澳門 "廉價" 一日遊 (感受篇)

等我分享一 D 相片比大家睇o下先!

E一架就係我地逗留大約 7 個鐘的汽車啦, 都算幾乾淨同新架, 座位之間又夠寬闊, 唔錯!

由於賭場內唔比影相, 所以我地在酒店賭場範圍外影左幾張相：

今次旅程的感受可以用 8 個字去形容：「超值、驚險、刺激、抵玩」

超值： 因為 $99 / 1人包晒 "國內運輸工具"、"兩餐膳食" 及 "小費", 所以超值

驚險：全個旅程至 "驚險" 之處就係 ── 回程的時候, 當我地抵達澳門關閘 (往拱北方向時), 過關人數 "遠遠超越" 你所想, 但係秩序就...........(你想像同國內同胞 "爭" 過關的景象)。

我地排隊的隊形如下圖示 (明明 1 行的隊伍 就 分裂成 2-3 行隊, 中間大把新的人潮零星的 "插隊") 難怪人龍長久也不動, 大家你推我擁的, 大型行李又四處衝擊人龍。怒罵關員工作緩慢 及 零星的 "插隊" 聲此起彼落, 大打出手的大有人在, 婦孺叫喊救命聲 (被擠得) 七零八落。

我地在澳門關閘花了 1小時 15分鐘才可過關, 好彩拱北關口人手快, 最終我地也比集合時間 (晚上 7:15) 遲到了 15 分鐘 ( 7:30 才到達)。(其實我地蠢左, 應該排比較右邊的隊, 雖然人龍看似好長, 但實際 "由於內圓周關係", 它的人龍該比左手邊的短 2-3 倍)

由於過關真的 "太混亂" 的關係, 令人對 澳門 "反感" 了不少。真的怕怕了!

刺激：和同胞爭食之戰就真的夠晒刺激了 (因為過程中, 你會被人用手踭刺、爭唔到食時又夠激 (氣))。

玩老虎時也好刺激, 因為我地唔識玩, 研究左好耐, 店員仲好不屑我只 "唱 $50 港紙" 玩添! 「最終輸了 $20」。

由於之前過關的意外遲到, 加上中途聞說大塞車, 司機好努力去高速行駛 + 頻繁切線, 好玩過 "過山車" 同 "亡命小巴", 今日仲有命在此打 Blog, 真的太幸運了, 感謝神恩!

抵玩：你想一下, 閣下只需付出 $99, 就可以玩足 18 個鐘 (從早上 6:00 直到凌晨 12:00) , 係咪夠晒抵呢?

最後感激媽媽無怨的被我 "賣豬仔", 嚇餐死! 佢話：「從章程中明明是去 "意大利" 的 (威尼斯人), 估不到最後卻去了 "羅馬" (希臘神話)」 其實係 「我」安排失誤, 本以為 "威尼斯人" 就在 "新世紀希臘神話" 附近, 無想過食完午餐、睇一陣歌舞表演後, 就唔夠時間過去 (怕趕唔切回來晚餐及坐車至關閘), Sorry!

尋晚在羅湖口岸落車後, 人十分疲憊, 而雙腳卻 "硬晒" (由膝頭以下至腳踭), 也許坐車太耐, 血液流通唔暢順所致。

今次真係一項好新鮮的體驗, 出外玩左成日, 才知道即使辛苦工作, 也是香港 (我的家、我的根) 好!! 難怪別人說：『在家千日好, 出外半朝難。』

澳門 "廉價" 一日遊 (飲食篇)

澳門 "廉價" 一日遊的團費係包左午餐及晚餐的, 兩餐均在 澳門 "新世紀希臘神話" 入面食的。由於餐廳位於賭場範圍內, 因此我唔敢取出相機影相, 故此o係度講o下就算了。

"新世紀希臘神話"的客源主力係 "賣團" 的 (賣比旅行團), 有 7 成國內團、2 成香港團 及 1 成散客。

眾所周知國內同胞的文化架啦 (怕蝕抵、唔興排隊 亦 唔講規矩), 因此同場食飯的時候, 就好似要同佢地 "打交o甘搶" 一樣 (尤其是一些 "高級少少" 的食物, 如：瀨尿蝦、茄汁蝦、花蟹、青口、蒜蓉炒蜆等, 幸好 "魚生" 係一定要排隊及配給供應的), 幾恐怖架! (我地食到 魚生 、青口 及 蒜蓉炒蜆 已經 『好叻』架啦!)

講o下野食先, 大概有：

冷盤：
魚生 (三文魚、吞拿魚、立魚, 每次限取四片)、中華沙律、辣辣冷麵、青口、火腿、各式沙律 (雜果、薯仔、南瓜)、生菜、蕃茄等等

熱盤：
白飯、星洲炒米、蓮藕排骨、滷水雞翼、鹽水雞腳、滷水腩肉、咸菜豬肚、炒椰菜、咖哩魚蛋牛丸、瀨尿蝦、茄汁蝦、花蟹、青口、蒜蓉炒蜆等

甜品、飲品及其他：
甜品有各式各樣的西式糕點 (樣貌唔吸引, 亦唔記得有什麼了) 及 雪糕、其他的有 XX粥 (該是有料的, 不過被人 "畢晒", 只得粥底)、羅宋湯、兩款中式湯 (又係被人 "畢晒" D 料, 唔知係什麼湯)、生果有蘋果、雪梨 及 西瓜 (唔甜的)、飲品有水、橙汁、冰紅茶、葡萄汁、紅酒 (似果汁味汽酒) 等。

睇落好似好多野食 o甘, 唔好忘記以上食物只係 「限量供應」 (有 D 只供應一盤), 但你要同 "幾百人" 一齊爭食, 場面幾o甘 "墟冚" 呢!

對於體力較弱、人也較 "斯文" 的 「港人」來說：「唯有食少 D 啦, 唔夠飽就返港再食過, 總之...........爭食也是一項消耗體力的大運動啊! 出來玩最重要係 "安全", 唔好因爭嗌而受傷回家。」

邊有 o甘大隻蛤蜊啊???? 不過唔試過又點知 "有幾好呢"?

澳門 "廉價" 一日遊

今時今日 $99 港紙可以做 d mug? 夠唔夠你週末出街消磨一日兼食埋兩餐 (午、晚餐)?

前幾日心血來潮氹埋媽咪一齊參加左 "大航假期" 的 「澳門威尼斯人渡假村 ── 一天汽車團」 團號：DH1N1068A 詳情可參考： www.62844992.com 原價 $69 團費, 4 月份出發每位減 $20, 結果 $69 - $20 + $50 (小費) = $99 / 1 位 (包全日國內運輸 及 兩餐膳食)

旅遊路線列明如此的：
集合 → 珠海 (經拱北關至澳門) → 午餐於澳門新世紀酒店品嚐 (豐富自助午餐) → 團友自由活動 (可到最新開幕的威尼斯人度假村 / 金沙 / 新葡京 / 希臘神話 等碰運氣) → 晚餐於澳門新世紀酒店品嚐 (豐富自助晚餐) → (經拱北關返回) 珠海 → 回程送返羅湖

等我略略講一下我地的行程啦：
早上 5:30 起身, 6:00 在家出門口
早上 7:30 羅湖口岸茶餐廳 集合 (結果等人齊至 8:00 才開車)
早上 8:30 深圳灣外更亭接戴其他客人上車
大約 11:20 抵達拱北關口 (之後的行程 "全是客人自助的, 直至晚上集合")
約 12:00 過關抵達澳門關閘, 自行乘 "新世紀酒店希臘神話專車" 至酒店)
約 12:20 抵達酒店、自行換領 "自助午餐 及 自助晚餐" 餐劵) 及 食午餐
約 1:30 食飽後, 在賭場內四處參觀、睇免費歌舞表演、玩 "老虎機"
約 3:00 出賭場外、酒店前影相留念, 在外四處逛逛
約 4:00 回賭場內四處參觀、玩 "老虎機"、同埋 "飲免費五花茶"
5:00 準時入場食自助晚餐
5:35 從"新世紀酒店" 坐專車至澳門關閘
6:00 - 7:30 過關回拱北關口再集合
8:00 拱北開車回深圳 (途中聞說遇上大塞車, 因此我地 "兜路行" 以避開一劫)
11:30 抵達羅湖口岸
12:00 終於回到家了

至於感受, 留待下一篇幅才講 (太長篇了)

意法大混戰

今晚約左媽媽同舅父一齊晚飯, 去左食 "意大利法國 fusion 菜" 的 "文化薈館" 餐廳進膳, 我地點左 3 個套餐, 套餐包括麵包、餐湯、主菜 及 餐茶。

1) 菠菜吞拿魚炒飯 (媽媽點的)
2) 白汁大蝦拼青島鮑片配薯菜 (我點的)
3) 法式芒果汁龍脷柳配意粉 (舅父點的)

結果:
菠菜吞拿魚炒飯: 淡而無味但不油膩, 麻麻地。(亞軍)
白汁大蝦拼青島鮑片配薯菜: 味道清清的, 又有少少芝士味, 幾好食。 (冠軍)
法式芒果汁龍脷柳配意粉: 芒果汁太過 "濃" 及 "似香精" 味, 龍脷柳又林又有雪味, 難食也! (包尾 ── 認真是 "金玉其外")

成餐飯連加一共 $220, 不過食完卻好似 "無 mug 野落過肚" (個肚依然好空虛)。

媽媽說請我食 "龜苓膏" (可以去濕), 我說 "唔飽肚" 的拒絕了。 舅父又說可以去食 "糖水" (中和一下食物的咸味)。

o甘樣睇o黎.......我同舅父兩個加埋就 = "大咸濕" 囉, 真攪笑!!

獵艷 Vs 尋食

問o下你, 到底 "獵艷" 係什麼心態的呢?

無論你已有伴侶, 抑或單身, 獵艷其實也是一種本能, 去尋找吸引你的人。 那一種期待, 足以令人興奮!

出動獵艷的時候, 你好自然的會打扮自己, 目的在於吸引別人的注意, 增加曝光率, 也令獵艷更有信心。


那麼 "尋食" 的心態呢?

「民以食為天」 嬰兒出生不久便需要食和睡, 此乃人之 "基本所需"。色香味俱全的食物最能吸引 "為食豬", 只要係知道好食的東西在哪? 不管它出自五星級酒店, 還是街邊的大排檔, 只要消費得起, 絕對不會放過它。

尋食也得做好事前準備, 不能太餓或太飽, 食之前不可食 "濃味" 的東西 及 要用清水嗽口, 以令味蕾清楚真實的味道。


"尋食" 同樣令人期待同興奮, 感覺竟和 "獵艷" 的同出一徹, 真攪笑!!!
我要求的 "層次" 好低, 只要滿足我 "基本所需" 就 OK 了, 請我食過飽就夠了, Come on BABY!!

助己助人

尋日報紙說有研究証明：「"定期捐血" 比 "無定期捐血" 的人 患上癌症的機會較低」

也許是有根據的, 因為：

1) 定期捐血可加速 "新陳代謝", 好細胞更快殺死壞細胞
2) 助人為快樂之本, "快樂" 的情緒令人都病少 D 啦
3) 定期捐血有助血管暢通, 防止患上血管有關之疾病

既然係o甘, 點解 "有能力的你" 唔快 D 行動呀?

飲 "屎"??

飲 "屎"??

無錯, E 個世界真係有人 "甘心" 飲 "屎" 的, 仲要係付出 "昂貴" 的價錢去飲添! 大家睇o下以下 E 段新聞：

**********************************************************************************

貓糞咖啡是由牙買加的藍山咖啡和印尼 麝香貓排泄的咖啡豆調製而成。印尼麝香貓屬於家貓近親，生長於蘇門答臘島北部叢林，夜間覓食時，透過敏銳的嗅覺，只挑選咖啡樹中最成熟香甜、飽滿多汁的咖啡果實食用。麝香貓將果肉消化，但堅硬的咖啡豆則被排出體外。專家說，咖啡豆一般要通過外殼發酵過程，在麝香貓腸道中則有特殊的細菌製造獨特的發酵環境，令咖啡豆倍添獨特風味。

這種風味獨特的咖啡，每杯售價高達50英鎊（約765港元），並將於本月在倫敦有售。

**********************************************************************************

你有無興趣試一杯呀? 我就無啦。想起都有少少肉酸!!

三隻小豬的故事

「三隻小豬的故事」係兒童耳熟能詳的故事, 內容大概是這樣的：

從前，有一隻胖胖的豬媽媽，她生了三隻小豬。

有一天，豬媽媽告訴他們說：「你們都長大了，應該自己蓋房子，自己住，自己種田，自己生活。我要你們自己照顧自己。」

豬大哥想一想說：「蓋一棟稻草屋吧，那最簡單了。」　　稻草屋很快的蓋好了，豬大哥好得意，他馬上去找兩個弟弟來，很驕傲的對他們說：「我的房子蓋好了，很漂亮吧～，你們也快一點蓋吧！」

豬二哥想了想，說：「稻草屋會被風吹倒，那我就用木頭來蓋好了，木屋較重，不怕風吹。」　　豬二哥決定以後，「咚咚咚，咚咚咚！」他很認真的工作，一會兒敲敲釘子，一會兒鋸木頭。很快的，一棟木屋蓋好了。

豬小弟不慌不忙說：「我蓋房子雖然比你們慢，但是我要蓋的房子不怕風吹，也不怕敲打，紅磚房子最牢固了。」　　豬小弟不理會哥哥的嘲笑，他搬好了磚塊，又搬水泥，他把水泥和好了，開始堆砌磚塊，一塊一塊將抹上水泥的磚頭堆砌起來。豬小弟心理想：你們不要笑我，等我蓋好了，你們就知道了，我的房子比什麼都堅固，野狼來了我也不怕呢！

最後野狼真的到訪豬大哥的家說：「砰砰砰！小豬朋友，快給我開門！」野狼叫門叫得好兇。豬大哥嚇得臉都白, 野狼一口便吹散了豬大哥的稻草屋, 豬大哥唯有走到豬二弟處暫避。

可是野狼吼叫說：「木頭屋子一樣擋不住我，我一定要把你吃掉！」說罷就揮拳「砰～～」，門板發出吱吱吱的斷裂聲，結果撞倒了木屋子，他們直奔到豬小弟的家。

豬小弟卻一點都不擔心，他說：「怕什麼？這麼堅固的磚屋，野狼進不來的。」最後全靠豬小弟堅固的紅磚屋保住了三兄弟的性命。

小時候我好喜歡聽媽媽講 E 個故仔, 除左因為我家有三兄妹之外 (和故事裏的角色相似, 聽得份外投入), 其次是因為 "第三頭小豬" 最乖又最聰明, 救了兄長, 所以我經常向兄姊示威：「你看老三多醒, 我叻過你地呀!」 結果惹來兄姊的抗議聲：「唓!! 好叻咩? 唔制呀!」

古惑的我, 經常要求媽媽講多幾次 E 個故仔比我地聽, 等我 "有得威"! (原來o甘都有得 "認叻", 邊個夠我威?)

"抱抱" 及 "揹揹" (下)

長大後 (中學時), 我也曾有被揹及被抱的時候 (總唔係好事)：

5) 有一次我沖涼時發生了小意外, 忽然 "砰一聲" 巨響 (不知發生何事), 而我卻誤會了廁所窗的玻璃爆開 (就在浴缸上), 我一時心急衝出廁所 "逃生"。

怎知..............原來因水壓問題, 洗手盤被水柱升高再跌落地, 一地碎片, 我的腳當堂 "中招" (插滿碎片), 其中一個傷口還流血不止添 (當時我家住的地區還未有醫院), 執好行裝後, 家人立即把我送去沙田威爾斯醫院治療。

哥哥自告奮勇的抱起我走去乘的士 (因為怕我再行走, 只會令碎片越插越深), 怎知............中途佢卻氣力不繼說：「阿妹, 唔掂啊! 你好重呀!」

結果奀奀的 KK 卻說：「等我o黎! 阿妹, 你上來我的背, 由我來揹你吧!」 就是如此, 我在 KK 的背上送上了的士。

E 一 D 就叫做 「兄妹情深」囉! 你地唔 "恨" 得o甘多架啦! 最後還要著上一個星期拖鞋回校上課, 果排沖涼仲有好大的陰影添!


6) 又一次我病倒了, 連續發燒幾日也唔退, 醫生說是 「重感冒」, 害得我連回校 "小測" 也缺席, 那次係我大個女以來, 發燒最嚴重的一次, 後來連飯、粥也吃不下, 床也落不了 (尤其是我睡上格床的)。

媽媽及 KK 好擔心 (心想：粥也不吃, 如何有體力康復呢?) 結果 KK 走來床邊睇我, 我說口腔喉嚨痛極了, 辛苦到喊起來, KK 用小電筒一看 (好似小醫生), 十分驚慌的說：「唔掂啦! 你的口腔及喉嚨生滿晒 "白點", 爛晒啊!」

結果我又被 KK 揹上了的士 (因為發高燒及無食野, 無力行了), 送進了威爾斯醫院治療, 探熱針的溫度顯示 103 度, 最後轉送了瑪嘉烈醫院的傳染病房, 原來我在 "麻疹高風期" 中招了, 休息左兩個星期才復課。


爸媽的愛、哥哥的熱情 同 KK 的落力也讓我享盡了 "抱抱" 和 "揹揹" 之「愛的威力」, 暖在心頭。 不過我都會積極的 Keep 住體重, 又或是減o下肥, 免得再出事時, 無人抱 / 揹得起我了, 哈哈哈哈哈哈哈哈哈哈!! (哥哥, 你也要努力的增強體力啊!)

"抱抱" 及 "揹揹" (上)

"抱抱" 和 "揹揹" 是人類之間的親密表現, 當中的溫暖和安全感, 比起 "錫錫" 來得更持久, 影響更深遠。

你還記得嬰兒時期被 "抱抱" 的感覺嗎? 仲記得在過去那些 "深刻" 的片段嗎? 以下就係我的一些小片段 (當中部份是長大後從相片中得知的)：

1) 嬰兒時, 我的頭髮長得 "棟篤企" 而 眼睛卻 "大大的", 活像一頭 "小馬騮", 有一天家裏調較好鏡頭影 "全家福", 我就在 "未修身" 的媽媽懷中, 被拍下了馬騮照。

2) 身手敏捷的爸爸抱著我爬上幾層樓高的大樹上, 當時我不懂驚慌, 只是一臉 "On 居居" 的任由擺佈, 長大後才發現此創舉 "好驚人" 啊!
還記得兒時我曾 "騎爸爸的膊馬", 怕高的我雙手扯住佢的頭髮來 "定驚", 好彩佢天生頭髮多, 否則早已變成了 "禿頭" 爸爸了。

3) 大我幾年的哥哥爭著抱住 BB 的我影相, 由於佢還是小孩子, 抱我的時候狼狽極了, 把我在尿片外的小褲子, 也露出裙仔外, 十分醜怪。

4) 小孩子的玩樂總離不開 "你揹我" 及 "我揹你", 結果小學的時候, 我一時不夠力便把 KK 在背上摔落床, 還害佢跌穿了頭, 要到醫院縫針添! 自此, 佢極怕再被我揹起來 (Sorry 呀 KK, 我無心架! 我也內疚左好耐。)

枯葉?

今晚沖涼洗頭後, 如常地走進廚房 "吹頭", 竟然比我發現..................一塊枯葉黏在門框上。











睇真 D, 原來牠係一隻貌似 "枯葉的飛蛾", 動物世界下的 "保護色" 果然厲害!!

我o甘大個女第一次見 E 隻品種的飛蛾咋! 真係 「大開眼界」。

尋找失落了的.......雪糕妹

小時候, 我的體質較弱, 尤其是氣管, 因此雪糕、糖果等小孩恩物, 往往都無我份, 只可以偶然飲o下汽水咋!

某日媽媽、KK 和 我 路過一檔街頭的 "流動小販" (車仔檔), 媽媽慷慨的買給 KK 及 我每人一個玩偶 ── 可愛的 "雪糕妹" 。如果你是生於 70、80年代的, 對 E 隻公仔一定不會陌生, 同系列的還有 "雪糕仔" 添。 想當年, E 一對活寶貝, 迷到了成千上萬的女孩、男孩架!! 相信而家市面上已經好難揾到了。其實"雪糕妹"一臉雀班, 為何會得我寵愛的呢?

原因是我鐘意佢的長頭髮, 我可以給她唔同的頭髮造型 (如：馬尾、孖邊等)、其次她的裙仔好靚 (有士多啤梨的)、還有最最重要的係佢身上永遠 "掛著一杯雪糕" (我發夢也想食的雪糕)。

傻瓜的我成日手握佢的雪糕同佢說：「唉..........如果你杯雪糕係真就好了, o甘我就可以一啖食左它。」

"雪糕妹" 多謝你給予我美好的回憶, 還伴我走過寂寞的 "介口" 期 (介糖), 你算得上係我心靈上的一點點安慰啊!

意大利艷遇

尋晚收工後, 相約朋友到意大利餐廳 Oliva 找尋艷遇。

一入店, 侍應安排好坐位便送上 1 號佳麗 : 意大行香草包 配 橄欖油紅酒醋, 雖然它 "醋意" 十足, 卻又幾醒胃喎!

不久 2 號佳麗上桌了, 意式煙三文魚薄餅 (半份 - 共有 6 件), 嘩!!!! 它充滿質感, 令我的口腔無空位容得下其他野, 好正! (出道o甘耐, 依然保持水準, keep 得好, 好野!)

3 號佳麗 龍蝦海鮮天使麵 出場啦! 比起以往, 它就缺乏保養, 失色了一點點啦! 也許 "龍蝦" 的來價貴了好多, 因此味道亦 "淡了好多"。

一日辛勞工作過後, 入店消費便有好幾位 "佳麗" 氹我開心, 於願足已!! 朋友還 "又食又拎" 呢! 因為太飽 (疲累多於肚餓), 所以只吃得下 4 件煙三文魚薄餅, 還有 2件做早餐。

由於餐廳的燈光昏暗 (營造浪漫氣氛), 因此相片比較暗及朦, 請見諒!

美女與野獸

報章上說美國田納西州大學最近進行了一項關於 "婚姻滿意度" 的研究, 研究針對了以下組別：

1) 俊男及美女配
2) 外貌平庸的男女
3) 美女及外貌平庸的男性

研究結果指出 3) 組別的婚姻滿意度較前兩者為高。

因為外表俊朗的男子, 容易受到誘惑, 對感情三心兩意。相反, 當外貌平庸的男子娶得美人歸後, 多會感到知足而珍惜眼前人。當然要維繫一段好的婚姻關係, 除了外貌因素外, 也得靠兩方的努力, 如：包容、溝通等。

原來童話故事中的 「美女與野獸」真有其事, 而且關係係比正常人好添!!

令人感動的小鬼

最近經友人介紹, 睇左 E 個 Blog http://hk.myblog.yahoo.com/mami-mama/ 結果出奇地好睇同令人投入。

Blog 的內容係講一家四口的生活點滴, 最難得係兩位小朋友都好可愛, 而父母卻花上好多心血去栽培佢地成長, 如：即使 OT (加班) 好夜至清晨, 回家後也不放過探視小孩一眼, 才去睡覺。(好勤力的媽媽啊!) 爸爸亦一改傳統中嚴父的角色, 經常設小計去整蠱小孩, 陪佢地在玩樂中學習、成長。 這就是我夢寐以求的快樂家庭生活了。

媽媽充當的攝影師, 在捕捉小孩的神韻好細緻, 文章雖是用大人的角度去寫, 但卻充滿了小孩的童心, 讓人不期然回想 "小時候的自己", 好有共鳴!

以前我常幻想如果生養小孩, 1 個就夠晒數, 因為現今工作壓力大, 要花上好多金錢及心機在小孩身上, 若生多幾個, 會變得分薄了注意力。

但係......................睇完以上的 Blog 後, 我又會想至少也要生 2 個小孩才好, 因為小孩之間有自己的一套言語、一套思想, 成年人根本無法明白, 因此 "伴兒" 係佢地成長中的重要角色, 令佢地多交流, 才會學習進步得更快, 也不會感到孤單。

父母在人生路上通常也較孩子 "先走一步" 的 (離世), 你忍心你走了之後, 孩子無兄弟姊妹的支持 (如需要別人的幫忙), 孤身一人麼? 又還是只能外求, 找尋朋友? 其他的表兄弟姊妹總比親生的 "次一級", 缺乏了 「血濃於水」的那份情。

「伴兒」對小孩的成長好重要, 我也要多謝我的父母, 賜我兩位活寶貝陪我成長, 我才能回味當日成長的點滴, 如無佢地的出現, 我的兒時回憶定必枯燥乏味。

小鬼的單純、快樂的面容總是讓人感動的啊!

思念

王菲的歌曲 "我願意" 中, 有一厥歌詞是這樣的：

「思念是一種很玄的東西　如影隨行　
無聲又無息出沒在心底　轉眼吞沒我在寂寞裡
我無力抗拒　特別是夜裡　想你到無法呼吸
恨不能立即　朝你狂奔去　大聲的告訴你.......................」


其實思念是什麼? 它只不過是「回憶」的副產品。

如果一些人和事從來無發生經歷過, 你會思念那東西嗎? (那東西在你心中壓根兒的地位也沒有)
又或者講每當 「寂寞」的時候, 我地才會思念, 因為當你愉快忙碌、充實的時候, 腦子根本無空隙容得下思念, 只著眼於 "目前的一刻", 無暇回顧過去。

過去已成歷史, 理應在心中封塵, 人應該珍惜現在, 放眼將來, 不是麼?
想懷緬過去, 就久不久「回憶」那些陳年往事 (如：我會回憶阿婆阿姨生前的往事), 犯不著去思念, 因為那些歲月不會回頭的 (她們不會復生)。

用你的智慧, 篩選美好的回憶, 留在心頭吧! 無謂 "枉思念" 了。

手信

朋友 Z 上週放假到泰國曼谷 "义電", 令人羨慕呢!

想起泰國, 我在 18 歲的時候和 KK 及朋友跟 "康泰" 去了一趟, 好好玩呢! 因為我愛：

1) 刺激的機動遊戲 (各大型的樂園玩意合晒我)
2) 泰式按摩
3) 大量的美食 (合晒嗜辣的我), 又有好多生果
4) 陽光與海灘
5) 平食魚翅及燕窩

好令人懷念的假期及年紀啊!!!!!!!!!!! 突然間好想去旅行, 那怕只是三日兩夜!!

今日收到朋友 Z 送來我 "手信" (金光閃閃小袋子), 我好鐘意, 多謝晒!

我的夢伴

E 個就係我的夢伴 ── Osc (音: 痾屎), 改 E 個名係因為佢果樣 "傻更更", 好可愛!

佢的毛毛好柔軟嫩滑, 毛色又同 "真的史納莎" 一樣。 o係 N 年前朋友 P 送比我的生日禮物 (係 "Rich" 牌子出品架!), 好好攬架! 佢最鐘意躺在我的肚腩上熟睡。 養佢都唔錯, 因為佢唔駛食、 唔駛痾, 只係定時同佢沖涼就可以, 難怪被我選為 "夢伴" 啦!!

你的夢伴又係 D mug 野呀??

尋開心

「開心」 其實好簡單, 它不用花費好多金錢去得到, 只要 "隨心所欲", 開心就在你左右。

好似 E 幾日無無聊聊的, 行行食食就已經好開心了! 只要調整自己的心態, 常存感恩的心情, 你就更容易獲得開心了!

希望大家天天開心。

18 年伴侶給我的 "領悟"

話說前晚難以入睡, 因為心中為著自己換冷氣而強奪 "雀巢" 感到忐忑不安!

唔知雀仔會否 "無家可歸" 呢! 我是否好自私呢! 對唔住啊! 我的目的只係為了換冷氣, 無心拆掉你地的家, 希望你地唔好怪我啦! (心中浮起了：「我雖不殺伯仁, 伯仁卻為我而死!」感到好內疚啊!)

之後雙手合十的望向觀音大士再訴說一篇心中話, 又叫觀音保佑雀仔早日找到藏身之所。 怎知一瞬間, 心內浮起了：「天下萬物皆有其道, 緣起緣滅, 不由得你去強求, 隨緣吧!」

也許是觀音大士給我的啟示, 說明了當天雀仔曾和我有緣, 築巢於我家的簷下 (此乃緣起), 今天因換冷氣而拆掉雀巢 (此乃緣滅), 雀仔自有它自己生存的軌道, 不由得人去操控, 安心的隨遇而安啦, 也不用怪責自己。

之後心裏舒坦了很多, 一覺瞓到大天光。 對於生命哲理, 渺小的我還有排學, 多謝大家指點迷津!!

最佳娛樂 ── 您是我們的開心果!!

強勁的自助午餐戰鬥後, 我地閒逛左一陣子, 目的是為了 "幫助消化", 之後我提議入元朗同小姪仔玩, 仲可以送上朋友 I 的兒童節禮物比佢添!

無見一輪, 亨亨又高大了, 仲識得講好多野的 "單字" 添! 例如：嫲、爺、姐、姨、丈等等, 當然佢一早已經識得叫媽媽及爹爹啦!

最好笑係佢 E 個 "為食豬" 會為左一塊餅乾、一支益力多去做好多指令, 如：叫每一個人、同人分享自己的零食、跳舞、玩波波、趁夕陽西照時玩手影 (狗仔、鴨仔)、仲識得扮鬼臉、揸相機影人及自拍, 好趣緻呀!
見到您o甘可愛, 真令旁人無憂呀! 多謝您, 我們的開心果!!

戰鬥力強勁的自助午餐

今日聯同 KK 及媽媽一齊到帝苑酒店 3樓 的雅苑座食自助午餐, 我地三人也戰鬥力十足, 尤其是今天的媽媽讓人另眼相看 (失敬失敬)。

我和媽媽中午 12:00 便到達, 入座後便發揮我地的 "小宇宙" 食過唔停, 三個鐘頭內, 一共食左 16 轉食物, 平均兩個幾字就 "清" 一碟食物, 厲害呢!!

由於有優惠折扣劵的關係, 平均每人消費 (連加一) $184, 食物品質也算 OK, 如果有埋生蠔就更好了! 等我比 D 相你睇, 引o下你地啦!

令人尷尬的 "貓屎"

尋日中午途經鄰村街市, 見到 "貓屎" (榴槤) 當造, 買一個平平地的同媽咪兩份分先。

愛食榴槤的人獨愛其香味, 若不, 卻憎它的濃烈臭氣。E 個榴槤熟得很, 一陣陣的飄香隨著清風從鄰村的街市, 一直陪伴我回家。

我跟隨大伙人入電梯, 突然

有一小男孩：嘩!!! 好臭呀, 是什麼呢?
他爸爸面有難色的說：天氣潮濕, 因此一陣 "UP" 味吧, 忍耐一下, 我地快到了!
小男孩媽媽卻說： 不是呢! 那是榴槤味, 好臭咩?? 不知幾香才真, 你未食過咩? 好好食架!!

估不到想氹自己、 想氹媽媽, 卻成了 "令人尷尬" 的主角啊!

告別 18 年的伴侶

今日我要告別陪伴我地 18 年的伴侶了!!! (黯然地.........)

心中雖然不捨, 但它總算 "光榮引退", 它就是我房中的 "三菱牌冷氣機" 喇! (安裝師傅說它是 "真材實料", D 料靚), 由我地入住開始, 它一直服役、陪伴我地 18 年啦!

我的新伴侶正是集平、靚、正於一身的 "美的冷氣機", 總共 $1,540 (包拆舊機及安新機), 趁炎夏來臨之前攪掂它, o甘我就可安享一個涼浸浸的夏天, 美夢常伴我身邊啦!
師傅拆舊機的時候說：「嘩!!! 雀 "鬥" 呀!! 仲要有兩個添。」我探頭一望, 真的見到一舊舊類似 "禾稈草" 及 "髮絲" 的物體 (該是雀毛), 好似好恐怖o甘。

我問師傅：「點解會有雀巢在冷氣機的呢?」
師傅說：「冷氣機背有罅隙, 而且機底又溫暖, 所以 D 雀才會築巢囉! Mug 你聽唔到雀仔叫咩? 你地 E 度也不算厲害, 我曾做過一 D 工程, 冷氣機內有老鼠添!」
是的, 我成日都聽到雀仔叫, 尤其是週末想瞓晏一點, 總被它滋擾的 (大家可參閱 "我不是白雪公主" 一文)

當我知房中的舊冷氣竟暗藏 "奧運場館" (鳥巢) 之後, 心中不寒而慄, 原來我曾開動冷氣, 在外抽空氣入房的同時, 我竟同它們共同呼吸 (好彩無禽流感咋)!

事後我又想：「唔知今晚 D 雀仔回家時, 無左個巢, 又會點呢?」 (心中為了拆它們的家而感到不安內疚)。

提前的 「兒童節禮物」

多謝朋友 I 及其老公的慷慨, 小姪子有一份提前的 「兒童節禮物」, 那是一個 Fisher-Price 出品的玩具蛋, 適合 18 個月以上的兒童玩的。 你睇..............顏色幾 sharp (鮮艷)!!! 真係未開封, 已令人興奮了。











突然間..................既羨慕又妒忌亨亨添, 點算好呢?? 唯有假期入去揾佢, 作狀打o下佢先得!! 一於o甘話啦!

預祝大家明日 "兒童節快樂"!!!

豐盛的 lunch, 開心的人生!!

尋日相約一眾同事 (有新有舊的) 今天一齊去尖沙咀海洋中心 4/F (舊海洋皇宮酒樓) 處試新菜。

E 間日本食店經香港郵政寄左宣傳單張比我地, 內容好吸引架!

午市套餐有和燒 (日式燒烤) 及普通的午市套餐, 價錢介乎 $68-$88 (加一另計), 所有 午市套餐均包括：洋風野菜沙律、前菜 (今日係九菜餃)、御飯、味噌湯及綠茶雪糕。

我和同事分別點左 4 款不同的 午市套餐 (大家可撈亂食) , 包括：

和燒套餐

1) 精選牛肋骨

2) 特上海鮮拚盤 (大蝦、鮮魷、青口、大蜆、銀雪魚)

3) 特選宮崎黑豚肉 (肉眼)

午市套餐

4) 炸蝦什錦天婦羅

比你地睇o下 d 想啦!! 唔錯架, 除返開每位 $85, 雖然有少少貴, 不過的確食得好滿足、好開心呀!!

夢想成真, 真開心!

今日心血來潮無無聊聊同 KK 講：「悶悶地, 好想食 Buffet!!」
誰知 KK 也有同感, 之後我地各自尋找心水食店。

最後我地揀選左 "口碑" 唔錯的 The Greenery 雅苑座 (位於尖沙咀的帝苑酒店), 仲特登上 Openrice 網址處下載優惠劵添 (平日 75 折 或 8折 優惠, 假日 85 折優惠)。

雖然只係 lunch buffet, 但也教我興奮啊!! 因為「食」和「瞓」最能氹得我開心 (我懷疑自己係 "豬" 托世的), 最近瞓得唔好, 一於用食來補補數!!

下次再同大家分享我的美食之旅啦! 今日下午的心情零舍好, 因為正熱切期待週末的美食佳餚。

無聊的生日儀式

小妹在 12 月 24日出生的, 在讀書時期, E 個日子多數正在放聖誕節假。

話過你知, 小時候我有一個 "好無聊的生日儀式" 趁著 E 一日做的 ── 我會在一早起床後, 走到媽媽 (正躺在床上) 的身邊, 縮起身子 (蝦米瞓的) 躺下來, 然後頭靠媽媽的肚皮, 扮著 BB 的哭聲在呱呱大哭。

其實此舉只係想給自己同媽媽紀念, 回憶一下 N 年前我出生的日子, 重溫一下那份溫暖的親切感。 及後人大了, 也感覺此舉太無聊, 不知不覺得無 "舉行這個生日儀式" 了。

假如人人也會在 "生日的那一天" RESET (重新設定) 變回嬰兒, 而下一日又回變回原來樣貌, 那都幾得意喎!! 不過如果和父母同日出生的人便弊了, 彼此也是嬰兒, 那.................誰照顧誰呢?? (餓足一日??)

生命何價??

廣告說：「要養大一個小孩子, 需要 $400 萬」 這麼說我的父母該是 "千萬富翁" 了 (因為有 3 名孩子)

其實父母養育子女又何只用左 $400 萬o甘少? 至少當中的心血就不止 E 個價錢 (亦不是用錢可以買到和衡量的)

最近沙田第一城的三屍命案, 死者疑欠債約二十萬所致。 原來 「人命」 只需平均 $7 萬蚊 / 1人, 幾o甘悲哀。

原來人脆弱的時候, 一想唔通, 便會做出愚蠢的決定, 試想想自己係一個 $400 萬的人, 卻為果少少數目的欠債而犧牲, 值唔值得?? 尋死需要莫大的勇氣, 如果你有 E 份尋死的勇氣, 點解唔將它用作解決問題身上??

唔好以為 「死左便一了百了」, 你活著的親人要幫你執手尾, 那些害你的人, 不會因你的死亡而內疚, 卻只會心涼及笑你蠢。 你該示範一下何謂 "絕地反彈", 活得比佢地好, 令人對你 "另眼相看" 才是 "最積極的生活方式"!

生命...........該是「無價」的, 因為是上天賜予給你的, 如果不好好珍惜自己, 便愧對你的父母!!

創意思維

媽媽說：「以前的人文學修養較現代人好, 我以前在課堂前 15-20 分鐘要背默舊課文, 溫故而知新, 現代人根本無得比。」

我同意佢的講法, 之不過現代的教育年年改革, 又說 "求學不是求分數", 更揚言不應著眼 "死背課文", 要大家發揮創意思維, 從多角度去思考。 攪 "文學藝術" 項目的人, 根本 "開不了飯" (揾唔到食), 又或者要 "死後才可揚名立萬" (揾鬼做咩!!), 因為文學對現代人來說, 只係 "茶餘飯後" 的一個奢侈玩笑吧!

在此等我發揮一下我的 "創意思維" 同 "多角度思考" 啦!
就以 "李白" 的 <<靜夜思>> 為例：
原文：
床前明月光
疑是地上霜
舉頭望明月
低頭思故鄉

改篇文：
尋晚眼光光
何事心慌慌
舉頭食肥肉
低頭無米穀

改篇文反映在而家的市道, 港元跟隨美元購買力貶值, 再加上瘋狂的通貨膨脹, 人們紛紛為 "基本生活所需" (稻米) 而憂愁, 而且食埋今餐, 下餐也不知如何是好, 幾o甘無奈!!

古時候人們常說：「積穀防肌」. 現代人刻下想搶購白米也甚艱難, 那倒不如 「積鼠防肌」 吧! 君不見旺角街市附近的 "鼠患厲害", 不如大家一齊參予搜捕行列, 潔淨社區之後, 又可以發揮你的創意思維, 想個辦法將 "老鼠" 泡製得既衛生又美味, o甘咪一石二鳥囉!!

「文學」 在前人眼中係高尚雅氣的, 當中投影左大家心中的思想冀盼。而在現化人心中, 卻是逆境中的 "開心果", 用作 "苦中作樂" 和 "反映現實" 之無奈也!

讓我感動

最近有興趣去睇舞台劇 <<攣到爆>> 「不能拗直版」, 據說今次已經係第四次公演了, 前三次也爆滿, 而且口碑極好。

《攣到爆》以「楝篤笑」混合「Camp到爆懷舊喜劇」的形式，講你知香港基佬的愛與哀愁。三度公演均迅速爆滿，觀眾人次過萬，一眾攣攣直直的觀眾均認為爆笑又感動，叫好叫座，更勇奪第十四屆香港舞台劇獎「最佳男主角（喜／鬧劇）」及「十大最受歡迎劇目」獎項。今次公演的（不能拗直版）更配合全新的佈景及服裝，加入更啜核抵死的對白，務求攣到爆~炸！ 大家可在此參考詳情：
http://www.wtheatre.org.hk/queershow4/about1.html

雖然劇中笑位很多 (好多人說 "好爆笑"), 但 「非同性戀」的觀眾也被深深感動, 認真笑中有淚。加上主角梁祖堯極具名氣, 兼且好演技, 故事寫實, 非常吸引。

希望買到飛睇啦!

*** 好o野!!!!!! 多謝 KK 幫我到通利琴行買飛, 有得睇啦。 仲要係 "貴飛" (前座添), 好開心, 睇完再同你地分享感受啦!

睇你點死!!!

某日同朋友傾起計來, 大家在研究著 "那種的死亡" 比較辛苦, 如：哽死、笑死、餓死、飽死等等。

依我的愚見認為 "笑死" 及 "飽死" 比較幸福, 因為可以完成死前的心願才離世, "哽死" 和 "餓死" 則比較慘, 離世前還有牽掛 (未有野落肚)。

如果比你選擇的話, 你想點死呢??


我就想..................瞓死 (既滿足又安樂的走, 幾好!!)

信任破產

今日在報紙上睇到一套愛情笑片的影評, 其中一段是這樣的：

「嫁個有錢人是當下不少女孩流行願望, 物質至上, 加上相互信任破產, 愛情遂淪為消費活動, 雖然沒有明顯一買一賣, 卻可由個體戶重覆生產, 男女關係愈趨廉價, 堅貞仿成神話, 只是愈廉價變得愈不快樂, 到頭來吃香或是未經減價促銷的愛情新丁, 經驗值增強不一定好!」

讀完以上一文, 不禁心寒暗嘆：「此乃正正是現實的寫照啊! 由於太多人曾受傷、受騙, 因此大家也懷疑身邊的人和事, 變得不容易信任別人。 又或者伴侶並無尊重、交帶過敏感舉動, 令人生疑。 總之, 如果 "對人失了信心", 甚至連身邊的人也得懷疑, 那種感覺係何等的 "恐怖", 可能會患上 "被害妄想症"」

若果套用於愛情、友情的層面上, 如你要懷疑那人說的每一句話, 猜不透佢的動機思想, 那倒不如不和那人成為伴侶或朋友了, 因為 "要日防夜防" 是多痛苦的一件事啊! 至於家人, sorry!!! 我地無得揀, 只希望大家以 "真心" 相對吧!

希望大家 "對你珍惜的人" 負責, 不要雙方弄得 "信任破產", 因為那是一件好可悲的事!

青春....真可愛青春

「青春....真可愛青春, 珍惜你光陰似金, 青春.......真可愛青春, 應心向書本 努力發奮 ...」 相信大家對 E 一首歌曲絕不陌生, 就係粵語片時代的青春劇歌曲 「惜青春」了。

尋日我又找回 "失去已久" 的青春心態了, 因為對上一次玩保齡球該係 8年之前和同事在大陸玩的, 再再之前的卻是中學的 2, 3 年班跟同學玩的, 哈哈!!! (時間真係眨o下眼就過左了)

尋晚一群朋友大約 7:30 在九龍灣德福的稻香酒樓打邊爐, 一行 8人卻被編坐 6人桌 (攪到桌面好鬼迫)! 大家有講有笑, 不知不覺間食左兩個幾鐘, 好彩友人有 "X打銀行" 信用卡, 享有 88 折優惠, AA 制也是每位 $113 !

之後我地便去左九龍灣展貿的 "香港保齡球中心" 打保齡, 原來............當中有 4個 "超級猛人" (包括朋友 C)、2 個 "飄忽人" (包括朋友 J)、 同埋 2個 "屎波人" (包括我)。 唔講唔知, 而家的保齡球消費唔係 "以 Game" 計算的, 而係 "以鐘" 計算的 (真係眼界大開), $200 / 1 個鐘 (假日晚上 9:00 後價), 我地總共打左兩個鐘。

我地分左 2隊 (4 人 1 隊), 第 1 個鐘裏我地以 "飲品" 打赌 (輸的一方請贏的一方飲野), 當時大家競爭得好激烈 (我卻輸得好慘烈, 包尾), 結果因為我而累事, 害我隊的 "隊長" 要請大家飲野 (因為其餘的 3 位隊友同敵方的其中成員分數差不多, 而我卻..........被對方最差的一位以大比數拋離) 噢!!! 我的天, 真羞家啊!

結果勝方 "誇下海口" 要在第2 個鐘的比賽裏, 以 "波鐘" 作赌注 (輸的一方請贏的一方打這個鐘的保齡, 即係比晒 $200), 由於在頭 1 小時大家太落力, 結果 E 一盤波, 有 D 人打到累而失準, 而我隊卻有 "超水準" 的表現 (就連我也打破了自己的舊紀錄, 總算對隊友有交代), 我方獲得最後勝利, 每人只需付 $25, 而負方卻要每人付 $75 呢!

雖然比賽成績同以往的戰績差距甚遠, 我卻為 "情懷回到從前" 而暗地高興呢!! 原來...不管你年紀變得如何? 只要心態長青, 即使結果不如以往, 享受此刻的過程就足以讓你滿足、興奮。(好似返回中學時代, 人也變得青春有活力呢!)

我要高呼 「青春.....我愛你」!!