可愛飯盒仔

收到朋友傳來的電郵, 內有一批可愛小飯盒的圖片, 由於圖片太多, 等我揀出幾張同大家分享啦! 真係好靚架, 我諗...........我一定唔忍心食左佢啫! 果 d 廚師真係好有心思呀!

你最鍾意邊一款啊? 我最鍾意 "綿羊", 佢身上 d 毛毛 "質感" 好似呀!

令人開心的 "太陽花"

雖然 "大鄉里出城" 尤如被騙 (因為自己唔識 "規矩" 叫食物, 對重量無概念), 但係錯有錯著的走左去香港公園開餐, 卻有意外收獲啊!

你睇............D 太陽花 (向日葵) 幾靚, 睇左之後, 令人心曠神怡, 開開心心的繼續上下午的課!

大鄉里出城

今日又繼續返學的旅程, 由於第一節早左落堂, 變相有一個 "悠長午餐" 時間 (差不多兩個鐘), 當時我身處金鐘, 你知啦, 果附近的食肆絕對唔平 (便宜的大家樂及麥當奴一早被外傭霸佔了座位), 我先去左大型超市 GREAT 用眼睛去 Shopping, 再為午餐作打算

由於早餐又未完全 "落格", 而且天氣炎熱, 無 mug 胃口, 我就想食沙律當午餐, 誰知天生對 "度量衡" 少條筋的我終於 "出事" 了! (活像 "大鄉里出城")

睇啱左一款叫 Greek 的沙律, 材料有: 青瓜, 車厘蕃茄, 芝士, 橄欖, 紅椒, 青椒, 黃椒, 紫洋蔥等 (它的顏色好靚, 我無加沙律醬, 怕肥), 售價係 $18 / 100克, 我就點左 1 客, 店員比左一個膠兜我睇, 我點頭, 然後見佢 "起勢" 的畢呀畢.......... (心想: "正呀!" 我估也許係 200 克吧! $36 也 ok 呀!)

點知........當我接到沙律後, 睇一睇盒底的價錢, OH!!!!!!!!!!!! 原來有成 300 幾克, 盛惠 $56.5, 呀........真係肉都赤晒! 唯有硬住頭皮, 行去附近的香港公園開餐, 幸好味道也唔錯, 而且好新鮮!

但係當我食飽飽之後, 我竟成為了 "別人的午餐", 由於我著裙子的關係, 被蚊咬左 3 處, 其中兩處仲係後大腿的高處添 (近 pat pat 的位置), 既攪笑又唔抓得, 好尷尬啊!

豐盛的慶功宴

尋日拆線離開醫院後, 去左樂富商場 (因為落大雨要暫避), 食左一餐豐盛的壽司, 慶祝 "甩難" 了 (甩掉了眼皮上的小瘤), 哈哈!! 我解禁的食左少少豉油 + 日本芥辣才返學, 好開心啊!

我愛 "大反派"

今日原本要返學至到晚上 7:30, 幸好講者講得快, 比預期早左兩小時放學 (其實係迎新日, 講學校規矩及課程編排等等), 可以趕得及去和嫲嫲一家人提早食 "中秋節"晚飯

結果....比我知道我爸爸 "後繼有人"了, 爸爸的個性唔喜歡 "隨波逐流", 你叫佢去東, 佢偏去西, 而亨 BB 就似足佢了

例如: 我地叫佢聽電話, 佢說: "唔聽",
叫佢執拾好 D 玩具, 佢說: "唔執",
總喜歡在 "指令" 的字眼之前, 加上一個 "唔" 字, 令人哭笑不得!! (真係似足佢阿爺, 我老豆呀!)

我地重成日整蠱佢, 會引導的問佢: 亨亨乖唔乖呀? (想設計令佢答: "唔乖"!!), 無論如何, 一家人總愛上 E 一個 "大反派" 啊! 剪左頭髮的亨仔, 又真係幾靚仔的, 而且仲好似哥哥的樣貌添!

明眸再現

今日終於夠期去拆線了, 好彩傷口經過我每日的悉心照料, 總算 "埋得唔錯", 只留下少少疤痕啫! 只要繼續介口 同埋 每日搽去疤膏, 好快就唔覺架啦!

明眸又再現, yeah!!!

公司的中秋厚禮

尋日下午和同事外出去半島酒店, 為的就係在網上流傳 "十分馳名" 的嘉麟樓月餅, 試食後才分享食評, 而家先睇外表啦! 售價每盒 $198 (內有 8 個迷你奶黃酥皮月餅)

紙袋盛載月餅禮盒, 派頭十足

禮盒外形討好, 高貴大方得來又夠 "的骰", 唔 "阻訂" (因為要放雪櫃的), 而且攞回家也方便一點啊!

等我靜靜地打開盒, 掀起牛油紙影一張 "大特寫" 先! (奶黃的香味湧入鼻子), E 張相係唔係 「好有偷窺 Feel」 呢?

至於月餅味道, 留待下回分解!!

違久了的零食

今日午餐後突然落大雨, 我等躲入零食店內 "睇零食"。

結果尋找到違久了的小時候至愛的零食, 相信唔少兒童細過時也試過此零食的, 而當時我最愛 "可樂" 味!










今日一於買枝 「珍寶珠」來回味一下先! 而家賣 $2 / 枝, $5 /3 枝 呀! 和同事夾份, 剛好每人取走一枝心頭好。

"進化" 了的「打風怪人」

尋日改良了包紮方法, 好似好睇一點丫啊? (今日唔用 "白色的貼肉膠布, 效果更好呢!)

應節的......小可愛

今日收到朋友送來的 "應節小可愛", 你睇個外包裝幾有型, 幾靚..............


估唔到 "內涵" 都唔錯喎! 多謝晒!

他的志願

你地知唔知道 "他" 的志願係什麼?

我講的 "他" 就係我家中眾人的 "心肝錠" 小亨 B 了, 原來他的志願係 ................做警察呀!

我在 "玩具反斗城" 中見過圖中的玩具車車, 好貴架! 好似要 $800-$1,000 (唔記得實際價錢), 而家 D BB 真係幸福啦!

"打風" 的 怪人 出巡記

今日係手術後第一日返工, 長時間在外接觸塵埃, 又唔方便一日洗三次傷口, 所以我用護理膠布貼, 妥善包紮傷口, 以防傷口發炎

不過.............我包得幾肉酸啊! 好似 "科學怪人" 出巡o甘, 途人個個都睇到眼甘甘, 唯有阿 Q 的自我催眠: "我係靚女"!!!

一名多口的朋友仲話: 本來護理膠布貼無什麼大問題 (透明膠薄膜 + 肉色護理墊), 最大問題係你用 "白色" 的醫生膠布黐在左右兩邊, 活像 "打風" 的模樣 (打風時的玻璃窗), 哈哈........... (佢又真係形容得幾似的, 我投降了, 聽日改善一下包紮方法啦!)

大昏迷的小傻瓜

上週六做完手術後, 個人 "慒慒懂懂" o甘, 也許眼皮位置太近腦部, 因此當麻醉藥的藥力過後, "痛" 開始發作, 人也變得行動緩慢, 吽吽哣哣o甘 (好似藕病o甘), 初頭唔知點解, 只以為自己戴左太陽眼鏡 (無近視度數), 所以暈暈o下, 唔習慣啫

第二日 (週日), 吽哣的感覺持續, 我都以為自己藕病, 擔心起來, 所以星期一趁住假期, 就在家中 "大昏迷" 了一整天, 醒來時鬼o甘生猛, 只可惜 "日頭瞓得太多, 晚上有點睡不著"

星期二個人開始回覆正常啦, 而且今天又要返工返學, 所以心理上已經 "預備" 得妥當 (雖然有 "千般不捨")

你地話啦....比 "大舊錢出來叫醫生割自己一忽肉, 然後就迷迷慒慒的大昏迷, 仲要抵受皮肉痛, 個心又赤之苦", 我係唔係一個 "小傻瓜" 呢!

不過呢..............即使我係 "小傻瓜", 亦都係 "天下界最靚的小傻瓜啊!" 呵呵................

開心假期完結了

上週六眼皮做了小手術, 之後享受了醫生開的兩天 "病假" (在家休養, 避免塵埃滿佈的街道污染傷口), 不過明天就又要 "踏上征途" 了, 心中十萬個唔捨得

幾日以來, 身邊也有相熟朋友來電, 既有問候, 亦有轉告公司的近況, "老馮" 又被人投訴了 (工作唔盡責, 態度亦欠佳, 和別人溝通合作亦有困難)

唉..........平日我自己都 "身受其害", 唯有嘆句 "愛莫能助, 別人命好" 吧! (管不著佢的工作及態度, 只做好自己的事便算了)

最近 KK 和我在公司內也好像電視劇 "家好月圓' o甘, 我地一齊做 "阿慶" 的角色, 除左 "啞口無言" 之外, 仲日日被人 "激到慶", 有苦呻不得 (啞子食黃蓮) 啊!

我的 "開心假期" 要結束了, 明天又要再做阿慶啦! 好彩只做三天, 又可以抖一抖啫! (但願佢唔好又再難為我就好了), 期待本週六的 "拆線" 呢! (希望傷口埋得 "靚一點" 啦)

四色草餅 vs 糯米糍

今堂的街頭小食係教授 "四色草餅 及 糯米糍", 過程並唔複雜, 算係簡單易整, 如果係 "宴客" 的話, 可預早整定啊!

首先課堂前導師已經整好了 "(紅) 豆沙餡 ", 然後在課堂上教我地如果整 "草餅 及 糯米糍皮" (草餅皮 同 糯米糍皮 差不多, 只係加添了 "食用顏料" 及 "薯粉" 吧!), 蒸熟 d 皮後, 就可以包豆沙餡了, 最後在外層洒上 "椰絲" 或 "糯米粉" 即成 (用 "椰絲" 加在外, 草餅顏色較明顯, 如果用 "糯米粉" 的話, 就粒粒也是白色了)

我的製成品 (四色草餅 - 紅色, 綠色, 黃色, 紫色 及 白色糯米糍)











同學仔的製成品 (用顏色食物盒盛載, 好靚啊!)


食後, 我認為椰絲味香, 而且唔太甜, 我鍾意 "草餅" 的口感多一點, 糯米糍太軟 (太林) 了!

可怖的 「牛雜」 聲

喜歡 "掃街" (食街頭小食檔) 的朋友都有試過在街頭食 "牛雜", 小販用夾子取起某一部位的內臟, 再用較剪 "剪開" 它 "插...插..." 聲發響後, 用竹籤串起來, 就有得食了。

尋日中午抵達醫院做好註冊後, 醫生再詳細講解一次手術過程, 填好了手術同意書, 就被帶到手術室了。 手術的過程比我想像中 "嚴謹" 得多, 姑娘帶我先更衣 (病人袍), 頭帶浴帽, 然後躺在手術床上, 手術室的 "大光燈" (手術燈) 正如早前惡夢中的出現一樣。

醫生先用筆勾劃手術記號, 然後用酒精消毒, 用布封起面部其他部分 (只露出眼部), 在眼皮打麻醉針 , 待藥力發作後, 開刀了!! (只感到 "有東西" 在眼皮上劃了一下, 但唔痛), 然後...................

由於我合上雙眼, 只可憑 "聽覺" 和 "感覺"去感受醫生的動作, 在醫生開刀劃了一刀後, 我感到醫生用 "夾子" 夾起患處, 再用剪刀 "左剪剪、右剪剪" (發出插.....插......聲), 活像剪牛雜o甘剪出患處 (去除它), 雖然心內覺得好恐怖, 但卻唔敢隨便 "郁" (連眼球都唔敢轉)。

最後止血縫針 (5針), 7 日後拆線覆診, 你地睇............手術後的患處變成點!! 而家真係唔敢在街頭食牛雜 (因那可怖的 "插....插..." 聲 令我想起手術的恐怖感)

回到少女的情懷

尋日早上, 在睇完中醫之後去食早餐, 途中忽視想起了一首歌, 心中在哼著, 是什麼歌呢?? 一時間想唔起歌名, 只記得它係 "中學時" 聽收音機 某廣播劇 的主題曲

當時我地成日瞞著媽媽, 晚上開著收音機聽廣播劇 (因為媽媽擔心我地夜瞓, 無精神返學), 果時的廣播劇真的風摩我地年青一族架, 唔收聽又點和同學有話題喎! 而且那種 "偷" (聽) 的刺激又令我地更感興奮呢!

講左o甘耐, 究竟係什麼歌呢?

原來係由 彭羚 主唱的 "未完的小說" - 商業二台叱吒 903蘭西夫人劇場《戀愛 1/2》主題曲, 我仲想起了第一套收聽廣播劇係 "初戀無限次", 唔知道差唔多年紀的你, 對 E 兩套劇有無印象呢? 好想再重溫啊 !

一瞬間, 情懷又回到少女時期, 哈哈............計我話, 多 D 懷緬 "小時候", 就會 "後生無限次" 啦!!

私房甜品

"私房菜" 就指 小量生產 而 製作精美 的菜式, 今日多得朋友 T 送來佢自製的 "私房甜品" 楊枝甘露










嘩..........一打開盒蓋, 好香濃的芒果味喎! 再攪 o下它, 發現紅柚, 西柚 及 芒果粒 均 "超級足料" 呢! 好好味啊! 我最愛它香得來又唔太甜 (剛剛好)

多謝朋友的心意, 就連媽媽也盛讚那 "私房甜品" 呢!

愛不分界

想像一下嬰兒、小孩的眼中, 係無性別、老嫩、靚唔靚之分, 只要佢地感覺你友善親切, 就喜歡 "黐" 你了! 有時候, 佢地在街上認識到新朋友仔 (別的嬰兒、小孩), 最愛說 hi, bye bye 及 飛吻添!

當嬰兒、小孩心情好 (熱情起來) 的時候, 有時會錫其他人的面珠, 和別人擁抱 及 揮手, 完全無分性別, 那時候, 人和人之間原來係無 "隔膜" 架, 只要一個擁抱, 一個吻 就能夠溝通起來 (表示友好)。 其實從何時開始人和人之間變得冷漠無情呢?

某日和朋友談起 "同性戀" 的話題

朋友 A: 時下的同性戀多的是, 尤其在少女 (青少年) 當中, 好似有明顯的增長, 街上見到唔少呀!

朋友 B: 係啦! 某君的表哥和表姐也是 同性戀 的, 好似好普遍o甘, 也許現代人的思想開放了, 容易接受同性戀, 我都可以接受別人係同性戀, 但係...........如果係我的子女, 又好似 "個心會唔舒服" 喎!

朋友 A: 其實我覺得 「人人天生都係 "雙性戀" 的 (無分性別的向人人表示友好), 只不過睇後天的培養, 同埋靜待 合適的時間 出現 合適的人, 這時才會知 "那有緣人" 係雄還是雌!」

E 一個 "天生雙性戀" 論完全破壞了 「同性相距, 異性相吸」的定理, 不過我卻響往嬰兒、小孩那種人人平等, 無分你我的純真行為 (好耐都無 "扭" 過父母的擁抱了)。

『真愛 ── 不應該分界嗎?』

那位 《老馮》

E 兩日被某些事影響了心情 (少少影響), 就係有些人自己想去做某些事, 然後硬拉你落水, 用你的名義 "一齊" 向其他人硬銷 (被人利用了, 心情固然麻麻地)

點知佢仲要 "慌死蝕底" 的快速向其他人宣揚 「佢已經為大家爭取了什麼......」, 然後最最 "精景" 的係最後的一句 「Big Mac 會安排架啦!!」 (完全被擺上桌囉!)

噢......天呀! 又唔係我想攪又或者去你講的聚會, 係你自己一廂情願吧! 為何拉我下水? 還要我去安排呢? 我切切實實感受到 《功就你領, 野就係人地做, 人地揹》的心態!!

只感到有一點 「大石擲死蟹」 的無奈感覺, 喘不過氣來!

唯有勸自己, 總之「做事最緊要對得住天地良心, 別人愛耍什麼手段, 由佢吧! 善有善報, 日久見人心!」

日有所思, 夜有惡夢

眼睛的手術快要開始了, 心內或多或少總有點擔心, 既擔心影響視力, 又擔心疤痕明顯, 影響外貌, 雖然擔心的事並無宣之於口, 但係..........竟然入左 "潛意識" 喎!!

尋晚瞓得唔好, 因為整晚反覆發著同一個惡夢, 夢中我正躺在手術病床上, 雙眼卻被 "手術用的大光燈" "燦親", 一個人既恐慌又孤獨的面對手術, 好可憐呢! (雖然明知 媽媽 和 KK 會在外陪我), 但也只得我一人在房內應付恐怕咋!

成晚左甸右甸, 左夢右夢, 驚恐至天光呢! 今日帶住一對熊貓眼返工去

唔通人地成日講 "日有所思, 夜有所夢" 係真的???

KK 被騙了!!

最近天氣酷熱, 我家最愛在晚飯後食 "消暑甜品", 美味的紅豆雪條, 啱晒熱愛 "紅豆" 的媽媽, 經常食開 "牛奶公司" 的 "紅豆樂" 被媽媽評為 "紅豆既爛又細粒, 無口感, 而且好甜"

某次爸爸行經超市, 買左一款我地未食過的紅豆雪條 (因為減價), 點知........居然 "執到寶" 喎! 紅豆大粒又有口感, 而且味道唔太甜, 好味呀!

上次同 KK 行超市, 我就將此款雪條介紹比佢啦, 滿心歡喜的拿下一盒 "紅豆霸" 落購物車, 點知....................

今晚回家後, 媽媽話爸爸今日見特價, 又買左紅豆雪條, 仲攞出來引誘我, 這時我才知, 原來我記錯左牌子, 講錯比 KK 知, 好味的該是 "雀巢出品" 的 "紅豆主義" 呀!!
KK 被騙了! 還要哽下一整盒 "紅豆霸" 呢, Sorry 啊! (我唔係有心架)

mug 東東之開估

原來佢係一個 "眼鏡托", 用作承托眼鏡的

將佢放在你床頭附近, 起身時就唔駛四處去揾眼鏡啦! 哈哈!!!!!!! 又幾 "潮" 的裝飾喎

佢係 mug 東東?

大家估 o下 E 一個 "戴鼻環" 又有咀唇的野係 "mug 東東" 來的?

等我比少少提示你地啦! 佢既 "睇得", 又 "用得" 的, 明日開估!!!

亨仔的禮物

尋日我地除左飲飲食食之外, 仲不忘為我地的寶貝亨亨搜購所需物品, 首先我地買左 E 樣野, 咦.........係 mug 野 o黎架呢??











啊.........原來係 "小朋友專用的筷子 (右手用)", 其實它的原理等於 "夾仔" o甘, 不過特別設計的 "圈圈" 可以 套住手指仔, 等佢地學用力 "揸筷子", 雖然而家比兩歲唔夠的亨亨略嫌早 D, 不過鬼叫 "它" 好得意, 而我地又心急咩!!

我地又點會o甘殘忍, 只要求亨亨學習, 唔比 D 動力佢呀?? 於是我地又買左 "BB 仔專用的軟糖" 同埋 "大架又紅卜卜的玩具車車" 呢!

亨亨, 你睇我地幾錫你!!

風球後週六尋食記 (下)

我地三人臨時決定 "出征九龍" (尋食), 因為天氣晴朗, 無謂辜負上天一番心意啊!

首先到旺角先逛一逛, 然後行落 深水埗, 下午 4:00 去左蔡瀾介紹 而 本身又出名的 "維記牛肉麵", 我地分別叫左 "牛肉麵" 同 "豬潤麵" (由於太肚餓及唔夠冷氣太熱, 忘了影相)

再行去西九龍廣場購物 (尋晚的 "宵夜"), 下午 5:00 才再到出名的 "松記糖水" 食甜品, 我地叫左: "幻彩明珠" (大粉圓, 小粉圓, 黑珍珠, 涼粉, 西瓜, 蜜瓜, 哈蜜瓜, 奇異果, 芒果汁) , "哈囉" (大西米, 小粉圓, 黑珍珠, 芒果汁, 雜豆, 涼粉), 同埋 兩杯 "西瓜滑冰" (好消暑解渴啊!) 甜品好好味, 好滿足啊!
由於飽飽地, 我地稍稍休息才再戰鬥, 大家一齊睇 "奧運", 嘩!!!! 好緊張啊...........

晚上 10:00 了, 我地才開始 "富貴宵夜", 分別有: 1) 電視廣告中的 "罐頭鮑魚" 做刺身, 2) 用微波爐翻熱 (即食) 的冬菇炆海蔘, 3) 黑俠王子買來的 "酸薑皮蛋酥"

罐頭鮑魚 (一罐 4 隻) 有口感但無味道, 全靠日本芥辣才能喚起味蕾, 即食的冬菇炆海蔘雖然方便煮食 (只係翻熱), 但冬菇味只稍香 (只限嗅), 汁液好淡味, 幸好冬菇及海蔘也頗有口感 (唔係一叮即爛), 酸薑皮蛋酥 "超大隻", 食完真係 "飽到冚", 尋日的美食配額 (quota) 幾乎超額啊!