石火燒

某天放工約了友人去尖沙咀「石火燒」處晚飯, 那處係專門食日本美食的, 有刺身、串燒、石光燒、飯麵及飲酒等等。

由於我地唔太肚餓, 只旨在食少少野, 傾o下計, 結果點左:

1) 煙肉香蕉 ($18): 那處的特色推介, 美味的煙肉包住又香又軟又熱辣的香蕉, 口感複雜, 好美味啊! 日後自己 BBQ 時都可以試一下啊!
2) 牛脷 (25): 特色推介, 睇落似 "鵝肝", 口感好爽, 超美味!

3) 煙肉廣島蠔卷 ($23): 廣島蠔既細隻又腥, 好失望!

4) 太子貝 ($15): 好似燒帶子o甘, 唔特別!

5) 墨魚 ($15): 味道一般, 唔特別!

6) 秋葵 ($10): 用火燒秋葵, 又幾好味喎!

7) 牡丹蝦刺身 (蝦頭另炸) ($45 + $5): 牡丹蝦刺身肉質好彈牙, 價錢略貴, 炸蝦頭香口美味!

8) 石火燒羊鞍 ($78 / 2件): 肉質幾嫩滑, 肉汁又豐富, 而且醃得羊肉一 D 都唔酥。

9) 枝豆 ($25): 味道一般, 唔特別!

10) 雞軟骨: 味道一般, 唔特別!

11) 煙肉露荀: 味道幾特別, 值得一試!

12) 茄子: 味道一般, 唔特別!

連飲品及加一共 $500 幾蚊。店內油煙頗大, 客人 Order 多時都好澀眼, 而且味精頗多, 食完都幾口渴。

她比煙花寂寞

記得以前睇過一部戲, 還是一本書, 名叫「她比煙花寂寞」, 內容講什麼已經唔記得了, 只記得劇目 / 書目有一點點特別, 帶一點淒怨的感覺。也許自少多愁善感, 所以對它感到額外的親切。

人類是群體的動物, 總需要別人的認同, 才得以群居、交流。當人慢慢長大的時候, 竟發現......."知己" 原來真的難求啊! 因為在體面的包裝之下, 你已經不懂得再分辨人心, 難以像小孩般坦率相處, 開心唔開心全部都寫在面上, 亦唔怕得罪別人 (初生之犢啊)。

久而久之.....自我保護的圍牆築起了, 你在內裏感到安靜自在, 誰知別人總覺得這有點不妥, 究竟該繼續忠於自己的感覺, 還是該順應別人的好心忠告呢?

迷惘、疲累 (尤其是精神上)......不知點算好 ! 其實低調不想講野會等於情緒病麼? 還是患上了什麼 "社交恐懼症", 也許來一個悠長假期, 所有問題便會迎刃而解了。

有時候 "人" 並不是比煙花更寂寞, 而係想遠離塵囂, 放下俗務, 享受一個人獨處的時光, 靜靜的想一想將來, 輕鬆一下吧!

我討厭

我討厭

1) 天氣整日都濕笠笠, 空氣中佈滿沙塵等污染物
2) "有心人" 裝 "無心人", 令人整天活在防備之中, 以防 "被人跣"
3) 人們太過主觀, 動不動就否決別人的觀點, 還用上難聽的說話
4) 世上紛爭太多, 和諧太少
5) 因為要顧及 "大體", 經常要包裝 (屈就) 自己去成全別人
6) 活得不自在, 因為慾望太多, 而行動太少 (懶~~)
7) 無病呻吟, 有病的卻堅忍的強撐著
8) 經常當 "得到" 的為 "老馮", 不懂得珍惜、感恩和知足
9) 為了自己一己的私慾, 而踩別人膊頭上位, 又或者有人為事業而嫌棄家人 "陀手勒腳"
10) 常活在過去, 無力去開展未來

如坐針氈

一生之中, 人們用上了多少時間在 「等待」上面呢? 如: 等 lift、等車、等位食飯、等朋友

在此金融海嘯之下, 還衍生多一樣野, 就係........「等被裁」 多諷刺啊!

有時候, 人們寧可 "事出突然"、速戰速決的, 總好過像有預知般, 只等待 "不明的時間" 來臨, 然後像被判刑一樣被人處置, 那種等待被處置的心情, 就像等別人擺佈自己的生還時限一樣, 尤如坐針氈, 感覺絕不好受。

這些時候, 通常身邊又會出現很多流言 及 小道消息, 訴說著公司的前景、被裁名單 (人們自己的分析) 等等, 令人更加心煩意亂, 有時甚至會煩躁不安。雖然說 "做果行嫌果行", 同一道理, 大部份員工都唔喜歡自己的公司, 只係尤如擁有 "雞肋" 一樣 (食之無味、棄之可惜), 亂世中, 大家都不敢斗膽貿然的離職, 既怕短時間內揾唔到工, 又怕新公司更刻薄, 再怕薪金被壓榨、福利又要重頭計算等....

總之無論結果如果, 被裁的不一定慘 (也許有另一方面的發展), 留下的亦不一定好 (也許做到死, 仲慘過以前)! 聽天由命, 睇上天的安排、自己的造化吧!

印度的 mug 東東?

早前睇文章知道用 Henna 粉 (指甲花粉 - 印度特產) 來染髮 (黑啡色遮蓋白髮), 有效之餘, 又唔傷頭髮, 因為它係純天然草本製的, 於是四圍打探在港邊處有得賣, 以便幫媽媽染髮, 圖中的售 $20 / 200 g(重慶大廈地下的印度雜貨店有售)

用法 (染髮):

http://hk.myblog.yahoo.com/jw!2ZL6DOuBHhYTY6z4PHH.X_Dk/article?mid=247

1) 用濃茶或咖啡將 Henna 粉, 以 1：1 的方式調開至少 3 個鐘 (又或者隔夜, 不要開得太稀爛)
2) 用梳逐少逐少的將顏料漿染上頭髮, 留在頭髮上 2-3 個鐘 (停留時間越耐, 顏色越便深)

3) 以清水及洗頭水洗頭

另外它還有別的用途架, 就係印度傳統的 Henna 紋身 (Mehndi - 曼海蒂), 相傳印度新人結婚前夕, 男女雙方都會在手上作此傳統紋身, 喻意踏入人生的新階段, 顏料越遲甩色, 婚姻就越幸福 (因為唔駛做家務)。坊間都有唔少網站教人作此紋身架! D 圖案真係好傳統好靚啊! 圖中唧筒裝的 Henna 顏料漿 (已混和) 包裝簡單 (無列明容量, 估計大約 30 g) 賣 $14 / 支

用法 (紋身):

1) 用水將 Henna 粉, 以 1：1 的方式調開至少 3-4 個鐘

2) 將顏料漿放在唧形的袋內及扎好袋口 (用時才剪開唧咀位置)

3) 在需要紋身的位置唧上顏料繪畫圖案

坊間相關的網址(紋身):

http://hk.education.nextmedia.com/index.php?fuseaction=Article.ViewSpecialCoverage&articleID=4664895&issueID=20050318

http://www.wretch.cc/blog/candyzoo/18035675

http://hk.myblog.yahoo.com/meilleurami2008@ymail.com/index?l=f&id=4&page=3

我係 「清水美弥子」

朋友介紹了我這一個網址, 輸入你的中文名字, 就可以睇到翻譯出來的日文名 (當然唔係正宗架啦, 玩o下啫.....不要盡信)。

http://rumandmonkey.com/widgets/toys/namegen/969

原來我係 「清水美弥子」

"清水" (clear water) 不用解釋吧, 而 "美弥子" 就係指三月出生的漂亮小孩 (beautiful march child)

日文名: Shimizu Miyako シミズ　ミヤコ

請大家多多指教呢!!!

大眼貓貓結婚去

之前整左一對 Pair Pair 貓, 後來經過 KK 的一番修飾同打扮之後, 佢地化身成為了一對 "大眼的貓貓", 仲一齊結婚去添, 你睇!!!!!!!!!! 好 "卡娃依" (可愛) 呀........ (我鍾意佢對眼夠晒 "精靈")

少女香奈兒

Chanel (香奈兒) 馳名的國際大品牌, 以簡約及優雅的風格而聞名, 原來......品牌創辦人有著不為人知的過去。創辦人乳名為 CoCo, 和姊姊被父親拋棄在孤兒院, 在院其間學懂了裁衣縫紉等技術, 加上天生對時裝的敏銳觸角, 令佢踏上創業之路。

在佢少女的時候, 有兩個影響佢一生的男子：

1) 法國的將領, 天生的二世祖, 有錢卻待 CoCo 為一件玩物, 有時要求佢像日本技藝般服侍自己, 以滿足自己的控制慾, 又會當著眾人面前奚落 CoCo, 不顧佢的面子, 就像只要比得起錢, 就可以隨意的玩弄 CoCo, 亳不用考慮佢的感受, 他和她之間, 仿佛只是賓主之間的交易關係, 一切都係條件、利益掛帥。

2) 英國商人 (1) 的朋友), 因為家族婚姻關係, 使他即使愛上亦不可能和 CoCo 成為一對, CoCo 成了對方的情婦。商人對 CoCo 十分慷慨及照顧, 亦真心的尊重佢感受, 欣賞佢的才華和眼光, 鼓勵佢創業, 甚至資本上支持佢, 最終卻遭逢橫禍離世。

雖然片中講述時裝的章節不多, 在男女關係上著筆多一點, 不過睇完戲卻令人有一點反思：

1) 選擇伴侶, 最重要係懂得尊重你, 而不是只著重你去滿足佢
2) 在愛的大前題下, 包容是很重要的, 佢總會找個角度去欣賞你所作的
3) 雖然有人相愛而不可愛, 但卻令佢地之間的愛情更覺淒美
4) 當你只顧去愛自己所愛, 忠而自己感覺多於世俗的名份 (不介意無名份), ,可惜卻不一定會得到好結果
5) 雖然你的眼光 (審美) 和世俗的人不一樣, 有時原來你的執著堅持, 用心去做, 最後會得到別人的肯定
6) 女人通常在愛情重傷之後, 才會夢醒, 在事業上發奮圖強

劇末時的時裝表演, 一次過展出多套 Chanel 的優雅時裝, 好靚啊!

父親節, 食屎忽.......(seafood)

今年的父親節原定了正日 (我返學走堂) 帶同姪仔及父母去郊遊, 我和 KK 還一早搜集了資料, 只可惜........天公不造美, 碰上了作打風的炎熱悶焗日子, 又怕會有驟雨, 還是選擇室內節目吧!

爸爸臨時臨急的食欲興起, 多得有大哥大嫂的落力安排下, 得以順利完成其心願, 我想幾位父親大人 (爸爸、舅父、哥哥) 也應該高興吧!

我地中午先聚在一起午餐, 餐後去街市搜購海鮮, 然後去大哥家中和姪仔遊玩、瞓晏覺, 晚上入流浮山 (海景酒家) 食海鮮, 盡興而歸。 我地的餐單有：

1) 豆腐鮮魚時菜湯 X 2 窩 (酒家送的) - 幾好味, 其實該送 1 窩, 不過侍應攞多次, 我地又飲多次
2) 清蒸鮑魚 10 隻 - 蒸完出來都好大隻 (無 mug 縮水), 幾鮮味, 如果有陳皮蒸更好!
3) 蒜茸粉絲開邊蒸象拔蚌 10 隻 - 蒜茸粉絲夠惹味, 象拔蚌又夠鮮!
4) 豉油皇蝦碌 1 斤 - 好好味, 肉又夠彈牙, 只係略咸!
5) 豉椒炒花甲 2 斤 - 無 mug 特別, "無沙" 值得一讚!
6) 薑蔥炒膏蟹 (近 2 斤) - 比想像中多膏, 但係略散, 好難夾起食
7) 清蒸老虎斑 (近 1.5 斤) - 既滑又有魚味, 一個字 "正"!!!
8) 雞油灼生菜 - 唔特別, 略細碟 (加餸)
9) 招牌炒飯 - 唔特別, 略細碟 (加餸-幾乎食晒才記起未影相, 哈哈!)

海鮮買料大約 $650, 另外酒家來料加工、加餸 及 酒水共約 $800, 總數都唔駛 $1500, 算係一餐豐富開心的海鮮夜啦!

素食一家

原本打算和友人到太子始創商場內的「大自然素食」晚餐, 只可惜人太多、要等位, 結果我地改去左旺角水務署斜對面的「素食一家」, 打開餐牌睇, 咦..........款款都唔錯, 攪到心大心細添, 結果隨意點了一客二人餐 $98。

二人餐包括:

南瓜海皇翅 (好香南瓜味, 素翅做得幾真, 唔錯)

煙薰鴨胸 (有一陣煙薰午餐肉味, 有咬口)

鮑魚扒時蔬 (素鮑片麻麻地, 生菜 ok, 不過略嫌 "芡汁" 太杰)

菠蘿咕嚕肉 (味道酸甜剛好, 嗅覺上醋味大左少少, 咕嚕肉好咬口)

炒飯 (都幾足料架, 又有生菜絲, 幾飽!!)

最後埋單 $126 (計埋茶芥及加一), 都好好味啊! 睇來我的 "想食牛扒" 的心, 要暫時 hold 住先, 等適當的時機才可實現。

心思思, 我想試………….

朋友由於身體狀況唔可以飲用 「肉骨茶」, 於是轉贈左兩包「肉骨茶」湯料比我。

講起「肉骨茶」, 我記得果次去新加坡旅行, 那份「肉骨茶」及白飯、油炸鬼的早餐, 令人印象難忘, 因為在香港, 好少人晨早流流食飯當旱餐, 仲要配上香濃藥材味又啖啖肉的 「肉骨茶」, 連我 E 個 大胃王都被嚇親, 可想而言有幾厲害!

製作方法看似簡單：

1) 將清水、湯料 (錫紙袋包裝) 及 蒜頭 20 瓣 一并置入鍋內烹煮至滾
2) 加入已汞水的排骨, 湯再煮沸後, 轉中火繼續烹煮 35 分鐘, 加入黑醬油, 熄火燜 20 分鐘。

你睇……….一瞬間你就變身成為 “大廚” 了!

聽聞曾蔭權都吃不到「黃亞細的肉骨茶」(無開舖), 想一想自己卻可以安坐家中, 印印腳的食到舔舔脷, 你話我幾威!!! 一於趁日後有機會的時候, 整o下美味 「肉骨茶」飲先, 聽講 「肉骨茶」係補身架! 不過唔知補 d mug 呢?

金融海嘯 之 「夠食力」

某天幾名女子在尖沙咀 "小肥羊" 嘆下午茶, "不經意" 地顯露出佢地的 "食力"。

下午茶係下午 2:00-4:00 的, 收費係 $45 / 位 (另外茶錢 $6 / 位 及 加一另計)

佢地點了 25 碟美點, 包括：

1) 香辣脆瓜 x 3 (好味道, 不過部份脆瓜偏咸, 味道 "唔云循")

2) 白雲鳳爪 (味道一般, 肉地 "硬")

3) 五柳皮蛋 (皮蛋味道佳, 五柳一般)

4) 白灼時蔬 x 3 (菜芯部份 "有沙" 及 "老 ── 有渣")

5) 鬼馬牛肉腸 (只食到 "油炸鬼", 食唔到牛肉)

6) 韮菜盒子 (難食.........)

7) 濃湯灌湯餃 (好香濃........的 "味精" 味)

8) 蒜香絲網蝦卷 (餡料 ok, 唯怕 "熱氣", 無食脆皮)

9) 蒜香小肥羊春卷 (炸得 "硬" 左 dd, 唔特別)

10) 蜂巢炸芋角 (好 "硬", 食得出係 "返叮" 之作, 唔掂!!)

11) 西湖盧羊肉水餃 (好香 "羊肉騷味", 愛羊之人必食, 不過一碟四隻太多了, 皮略厚, 有點飽)

12) 金蠔豬骨粥 (好好味, 粥底夠香甜之餘 又有 蠔豉 及 肉食)

13 ) 海皇鮮蝦餃 (比一般酒樓的 "細隻", 味道 ok 啦)

14) 蒙古餡餅 (餡料唔吸引, 飽皮亦厚, 好易飽)

15) 冬菇棉花雞 (同酒樓的無異, 略油膩)

16) 麻辣豬耳絲 (豬耳絲只有口感, 無味道, 汁料味道唔特別)

17) 青瓜伴貢菜 (略咸)

18) 桂花馬蹄露 x 3 (桂花幾香, 馬蹄口感爽, 味道唔太甜, 我鍾意!!)

19) 蜂蜜桂花糕 (桂花味清香, 唔太甜, 不過........好難 "夾得起", 略散!!)

整體而言, 平均每人 $56 食到 8 碟美點, 仲有茶水任飲, 侍應上菜、收碟服務又 ok, 都算唔錯啦! 不失為良朋共聚, 吃喝談天的好地方。 油炸食品, 不點也罷, 反而甜品就幾出色!!

咪玩啦......Baby

有一個故事是這樣的：

妹妹 (用手束起孖辮) 向姐姐道：咦........你還記得嗎? 小時候我常常提早起床, 每朝為你束起孖辮返學架! 那時候你留著一頭長頭髮, 真羨慕呢! (媽媽不准妹妹留長頭髮, 為要佢專心讀書, 不用為 "扮靚" 而分心)

姐姐 (立時用認真的精神一望, 誠心地說)：咦.......你好似 Angelababy 呀!! (潮流的o靚模)

妹妹 (開心的) 說：真係?? 多謝你。 (心甜中)

姐姐 (打開雜誌, 拍著某一幅相)：你睇........你幾似佢!! (變身前之 Baby)

妹妹 (面露 "小丸子" 無奈之神情)：頂你吖............... (正衰人, 咪玩啦......Baby!!)

變身前之 Angelababy變身後之 Angelababy

「她」 九大簋午餐

黃色暴雨警告低下, 要在公司附近覓食 (午膳), 於是去左入職o甘耐都無去過的 "她" 泰國餐廳, 原以為它會好貴, 試過之後才知道價錢尚算合理, 我地一行五人點了一客五人餐, 計埋加一共 $330, 平均每人消費 $66 (加送「超級無敵大海景」, 遠眺 "圓方" 及 "凱旋門" 等豪宅)。

從未試過用午餐價錢食 "晚餐o甘豐富" 的食物架 (碟碟都超大碟)! 滿腹之餘仲要打包添! 有咩野食??? 去片.........

1) 泰式粉絲沙律: 此乃一味 "熱的" 沙律 (真係熱到出煙架), 辣左 d, 勁大碟
2) 豆腐肉碎湯: 味道一般唔特別
3) 泰式炒時菜: 好味, 菜夠嫩又唔太油
4) 泰式燒豬頸肉: 勁大碟, 唔肥, 超飽
5) 泰式魚爐: 魚肉夠嫩, 湯底又清甜
6) 辣椒膏牛柳粒: 唔太辣, 牛夠 "林", 略嫌欠牛味
7) 乾炒貴刁: 唔油膩, 食到 e 碟已經超飽
8) 五色椰子奶 (甜品 ─ 忘了影相): 好香椰子味
9) 泰式鍋巴 (有租戶証送的): 好美味, 唔油膩, 醬汁好大陣椰香味

大家對 E 一餐都 "十分" 滿意, 仲說:「中午食它, 下午的時光倍覺易過, 因為太開心、太滿足了」另一人則說:「是的, 由於食得太飽, 預知下午會打瞌睡, 所以時間會易過囉!」

一定再有下一次!!!

你自豪什麼? 之 「大枷鎖」

有人說：「活在現今的社會之中, 身邊總有不少 "小人"」

有人戀棧「權力」, 常以為自己掌管一切, 包括 "機密" 事情, 最喜歡向外 "扮作" 知道很多, 常常在人前表現出 "手揸大鎖匙" (暗示自己知道太多機密), 還一天到晚, 面上露出 "得戚" 神情, 次數頻密的來來回回、開櫃鎖櫃的煩擾著別人。

誰不知..........

別人看在眼裏, 只覺得是「笑料一則」, 如果你係 "挑通眼眉" 的就應該知道, 這......根本不是「一揪大鎖匙」, 而係好似「巾幗梟雄」四奶奶手中的「一揪大枷鎖」, 你喜歡戀棧它就由得你, 別人根本不會羨慕, 只會可憐你為了它而扭曲了自已的良心, 作了一頭沒有良知和靈魂被囚禁的傀儡, 最終只得你一人每天苦住面過日子, 其他人就樂得逍遙。

別忘了.......最終大家的結局好可能係一樣的, 因為......我地都係打工架囉! (只係老闆眼中一隻有利用價值的棋子吧!) 何解不能令自己賺錢之餘又開心過日辰呢?

「大枷鎖」只因放不下「權力」 (面子), 何苦呢?

相愛很難

好耐之前已經知道有 E 一首歌, 當中林夕填的詞真係好寫得出 "男女對愛情" 的一點點 無奈心態, 好o野!

記得當時睇電影「男人四十」時, 對 E 首歌的印象好深刻, 可能因為歌曲主唱者同電影的男女主角一樣係 "梅艷芳" 同 "張學友" 啦! 學友唱得就人所並知, 最最欣賞阿梅的就係佢獨特的聲線, 去演繹女性 / 人生的無奈, 真係好有感情, 令人好容易投入。

最近睇的舞台劇《小人國2》其中一幕講 "港男港女港式離婚" 的結尾就播出了這一首歌, 其實男女的天性根本不一樣, 對事物的睇法同人生觀、愛情觀都好唔同。

可能女性天生容易投入愛情, 而且相信自身的直覺 (感覺), 喜歡另一半耐唔耐用 "浪漫" 的點子去氹自己, 卻又害怕對方 "太痴身", 令自己缺少空間 (好矛盾啊!)。男生卻覺得 "愛情" 只不過係一剎那的事情, 火花一旦失去就變成長流細水的感情, 當感情安定下來 (結左婚) 又害怕去到終站 (再無追女生自由)。

當大家的理念越走越遠, 而缺少包容、遷就同溝通時, 最終只有一個定局───分開! 即使一個願打、一個願捱的互相遷就得到, 維持了一段關係, 有時卻第三者 (身邊的人) 又會睇唔過眼的去 "比意見" 你, 此時就係要考驗你地的戀情夠唔夠堅定, 可以抵受外來的閒言閒語嗎?

所以有人講過「相愛容易相處難」! 亦有人話過「真正愛一個人要 "隻眼開, 隻眼閉", 不要睇得太清」 (就如歌詞中的最後一句)

相愛很難
歌手：張學友 梅艷芳
作曲、編曲：陳輝陽 填詞：林夕

女:最好 有生一日都愛下去
但誰人 能將戀愛當做終生興趣
男:生活 其實旨在找到個伴侶
面對現實 熱戀很快變長流細水

* 女:可惜我 不智或僥倖 對火花天生敏感
男:不過 兩隻手拉得太緊
合:愛到過了界那對愛人 同時亦最易變成一對敵人

合:也許相愛很難 就難在其實雙方各有各寄望 怎麼辦
要單戀都難 受太大的禮會內疚卻也無力歸還
也許不愛不難 但如未成佛升仙也會怕 愛情前途黯淡
愛不愛都難 未快樂先有責任給予對方面露歡顏

女:得到浪漫 又要有空間
男:得到定局 卻怕去到終站
合:然後付出多得到少 不介意豁達 又擔心 有人看不過眼*

Repeat *

合:無論熱戀中失戀中 都永遠記住第一戒 別要張開雙眼

健康的零食

逛超市發現了這款看似美味的食味 ─── 黑莓乳酪, 還附有大大粒燕麥添 (仲有摺曲膠羹)!

好唔容易等到飯後的 "甜品時間" 了 (忍左好耐唔偷食), 快 d 開來試o下先, 咦........上、下層有錫紙分開乳酪同燕麥的, 又幾細心喎!

黑莓乳酪好大陣提子果醬味, 乳酪味道唔濃, 而燕麥呢......由於太大粒, 又有點硬, 所以進食時會容易 "卡損" 口腔上顎啊! (疼), 是次見識費用大概 $20

食完之後, 立即覺得自己 "好健康", 因為食甜品都選有益的去食, yeah!!

子女算什麼?

生兒育女本是人生中的一件大事, 隨住男女生越來越遲婚, 工時過長及經濟氣氛不好的條件下, 生育係需要莫大的 "勇氣", 而且即使肯生育的夫婦, 大多選擇「一孩政策」, 免得被孩子們花光所有僅餘的精力。

「子女」在父母眼中究竟代表什麼呢?

愛情結晶品 (好老土的一個名詞啊)

開枝散葉的表徵 (人丁旺代表家族興旺、強盛)

維繫夫婦關係的一個工具 (冷淡了的恩愛濃情, 轉化成合力照顧孩子的責任恩情)

鞏固家庭地位的工具 (生到 "兒子", 家翁奶奶睇在 "孫仔" 面上, 對新抱自然 "好一點")

攞綜援的籌碼 (尤其係新移民婦女, 生得越多, 得到的金額越多, 每天仲有閒錢去打牌、飲茶添)

賺取更多錢的一個手段 / 遺產承繼人(如有幸成為 "富商" 之情人, 誕下一男半女, 母憑 子 / 女貴, 飛上枝頭, 從此要什麼有什麼, 你睇徐子淇、梁洛施、呂麗君、甘比等人辦)

當中究竟有幾多父母是真的 "因為喜愛小孩" 而選擇生育的呢?

雖然我未為別人父母, 唔明白為父母者的心態, 不過如果純粹只為 "喜愛小孩" 而生育 (而又有經濟能力的條件低下), 那麼 "領養" 不也是一個好選擇麼? 雖然不是自己所出, 但如果你肯 "領養" 孩子, 社會上少了一個被遺棄的人, 也許日後少了一個邊緣青年, 多了一個被寵愛的孩子, 你 "喜愛小孩" 的慾望又被滿足, 仲可以 "做善事積福" 添! 世界不是變得更好嗎?

上一輩好多父母的子女因為戰爭去世, 那些父母會領養別人的遺孤 (孩子), 當作紀念自己失去的也好、心靈上一個安慰也好、可憐孤兒也好, 很多結局都好圓滿, 子女長大都懂得孝順感恩。「血緣」不能代表一切, 要是生性、待你好的, 沒有血緣也沒有關係, 最重要的係「你和領養子女之間」的那份愛! 你那份無私付出、偉大的愛, 就正如親生父母一樣被受尊重!

作死

常言道：「得閒死都唔得閒病」

最近我........"作死", 又或者叫..."太得閒", 因為我 "作病" 了!

公司附近的辦公室有人確診了患上人類豬流感, 最近我的鼻敏感因天氣差的關係, 頻頻發作, 甚至令雙眼及鼻咽腫脹起來。唔知係鼻敏感太厲害, 還是經常唔夠瞓, 所以開始感到 "作病"。

星期二在公司用了 1/3 盒紙巾 (呻鼻涕), 個頭 同 d 筋骨超痛, 個人無晒心機, 好眼瞓! (周身都感覺好重.....好重.....好重.....) 於是放工以 9 秒 9極速趕回家, 晚飯都唔食, 沖完涼食粒藥即瞓! 我估計當時大約係晚上 8 點, 一覺無夢醒來已經係星期三的早上 7點了, 太好瞓...............我依然仲想瞓! 早上起身好似精神好一點, 個人感覺輕一點 (無o甘重), 知道未完全回復正常。

決定星期三晚上重覆星期二的「對抗作死大計劃」, 希望計劃會成功啦!

「井底之 Mac」 看 「井上之瓜」

早前逛超市, 才發現自己係一個 「井底之蛙 (井底之Mac)」, 你地睇...............嘩嘩嘩!!! $3888 蚊一個西瓜呀, 唔通食左它曉飛? 因 mug 解究賣o甘貴?

啊.............原來它係 「心型」架 (留意紅圈示), 雖然展示的時候被布遮掩了底部, 睇得唔清楚。

抵唔抵就見仁見智了, 如果比 $3000 幾蚊我, 我寧願一大夥人去食餐好, 又或者去旅行觀光好了! 總算見識過啦! 欣賞它總好過擁有它 (因為我諗我會唔捨得食)

美式風格

某天從免費報上讀了李純恩的專欄, 內容講述美國對於橫行全球的 "豬流感" 態度, 深感認同, 內容是這樣的：

風水也是輪流轉, 美國佬巴巴閉閉過了幾十年, 幾曾想到有今天這個霉運?

所以我想, 美國人對於豬流感表現得那麼不看緊, 一來這個病毒不算猛烈；二來也是自尊心作祟。就如香港衛生局局長去電要求美國加強邊防防護, 美國佬就是不加理睬, 我行我素, 這種不講道理的姿態, 其實就是面子上下不來, 自尊心過不去, 你要我這樣, 我偏偏不這樣。

過強的自尊心, 產生於自卑。你如果說美國佬自卑, 他會跟你拼命, 但實際情況反映出來, 卻正是這一回事! 美國幾時如此灰頭土臉過? 但又真是灰頭土臉了。

因為身邊有人一直以 「美式風格」自居, 故此行為舉止上也沾上了美國佬的習性 ─── 無視你的合理要求, 你要佢這樣, 因為面子關係, 即使知道應該做, 也會擺出高姿態, 絕不會做。即使知道繼續下去是有問題的, 也只是別人的問題。這全因為 "過強的自尊心" 作祟。即使知道事實真相 / 原因, 對佢也絕不能說出口, 否則只會自討苦吃, 佢會跟你拼了命!! 所以..............最後只得佢一人孤獨的灰頭土臉了!

「美式風格」究竟是對抑或是錯呢? 還是「一樣米養百樣人」, 和 "風格" 扯不上關係呢? 我只知道要享有一個共融的和諧社會, 是要大家一起 "合作"、"包容"、"多為別人著想" (就如巾幗梟雄的 "四奶奶"一樣, 才會獲得別人的尊重) 假如世界上還有國家比美國更強, 開聲要求美國加強邊防防護, 你估美國佬又會屈服嗎? 這種 "白鴒眼" 見高拜、見低踩的行為絕對得不到別人的欣賞。

中國人的一句話「面係人地俾的, 架就係自己丟的」正正和「美式風格」作一個強烈的對比。

本地大學生 vs 大學生外傭

外傭 = 海外家庭傭工

唔講唔知, 原來好多的國家的傭工 (尤其係菲律賓) 都擁有高學歷水平, 佢地英文流利, 甚至係大學生, 又或者係專業人士添 (如：藥劑師)! 只可惜佢地的國家薪金水平低, 而且就業職位不足 (出路有限), 為求生計, 只好忍受住 "人離鄉賤", 絳尊降貴的去別國打工賺錢養家、貢獻國家。

金融海嘯經濟大衰退的氣氛低下, 本地大學畢業生紛紛投訴揾唔到工做, 雖然都係事實, 但唔等於事實之全部。究竟係 "不能" 揾工"? 還是 "不為" 做工? (嫌棄工種職位低微、大材少用、薪金低、工時長)

難道本地大學生有父母生, 而外傭就沒有父母生的嗎?

中國人有一句說話講得好啱：「馬死.......落地行」, 與其每天坐著怨天怨地怨政府, 點解唔去面對現實接受磨練呢? (出來社會做事, 受o下氣、捱o下苦工作, 即使低微的工作, 只要用心去做, 一定會有所得著的)

雖然我都知道「大學生就業實習計劃」只得幾千蚊津貼看似有一點揾笨 (廉價勞工), 但你一日唔肯面對現實, 投入社會工作賺取經驗, 就一日只會係一張無工作經驗的白紙, 最終只會被人壓價, 甚至不會被聘請做事。難道為了此一時的 "面子、自尊心", 就寧願 30 歲人 (畢業後渾渾噩噩的渡過幾個年頭) 仍是一張白紙 (又或者半張), 恐怕那時候比你成熟懂打算的同輩, 早已捱過了苦, 成就比你高了!

回頭再想, 這豈不是「好笨」?? (只在虛耗青春, 無目標的生活, 為了一時的面子而唔長進) 趁後生, 快 d 捱o下、 快 d 上岸不是更好嗎?

假如有天我慘遭被裁 (裁員), 我會先休息一段短時間, 然後盡快投入勞動市場, 即使揾唔到心水工作, 面對其他工種, 我一樣會做住先, 邊學邊做邊留意更好的機會, 既要賺錢自給自足的過活 (唔通攤大手板問父母, 又或者攞綜援咩??), 亦要趁後生學多一點點知識 (其他的實際工作經驗), 其實..................相比起那些高學歷、擁有專業資格的外傭來講, 我的不幸遭遇又算得上什麼呢? 至少這不過是一個 "過度期", 而且我唔需要 "人離鄉賤", 家人在身邊支持住我, 我已經好幸福, 應該感恩了!

行雷閃電失魂夜

某天晚上睡在床上, 忽視窗口 "狂閃" (像鎂光燈般), 然後..............."轟隆轟隆" 的響, 行雷閃電了!

仲要係十分厲害果隻添!!

弊!!!! 我瞓覺時最怕有聲有光干擾的, 唉............真後悔上次無買 "眼罩", 否則便可以戴上遮擋光源啦!

最後..........唯有整晚以背脊 "背向" 窗口 (眼向屋內) 去睡。 結果早上起床, 筋骨因為整晚無郁而 "硬晒"。