素食一家

原本打算和友人到太子始創商場內的「大自然素食」晚餐, 只可惜人太多、要等位, 結果我地改去左旺角水務署斜對面的「素食一家」, 打開餐牌睇, 咦..........款款都唔錯, 攪到心大心細添, 結果隨意點了一客二人餐 $98。

二人餐包括:

南瓜海皇翅 (好香南瓜味, 素翅做得幾真, 唔錯)

煙薰鴨胸 (有一陣煙薰午餐肉味, 有咬口)

鮑魚扒時蔬 (素鮑片麻麻地, 生菜 ok, 不過略嫌 "芡汁" 太杰)

菠蘿咕嚕肉 (味道酸甜剛好, 嗅覺上醋味大左少少, 咕嚕肉好咬口)

炒飯 (都幾足料架, 又有生菜絲, 幾飽!!)

最後埋單 $126 (計埋茶芥及加一), 都好好味啊! 睇來我的 "想食牛扒" 的心, 要暫時 hold 住先, 等適當的時機才可實現。

心思思, 我想試………….

朋友由於身體狀況唔可以飲用 「肉骨茶」, 於是轉贈左兩包「肉骨茶」湯料比我。

講起「肉骨茶」, 我記得果次去新加坡旅行, 那份「肉骨茶」及白飯、油炸鬼的早餐, 令人印象難忘, 因為在香港, 好少人晨早流流食飯當旱餐, 仲要配上香濃藥材味又啖啖肉的 「肉骨茶」, 連我 E 個 大胃王都被嚇親, 可想而言有幾厲害!

製作方法看似簡單：

1) 將清水、湯料 (錫紙袋包裝) 及 蒜頭 20 瓣 一并置入鍋內烹煮至滾
2) 加入已汞水的排骨, 湯再煮沸後, 轉中火繼續烹煮 35 分鐘, 加入黑醬油, 熄火燜 20 分鐘。

你睇……….一瞬間你就變身成為 “大廚” 了!

聽聞曾蔭權都吃不到「黃亞細的肉骨茶」(無開舖), 想一想自己卻可以安坐家中, 印印腳的食到舔舔脷, 你話我幾威!!! 一於趁日後有機會的時候, 整o下美味 「肉骨茶」飲先, 聽講 「肉骨茶」係補身架! 不過唔知補 d mug 呢?

金融海嘯 之 「夠食力」

某天幾名女子在尖沙咀 "小肥羊" 嘆下午茶, "不經意" 地顯露出佢地的 "食力"。

下午茶係下午 2:00-4:00 的, 收費係 $45 / 位 (另外茶錢 $6 / 位 及 加一另計)

佢地點了 25 碟美點, 包括：

1) 香辣脆瓜 x 3 (好味道, 不過部份脆瓜偏咸, 味道 "唔云循")

2) 白雲鳳爪 (味道一般, 肉地 "硬")

3) 五柳皮蛋 (皮蛋味道佳, 五柳一般)

4) 白灼時蔬 x 3 (菜芯部份 "有沙" 及 "老 ── 有渣")

5) 鬼馬牛肉腸 (只食到 "油炸鬼", 食唔到牛肉)

6) 韮菜盒子 (難食.........)

7) 濃湯灌湯餃 (好香濃........的 "味精" 味)

8) 蒜香絲網蝦卷 (餡料 ok, 唯怕 "熱氣", 無食脆皮)

9) 蒜香小肥羊春卷 (炸得 "硬" 左 dd, 唔特別)

10) 蜂巢炸芋角 (好 "硬", 食得出係 "返叮" 之作, 唔掂!!)

11) 西湖盧羊肉水餃 (好香 "羊肉騷味", 愛羊之人必食, 不過一碟四隻太多了, 皮略厚, 有點飽)

12) 金蠔豬骨粥 (好好味, 粥底夠香甜之餘 又有 蠔豉 及 肉食)

13 ) 海皇鮮蝦餃 (比一般酒樓的 "細隻", 味道 ok 啦)

14) 蒙古餡餅 (餡料唔吸引, 飽皮亦厚, 好易飽)

15) 冬菇棉花雞 (同酒樓的無異, 略油膩)

16) 麻辣豬耳絲 (豬耳絲只有口感, 無味道, 汁料味道唔特別)

17) 青瓜伴貢菜 (略咸)

18) 桂花馬蹄露 x 3 (桂花幾香, 馬蹄口感爽, 味道唔太甜, 我鍾意!!)

19) 蜂蜜桂花糕 (桂花味清香, 唔太甜, 不過........好難 "夾得起", 略散!!)

整體而言, 平均每人 $56 食到 8 碟美點, 仲有茶水任飲, 侍應上菜、收碟服務又 ok, 都算唔錯啦! 不失為良朋共聚, 吃喝談天的好地方。 油炸食品, 不點也罷, 反而甜品就幾出色!!

咪玩啦......Baby

有一個故事是這樣的：

妹妹 (用手束起孖辮) 向姐姐道：咦........你還記得嗎? 小時候我常常提早起床, 每朝為你束起孖辮返學架! 那時候你留著一頭長頭髮, 真羨慕呢! (媽媽不准妹妹留長頭髮, 為要佢專心讀書, 不用為 "扮靚" 而分心)

姐姐 (立時用認真的精神一望, 誠心地說)：咦.......你好似 Angelababy 呀!! (潮流的o靚模)

妹妹 (開心的) 說：真係?? 多謝你。 (心甜中)

姐姐 (打開雜誌, 拍著某一幅相)：你睇........你幾似佢!! (變身前之 Baby)

妹妹 (面露 "小丸子" 無奈之神情)：頂你吖............... (正衰人, 咪玩啦......Baby!!)

變身前之 Angelababy變身後之 Angelababy

「她」 九大簋午餐

黃色暴雨警告低下, 要在公司附近覓食 (午膳), 於是去左入職o甘耐都無去過的 "她" 泰國餐廳, 原以為它會好貴, 試過之後才知道價錢尚算合理, 我地一行五人點了一客五人餐, 計埋加一共 $330, 平均每人消費 $66 (加送「超級無敵大海景」, 遠眺 "圓方" 及 "凱旋門" 等豪宅)。

從未試過用午餐價錢食 "晚餐o甘豐富" 的食物架 (碟碟都超大碟)! 滿腹之餘仲要打包添! 有咩野食??? 去片.........

1) 泰式粉絲沙律: 此乃一味 "熱的" 沙律 (真係熱到出煙架), 辣左 d, 勁大碟
2) 豆腐肉碎湯: 味道一般唔特別
3) 泰式炒時菜: 好味, 菜夠嫩又唔太油
4) 泰式燒豬頸肉: 勁大碟, 唔肥, 超飽
5) 泰式魚爐: 魚肉夠嫩, 湯底又清甜
6) 辣椒膏牛柳粒: 唔太辣, 牛夠 "林", 略嫌欠牛味
7) 乾炒貴刁: 唔油膩, 食到 e 碟已經超飽
8) 五色椰子奶 (甜品 ─ 忘了影相): 好香椰子味
9) 泰式鍋巴 (有租戶証送的): 好美味, 唔油膩, 醬汁好大陣椰香味

大家對 E 一餐都 "十分" 滿意, 仲說:「中午食它, 下午的時光倍覺易過, 因為太開心、太滿足了」另一人則說:「是的, 由於食得太飽, 預知下午會打瞌睡, 所以時間會易過囉!」

一定再有下一次!!!

你自豪什麼? 之 「大枷鎖」

有人說：「活在現今的社會之中, 身邊總有不少 "小人"」

有人戀棧「權力」, 常以為自己掌管一切, 包括 "機密" 事情, 最喜歡向外 "扮作" 知道很多, 常常在人前表現出 "手揸大鎖匙" (暗示自己知道太多機密), 還一天到晚, 面上露出 "得戚" 神情, 次數頻密的來來回回、開櫃鎖櫃的煩擾著別人。

誰不知..........

別人看在眼裏, 只覺得是「笑料一則」, 如果你係 "挑通眼眉" 的就應該知道, 這......根本不是「一揪大鎖匙」, 而係好似「巾幗梟雄」四奶奶手中的「一揪大枷鎖」, 你喜歡戀棧它就由得你, 別人根本不會羨慕, 只會可憐你為了它而扭曲了自已的良心, 作了一頭沒有良知和靈魂被囚禁的傀儡, 最終只得你一人每天苦住面過日子, 其他人就樂得逍遙。

別忘了.......最終大家的結局好可能係一樣的, 因為......我地都係打工架囉! (只係老闆眼中一隻有利用價值的棋子吧!) 何解不能令自己賺錢之餘又開心過日辰呢?

「大枷鎖」只因放不下「權力」 (面子), 何苦呢?

相愛很難

好耐之前已經知道有 E 一首歌, 當中林夕填的詞真係好寫得出 "男女對愛情" 的一點點 無奈心態, 好o野!

記得當時睇電影「男人四十」時, 對 E 首歌的印象好深刻, 可能因為歌曲主唱者同電影的男女主角一樣係 "梅艷芳" 同 "張學友" 啦! 學友唱得就人所並知, 最最欣賞阿梅的就係佢獨特的聲線, 去演繹女性 / 人生的無奈, 真係好有感情, 令人好容易投入。

最近睇的舞台劇《小人國2》其中一幕講 "港男港女港式離婚" 的結尾就播出了這一首歌, 其實男女的天性根本不一樣, 對事物的睇法同人生觀、愛情觀都好唔同。

可能女性天生容易投入愛情, 而且相信自身的直覺 (感覺), 喜歡另一半耐唔耐用 "浪漫" 的點子去氹自己, 卻又害怕對方 "太痴身", 令自己缺少空間 (好矛盾啊!)。男生卻覺得 "愛情" 只不過係一剎那的事情, 火花一旦失去就變成長流細水的感情, 當感情安定下來 (結左婚) 又害怕去到終站 (再無追女生自由)。

當大家的理念越走越遠, 而缺少包容、遷就同溝通時, 最終只有一個定局───分開! 即使一個願打、一個願捱的互相遷就得到, 維持了一段關係, 有時卻第三者 (身邊的人) 又會睇唔過眼的去 "比意見" 你, 此時就係要考驗你地的戀情夠唔夠堅定, 可以抵受外來的閒言閒語嗎?

所以有人講過「相愛容易相處難」! 亦有人話過「真正愛一個人要 "隻眼開, 隻眼閉", 不要睇得太清」 (就如歌詞中的最後一句)

相愛很難
歌手：張學友 梅艷芳
作曲、編曲：陳輝陽 填詞：林夕

女:最好 有生一日都愛下去
但誰人 能將戀愛當做終生興趣
男:生活 其實旨在找到個伴侶
面對現實 熱戀很快變長流細水

* 女:可惜我 不智或僥倖 對火花天生敏感
男:不過 兩隻手拉得太緊
合:愛到過了界那對愛人 同時亦最易變成一對敵人

合:也許相愛很難 就難在其實雙方各有各寄望 怎麼辦
要單戀都難 受太大的禮會內疚卻也無力歸還
也許不愛不難 但如未成佛升仙也會怕 愛情前途黯淡
愛不愛都難 未快樂先有責任給予對方面露歡顏

女:得到浪漫 又要有空間
男:得到定局 卻怕去到終站
合:然後付出多得到少 不介意豁達 又擔心 有人看不過眼*

Repeat *

合:無論熱戀中失戀中 都永遠記住第一戒 別要張開雙眼

健康的零食

逛超市發現了這款看似美味的食味 ─── 黑莓乳酪, 還附有大大粒燕麥添 (仲有摺曲膠羹)!

好唔容易等到飯後的 "甜品時間" 了 (忍左好耐唔偷食), 快 d 開來試o下先, 咦........上、下層有錫紙分開乳酪同燕麥的, 又幾細心喎!

黑莓乳酪好大陣提子果醬味, 乳酪味道唔濃, 而燕麥呢......由於太大粒, 又有點硬, 所以進食時會容易 "卡損" 口腔上顎啊! (疼), 是次見識費用大概 $20

食完之後, 立即覺得自己 "好健康", 因為食甜品都選有益的去食, yeah!!

子女算什麼?

生兒育女本是人生中的一件大事, 隨住男女生越來越遲婚, 工時過長及經濟氣氛不好的條件下, 生育係需要莫大的 "勇氣", 而且即使肯生育的夫婦, 大多選擇「一孩政策」, 免得被孩子們花光所有僅餘的精力。

「子女」在父母眼中究竟代表什麼呢?

愛情結晶品 (好老土的一個名詞啊)

開枝散葉的表徵 (人丁旺代表家族興旺、強盛)

維繫夫婦關係的一個工具 (冷淡了的恩愛濃情, 轉化成合力照顧孩子的責任恩情)

鞏固家庭地位的工具 (生到 "兒子", 家翁奶奶睇在 "孫仔" 面上, 對新抱自然 "好一點")

攞綜援的籌碼 (尤其係新移民婦女, 生得越多, 得到的金額越多, 每天仲有閒錢去打牌、飲茶添)

賺取更多錢的一個手段 / 遺產承繼人(如有幸成為 "富商" 之情人, 誕下一男半女, 母憑 子 / 女貴, 飛上枝頭, 從此要什麼有什麼, 你睇徐子淇、梁洛施、呂麗君、甘比等人辦)

當中究竟有幾多父母是真的 "因為喜愛小孩" 而選擇生育的呢?

雖然我未為別人父母, 唔明白為父母者的心態, 不過如果純粹只為 "喜愛小孩" 而生育 (而又有經濟能力的條件低下), 那麼 "領養" 不也是一個好選擇麼? 雖然不是自己所出, 但如果你肯 "領養" 孩子, 社會上少了一個被遺棄的人, 也許日後少了一個邊緣青年, 多了一個被寵愛的孩子, 你 "喜愛小孩" 的慾望又被滿足, 仲可以 "做善事積福" 添! 世界不是變得更好嗎?

上一輩好多父母的子女因為戰爭去世, 那些父母會領養別人的遺孤 (孩子), 當作紀念自己失去的也好、心靈上一個安慰也好、可憐孤兒也好, 很多結局都好圓滿, 子女長大都懂得孝順感恩。「血緣」不能代表一切, 要是生性、待你好的, 沒有血緣也沒有關係, 最重要的係「你和領養子女之間」的那份愛! 你那份無私付出、偉大的愛, 就正如親生父母一樣被受尊重!

作死

常言道：「得閒死都唔得閒病」

最近我........"作死", 又或者叫..."太得閒", 因為我 "作病" 了!

公司附近的辦公室有人確診了患上人類豬流感, 最近我的鼻敏感因天氣差的關係, 頻頻發作, 甚至令雙眼及鼻咽腫脹起來。唔知係鼻敏感太厲害, 還是經常唔夠瞓, 所以開始感到 "作病"。

星期二在公司用了 1/3 盒紙巾 (呻鼻涕), 個頭 同 d 筋骨超痛, 個人無晒心機, 好眼瞓! (周身都感覺好重.....好重.....好重.....) 於是放工以 9 秒 9極速趕回家, 晚飯都唔食, 沖完涼食粒藥即瞓! 我估計當時大約係晚上 8 點, 一覺無夢醒來已經係星期三的早上 7點了, 太好瞓...............我依然仲想瞓! 早上起身好似精神好一點, 個人感覺輕一點 (無o甘重), 知道未完全回復正常。

決定星期三晚上重覆星期二的「對抗作死大計劃」, 希望計劃會成功啦!

「井底之 Mac」 看 「井上之瓜」

早前逛超市, 才發現自己係一個 「井底之蛙 (井底之Mac)」, 你地睇...............嘩嘩嘩!!! $3888 蚊一個西瓜呀, 唔通食左它曉飛? 因 mug 解究賣o甘貴?

啊.............原來它係 「心型」架 (留意紅圈示), 雖然展示的時候被布遮掩了底部, 睇得唔清楚。

抵唔抵就見仁見智了, 如果比 $3000 幾蚊我, 我寧願一大夥人去食餐好, 又或者去旅行觀光好了! 總算見識過啦! 欣賞它總好過擁有它 (因為我諗我會唔捨得食)

美式風格

某天從免費報上讀了李純恩的專欄, 內容講述美國對於橫行全球的 "豬流感" 態度, 深感認同, 內容是這樣的：

風水也是輪流轉, 美國佬巴巴閉閉過了幾十年, 幾曾想到有今天這個霉運?

所以我想, 美國人對於豬流感表現得那麼不看緊, 一來這個病毒不算猛烈；二來也是自尊心作祟。就如香港衛生局局長去電要求美國加強邊防防護, 美國佬就是不加理睬, 我行我素, 這種不講道理的姿態, 其實就是面子上下不來, 自尊心過不去, 你要我這樣, 我偏偏不這樣。

過強的自尊心, 產生於自卑。你如果說美國佬自卑, 他會跟你拼命, 但實際情況反映出來, 卻正是這一回事! 美國幾時如此灰頭土臉過? 但又真是灰頭土臉了。

因為身邊有人一直以 「美式風格」自居, 故此行為舉止上也沾上了美國佬的習性 ─── 無視你的合理要求, 你要佢這樣, 因為面子關係, 即使知道應該做, 也會擺出高姿態, 絕不會做。即使知道繼續下去是有問題的, 也只是別人的問題。這全因為 "過強的自尊心" 作祟。即使知道事實真相 / 原因, 對佢也絕不能說出口, 否則只會自討苦吃, 佢會跟你拼了命!! 所以..............最後只得佢一人孤獨的灰頭土臉了!

「美式風格」究竟是對抑或是錯呢? 還是「一樣米養百樣人」, 和 "風格" 扯不上關係呢? 我只知道要享有一個共融的和諧社會, 是要大家一起 "合作"、"包容"、"多為別人著想" (就如巾幗梟雄的 "四奶奶"一樣, 才會獲得別人的尊重) 假如世界上還有國家比美國更強, 開聲要求美國加強邊防防護, 你估美國佬又會屈服嗎? 這種 "白鴒眼" 見高拜、見低踩的行為絕對得不到別人的欣賞。

中國人的一句話「面係人地俾的, 架就係自己丟的」正正和「美式風格」作一個強烈的對比。

本地大學生 vs 大學生外傭

外傭 = 海外家庭傭工

唔講唔知, 原來好多的國家的傭工 (尤其係菲律賓) 都擁有高學歷水平, 佢地英文流利, 甚至係大學生, 又或者係專業人士添 (如：藥劑師)! 只可惜佢地的國家薪金水平低, 而且就業職位不足 (出路有限), 為求生計, 只好忍受住 "人離鄉賤", 絳尊降貴的去別國打工賺錢養家、貢獻國家。

金融海嘯經濟大衰退的氣氛低下, 本地大學畢業生紛紛投訴揾唔到工做, 雖然都係事實, 但唔等於事實之全部。究竟係 "不能" 揾工"? 還是 "不為" 做工? (嫌棄工種職位低微、大材少用、薪金低、工時長)

難道本地大學生有父母生, 而外傭就沒有父母生的嗎?

中國人有一句說話講得好啱：「馬死.......落地行」, 與其每天坐著怨天怨地怨政府, 點解唔去面對現實接受磨練呢? (出來社會做事, 受o下氣、捱o下苦工作, 即使低微的工作, 只要用心去做, 一定會有所得著的)

雖然我都知道「大學生就業實習計劃」只得幾千蚊津貼看似有一點揾笨 (廉價勞工), 但你一日唔肯面對現實, 投入社會工作賺取經驗, 就一日只會係一張無工作經驗的白紙, 最終只會被人壓價, 甚至不會被聘請做事。難道為了此一時的 "面子、自尊心", 就寧願 30 歲人 (畢業後渾渾噩噩的渡過幾個年頭) 仍是一張白紙 (又或者半張), 恐怕那時候比你成熟懂打算的同輩, 早已捱過了苦, 成就比你高了!

回頭再想, 這豈不是「好笨」?? (只在虛耗青春, 無目標的生活, 為了一時的面子而唔長進) 趁後生, 快 d 捱o下、 快 d 上岸不是更好嗎?

假如有天我慘遭被裁 (裁員), 我會先休息一段短時間, 然後盡快投入勞動市場, 即使揾唔到心水工作, 面對其他工種, 我一樣會做住先, 邊學邊做邊留意更好的機會, 既要賺錢自給自足的過活 (唔通攤大手板問父母, 又或者攞綜援咩??), 亦要趁後生學多一點點知識 (其他的實際工作經驗), 其實..................相比起那些高學歷、擁有專業資格的外傭來講, 我的不幸遭遇又算得上什麼呢? 至少這不過是一個 "過度期", 而且我唔需要 "人離鄉賤", 家人在身邊支持住我, 我已經好幸福, 應該感恩了!

行雷閃電失魂夜

某天晚上睡在床上, 忽視窗口 "狂閃" (像鎂光燈般), 然後..............."轟隆轟隆" 的響, 行雷閃電了!

仲要係十分厲害果隻添!!

弊!!!! 我瞓覺時最怕有聲有光干擾的, 唉............真後悔上次無買 "眼罩", 否則便可以戴上遮擋光源啦!

最後..........唯有整晚以背脊 "背向" 窗口 (眼向屋內) 去睡。 結果早上起床, 筋骨因為整晚無郁而 "硬晒"。

六四回憶事件簿

一九八九年「六四事件」令大部份中國人留下深刻的印象。

當時就讀小學高年級的我, 對事件的始末不太清楚, 只記得在成年人的評論 及 媒體的佈導低下, 知道中國學生為爭取 "民主自由" (以絕食靜坐抗爭, 爭取和政府面談商討), 最後演變成流血事件、武力鎮壓。電視中傳來一幕幕被坦克輾過的屍體, 一具具被武力打至重傷流血, 甚至死亡的人們, 叫人驚心動魄。

在本港, 各大政黨人員紛紛站出來支持學生抗爭, 又為佢地籌款作抗爭經費, 估不到學生最後落得這下場。之後本港人士紛紛在臂上纏上黑紗布, 以哀悼為事件流血的人, 還記得當時受到群體影響的我 (社會的氣氛、學校的同學、老師們), 我亦有戴上黑紗布, 甚至因此感染到哀愁想哭添!

因為對事件唔了解, 我唔可以中肯的評論誰是誰非。不過我兒時對「六四事件」的記憶係o甘薄弱的時候, 如果清楚知道事件的人隨住時間過去而逝世, 中國歷史教科書又沒有詳細紀錄, 那麼.........我地的下一代還會知道「真相」嗎? 中國歷史還完整而詳實嗎?

始終唔明白, 在文明的社會底下, 即使有人犯錯, 非要用 「武力」解決嗎? 何解「中國人要殘殺同胞」? 這會給其他人看不起的。

其實世界各地的 "慰安婦" (包括中國) 經常遣責日本人不承認當年侵華的暴行, 又唔肯道歉, 經常 "美化" 侵華史實, 試問日本國民睇見你地中國人血腥鎖壓同胞, 事後唔承認事實, 還刻意淡化事件, "中國人" 又憑什麼話別人呢?

我對當時的「六四」事件有著以下記憶:
1) 民主女神像
2) 民運歌曲 "為自由"
3) 歌曲 "血染的風采"
4) 學生領袖 "吾爾開希"、"王丹"、柴玲" 等人
5) 電視中黑暗的天安門廣場, 有著一列列的坦克車經過, 亦有零星槍聲劃破寧靜的夜空
6) 解放軍狠狠的杖打手無寸鐵的學生
7) 地上一具具的流血屍體 (數量太多, 睇見都心寒)
8) 電視中多位成年人為事件流淚 (包括中、港人 及 國內高官)
9) 天安門廣場 及 人民英雄紀念碑
10) 實施戒嚴 及 新聞封鎖

希望我地的下一代仍然有途徑去了解這一次的近代史, 雖然佢地未必體會當中的一切, 亦未必心內有一團火去為 「六四」平反, 但至少知道有這麼的一回事, 曾經確確實實的發生過

Pair Pair 貓

最近興緻到, 創意澎湃湧上腦, 一於等我化構思成事實先, 結果整o左一對 "Pair Pair 貓", 靚嗎?

唔駛諗啦........已經有o左 "送禮對象" 了, 遲 d KK 還會幫我再 "美化" 一下佢地添!

白貓頭仔側側的傾向黑貓, 夠晒嬌俏, 合上眼又含情脈脈o甘, 一身純白的毛色配上粉紅口鼻及蝴蝶, 好可愛啊! 黑貓身形夠英偉, 眼仔碌碌的偷望白貓, 夠古惑, 而且黑色的毛色配上金色口鼻, 加上鮮紅色蝴蝶, 既搶眼又靚仔。

今次我都幾滿意作品, 用左 3 晚時間去整, 大約 10 小時啦!

實物尺寸:

白貓 ── 6" (長) x 3" (闊) x 3.5" (深)

黑貓 ── 7" (長) x 3.5" (闊) x 4" (深)

阿土麵線

唔少去過台北西門町的朋友, 一定試過馳名的「阿宗麵線」 (要企街食的, 無坐位), 最近去旺角的 "阿土麵線" 試食懷緬一番, 據說 e 度係名副其實的師承台灣「阿宗麵線」架!

"阿土麵線"有 3 種 size (標準-$12、中碗-$15 及 特大-$18), 圖中的為特大碗 + 豬腸 (另加 $4), 總括而言, 都係台灣好食 d, 而這處的麵線 "味精" 及 "木魚絲味" 好重啊!

還有多款配料可自行選擇加入 (另加錢), 一試都無妨的。

現代的打工仔寫照

所謂 「同人唔同命, 同遮唔同柄」係有根據的, 就以現代打工仔為例, 有人文件堆滿辦公桌, 忙到 "一頭煙", 還要活在別人的監視之中工作。

有人在工作時間化身成為 "一頭田鼠", 在坐位中上上落落的鬼祟四圍望。

亦有人尤如椅子裝有 "彈弓" 一般, 屁股剛坐下, 又會立時彈起來, 去突擊檢閱四周。

頂.........若真的o甘多時間無o野做, 倒不如去幫o下別人手工作, 再不然的就 「出少句聲、攪少 d 事當幫忙」 便好了!

不敢苟同的介紹

掀開唔同的報章雜誌, 為求銷路, 除了嘩眾取寵的標題之外, 最攪笑的係........................不論介紹那一位 "女藝人", 上至明星, 下至o靚模、女新人, 記者總愛以 3x C (數字 + 字母) 去形容女性的上圍, 再去介紹那位女藝人的姓名。

可能因為有求才有供 (供求關係), 所以一眾女藝人 (尤其係初出道的o靚模、女新人) 出席活動時, 總愛以性感打扮作出位、博上報 (維持曝光率)。

唔知道婦孺團體會唔會覺得有辱女性呢? 亦唔知我地的下一代受這些報導的薰陶底下,究竟會唔會將佢地的道德觀 / 性觀念變得太開放呢?

哈哈..............日後要介紹自己做 34 Z 的 Big Mac 了(下圍), 勁!!!

湘川滬

早前去葵青劇院睇舞台劇之前, 走左去劇院附近的「湘川滬」晚餐, 點了二人餐, 再加一個小菜幾個人一齊食, 總共 $270, 有 d mug 野食先??? 去片.............

二人餐:

粟米魚肚羹: 似粟米羹, 味道唔特別 (無影相)

前菜兩小碟 (肴肉 同 炸魚): 肴肉夠香滑, 炸魚又甜美 (係乾左少少)

煎鍋貼: 皮薄餡靚又夠熱, 仲好多肉汁添, 好味

糖醋鱸魚: 糖醋汁正, 鱸魚炸炒略厚, 鱸魚肉少

干扁四季豆: 惹味唔太辣, 豆又夠嫩, 正

甜品 (紅豆沙): 唔特別, 亦無果皮味 (無影相)

加餸:

椒川海龍筋: 海龍筋係高纖的素食, 口感爽口, 不過無味, 全靠 椒川 釣味, 好香而唔太辣

整體而言, 食物、服務同環境質素唔錯啊, 不失為睇劇前的一個好選擇

咖哩鄉里

某天中午去左尖沙咀的 City Super 買外賣作午餐, 選了 "咖哩鄉里" 出品的商場午餐, 睇o下有 d mug 野食先:

一盒白飯、咖哩羊肉、胡椒餅 拼 印式薄餅、兩小盒雜菜、一盒醬汁 (點薄餅) 及 可樂一杯 (共 $45)

嘩嘩嘩..............真係飽到冚, 食唔晒, 味道仲「超正」添! 尤其係 咖哩羊肉、胡椒餅 拼 印式薄餅, 其實可以一個餐, 兩位女士 share 食都夠架!

《小人國2》

和朋友一齊去葵青劇院睇左《小人國2》, 一套以嬉笑怒罵方式諷刺 "總有一個o係你左近" 的時代小人, 內容如下:

鬼妹仔現形記2之裁員風雲: 反映時下部份女小人以 "姣" 及 "狠毒" 手段去踩低別人, 抬高自己, 以保飯碗及地位

踢走負能量: 用 "志雲大師" 講座去說明時下部份人的 "奇異" 想法, 去排斥 "思路正常" 的人

白蛇新傳: 諷刺政治官員 "吞 pop 偷懶" 同 "睇咸網"

超市喪「師」: 說明都市中有不少 "師奶" 趁超市越接近 "收市" 時的減價優惠

囧樣少男少女: 時下部份 "新潮而無家庭負擔" 的少男少女見工面試唔認真, 目中無人而創意無限 (為自己揾借口) 的潮語溝通模式

便利店員深宵實錄 I: 便利店內真係 mug 人都有, 有 d 人借故向人發脾氣而減壓, 好變態

港男港女港式離婚: 反映時下港男同港女包二奶揾情夫的事實

便利店員深宵實錄 II: 原來世界上有 d 人做事 "損人而不利己", 純粹鍾意玩人

卸膊天后 Christine Law: E 一幕 "好正", 因為我試過唔少 (好有共鳴), 大機構的顧客服務熱線, 常將客人當 "人球"

基米高淚灑 Bollywood: 有些人成人以為自己 "好有料", 即使去到新地方, 唔肯主動融入別人圈子不特止, 還常常懷緬過去的風光, 要其他人遷就佢

整體上, 成套劇無悶場, 笑聲掌聲響不停, 而我最欣賞的係 "踢走負能量" 、"囧樣少男少女"、"卸膊天后 Christine Law" 同埋 "基米高淚灑 Bollywood"。最後的一幕更有大型的印度歌舞, 全場觀眾一同拍掌打拍子, 大家睇得好投入, 就好似睇緊 "演唱會" o甘, 好有氣氛, 好好笑啊!!

帶你去試泰滋味

帶左媽媽同 KK 去左尖沙咀的山林道食泰菜, 今日佢地的戰鬥力麻麻 (因為佢地食左 "小肥羊" 點心自助餐 - 下午茶, 所以撐飽了胃口)。

我地叫左:

1) 青木瓜絲沙律 $5X (幾美味, 不過辣左 D)
2) 冰鎮四寶 $98 (食口感 - 夠爽, 但海鮮凍到無咩味, 只食醬料)
3) 自選串燒 $13/串 (豬頸肉 - 夠林甜、牛脷 - 好有牛香味, 少少UN、冬菇 - 好香又好食)

4) 海鮮菠蘿炒飯 $56 (好香又惹味, 炒飯唔太油, 唔覺唔覺就食晒整碟飯, 好味到唔停得口)

整體而言, 太美味了! 只可惜 "泰式生蝦刺身" 無貨啦........無得食, 好失望啊!

去 Hut 食

叫人地 "去乞食" 係十分無禮的, 不過........叫人地 "去 Hut 食" (Pizza Hut) 就係一件 "柴娃娃" 的開心事了, 用匯豐信用卡優惠叫了特選二人晚餐 $178, 套餐包括: 餐湯、飲品、前菜 (香草烤磨菇)、天使麵 (青口天使麵)、普通批 (烤雞芝麻脆批)、甜品 (忌廉泡夫)

烤雞芝麻脆批味道唔錯, 天使麵不能食太多, 否則會 "好漏", 前菜卻出奇地好, 整體來講 "幾滿意"。

巾幗梟雄的情誼

最近全城都迷上了睇電視劇《巾幗梟雄》,當中演員黎耀祥同鄧萃雯的演技, 觀眾根本無需質疑。

我尤其欣賞其中一句金句:「王爺保四奶奶, 四奶奶保我, 我保你」

塵世間, 有幾多人願意同人共患難? 尤其係對 “萍水相逢” 的人, 古時曹植 “七步成詩” 的事件中, 已經見到即使為有血緣的親兄弟, 也可以因為利益而難為對方, 更遑論共患難?

曾幾何時, 香港人亦曾經守望相助, 當時的鄰里關係十分融洽, 人與人之間無分彼此, 尤其在公共屋村中更見溫情。只可惜太多騙案發生, 慢慢的人們收起了同理心和同情心, 各家自掃門前雪,對週遭的事情經常不聞不問。令電視劇中共患難的情況更見可貴。

劇中柴九出身草根, 目光短淺, 做事有勇而無謀, 往往只有一股蠻勁向前衝, 不理後果,為佢自己和週遭的人帶來好多麻煩。四奶奶雖然知道佢的缺點, 但處處對佢包容, 甚至以自己的性命去維護佢, 行為令人動容, 怪不得柴九對佢那麼忠心不二。

無論幾好的 “千里馬” 也需要有 “伯樂” 的賞識才能發揮最大的效益, 如果 “伯樂” 無心胸 (妒忌對方的長處), 而 “千里馬” 無耐性去等候 “伯樂” 的出現, 意志消沉的放棄表現自己, 那便有點可惜了。

蝦麵店

早前去左灣仔蘭杜街揾食, 結果去左蔡瀾同阿蘇都介紹過的「蝦麵店」, 原來在網上的食評都講:「可以試到馬來西亞的蝦麵」, 唔通真係o甘好食?? 等我去試o下先。

我叫左一客 "咖哩喇沙海鮮油麵", 要 $47 / 碗架, 都幾貴。

麵食送來時, 咦.........外觀唔錯喎, 仲好足料添, 湯底好香椰汁同蝦味, 應該加左一點味精, 少少辣, 蝦都幾新鮮, 其他用料 OK 啦!

有少少 "名過其實", 在灣仔晚餐而言, 價錢算合理了。店內裝修簡樸, 不過開唔夠冷氣, 只得風扇開動, 流了一點點汗 同 焗焗地呀!

我的「甜心」

外國人最愛稱佢地 "愛的人" 為「甜心」, 最近 "畫興" 正濃, 幫我的「甜心」畫左一幅畫像, 唔知佢長大後覺得似唔似呢?

你地又覺得似唔似呢?

有時候 “無知” 也是一種快樂

從前有一個初出茅廬的女生獲得上司的器重, 教授佢不同範疇的工作知識, 將白紙般的佢訓練得可以獨立工作, 有時甚至彼此當作朋友般交心傾吐。後來經濟環境不佳的大趨勢下, 市道上常見公司倒閉、裁員。

女生因為工作關係, 會接觸到一些機密資料, 於是知道公司的狀況不妙, 會有經營不下的機會, 於是另覓發展, 最遺憾的係…..基於 “工作操守” 關係, 不能公開消息, 眼見工作伙伴每天仍舊嘻哈的笑, 不知將會面臨遣散, 只好心裏替佢地著急, 自己亦唔開心。

本來 “食君之祿, 擔君之憂” 係無可厚非的, 不過…….如果 “不在其位, 不謀其政” 也絕對正確啊! 要想辦法的, 該是那些位高權重的管理層, 佢地受的俸祿較高, 當然要憂心的事亦較多啦!

面對刻下的經濟環境, 雖知狀況不太好, 四處也是裁員消息, 不過……..我會好好享受此刻的 “無重、無知” 狀態 (既然 “唔知道” 將來會點, 倒不如 “開心左” 才算), 即使日後真的不幸被裁, 那將來會唔開心一陣子, 總好過由而家開始唔開心呀! 而且相比起那些 “唔話得事” 的劊子手(無實權的管理層, 卻要作傀儡般執行上頭命令), 我已經幸福得多了, 至少……..我可以坦蕩蕩的安枕, 不用覺得 “戥同事將來的仕途” 而難受。

常常覺得 “一切上天自有主宰, 無謂爭、無謂愁”

男不壞, 女不愛

「人類」 天生都係 「犯賤」的..........................點解?? 因為我愛上了一位壞透的花花公子, 雖然佢魅力非凡, 又惹人注目, 十足萬人迷一樣, 但佢卻喜歡藉此去吸引身邊的異性, 享受著被女的圍繞身邊的優越感, 將他人玩弄於股掌之間, 真係令人對佢又愛又恨啊!

講緊的係欣賞完百老匯經典舞台劇 CATS 之後, 那令我印象深刻的一隻公貓, 以下係佢的資料:

羅騰塔格(Rum Tum Tugger )花花公子

Rum Tum Tugger 被稱為好奇的貓。因為因為他的人類家庭對他百依百順，把他寵得過於厲害，使他挑剔任性，沒有責任感，只喜歡得不到的東西。

Rum Tum Tugger 是貓里的搖滾歌星（他的歌也是傲氣十足的搖滾樂），最受女性的歡迎。他自己無疑很清楚這一點，在聚光燈的照耀下享受盡了女性們瘋狂的迷戀。他輕浮地挑逗場上的母貓們，幾只小母貓對他尤其痴迷，跟着他從場這一頭跑到那一頭。而公貓們則對他的誇張舉動表現得很冷淡（如果不是嫉妒的話）。

佢自信狂妄玩弄母貓的 "罪証"

http://www.youtube.com/watch?v=LNCbharr18U

唉...............明知佢的壞, 卻又不能自拔的在瞬間 "迷上佢" (3 小時內), 甚至對佢歡呼尖叫, 因為佢自信而奔放的演出, 既媚且妖, 亦中亦邪的........簡直想攞佢的簽名同合照啊! 噢................我無得救啦!!

百老匯名牌舞台劇 - CATS

睇左百老匯名牌舞台劇 - CATS, 嘩..................到場時人山人海, 而且好多外籍人士來睇 show, 佢地大多數衣著打扮得好似去飲宴一樣 "盛裝", 而我就.........T 恤牛仔褲, 嘻嘻!!

劇中各貓兒 (各演員) 的演出相當投入落力, 每一幕 (個幾鐘內) 十分有勁地唱歌跳舞, 極有活力, 勁!! 舞蹈的難度頗高, 需要好柔軟的身體 和 很強的體能才可應付, 而且佢地連小動作也非常之 "貓兒", 總括來講, 令我眼界大開之餘, 全程無悶場, 票價 $395 (最平的票) 雖然感覺有點貴, 但也物有所值。

大致的劇情:

第一幕 :

今夜是一年一度的舞會,所有的貓兒們都在夜靜無人的廢墟中彙集, 音樂很快地沖斥整個劇場。白貓 Victoria 表演了一首獨舞,象徵著一場舞會的正式開始。

強健的灰貓 Munkustrap 是貓族管事人,也是小貓的守護者, 他給小貓解釋了潔里珂舞會的意義。在這一年一度的月圓之夜,貓族的首領 Old Deuteronomy 會在黎明到來之前選出一隻貓來,送上雲外之路（Heavy Side Layer〉,從而獲得重生。因此在舞會上,貓兒們都要登場介紹自己,希望能去美妙幸福雲外之路

JennyAnyDots 對待所有的小貓都親切得像老媽媽一樣。

Tugger是一隻被寵壞了的好奇貓 (搖滾貓)，他也最喜歡所有母貓們對他的迷戀。

Grizabella出現了, 她現在又老又醜又髒。因為她年輕時背叛了潔里珂貓,離開貓族到外面的世界闖盪,嘗盡了冷酷辛酸。現在獨自人回來, 可是所有的貓兒不原諒她, 並把她趕走。Grizabella 於是悄悄躲在舞台的角落裡。

Bustopher Jones 這個肥貓是一個富商, 令所有同類驕傲。

兩隻小偷貓 - Mongojerry 和 Rumpleteazer 表演了歌曲的舞蹈, 隨著舞會的高潮,所有的貓加入了歌舞,《貓》的主旋律再次響起。

Grizabella 再次回到舞台中心,貓兒依然不肯原諒她,這時 Grizabella 唱出動人心弦的「記憶」,首領Old Deuteronomy 同情地注視Grizabella 。

第二幕 :

貓兒們再次回到舞台上的時候, 首領 Old Deuteronomy 用歌聲提醒他們記憶快樂時光。 老貓 Gus 是一隻曾風靡所有劇院的演員,現在他回憶著自己當年的日子,尤其是他最得意的創作。

火車貓是個滑稽可愛的叔叔。大家幫他用堆積場的廢物堆出一輛火車頭,讓他站在上面。

快樂的舞會被罪犯貓 Macavity 打斷了。他在黑暗之中劫走了 Old Deuteronomy。這時 Old Deuteronomy 忽然又回到場上, 然後突然甩下灰皮,原來是 Macavity 假扮前來搗亂。

神奇的 Mistoffelees 先生在眾貓的要求下成功地變回了 Old Deuteronomy。

貓兒們再次準備聆聽老首領的選擇。Grizabella 又一次上場了。可是這一次,在她歌唱「記憶」的時候, 貓族裡最年幼的小貓 Jemima 用歌聲回應。這時貓兒們原諒了 Grizabella,使她重新回到潔里珂溫暖快樂的家族裡來。 Grizabella 登上雲外之路，獲得重生！

劇中精彩片段

貓兒們出場參與舞會

http://www.youtube.com/watch?v=IFCNzuVvxGY&feature=related

白貓 Victoria 獨舞片段

http://www.youtube.com/watch?v=ePQ-wnIIcTs

動聽歌曲 - Memory (記憶)

http://www.youtube.com/watch?v=4-L6rEm0rnY&feature=related

罪犯貓 Macavity 出場

http://www.youtube.com/watch?v=GvLxkfOFnFc&feature=related

不知不覺迷上你

以前成日同人講, 在公司已經對住電腦 10 個鐘 (大約), 放工後回家當然唔想再對仕屏幕啦! 尤其是怕眼累會加深近視。

不過上網逐漸變成了我的生活習慣, 每天總係唔上過網便有點不安心的感覺, 總認為會有人傳電郵比我的樣子。

最近家中的電腦經常被老爸 投訴 太慢 又或者 罷工, 所以交由黑俠王子去修理好了。

在這段無得上網的日子, 真的有少許苦悶, 幸好之前問哥哥借左一部手提電腦在家備用, 所以它終於有用武之地啦! 而家我有一點怕………..怕我迷它 (用電腦上網) 迷到不能自拔, 最後變成患有 “社交障礙” 的 “隱蔽青年”。

扭曲的價值觀

最近收到朋友傳來的電郵, 讀完之後, 有一點感觸。是我不屬於這一個時代 (太保守) 抑或 係我少見多怪呢? (為揾錢, 如此行為係正常的) 文章是這樣寫的：

以後, 小朋友的故事書裡面出現了這樣的一則童話:因為爸爸的婚外情, 我們一家就過著很幸福的生活---

爸爸跟媽媽結婚10天後就跟一個老女人搭上, 跟她發生性行為, 除了幫她算命, 還幫她按摩全身, 拍親密錄影帶...

自此, 我們一家人就過著很幸福的生活: 住寶雲道獨立屋, 去旅行有私人飛機接送, 平日出入有保鑣。好比倪震, 好比謝偉俊, 正當其他男人被揭發對伴侶不忠都遮遮奄奄尷尷尬尬的同時, 爸爸為他的婚外情感到無比驕傲. 還主動提供跟老女人的親密合照,私房錄影帶, 遺囑等作為證明他跟老女人的親密關係的證據。

雖然爸爸跟第二個女人有染, 媽媽並沒有感到不光彩, 她真是世界上最幸福的一個大婆.如果那些證據能夠證明爸爸跟那個老女人的關係, 我們這一家以後都可以過更幸福的生活了。爸爸十多年來默默經營的一段婚外情, 為我們一家帶來一段幸福美滿的生活。媽媽和我們自此富富貴貴, 無憂無慮, 快快樂樂的生活著, 直到永遠.......

唔知你地讀完之後有何睇法? 可能….就正如我輩的離婚率比起上一代高得多一樣, 無什麼特別。佢地各人在經濟學上去睇, 只係 “有供有求, 各取所需”, 淪不得第三者干涉吧!

只係 “可憐” 在此等父母 “身教” 下成長的孩童, 長大以後佢的價值觀變得如何呢? 突然想起讀過一句說話：「金錢可以買到性, 卻買不到愛」, 只希望人們可以在亂世之中, 繼續保持住一顆純樸的心。

邊個夠我威?

小妹的老爸回鄉參與扒龍舟的端午盛會, 媽媽並無隨行, 因此..............

我地得到大約 10 天的假期, 媽媽不用煮飯, 我又可以帶佢四出覓食尋開心, 仲可以預埋為食的 KK 添! (心中盤算緊: 食邊間好呢? A 店夠特色、 B 店又好食、C 店勁抵食, 點算好呢?)

放工後可以帶阿媽去威, 你地邊個夠我威??

三伏治療法

跟朋友轉睇左另一位中醫師, 最近談起哮喘, 佢說：「有得醫, 仲要係 "斷尾" 果隻, 不過一年只得一次機會, 錯過左就要等下一年, 趁今年還未到時候, 你可以考慮一下, 好好把握醫療的機會。」

佢所講的係 「三伏治療法」, 大致係跟據通勝上說明的幾個指定日子 (在指定的 "節氣" 日用上三伏藥, 再加上一天 "加強" 治療), 當中會用膏藥、針灸、炙草等藥物敷貼於某幾個穴位之上, 歷時需要差不多一整天, 上午大約兩小時, 下午大約三小時。聞說此後喘症就不會發作, 聽落幾神奇, 簡直係從未想過, 如果真係得的, 一試又無妨 (每伏藥 $400, 即係整個療程需花 $1600)

* 2009 年的三伏日子係: 初伏: 7 月 29 日, 中伏: 8 月 8 日, 末伏: 8 月18 日, 加強劑: 8 月 28 日

在網上揾到一些有關 「三伏治療法」的資料

根據中醫針灸理論，在“天人相應”及“時間治療學”等傳統理論指導下，在三九天進行艾灸相應穴位，能溫陽益氣，健脾補腎益肺，祛風散寒，起到通經活絡止痛的功效。

而近年進行的臨床觀察，發現“三九灸”能治療多種反復發作及過敏性病症，如慢性支氣管炎、支氣管哮喘、過敏性鼻炎、體虛感冒咳嗽；慢性胃腸炎、潰瘍病、慢性腹瀉；風濕與類風濕性關節炎、強直性脊柱炎；虛寒頭痛、頸肩腰腿痛、胸腹痛等，效果亦佳。

其實冬令進補的時機一般略分三種說法：
一是在立冬後至立春前；二是在冬至前後；三是三九天。
中醫自古就有「三九補一冬，來年無病痛」以及「夏補三伏、冬補三九」的說法，在經過一年的體力消耗後，人們臟腑的氣血陰陽多少會有所偏衰，適當的冬令進補確實是需要的，但得注意藥補與食補需相互配合，且以溫補陽氣為宜，以達強身健體之效。

三九天即每年冬至後的三個九天，是一年中天氣最冷的時候，故有「冷在三九」、「冬至三九則冰堅」之說，這段期間也是呼吸道疾病最易發作的季節。

「三九天灸療」和「三伏天灸療」同屬「天灸」或「節氣灸」，其差異在前者治療的時間在冬至後天氣嚴寒之時，後者是在夏至後氣候炎熱時進行。

姑勿論成效理想與否, 不過抱住買個希望的心態一試又無妨, 而且 $1600 都唔算太貴, 因為花在治療哮喘的噴劑都要 二、三百元一盒, 每次發作時均要用上至少兩盒 (預防及治療各一盒), 都算值得投資的, 好過買什麼保健品而不能根治病況。

最最重要的係: 「"生命" 係上天和父母賜予的, "身體" 卻是自己的。如果在自己能力許可之下, 也不為自己的健康著想, 多愛惜自己, 漫漫的人生長路, 無健康的體魄, 又如何走呢?」

「通識科」 背後的陰謀論

某天在火車車廂中睇見有線新聞找來 "才子陶傑" 去做一份高中生的 通識科模擬試卷, 然後找來三位老師批改 (當然不告知考生身份啦), 結果..........三位評卷員一律給予 "不及格"。

當公佈了考生身份後, 其中一位評卷員對考生身份難以置信, 而考生陶傑知道結果之後, 不屑的拋下一句:「先別論我考試結果及不及格, 我告訴你, 根本這份試卷已經草擬得唔及格, 怎可能叫一位 17、18 歲的年青人, 去就溫家寶對經濟環境的評論字句, 去揣測對背後方的用意? 即使現任特首曾蔭權也未必可以準確的揣測得到啦!」

我覺得以上事件除了係 "笑料" 一則之外, 亦大膽的令我聯想起以下幾點:

1) 通識科的函蓋範圍值得檢討 (有感太政治化)

2) 通識科的試卷是否草擬得有技巧一點, 政治立場中立一點?

3) 別忘了我地的考生並不是個個也精通國內政治, 是否可以將目光擴闊至世界時事, 又或者深入一點作答本地的新聞?

4) 人們說 「通識科」係訓練學生的思維模式, 希望佢地投入專題學習中, 從而學到 "自學" 的主動性, 多發問去求真, 不過....................似乎目標同現實係 "兩回事"!

5) 從第 4 點所見, 試卷將學生的思維同目光規範化 (與 評卷員 又或者 某些人士的目光、思維相同), 再加上大量的政治薰陶, 從而令我地的新一代洗腦, 默默的灌輸 "教育局" 的政治理念。教育局的政治理念係來自那一處??? 就係我地的那被 "中央" 管轄 的 "特區政府"。

可能日後通識科其中一條題目係:

特首曾蔭權曾經代表 "大部份" 香港人說: 「這些年來, 國家的經濟發展很好, 無需再議論六四平反一事。」 試詳述你的睇法。

如果考生答: 特首曾蔭權此番演說的確 "有錯", "錯" 在他該代表 "全部港人", 而不只 "大部份" 香港人, 無論佢作任何評論, 作為市民的我一定會無限支持。

那麼..............E 位考生一定被評卷員給予及格, 而且仲......好高分添! (因為政治立場清晰明確)

虛脫的我

上星期忙透了, 週一至週五要返工之外, 放工後還有不少活動, 睇o下我的時間表

星期四: 進修課程 的 副修學科 學期考試
星期五: 進修課程 新學科 的 外國導師授課 (下午 6:30- 晚上 10:00)
星期六: 進修課程 新學科 的 外國導師授課 (下午 2:30- 晚上 9:30)
星期日: 進修課程 新學科 的 外國導師授課 (上午 10:00- 晚上 8:30)

多得結織到一伙志同道合的同學仔, 一齊捱過此三天的 「非人生活」, 上完課之後, 個人好疲累, 但又一點想 "曳" 的心態, 所以..........回家放縱自己 睇電視 及 食熱氣零食, 以慰勞一下自己, 哈哈!!!