摸蜆之旅

上星期朋友 I 到大埔大尾篤摸蜆, 收獲甚豐富, 引起了我的興趣, 今個星期日, 聯同朋友一齊從大圍踏單車到大埔, 再到大尾篤摸蜆, 盡興而回

踏單車期間, 沿途除了欣賞河景及海景, 還有欣賞花花草草, 有盛開的花兒, 有我的戰車, 有我的同伴, 有替你遮蔭的大樹, 還有........在樹幹上開花的洋紫荊




























中午由於早餐未落格, 我地去左食甜品, 有 "紅豆蘆薈雜果撈 " 同埋 "雲喱嗱雪糕蘆薈撈"







終於到左摸蜆的地方了, 在龍尾村對面, 從小路直入的泥灘, 掘左 "個幾鐘", 只得小量細蜆咋!

























回程時見到一棵 "成身也生滿果的樹" (不知名樹), 之後去飲下午茶, 因為太熱, 點了啤酒下火, 炸薯條同埋魷魚鬚, yummy!! 多愉快的一天啊!

心中的平衡點

都市人忙忙忙, 經常因壓力自困, 最想找出一個平衡點, 入住蒙古包, 晚上躺在寬大的草原上, 觀賞星星, 遠離繁囂, 多寫意!

愛人還是愛自己

今早在巴士上睇見新產品廣告, 、"鴛鴦被" (如上圖)。 大部份男生比女生的體溫較高, 因此比較怕熱, 而女生則怕冷, E 件新產品的原意係 「兩公婆每人一半不同厚薄的被芯, 那豈不是解決了問題嗎?」

我卻想: 表面上問題係解決了, 而且還彼此尊重了對方的意願, 不用苦苦屈就枕邊人, 比多少少錢就可以各取所需, 又在同一被窩下, 不是很好嗎? 轉個角度而言, 古時候科技無o甘先進, 產品無o甘多選擇, 人們會如何呢?

妻子多數遷就丈夫用薄被, 假如見凍的話, 就自行多加一張被, 又或者將冰冷的四肢靠向丈夫身驅取暖。丈夫不忍妻子受冷, 會用暖熱的臂彎包圍瑟縮的妻子, 有時候甚至 "窩心的" 預早爬入被窩 (妻子睡的那一邊), 先 "預熱被窩", 好讓妻子睡得甜一些。 場面多溫馨啊!

「新產品新科技」確係方便了大眾, 卻同時教曉了我們 「愛錫自己多一點」, 對於枕邊人的感受, 一概用錢用產品搭夠好了, "為對方做多一點點" 的心意, 早已經唔再存在。 安靜下來, 問問自己:「寒冬之下, 你需要的係 "一個他", 還是 "一個它 (被)" 呢?」

我的形象顧問

昨晚 KK 因有事做, 故此回娘家晚飯, 還送了我幾件衣服添! 你睇........幾靚。

唔知點解, 由細到大我都唔多鍾意去行街買衫 (無 mug 意慾), 雖然心知作為女性係該 "扮o下靚" 的, 但總唔捨得花費, 又怕麻煩! 所以有鍾意行街買衫、 又鍾意扮靚的 KK 代勞, 你話幾好呢!

多謝 KK, 遲 D 要比返形象顧問費你先至得。

烏龍王

小妹有帶飯盒返工食的習慣, 家中有兩個固定的膠飯盒裝飯, 早上在雪櫃取出昨晚預備的飯盒出來, 放進圖中的保溫袋中運送至公司 (保溫袋的鍚紙塗層可防止露水整濕手袋)。

「烏龍王」除左係名茶之外, 原來仲係我的 "新花名", 中午時接到媽媽來電, 內容如下:

媽媽: Big Mac, 我唔係想鬧你, 不過講比你知, 今早你返工取飯盒出來時, 竟然將另一個 "備用飯盒" (吉的) 放進雪櫃內, 你自己知唔知.......多好笑啊!

我: 哎呀.......(尷尬傻笑), 係咩?? 我唔知呀.....因為今早想取飯盒返工時才發現前晚回家忘了取出吉飯盒, 今早急急忙的取飯盒入保溫袋, 可能因此............順理成章的幫 "兩個飯盒" 掉位, 嘻嘻...... 我雪住個吉盒做什麼呢?

正一 「烏龍王」!!!

傍晚海濱遊

今日好健康, 傍晚時份到了大埔海濱一邊跑步, 一邊用手機拍下漂亮景致, 繼續舒展心胸, 唉...........一個字「爽」呀!!!









你睇, 我仲跑到成身汗添.........好似好健康o甘喎, 其實跑o下又停o下, 哈哈!!!

修讀課程睇性格

尋晚上 "核數" 科目, 阿 Sir 講的其中一個道理, 我好認同的, 就係...........

阿 Sir: 相信各位同學同我都一樣, 唔係做生意的好材料, 因為我地修讀 E 個學科的人, 想法比較保守, 就如: 做生意會薄利多銷, 用 $100 去賺 $1, 唔似得隔離班的同學, 佢地去學如何用 $1 去賺取 $100 (隔離班係修讀 "市場學" 的)

同學們: (紛紛點頭表示認同) 係呀.......

阿 Sir: 梗係啦......大家都係 "怕死" 之人, 讀書讀得o甘辛苦才考獲個 "牌" (會計師牌), 又點捨得一個決定就輸晒呀, 都係打工適合我地多 d (保守穩陣的性格)

估唔到.......睇你讀邊科都睇得出少少性格架喎!!

假期前夕的渡假之旅

今日放假, 早在尋晚已經興奮莫名, 雖然 "嚴重鼻敏感" 昨午又來襲擊我, 令到我 "紙巾不離身, 鼻水長流", 但無損我放學去尋歡的雅興

放學後和朋友去食一個快餐, 然後漫步至灣仔海濱長廊, 欣賞對岸海景之餘, 又可以聽o下海浪聲, 用手機拍下 "美妙景致", 立時心情都舒暢一點

從港島區望向尖沙咀海岸的景色 遠不及 從九龍區望向港島區, 因為港島區高樓大廈林立, 霓虹燈又較多, 色彩斑斕, 令人目不暇給, 不過我的手機卻拍下一幅得意之作, 金紫荊的銅像配襯住點點霓虹燈光, 幾靚!








之後還特意乘坐天星小輪去尖沙咀添, 不過而家的小輪唔知係開得快, 還是維多利亞港兩旁收窄了, 好快就到目的地啦, 相比小時候坐渡海小輪, 好似快左好多呀!

喪運動

最後週邊又出現了無理事, 有時候.....常叫自己 "不要勞氣", 已經孤獨奮力地工作時, 那些無聊人卻咄咄逼人, 作出無理的控訴, 確令人動氣又氣餒。

經常問自己......其實明知道理何在, 為何還為佢動氣, 何解不能像 "得道高僧" 般思想超群灑脫? (又氣自己容易忟憎啊!)

一邊在氣餒, 一邊覺得......一個人孤獨地承受, 因為週邊只得那無聊人及我有正面的利益關係, 其他人等也不想牽涉其中吧! 朋友呢.......都不想見你一次, 便聽一次那無聊人的歪理啦, 又唔想家人擔心。

孤獨的心痛, 卻只可默不作聲的繼續每天承受....心口的鬱悶每天加深的 "壓住壓住", 抖氣也辛苦起來, 一瞬間, 飄起過去的回憶, 令你倍覺自己可憐無助, 有時候靜下來一個人, 開始 "迷失", 三魂不見了七魄的 (唔知自己想點), 腦內卻轉過不停 (不停的在想東西)。

也許.......趁工餘課餘時喪運動, 強健體魄又減減壓, 才不致會 "胡思亂想" 啊!

生命密碼 Birth Code

中國人篤信八字命理, 而外國人呢?? 原來相信「生命密碼 Birth Code」, 一個出生就跟住你的 "密碼", 朋友 C 篤信 「生命密碼 Birth Code」, 它的原理好簡單, 只要出世年月日就可以計算出來, 例如:

你的出生日期是：1980年02月13日 （出生日期是你的先天數）
把出生日期的每一個單數相加，1+9+8+0+0+2+1+3 => 24 （24就是你的後天數）
計算還沒完啊，要再把2+4 => 6，就得出主命數Core Number

o甘簡單 d 講, 你就係 "6" 號人了。

而小妹呢.........正正係 "7" 號人! "7" 號人有以下的特徵, 認識我的你又覺得準唔準呢?
特質
7號人是很聰明的一群，他們天生對所有的事物都非常好奇，為了探索事物背後的真相，他們一般會非常好學，對各方面的知識都有點興趣，很喜歡看書，也具備很強的分析能力。

他們一生普遍大起大落，經歷比別人戲劇性的人生路，因為他們喜歡追求新事物，新朋友，新觀念。可是也由於他們先天的探索能力，7號人雖然表面合群，內心會傾向孤獨，因為他們會不自覺的質疑身邊的人、事，總覺得他還沒有了解別人的所有真相。這一點，常常會使他們錯過身邊的機會。

他們在感情上也偏向理智，而傾向壓抑自己的感情，有時帶點神經質。7號人的內在有著期待被人誤會或被背叛的種子。所以他們必須學習信任，放下這個種子，要不然不幸就會如他們所願，發生在他們身上。

智慧之神雅典娜
7號人最大的特點就是他們的聰明智慧，而最能代表他們的就是智慧之神雅典娜, 雅典娜的思維方式，正是愛批評分析的7號人的典範，他們的標準很高，往往讓人覺得吹毛求疵。而他們分析事物的方式，也偏重於理性思維，容易讓人覺得冰冷無情。實際上，這只是他們與生俱來的個性，並非特別挑剔。當然，7號人是要學習減少過份的思慮，信任是他們一生的大題目。

另一方面，雅典娜也是一個閨女之神，這在關係比較淫亂的眾神中非常少有。換一個角度來說，她喜歡獨處。不論他們有多少的朋友，7號人的內心都是比較孤獨的，他們在愛情方面不容易全情投入，當然也和他們常處於過份理性思維有關。

參考網址
http://hk.knowledge.yahoo.com/question/?qid=7006042000049
http://www.locuspublishing.com/hi/kodiko.asp
http://marichi.mysinablog.com/index.php?op=ViewArticle&articleId=426047

可愛的南瓜

星期日和 KK 及 媽媽到沙田飲左一餐 "陽光早茶", 因為坐得開揚 (靠近玻璃幕牆, 空外陽光充沛), 真係令人心曠神怡, 鬱悶的心情也開朗了一點點。








之後在沙田新城市廣場四處閒逛, 走到 City Super, 眼見一個個大大小小, 造型可愛的南瓜在擺賣, 有的甚至被畫上卡通公仔, 售價由 $20-$100 幾蚊都有。








最後還去左 7 樓的空中花園睇音樂噴泉表演添!

《頭注香》之分享

尋晚去左睇舞台劇《頭注香》, 聽聞它係一套十分 "爆笑" 的劇 (部份人甚至笑到標眼水添), 適合十分 "需要狂笑" 的我。

故事講述剛離世的姑媽遺下六合彩頭獎彩票，欠債姪仔得悉後，立即於家中進行地毯式搜索，希望能令債務一筆清。怎料癡情泰籍女友、無厘頭電訊師傅，以至執達吏和阿姨都串演程咬金，一場分秒必爭的橫財角力賽就此爆發。

整體而言, 此劇真係一套鬧劇, 劇情有犯駁之嫌, 十分胡鬧, 但當中也有爛 gag 爆笑位 (如: 在麥當奴擺 "解穢酒"), 不過未至於笑到標眼水, 有一點失望啊!

都係 《29+1》 同埋 《攣到爆》 好睇一 D (可能我比較喜歡它有劇情 / 主題 兼有 共鳴啦)

文字的詩意

記得小時候最愛寫信, 雖然寫來寫去都係果幾隻字 (如: 你好嗎? 工作忙嗎? 等等), 但感覺自己似 "成年人", 當信件寄出後, 總係每天期盼著信箱的回信。

長大了, 幾兄妹最愛 "爭電話", 內容當然不只和同學討論功課啦! 還有不少的八卦話題 (如: 邊套戲好睇? 邊幾個同學鬧不和? 等等), 總係熱切期待聽筒的另一端傳來 "即時" 的反應。

電腦普及了, 開始接觸 ICQ (全球即時傳訊的程式), 當時驚嘆好新奇呀! 在網上見識到不少朋友 及 世界各地事宜 (從朋友的文字中), 當中一人還和我成為筆友呢 (為期一年咋)

取而代之的係另一款電腦程式 MSN, 它方便易用, 而且表情符號多多, 又有即時通話功能 (只要裝上鏡頭及咪便可), 我家雙親常用作和孫兒溝通的橋樑呢!

而最貼身和方便的就係 SMS (手機即時短訊), 你可以隨時隨地發放心中所想, 無時間、地點的限制, 又不太阻礙別人 (如; 對方開會中)

雖然面對面傾談係最直接的溝通方式, 尤其是當中加插了大量的肢體動作及表情。不過用文字溝通卻有另一番味道, 就如:

1) 那人的字體美嗎? 從而在腦內勾劃心中的他 / 她。
2) 在文字訊息中, 我地可以 "大膽" 一點, 表達出平時你不敢 / 不會說出口的事, 如: 咦....... mug 你o甘衰o架? (也許你平日講說話不會那麼嬌嗲), 而文字訊息就可令人加上一點點 "幻想空間"

講到尾.......無論文字又好, 面談亦好, 人們也要取得平衡, 不要 "屈埋一角做電車男" 啊! (只愛對住電腦, 而對現實無興趣的人)

病床上的歷險記

好久無試過無牽掛的睡了 (不用擔心唔知醒)
一覺的沉了下去 無止境的
千百個夢魂飄在腦裏
可笑是一個也記不起來
就當作腦內記憶大釋放

夢裏一個熟悉的背影坐著
孤獨地哭 我知道她是誰
只可惜我愛莫能助
想走近安慰又怕添自己的愁
還是拔足逃跑比較好

我追著腳印 走進村莊的小路上
寬大的草原 寧靜的海聲
正是我夢寐以求的人間仙境
此刻我知內心深處
渴望離開戰場 走入寧靜的空間

只要多捱兩個星期
願望就快實現了
我要去那人間仙境
呼吸新鮮的空氣
趕走鬱悶情緒
重新再上征途

回不了從前

常聽說:「早知xxxx, 我就xxxxx」 語句中總帶著一點點的遺憾 及 無奈!

當中有幾多個人可以說:「即使時光倒流, 我也會xxxx」 (作出同樣的抉擇)

人總以為自己在世, 努力的去尋尋覓覓, 就可以主宰身邊的事, 一切在自己掌握之中 (有能力去選擇自己喜好的事物、喜愛的人)。這是真的嗎?

有無想過其實好多時也要睇 "際遇" 及 "EQ" 呢? 上天給你的 "際遇"從不到你選擇 (千里馬遇唔上伯樂也無用武之地), 至於 "EQ" 就係當你面對不同"際遇"時的心態, 有時候《有危才有機》呀, 一切視乎自己點睇啫......

唔好成日怨天怨地了, 一切也回不了從前。 就像「沒有昨日(愚蠢) 的自己, 那有今天成長了 (充滿智慧) 的你」, 不是麼?

泰好味啦!

早前和朋友相聚在尖沙咀食泰國菜, 由於店舖燈光昏暗, 所以要等朋友的相片 (用靚靚相機拍攝的), 才在此同大家分享

我地點左:

1) 生蝦刺身 配 惹味醬汁 (好味)

2) 海鮮拼盤 (冰鎮四寶 2 客), 有螺, 大隻蝦, 魷魚, 帶子肉, 青口, 鮑魚, 青瓜條 配 惹味醬汁 (口感好爽)

3) 冬陰功 (足料)

4) 炸蝦餅 (唔特別)

5) 馬拉盞炒通菜 (咸左 dd)

6) 蝦膏海鮮炒飯 (好味)

7) 菠羅雞粒炒飯 (好味)

每人攤分 $120 就有如此美食, 滿腹而回呀!! (記住有 DBS 信用卡有 85 折架), 下圖為食物 1), 2) 及 7)

天氣轉涼, 大家小心保重

親友們, 朋友們

最近天氣轉涼了, 大家多加衣服, 小心身體啊!

繼上週四 "瀨左野" 之後, 因為無依時食藥 (太眼瞓會影響工作), 所以尋晚發燒了, 身體流著汗卻在攬住被發冷, 好辛苦啊!

醫生話係 "過濾性病毒引起的感冒", 要依時食藥及多休息, 否則下次見佢就要食抗生素了

大家保重啊!

真我何在??

上文提到因為 "人" 皆怕失敗挫折, 於是多做多錯, 少做少錯, 唔做就唔錯了。

因此社會上每個人不知不覺築起了圍牆 (防護罩) 去保護自己。 小時候學習的真理早已經不適用了, 而「真我的個性」卻要因環境而調較, 甚至扭曲, 多可悲!! 以下的 E 首歌就最能表現出當中的無奈。

十字架
主唱: 謝安琪 作曲/編曲/作詞: 周博賢

很久的當年 媽媽天天囑告
好心交給人 總可得到好報
過去按這教導埋頭做
可惜隨年長一步 傷口隨年多一道

*伸出手攙扶 遭鬆開手警告
交出心戀愛 反得傷心的控訴
嫌棄我過份熱情流露
或是仁慈得恐怖 燙手愛意怕碰到

彷彿背上十字架捨我救贖未算好
越奉獻得到結局越殘酷
教我為免傷勢再會變更糟 圍牆變更高
圍住了自己的去路 防護罩終變成墳墓*
將根本的我葬下去獨自老

Repeat *

將真的我埋藏下去 哀悼裡獨個漸漸老

多想光陰退後到舊時 童年重渡
多斬釘截鐵共處態度
我對你好 所以你會對我好
心裡沒旁騖 無奈這幸福的國度
已飽經災劫無寸草
今天只得我野地裡在獨舞

要怎麼的上路 期望一天我能知道

「勇氣」在哪裏?

今日讀了一篇文章 (節錄於 "頭條日報" 某專欄), 內容發人深省

當我們長大成人, 人生閱歷擴闊了, 社會經驗豐富了, 內心用來盛載夢想的空間卻愈來愈少。

成年人常罵孩子「不知天高地厚」, 但從某角度來看, 他們的勇氣和 「大志」, 其實彌足珍貴。當我們成長到某一階段, 人就會變得容易安於現狀、不願犧牲, 別說什麼重大使命, 即使只是轉一份工、愛一個人, 我們也會小心計算、不肯冒險, 只因害怕失敗。

不過, 過程有時比結果更為重要。拯救地球也好, 工作也罷、愛情亦如是, 哪怕知道有九成甚至十成機會失敗, 只要你認為應該去做、去試, 即管死命向前衝吧, 那樣才不會有遺憾。

無錯…….我身邊正正出現了幾位唔同 “個性” 的朋友, 有人明知 “結果會失敗”, 卻抱住該做而去嘗試的 “大無畏” 精神。 有人想開始一段感情, 投放感情卻很小心、不肯冒險, 只因害怕失敗。 其實無論 「男」 或 「女」, 也會出現以上的種種人性, 當中你和我也曾經成為了主角, 只因 「人性」就是充滿著 “惰性”, 誰不想可以 “垂手可得”? 誰喜歡向難度挑戰? 誰不怕遇挫折、會受傷?

但若固步自封, 人生夠積極嗎? 活在自己的框框內, 會生活得燦爛愉快嗎?

M 熱朱古力

睇戲後去左 "麥當奴" 的 cafe 飲o野, 今次係我第一次在此飲 "熱朱古力" 咋! 你睇.....個 "M" 字幾靚!! 哈哈............多愉快的一晚

叛諜同謀

尋晚去左睇電影 《叛諜同謀》
劇中幾位 "大骨幹" 的主角 (列尼史葛 + 羅素高爾 + 李安納度) 也演得好精彩, 只係我的轉數比較慢 (病緊唔夠瞓中), 所以中途 "明 D 唔明 D", 要靠觀看後回想起來, 才明白多 D。

劇中的爆炸場面頗多, 而且好震撼, 有時會突然被 "嚇親", 尤其係 "李安納度被大鐵錘揼手指" 時, 好恐怖 (勁想替佢大嗌 "痛")!!!

整體而言, 劇情 "局中有局", 好多無間道在內, 你永遠唔知邊個係敵、邊個係友, 只能信自己 (即使這一刻係你的同黨, 下一刻卻看似出賣你, 又或者防礙你工作), 係現實職場上的寫照。(因為總有人 "貪功", 要搶住領功)

另一感受係 "原來人真係好脆弱" 架! 一旦受到威脅, 自私的 "人性" 就會走出來了! (也許係 "保護自己" 的本能啦)

別想太多

「若這一束吊燈傾瀉下來 或者我 已不會存在
即使你不愛 亦不需要分開
若這一刻我竟嚴重癡呆 跟本不需要被愛
永遠在床上發夢 餘生都不會再悲哀 」

這一節歌詞出自 "陳奕迅" 的 "明年今日", 歌曲的內容好有意思

常言道: 「人生不如意事, 十常八九」

何必想得太多, 令顧慮更多? 當你此刻在猜想下一步的時候, 可能............根本無下一步 (就如歌曲所言, 假如遇上橫禍, 此刻的 "想"......又有什麼用? 因為已經無機會 "做" 下一步了)

總之無愧於心, 及時行樂, 不要帶著遺憾而走就最好了

我係普通人

大家記得益力多的廣告嗎? "你今日飲左未呀?"

尋日朋友傳來訊息: "及時行樂，快樂從來不需要理由，你今日快樂咗未呀？"

哈哈.......等我每天一早也對自己o甘講先, 也許在 "自我催眠" 的狀況下, 每天也會很開心呢!

和朋友談起話來, 發現好多時唔開心的原因係 "我地太介意別人眼中的自己", 甚至因為 "過份的反省", 引致 "對自我的期望過高", 時刻為自己的 "行為舉止" 加上了許多規條限制, 因此活得不快

原來...只要告訴自己: "我係一個普通人", 普通人也會犯錯, 錯左唔緊要, 最多改返啱, o甘好多事 根本可以解決, 而且不會對自己期望過高, 心理包袱細了, 人也活得輕鬆快樂一點

放鬆一點, 做個 "普通人" 啦!

好o野, 叻女!!!

尋晚放工返學好鬼累, 今早依然早起和媽媽飲茶 (既不想浪費相聚的光陰, 又因食藥口乾, 想多飲一點水)

回到家中, 做功課先, 數小時後終於..........

好 o野, 好叻女呀!!! 完成了 1,000 字的初稿了 (不多不少的), 由於已經乏力 (腦力), 所以留待日後才作校對修改

而家.......要快快食藥瞓覺先, 期待同周公的甜蜜約會啊! 要多休息, 才快康復架!

給世上獨一無二的 "你"

你知道嗎
雖然你排行最少 卻不特別依賴
雖然你是女兒身 心態卻像個男生
雖然你唔算肥大 但胃口卻不少
雖然你不算美艷 至少看來還順眼
雖然善心未滿瀉 心腸總算過得去

你知道嗎
別人在添新裝(妝) 之時 你卻選擇增添智慧
別人在豪花揮霍之時 你卻選擇美食旅遊
別人在獨享物質之時 你卻選擇和友人分享喜樂
別人在佔你便宜之時 你卻選擇避開衝突
別人只顧自己之時 你卻選考慮對方感受

你知道嗎
你的缺點多的是 你的道行還未夠高
你易怒易被別人影響情緒 你對自己唔夠信心
你多疑多顧慮 想得太多而做得太少
你常常懷疑自己 (做得不夠好嗎?)
你想別人關心又害怕得到太多 (既害怕失去, 又怕無力償還)

你知道嗎
雖然你有千千萬萬的缺點 而且不是一時三刻可以改變
但 "你" 仍是 "你" 請 "你" 承諾……..會好好愛自己
因為 "你" 是上天與父母賜予的
世上獨一無二的 "你"

清心食齋記

今日同靚女們去食齋, 因為佢地想食 "清 d", 而我就想 "清心寡慾" 一點, 唔想再o甘易嬲怒、動氣、氣餒啊, 只恨自己 "塵緣未盡", 要為煩惱而煩。

我地去左佐敦的 "六榕仙館" 食齋 (已經有 40 年歷史架啦), 叫左:

1) 齋鹵味 (味道一般, 但售價平, $16)

2) 羅漢齋炒麵 (好多餸啊, 抵!! 午市特價 $32)

3) 生菜包 (好好味啊! 少少貴啦 $52)

計埋茶錢, 今餐總共 $112, 都算 ok 啦!

缺角的靈魂

「缺角的靈魂」是什麼?

佢最愛躲在熱鬧的人群中, 因為此舉顯出佢並不孤單, 縱是如此, 佢的思緒卻飄得很遠...很遠....就連佢自己也不知去到哪裡, 只知道不屬於現實 (好抽離, 卻難以控制), 難道佢患上了 "思覺失調"?

秋天令佢添上了幾分哀愁, 不知道愁從那裡來? 只驚訝佢樂於沉溺在哀愁之中, 也許因為.......不需要掩飾自己, 不需要努力裝出 "強" 的樣子。

親人的支持, 朋友的關懷, 偶然令佢振作起來, 一靜下來卻發現 "對人際關係" 感到恐慌 (總怕做得不夠好, 又怕遷就別人而迷失自己), 不懂處理、 不想傷害別人 (也許無意), 也不想被人注目, 逃跑是最好的辦法麼?

越想至此卻越忟憎 (想發自己脾氣), 真不濟啊!! 為何堅強不起來呢? 可知道自己令身邊的人何等失望麼? 既已訂立了學習目標, 何不發奮? (思緒難集中呢) 何解不能像 "得道高僧" 般斷絕了 "七情六慾", 豈不是煩惱少得多嗎?

「缺角的靈魂」是一個懦弱的人, 不知道要儲幾多能量才能積極面對現實, 也許佢需要的是 "歡笑一刻便一刻吧, 不要再想太多"了。

"瀨左" 野!

早前見 "無聊" 及 "為健康", 專誠去做運動操 fit 自己, 點知..........出事了!

由於之前運動得 "太激" (烈) 所致, 所以肌肉嚴重投訴, 唔知道係唔係之前肩頸勞損, 昨晚食飯時成條頸 "梗左" (幾乎郁唔到, 仲好痛添)

沖涼後, 拿拿淋取出 "按摩膏" 按一下肌肉先, 由於係藥用按摩膏關係, 一塗完, 成身都散發 "薄荷味", 而且仲..........好涼, 涼到覺得凍同寒。

就係o甘, 成晚又熱 (蓋被時流汗) 又凍 (褪被時發冷), 早上起床時個頭又重又痛, 仲不斷流鼻水添, 我知道..........我已經 "瀨左" 野了!

睇完醫生就快快趕返工, 患左 "外感" 呀! 要快 d 好番至得, 因為下個 week 有好多 "美食" 及 "節目" 等緊我架!

剪不斷, 理還亂

朋友問起我:「有否想過有一天你是一個靈魂, 在靈堂上見到自己的葬禮, 你會著緊有多少來賓嗎? 想知道有幾多人為你哭嗎?」

想起了王菲 "愛與痛的邊緣" 中的歌詞：「情像雨點, 似斷難斷, 越是去想, 更是凌亂, 我已經不想跟你痴纏, 我有我的尊嚴, 不想再受損」

只要你人活在世, 有付出過感情和誠意去待人, 當你辭世之時, 總有人會為你傷心, 又何需在死後變成靈魂之時, 再計算有幾多人? 因為已經唔重要啦, 這份友情、親情、感情你帶唔走的去第二個空間的 (它只屬於這個空間, 這個人世), 而且如你也是愛佢地的, 不是應該 "唔想佢地傷心" 嗎? (不願看見佢地流淚)

「愛」乃係人與人之間必先存在, 才會發展成其他關係, 如: 友愛, 兄弟姊妹互愛。你唔想別人和自己在辭世時傷心難過, 難道從此就 "抽離現實, 不願付出去愛人" 嗎?

任何一種 「情」總似剪不斷, 理還亂, 但人畢竟是煩人, 即使多麻煩........也要面對啊!

美味的 "長腳蟹"

拜朋友 T 所賜, 今天和媽媽食左一頓美味的 "長腳蟹"

一打開盒蓋, 噢.............好漂亮的顏色盡入眼簾, 味道唔錯, 不過有少少 "沙" 呀! 放假又有好口福, 真係多謝晒

必勝客的兒童餐

今日和媽媽飲茶後, 入左元朗探姪仔, 仲帶佢去左 "必勝客" 食 "兒童餐", 餐內有:
1) 脆魚圈
2) 蜜味腸
3) 白汁菠菜意粉
4) 彩色啫喱
5) 汽水一杯

原來 "脆魚圈" 同 "彩色啫喱" (藥水味) 都好難食架!! (經過成年人的測試), 姪仔 "扭眼瞓" 食慾一般, 全靠嫂嫂 "包底", 最後姪仔獲得新寵才離開 (籃色汽球一個)

英國之手信

同事出差到英國, 買來了手信

糖果色彩繽紛, 而且好似 "擦膠", 味道卻................好難食!! (藥水味 + 苦味), 同事說佢知道 "難食" 的, 不過買回來比我地見識一下喎! 多謝夾盛惠了

龍鬚糖 + Q 版紅豆砵仔糕

尋晚的街頭小食課教授了 龍鬚糖 + Q 版紅豆砵仔糕 (示範)

老師 "三扒兩撥" 的就做好了 Q 版紅豆砵仔糕, 每位同學分配得兩個, 咬口幾好之餘又唔太甜, 我鍾意呀!








另外龍鬚糖就由同學 "一手一腳" 自己整, 原來整 "龍鬚" 都幾吃力架, 因為要將製好 (煮好待涼) 的 "粟米膠" (似一舊圓形的硬膠) 拉成 "幼幼的龍鬚" 真係一 D 都唔容易, 拉完龍鬚之後已經攰到半死了 (可能女生的臂力及手溫唔夠), 而且龍鬚幾快變硬呀, 所以即拉即食就好味, 否則又硬又痴牙!

十指緊扣

"十指緊扣" 令你想起了什麼?大部份人總會想起 "男女拖手"的, 而我就例外了

女生們 (好姊妹) 逛街時總愛 "撓手", 關係尤好的 (如親戚: 親姊妹, 母女) 更會拖手添, 不過一般人拖手時, 總係 "橫向式手掌貼手掌" 的拖, 好少會 "十指緊扣" 式的拖手架!

媽媽和我卻總會不期然的 "十指緊扣" (尤其橫過馬路時), 彼此也甚有默契的, 佢交出手掌而我接上

同佢 "十指緊扣" 時總感受得到溫馨和使命感 (要保護佢), 還有內裏似有一種 "難以言喻" 的交流, 像知道對方的思想般的感覺 (感到佢的支持), 捨不得 "甩開" 佢的手, 心內又回想起小時候我舉高手, 而佢微彎著身體去拖住我, 照顧我的片段, 因此今天有幸佢仍健康的陪我 "十指緊扣" 地走, 真幸福!!

以下係一節歌詞描寫 "十指緊扣" 的, 希望和媽媽可以 "十指緊扣" 直到氣力不夠, 彼此才願意放手

誰都知雙手可緊扣
不依不捨的背後
這個信念有多溫柔
從害怕會被擁有
直到氣力不夠
十隻手指終於找得到對手

能開不開心都緊扣
辛不辛苦都接受
是一個成就
可惜我只想與一個人尾指一勾
也沒有

勞損了

上週工作較繁忙, 經常用電腦至眼累, 頸緊兼膊痛, 好唔容易才 "頂" 到星期五 (好彩多了國慶假期咋, 當日在家也是對著電腦, 不停的做功課)

週五放工後趕返學, 嘩..............頸緊得 "越來越痛", 好似個頭快將 "甩" 出來o甘, 好辛苦啊! (也許係 "拉傷" 了頸膊肌肉, 又或係工作時用電腦的姿勢不正確, 太勞累所致)

今早我是一隻 "死豬" (無陪媽媽飲茶), 中午外出食飯及閒逛, 回家時原定做功課, 惜肩膊真係痛得不想舉起手去打鍵盤, 唯不停的睡, 直至晚飯才起身

而家想在網上為功課搜集資料, 但膊頭依然好痛, 睇o下頂得幾耐啦! (已經熱切期待下週二的假期了)

壽司 lunch

今日同幾個靚女去美麗華商場的 "上壽司" 食 lunch, 每人點了一客定食, 我點的係 "壽司 + 烏冬定食"。








你地睇..................都幾豐富架, 埋單都係 $65 啫 (已計了加一及 85 折), 算唔錯喎! 聞說它的下午茶都好抵架!

King King 生日快樂

今日係我大佬 King King 的生日, 在此祝係你 兒子孝順健康, 夫妻和睦順意, 財源水漲船高!!

o黎緊 18/10 才和你補祝生日晚飯 (今年仲要係 "三代同堂" 一齊攪添, 認真高興)

道行唔夠

自己始終都係 "道行唔夠", 今日又著了魔, 用了別人的錯處 (無理的控告) 來懲罰自己, 情緒低落了一天之餘, 谷住度氣再 "做, 做, 做"

唉...............真失敗!!

終歸我也只是 "一個凡 (煩) 人" (多煩惱的人啊)

我要快快將低落的情緒 "站起來", 變成一個 "超級撤亞人", 和大家一齊打怪獸!!

跑步悟人生

剛跑完步回來寫 blog, 今日和媽媽一齊跑上次的 "小山坡", 上斜的時候依然感到吃力, 要多練習才得了

頭先跑步的時候, 我悟出了一個道理, 每次當我跑 "上斜" 時, 總覺得力不從心 (未鍛鍊足夠體能), 但又唔想因此而放棄, 於是我想辦法去鼓勵自己 (鞭策自己) 完成使命, 結果...........

我同自己講: 不要回頭望, 只管堅定的望住前方, 心想 "放低過去, 做好現在, 展望未來, 前路正等著我呢!" (我的人生不可以只 "原地踏步" 啊)

結果當我一步一步向前邁進時, 剛才的步伐已經離我絕塵而去了, 所以只要你意志堅定, 肯去嘗試去做, 無話做唔到的, 只係需時幾耐啫! (尤其是需要儲幾耐的勇氣去開始嘗試), 引申至人生中, 活到老, 學到老, 有心肯學就一定得, 最多用多 d 時間完成啫, 係唔係??

今日的 target (目標)

今日係國慶日, 因此獲得額外一天的假期, 好開心喔!

早上 8:00 幾起身同媽媽及 KK 飲茶, 然後購物回家, 之後就為自己訂立了今日的時間表

飲茶 → 回家 → 做功課 → 跑步 → 晚飯 → 休息

哈哈...........大約下午 1:00 就已經做起了一份草稿 (下星期五交的小組討論 - 自己負責的部份), 之後小休一陣 (食少少野), 又再開工, 希望做得起 (半份初稿) 1000 字論文的功課啦! o甘就有多 d 時候作出修改, 可以在 10 月 25 日 deadline (死線) 之前交功課了

為著黃昏去跑步感到興奮, 要努力爭取健康的體魄, 不可因壓力而倒下 (病倒) 喔!

我要努力向上, Big Mac 要加油啊!

公司 BBQ 後記

同事攞左 BBQ 當日的相片返來了, 等我同大家分享一下啦!

顏色奪目的蔬菜類串燒 (三色椒, 粟米, 薯仔, 冬菇, 燒烤菇, 金菇) 全靠一班靚靚女工 (女同事) 一齊製作咋! 食物仲有海鮮類 (多春魚, 蝦, 秋刀魚, 魷魚), 肉類 (各款腸仔, 牛肉, 雞中翼) 等等....

用 Gas 的 BBQ 爐 及 BBQ 的場地 (一個小三角位)

無敵的海景 及 BBQ 後的生果 (巨峰提子, 好重酒香味啊!)

燦爛的煙花

聽日就係國慶日啦, 真好! 又多一日假期。 晚上還會有煙花大匯演啊, 聞說今次的煙花設計有大突破, 既有 "大腳板" 圖案, 仲有好多新款式添, 歷時大概 23 分鐘。

預計我該會躲避的, 因為今年唔想睇煙花啊 (總會想起往事), 也許早一點入睡 又或者 外出逛一逛啦!

有時候我覺得 「人際關係」 (人與人之間的相處) 要有熱情和誠意, 又尤如踢足球一樣, 要攻守兼備 (一時採取主動關懷對方, 一時享受被照顧)。

如果熱情過多, 性格過於急進, 好容易似 "煙花" 一樣, 短時間內很燦爛, 卻好快消失得無形無縱。(因為熱情燃燒盡了) 反而大家比多一點耐性 (空間), 一齊互相攻守, 慢慢的去彼此了解 (就如足球場上的 "猜波"), 才能促成有默契而良好的人際關係, 彼此變成 "真心朋友"。

你愛熱情澎湃的花火 抑或 恆久恬靜的細水長流?

幻想治療

如果可以 「停一停, 抖一抖」就好了, 本週工作多而雜, 令我的思緒好混亂 (組織上, 總怕忘記了一些重要的事), 學習上的功課接二連三, 既有小組演講, 又有 1000 字的文章 (亳無頭緒點 "入手" 寫呀!)

閉上雙眼幻想一下:

1) 坐在沙灘聽海浪聲
2) 躺在大草原上, 晚上觀星看月
3) 在露台上曬月光, 飲紅酒, 聽音樂
4) 在郊外看看山, 望望海, 睇住 "咸蛋黃" 落山
5) 落力的運動, 發洩心內鬱悶的情緒

噢..............我的 「幻想治療」湊效了, 心情舒坦了一點! (無o甘鬱悶啦)

秋之想

「秋」 令你想起了什麼?

愛在深秋
鄭少秋
秋來秋去
秋天的童話
紅色的楓葉
乾燥的天氣
遠足的好日子
踏單車 + 燒烤的好時機

秋天天氣乾燥清涼 (尤其早晚), 或多或少也容易令人添上 "秋愁", 感覺 "悲涼"。

最近 E 兩朝起床, 發現氣溫涼了, 想必秋天來臨啦! 雙唇及皮膚最容易感覺得到, 要揾 D 野滋潤一下先 (糖水、潤唇膏、湯水、保濕面膜、補水潤膚膏)

起步了

E 一排總係飲飲食食, 尤其是星期六呀, 早上 BBQ 晚上又食海鮮, 加上今個月極少運動, 連跳舞都停埋 (因為和學位課程撞時間), 怕體型肥之餘, 更怕影響健康!

尋日天朗氣清, 終於 "的起心肝" 去屋苑附近跑 「山」 (係小山坡), 跑足半個鐘 (當然係跑o下停o下果隻啦), 想練一下 "氣", 因為秋冬天將至, 我怕天氣又影響氣管收窄, 呼吸會辛苦啊!

我的運動神經又再 "起步了"!!

跑完步, 面色好似 "飲左血爾" 一樣 (面色紅潤, 好鬼 cute 呀!) 今日雙腳某部份的肌肉出現少少運動過後的酸, 証明肌肉真正在運動呢!

我的 "烏 Where" 論

男仔頭的我有時候也羨慕別的女生愛打扮, 愛化妝的, 因為佢地的落力, 令整個社會的市容也好看一點, 至於我呢............

天生皮膚質地麻麻, 如果皮膚長期被化妝品覆蓋著, 膚質豈不是會更差? (毛孔易被阻塞), 另外守財奴的我寧可把金錢投資在食野, 學習, 投資 及 旅行 身上, 也不捨得花費在華衣美服處啊!

平日返工的衣著總係平平無奇, 只求整潔, 不太著重款式多變, 衣櫃內 "最老" 的一件衫該有陪足我 5 年或以上了 (足證我的身形 10 年如 1 日, 幾 fit!!), 因為它唔太殘 (唔係時時著), 而又幾耐看及穿得舒服, 唔捨得棄掉啊!

週末總喜愛著得有 o甘隨便得 o甘隨便, T shirt + 牛仔褲 + 波鞋幾乎係我的 "必然選擇" (因為好少機會 "配襯出錯", 又唔駛用腦去諗), 所以週末我就會變身成為一個 "未瞓醒的屋村師奶仔" 了 (有時刻意唔 gel 頭 (鬈髮), 比機會頭髮抖一抖, 怕甩得多頭髮啊!)

大家週末見到我時, 會唔會唔認得我, 以為我係 "外傭" 呢? 哈哈..........

講明係週末, 梗係處於輕鬆的狀態, 打扮應該隨心隨意無壓力, 否則全身又要 "整裝待發", 壓力可大啊! (加上男仔頭的我會 "周身唔自在" 呢!)

海鮮之夜, Yeah!!!

一行 13 人做什麼好?

唔駛問, 一家又係飲飲食食啦! 尋晚我地去左屯門三聖村食海鮮


首先我地去左青山灣海鮮街某店鋪買海鮮, 總共買左 8 款海鮮, 包括: 魚, 蝦, 蟹, 花甲, 扇貝, 瀨尿蝦 (我的至愛), 聖子, 龍蝦仔 (另送我地石頭魚煲湯), 共 $1,630









之後我地去左附近的大排檔將食材加工, 仲加多三個餸, 變成:
1) 白灼生蝦 (新鮮好味)
2) 清蒸魚 (我唔知什麼魚)
3) 薑蔥炒蟹 (薑蔥調味好)
4) 上湯花甲 (唔特別, 花甲肉甩晒出來)
5) 蒜茸粉絲蒸扇貝 (只得 8 隻, 我無食到)
6) 椒鹽瀨尿蝦 (我的至愛, 好食得來 "油" 左少少)
7) 豉椒炒聖子 (有咬口, 不過略嫌有沙)
8) 芝士焗開邊龍蝦仔 (買左 4 隻, 即使開邊有 8 件, 部份人也要 share 1 件, 試得唔清楚味道)
9) 咕嚕肉 (一般, 唔特別)
10) 椒絲炒唐生菜
11) 豆豉鯪魚油蜜菜
12) 石頭魚海鮮湯 (海鮮店送的, 好香胡椒味)









12 個餸包埋酒水 及 白飯, 總共 $1,130, 連埋食材費用, 每人都係攤分 $212 就可以試食o甘多款海鮮, 唔錯啊! 飯後仲去左深井食甜品添, 超滿足的一天

食物上桌的時候, 人人已經 "食指大動", 我也忘了影相, 到了尾聲時才拍下幾張照片, 唔好見笑啊! 相信秋冬天去食會好一些, 因為夏天在大排檔實在太熱了!