此刻根本不會知道將來, 亦不能有所預備 (會碰上什麼), 不要怕做錯, 不要怕痛苦, 若不前進, 不會知道結果, 只得你獨自一個在瞎猜著將來!

無論過去那記憶有多深刻、甜蜜和難忘, 佢始終也走了, 想必佢地在天上也想你活得安好, 不想你只活在過去的記憶之中, 如果你死牽住那回憶係會徒添佢地的痛苦, 倒不如輕鬆一點放開手, 好好整理裝備自己, 然後少一點預備去迎接你生命中的另一位守護神!

你的人生係屬於你自己的, 不是為著向別人交待而活, 總之你清楚自己在做什麼, 認為 "值得" 的, 便去好好的幹吧! 雖然面對舊記憶偶有不捨的感覺, 換個角度而言, 你該慶幸自己曾幸福的碰上佢, 伴你走過值得回憶的歲月, 而且佢也成就你的成長!

Keep his word

「Keep his word」 解作遵守諾言, 早前劉美君說佢的外籍男友早早向佢 make a promise (承諾了佢) 會和佢一起欣賞某一套電影, 結果男友早在航班上睇過了, 為了 keep his word, 所以 "暗啞底" 再同劉美君多睇一次。

有時候, 雖然做的事 "看似浪費時間, 看似無聊" (就像男生護送女生回家一樣), 但那一份心意, 卻教人感到溫馨窩心, 金錢上係買不到的, 這些 "傻氣的行為", 在相處的日子久了, 也許亦會慢慢的 "消失"。在此戥劉美君開心, 揾到愛錫佢的男友!

某天晚上睇電視劇, 劇中男主角因女方家長反對結婚, 要 "暗啞底" 單方面向女友提出分手 (又要不影響女主角和其父母的關係, 所以獨自承受分手原因, 說已經不再愛女方), 終於......生於富裕家庭, 思想單純的女方苦苦痴纏男角追問分手的真正原因 (因為唔信對方 "話變就變")

女方哭斷腸的道：「點解會o甘架?? 你話過愛我的, 係唔係我有什麼地方做得唔夠好? 我可以改架! 我地唔好分開啦!」

此刻.......早已以為 "鐵了心" 的我禁不住流淚了!!

因為我知道 「不是每樣事情也有原因, 不是單方面出了問題, 不是 "改" 就可以解決得了問題! 即使知道了原因又怎樣? 已經 "變了的心" 不可能回復本來的模樣, 鏡子破裂了, 即使再修補也始終有裂痕, 倒不如.......不要 "掀破肚皮" 讓彼此也有 "下台階" 那不是更好的處理方法嗎?」

人與人之間的關係, 是靠 "緣份" 和 "時間吻合" 的機遇造就出來的, 其中一個因素出了偏差, 結局也一樣會改寫! 佛家有云: 一步一腳印, 放下執著! 我地該腳踏實地的去做人, 要捨得那令你成長的經歷, 你才會前進 和 長大!

不要隨便向別人 make a promise, 否則要好好的 keep your word!

面對

有人說碰上問題時, 不妨用 "阿 Q" 一點的心態去面對 (盡量想得 "正面" 一點), 如果解決不了的話, 就不要想得太多, 將它擱在一邊! 日子久了, 它便會淡化 (你會忘掉), 又或者它會被其他人解決

原來此方法並不是適用於每一個人, 將問題埋藏也只是在 "逃避" 它, 令自己的心忐忑不安, 胡亂猜測, 而它也像 "膠袋" 一樣, 難以在一時三刻內分解腐化, 若干時間後, 你發現它始終存在, 只係印象比當初模糊吧!

要學習的地方, 就是鼓起 "勇氣" 去 "面對" 它, 之後你會驚覺原來自己長大了, 面對問題時的思想心態已經完全不同, 少了 "一點火", 亦不再執著, 心內感到踏實許多, 也許沒有當天的問題出現, 不會令你成長至今天的樣子 (造就了現在的你)

人始終要長大向前走, 面對問題解決它, 然後不被它絆著, 才是最好的方法

問題的發生是你成長的証明, 証明你曾經的執著, 幼稚, 純真! 當你長大了, 眼光擴闊了, 然後你才發現 "問題無什麼大不了", 你已經完全有能力去駕馭它!

"問題" 只是你人生中的一個經歷, 令你不斷學習, 不斷成長! 真正要成就一件事 "在適當的時候, 碰上適當的人, 幹上適當的事" 係絕不容易的!

加多加多

印尼菜中有一樣食品叫做 "加多加多", 它係一種印尼沙律, 早前我買左沙律醬 (加多加多醬) 比哥哥的印傭, 之後佢整此沙律比我地食, 材料都有好多架, 如: 椰菜、烚蛋、芽菜、小青瓜、薯仔、豆卜、印尼糯米飯、花生 及 加多加多醬。

材料清清地幾好, 至於醬汁呢.........好香濃的 "花生醬" 味 (另有一包辣粉, 如果唔落的話, 一 D 都唔辣)

笑話分享 ── 同阿嫂 及 印傭到街市買才料整 "加多加多" 時, 才發現原來要買 "好多樣材料", 阿嫂笑言......整 "加多加多"........原來真係 + 多 +多 好多材料呀!!!

惹味的三文魚扒

我好耐無入廚了, 有點怕退步! 某天趁老爸不在家, 一於和媽媽 "作反" 先!! (煮佢唔食的野來食), 結果我整左三文魚扒, 貪其含豐富的魚油 (Omega 3) 對媽媽的健康好一點嘛!

原來急凍的三文魚扒價錢都唔平架! 左揀右揀之下, 才揾到一份 (兩塊的) $29 的, 仲要係一塊靚一塊唔靚 (唔靚的放在盒底, 被遮住, 睇唔到), 好啦........等我講解一下我的製作過程啦! 去片........

1) 解凍三文魚扒後, 沖洗, 印乾水, 用少量鹽醃
2) 半個洋蔥切粒, 備用
3) 將三文魚扒的兩面煎至金黃色, 撈起
4) 爆香洋蔥粒後, 落少許糖, 再放入三文魚扒, 加少量清水, 合上蓋煮
5) 2-3 分鐘後三文魚該已全熟, 食得!!

大家不妨試o下啦!

BB 西瓜誇啦啦

市面上興起了一款手掌o甘大的 BB 西瓜 (無核架), 老爸買左 3 個回家, 我仲好 "招積" 的一人獨霸半個, 用匙羹畢來食添!

都幾清甜多汁喎! 而且外型小巧, 唔駛 "霸晒" 個雪櫃位置

無得揀之中的 "最好"

美國總統奧巴馬爆冷獲得諾貝爾和平獎，掀起滔天爭議。他上任不足九個月，許多政策未有成果... 卻意外地獲獎, 結果惹人話柄

中國人有一句說話: "時勢造英雄" 係絕對正確的, 因為前任美國總統布殊的 "牛仔性格" 四處樹敵, 令國家陷入四處楚歌的狀態, 當奧巴馬接手這個燙手山芋之際, 換上懷柔政策, 向四方示好, 結果扭轉大勢, 令世界的人心重歸美國

今次得獎, 不是因為奧巴馬做得 "特別好", 而係因為布殊做得 "特別差" 吧! 我卻覺得獲獎真是 "言之過早" 呀, 因為還未見有顯著的成效呢!

終於出場了

近年流行自備環保袋購物, 那個由日本空運的環保袋, 終於敵不過歲月的洗禮, 肩帶爛了

好彩 KK 一早就送我這個 "美麗粉紅色的 Melody (我至愛的卡通公仔)" 環保袋, 它終於可以出場 lu

真的想......."嗒" 你

在報章雜誌中見到可口可樂推出的 "一扭凝到結冰" 新產品, 佢的外型同一般膠樽裝的可口可樂無異, 只係當你打開樽蓋飲一口之後, 再合上樽蓋, 然後將可樂倒轉 (樽口向下) 的做幾次, 便會發現內裏的液體部份會結冰, 結冰的多寡視乎你倒轉樽蓋的密度而定, 幾得意!

在炎炎夏日之下, 本來擁著你係一件賞心樂事, 可惜每次經過專屬售賣機時, 產品總出現 "售罄" 二字, 我同你真是十分無緣啊! 希望下次有機會 "嗒" 你啦! 你要等我啊..........

廣告 的 聯想

最近留意到兩個廣告, 令我想起某些事情:

廣告 1) 某牌子的印表機 printer: 廣告內阿葛經常按門鐘問靚女模特兒借 printer 印東西, 我想.......如果你買左此產品在家, 豈不是每天也會被人煩擾麼?

廣告 2) 某珠寶公司中的一段母女對話:
小女兒望向媽媽: 我要嫁人啦
媽媽: 你知道什麼係 "嫁人" 嗎?
小女兒: 唔知呀!
媽媽: 嫁人即係同你深愛的人在一起
小女兒: 媽媽, 我要嫁比你!

相信部份孩童小時候亦講過類似的傻話, 今天聽返的確令人會心微笑, 不過我又會想在小學 (基督教) 的教導下 「你願人怎樣對待你, 你就要怎樣對待人」 如果你一直抱住此信念做人, sorry!! 你將會一次又一次的失望, 因為此理念 "絕不是" 完全正確!

正如廣告 2) 一樣, 母親如何愛鍚子女是無可置疑的, 但是子女長大以後, 卻會尋找自己所愛, "那個所愛" 是原本和佢互不相識, 亦無血緣的一個人, 卻將會取代了母親的位置 (依賴 和 被溺愛 的感覺), 難道 "人性" 一早就暗示了「即使你付出你所有的愛, 亦未必會得到正比的回報」

最可笑的係: 嬰兒孤獨的來到世界, 父母卻一早作準備去迎接佢, 當嬰兒長大成人後, 又有幾多人會好好準備 (盡力完成父母的心願), 為他們的離去作出適當的安排呢?

學會 "放手"

電視劇 "畢打自己人" 其中一集講: 學潛水, 有一課係要學懂 "放手"!

最近讀過一篇文章說:
如果你不再愛一個人, 請你放手, 讓別人有機會去珍惜佢
如果你愛的人已經不再愛你, 也請你放手, 放生別人也是放生自己, 讓其他人有機會去愛你

佛家有云: 放下執著, 活得自在

人總係有無窮的慾望, 總係貪婪的, 而且就在追求理想的同時, 那堅毅個性就似是一種執著, 如果該要放棄的時候, 也不懂放手, 最終就似 "烈火雄心 3" 當中的阿成一樣, 苦了人又害了自己, 何苦呢?

嬌嗲的小姑娘

最近無聊又有新作啦! 就係用 "勾" + "織" 的技巧完成了一條合 3 歲小朋友的裙仔。

整好左就帶去比嫂嫂 及 KK 分享一下先, 點知...........有個小朋友雙眼不停上下打量它喎! 然後我地問准佢, 佢首肯成為我地的模特兒, 神情仲帶點妞妮的去演繹時裝, 超攪笑!!

佢似唔似一個 "嬌嗲的小姑娘" 呢? 似唔似女孩子剪短頭髮呢?

舊情人的邀約

女友人告訴我:「佢的舊情人向佢提出邀約, 想約出來食飯見見面」

佢的心十五又十六, 因為已經事隔多年, 早就放低了唔開心的舊事, 只係偶爾心頭會湧起相處中的開心小片段, 但一閃即逝! 已經多年無見, 佢怕見面時會有芥蒂 (無話題, 彼此有一點尷尬), 亦唔清楚對方邀約的動機 (會不會是轉左行揾生意, 還是最近太空虛無聊, 想揾人 "攝" 時間?)

佢冷靜思考後, 然後回覆舊情人, 婉拒了對方的邀約。

然後對方回覆內容大致係回想起初次見面的情況 及 至今還沿用過去的密碼。

友人隱約覺得舊情人利用密碼一事去暗示 "至今還沒有變", 真可笑! 其實做回普通朋友係無問題的, 只係佢怕未摸清別人的心, 令事件複雜化, 也會令 "過往的美好片段" 化為烏有!

站在女生的角度, 要見舊情人, 不是一件容易的事, 因為唔想 "醜樣過" 以前 (自尊心作祟, 唔想對方覺得自己走得快, 好世界, 而家自己變得 "o甘殘"), 但係又怕節外生枝的惹起對方舊情 (只係想 "活得好過之前", 並不是想重新發展關係), 作為朋友的我, 只可以說.........愛是難以解釋, 送上以下的歌曲比佢, 以作鼓勵啦:

忘掉你像忘掉我 - 主唱: 王菲

想不再回頭　又不想錯過
想不想之間　著了魔
重逢後　白髮後　
又怎知道　是戀火
是如何　燒毀我

假使你仍然　認得這個我
不枉我換來　這結果
狂傲地　任性地　
為想等你　望清楚
為你瘋魔　這樣錯

＊愛我嗎　不戀也恨　
等到白頭　未染塵　
愛我嗎　但如何敢問　
忘掉你像忘掉我心　

生死也為情　是否不會有　
只得苦戀可永久　
明明是沒以後　
但怎麼我　仍牽手　
讓你減輕　你內疚＊

Repeat *

醉人美景

黐起條筋, 同朋友相約影相去, 睇o下我地 D 佳作先, 包括有 迷人的彩霞 同 醉人的夜景!

感謝上天賜我有手、有腳、有眼、有錢 (夠搭車船)、有親友支持 (借出相機)、有時間 (放長假) 去欣賞靚景, 縱使生活偶有不愜意, 不過我比好多人有福了, 我知道.......我該知足!

我的咪咪

咪心邪呀..................... 此 "咪咪" 不同 彼 "咪咪"!

講緊的 "咪咪" 係 普通話 "秘密" 的發音, 之前提過在 6 月開始了一項秘密, 中途停工, 然後復工, 終於完成了! 你睇...........得意嗎? 小姪好鍾意佢的 3 歲生日禮物啊! (仲刻意拎轉背叫我影背脊, 因為有尾巴呀嘛!!)

中秋 暨 哥哥壽辰

在此祝 哥哥 生日快樂, 身體健康, 事事如意, 愛兒孝順, 夫婦恩愛!!

也祝大家 中秋節快樂, 人月兩團圓

大家一齊在家中玩 "集體遊戲" ── 電筒繪畫, 亨仔仲同 KK 姑姐合力畫左一朵有綠葉的花花添, 好靚架!

「夜麻麻, 兩隻鬼黎陪我玩」

哈哈.......上次在室外玩完用電筒繪畫之後, 大家都十分感興趣, 終於等到爸爸回鄉後返港, 飯後立即問佢借 "單鏡反光相機", 在家研究o下, 玩o下先............

因為上次係朋友 調較 相機拍照的 (我唔識架), 所以今晚要 "研究" 一大餐才可掌握 (爸爸的說明書早已丟失了, 只可純粹靠估), 當一切似乎準備就緒時, 誰知..........

相機竟在 "最關鍵時刻" 先黎無電 "抗工"!!!

終於等到差飽電了, 已經係晚上十一點啦! 開頭失敗了好幾次, 之後上網揾資料又嘗試, 再失敗, 再嘗試.......結果終於如願了! 還攪得兩老 "心癢癢" 的陪我玩, 睇見佢地兩老在摸黑的環境中 (只著住電視機的微光) (唔忿氣的 ── 因為失敗了好幾次) 落力對住虛擬空氣去練習 "逆轉寫字", 真的太好笑了! 一瞬間, 大家都似長不大的小孩子一樣 "爛玩"!

比大家睇o下媽媽的傑作啦! 幾厲害幾靚! 其他的照片已經比爸爸刪除晒了!
估唔到 「夜麻麻, 竟然有兩隻鬼黎陪我玩」(夜鬼)! 好好玩啊..........
打算中秋節帶齊相機、腳架、電筒去同大伙兒又玩過先!!

十.一國慶, 齊齊盡慶

今日係 "十. 一國慶" 的大日子, 市民可享有假期一天, 難怪人人也盡慶啦!

講的 "盡慶" 不只是為了國慶, 而係........對香港的管治班底施政太失望 而 "慶過火屎" 的 "慶"!!

醫療常常發生事故: 初生嬰兒斷手斷腳, 手術後物料遺留在病人的體內, 醫院的官僚主意拖延了救人的時機等等, 令人震怒!!

經濟復甦待何時: 金融海嘯之後, 全球面臨訂單減少, 信貸危機等問題, 就連環球性銀行 "匯豐" 亦曾經在股票市場中 "大跌一交", 最終要靠散戶供股集資去化解危機, 可想而知問題有幾嚴重! 在此等時刻, 香港市民 "心目中最信任" 的財金管員 任志剛 宣佈退休, 資深大法官亦緊隨其後, 一瞬間令市民感到: "有能之士 在 無能的管治 之下, 發揮不了能力, 心死辭官歸隱去"! 試問本港的貧窮戶又如何指望在 經濟復甦的 後期, 可輕嚐一羹甜頭呀?

民生 ── 民不聊生是也!! 青年人就業不足 又或者 失業情況上升, 政府只不停加開 "XX 計劃、XX 副學士" 等無謂課程, 目的只在於 延緩青年人的入職年齡, 令失業率 "看似" 維持或下降, 而且還可以以此等課程斂一點少財! 中年人的就職市場更不堪, 工種職位選擇少, 而且薪金又被壓榨, 即使每天工作十幾小時 (還未計 "跨區" 的乘車時間), 所得到的薪金, 根本唔夠承擔一家四口的生活費! 老人的福利不斷被削減, 津貼減少之餘, 生果金又要提高申請門檻, 為何佢地年青時有奉獻稅金, 老來時卻無份共享成果? 政府名義上說 "人口老化", 要量入為出, 所以削減福利, 但對初到港的新移民人士的子女卻處處幫助, 提供各式各樣的津貼、輔導, 還加上綜援、社工跟進等措施, 以助佢地融入社會, 對本地土生土長的人民卻厚彼薄此, 可怒也!

你看看......我地的財政司司長亦 "表明心跡" 一齊 "賀港 (國) 慶", 佢眼見管治上的無能, 終於 "個心" 都出事, 要入院通波仔, 不是麼? 身為升斗小市民 (無力反抗) 的我, 唯有希望 "來年會更好" 啦!

嘩.......美麗健康的秘方

某天在中藥店買野, 見到有一位皮膚靚靚的客人入內買野, 還將那幾款藥材磨成粉末! 客人走了之後, 我向掌櫃 "八卦" 一下藥效先, 原來...............那是一道「美麗健康的秘方」, 於是我又 "學人地" 執一包試o下先 (買左 $66)

材料有: 淮山、茨實、生薏米 (仁) 各 4 兩, 磨成粉末狀, 混和在一起
用法: 煲粥仔, 用一湯匙的 "粉末", 凍水連米一同落, 煲好就食得。(另外可以加瘦肉)
功效: 健脾助吸收、補肺益腎、美容護膚、去濕除水腫 (看似減肥)、增強抵抗力 (減少感冒)

淮山功能補肺益腎，健脾止瀉，益精補氣。用於脾虛洩瀉、久痢、虛癆咳嗽、消渴、遺精、帶下及小便頻數等症。芡實補脾去濕止瀉、益腎固精止帶。薏仁健脾利濕消水腫、寧神安眠，久食可以滋補強身。 薏米更有清熱去濕之功

調理之法，每天早上，用淮山五錢至一，與米配合煮飯，此種淮山飯，有健脾胃、補虛損，調理白帶的好處，作為早餐，收效更佳。又身體素弱者，或久病以致陰虛的人，可將淮山研粉，每日用淮山粉，加入少許白糖或紅糖，煮為稀糊或製糕點食之，長期用為調理品，對身體很有裨益，至於陰虛而又患肺病者，或是壯年人，由於遺精時間太長，引致神經衰弱，有面黃骨瘦，記憶力衰退等病狀，可經常用淮山作為食療品，可收輔助治療之效。

參考網址 http://www.chiusang.com.hk/vegetable/vegetable_80.htm

希望大家服用後都會變得靚靚又健康啦!!

請你睇......「傻瓜真人 SHOW」── 光軌繪畫!

以上的照片, 似唔似一幅美麗的夜景 圖畫, 加上畫家 (mac) 在畫的下方簽名呀?

攝影中的「光軌繪畫」, 英文為「Light Painting」，是一種很流行的創意拍攝手法。繪畫光軌的原理就是運用了長時間曝光的技巧，把光源連續地描繪在感光元件上。一於結伴去 "做實驗" 先!! 詳情請參考: http://www.fotobeginner.com/924/easy-light-painting/

我地先利用腳架穩定相機, 加上調較 "快門" 同 "光圈" 的技巧, 之後我地便利用電筒在漆黑之中 "寫字" 及 "繪畫"。 我地經歷過無數次的失敗, 才有以下的 "精美" 照片面世, 雖然 "它" 不是最完美, 卻令我印象難忘 (真的 "無血有汗", 可媲美海南島的 "跳躍照片" 啊!)

當日我地各人除左寫自己的名之外 (我當然係寫 mac 啦, 貪其簡單, 又可連筆寫!) 還有 "畫出" 星星 及 花花、汽車 及 廢氣、屋仔 及 十字架 等圖案, 其實在摸黑的空氣中 (虛擬的畫板之下), 要 寫出 及 畫出 心中所想, 真的一點也不容易!

如果你地有興趣, 都不妨一試啊, 因為幾有趣架! 以下係一些小貼士:
1) 用 "圓周細一點" 及 "不要太強光 (LED 燈泡太強了)" 的電筒 寫字 及 繪畫, 因為光的線條較幼, 比較靈活控制 ── 線條較優美, 而且所需的時間較短 及 空間也較細
2) 選擇漆黑的背景, 無光干擾的較好 (寫字及繪畫效果較 "出")
3) 還有..........若要寫字的話, 要練習 "逆轉來寫" 啊!

角色的取捨

一對夫妻拍拖多年結婚了, 婚後誕下小寶寶, 夫婦合力建設家庭 及 照顧小寶寶, 然後...............

小寶寶逐漸長大了, 妻子緊張佢的學業, 又怕佢不懂照顧自己, 因此常伴左右

丈夫卻感到他和妻子之間彷彿有一道日漸擴大的鴻溝, 因為妻子的注意力只集中在小寶寶身上, 而忽略了他, 彼此之間似乎 "沒有" 了戀愛的感覺 (二人間缺乏 "維繫" 火花的心), 所以丈夫和朋友吐苦水: 小寶寶已經長大, 不需要長期陪伴, 妻子理應有時間和自己 睇場戲, 去個旅行 或 閒時拍o下拖!

聽完以上的故事, 我有一點得著, 身為女生 而 思想較傳統 的我, 相信婚後如有小寶寶, 也會竭力的去照顧佢, 盡力維持著家庭運作, 可能最終亦會像故事中的妻子一樣, 最後遭老公的埋怨! 因為在 "天性的母愛" 驅使之下, 女生有時會 "過份投入照顧小寶寶" 而不自知, 所以遭 "大寶寶" 的丈夫投訴被冷淡對待!

話說回頭, 如果丈夫將向朋友吐苦水的時間 用作在孩子管教, 家頭細務上, 幫輕妻子一點, 讓她早點完成工作, 那麼便有心情可輕鬆的出外拍拖, 不是麼?

有時候男生永遠就似 "長不大" 的孩子, 即使已為人夫, 為人父, 而女生天性就似是 "管家" 及 "媽媽", 總愛將事事處理得井井有條, 卻又不喜歡別人 "違抗" 自己所訂下的 秩序, 規矩, 計劃! 人和人之間的相處, 角色的取捨, 真的好難去抉擇, 誰也沒有對錯, 只有 "夾 與 不夾"!

想起某年的我

記得友人曾經話過: 我最喜歡你的笑臉, 那是一種孩子氣的笑臉, 看見你笑, 我便倍覺開心, 使我煩惱盡消, 即使辛苦工作, 為博你一笑, 也覺值得!

當時我很噩然, 原來有人欣賞我的笑臉! 我亦不知道 "它" 的威力 (竟可成為別人的推動力)! 還是我平時 "太少笑", 所以 "它" 會以罕為貴呢? 真是要好好反省了!

最近又聽到另一位友人說: 女生多一點笑容, 的確令人喜歡她多一點!

我又想起電視劇中的 "好彩妹" (一個即使面對逆境亦常笑的角色), 我亦相信只要笑多一點, 就會幸運多一點, 至少別人看你 "順眼" 多一點, 也不致會經常 "難為" 你吧!

情懷忽然又回到了那年, 想起那個朝氣勃勃, 面上掛上陽光笑容, 無愁無慮的自己 (似是熟悉, 又彷彿遙遠)