戰鬥力強勁的自助午餐

今日聯同 KK 及媽媽一齊到帝苑酒店 3樓 的雅苑座食自助午餐, 我地三人也戰鬥力十足, 尤其是今天的媽媽讓人另眼相看 (失敬失敬)。

我和媽媽中午 12:00 便到達, 入座後便發揮我地的 "小宇宙" 食過唔停, 三個鐘頭內, 一共食左 16 轉食物, 平均兩個幾字就 "清" 一碟食物, 厲害呢!!

由於有優惠折扣劵的關係, 平均每人消費 (連加一) $184, 食物品質也算 OK, 如果有埋生蠔就更好了! 等我比 D 相你睇, 引o下你地啦!

令人尷尬的 "貓屎"

尋日中午途經鄰村街市, 見到 "貓屎" (榴槤) 當造, 買一個平平地的同媽咪兩份分先。

愛食榴槤的人獨愛其香味, 若不, 卻憎它的濃烈臭氣。E 個榴槤熟得很, 一陣陣的飄香隨著清風從鄰村的街市, 一直陪伴我回家。

我跟隨大伙人入電梯, 突然

有一小男孩：嘩!!! 好臭呀, 是什麼呢?
他爸爸面有難色的說：天氣潮濕, 因此一陣 "UP" 味吧, 忍耐一下, 我地快到了!
小男孩媽媽卻說： 不是呢! 那是榴槤味, 好臭咩?? 不知幾香才真, 你未食過咩? 好好食架!!

估不到想氹自己、 想氹媽媽, 卻成了 "令人尷尬" 的主角啊!

告別 18 年的伴侶

今日我要告別陪伴我地 18 年的伴侶了!!! (黯然地.........)

心中雖然不捨, 但它總算 "光榮引退", 它就是我房中的 "三菱牌冷氣機" 喇! (安裝師傅說它是 "真材實料", D 料靚), 由我地入住開始, 它一直服役、陪伴我地 18 年啦!

我的新伴侶正是集平、靚、正於一身的 "美的冷氣機", 總共 $1,540 (包拆舊機及安新機), 趁炎夏來臨之前攪掂它, o甘我就可安享一個涼浸浸的夏天, 美夢常伴我身邊啦!
師傅拆舊機的時候說：「嘩!!! 雀 "鬥" 呀!! 仲要有兩個添。」我探頭一望, 真的見到一舊舊類似 "禾稈草" 及 "髮絲" 的物體 (該是雀毛), 好似好恐怖o甘。

我問師傅：「點解會有雀巢在冷氣機的呢?」
師傅說：「冷氣機背有罅隙, 而且機底又溫暖, 所以 D 雀才會築巢囉! Mug 你聽唔到雀仔叫咩? 你地 E 度也不算厲害, 我曾做過一 D 工程, 冷氣機內有老鼠添!」
是的, 我成日都聽到雀仔叫, 尤其是週末想瞓晏一點, 總被它滋擾的 (大家可參閱 "我不是白雪公主" 一文)

當我知房中的舊冷氣竟暗藏 "奧運場館" (鳥巢) 之後, 心中不寒而慄, 原來我曾開動冷氣, 在外抽空氣入房的同時, 我竟同它們共同呼吸 (好彩無禽流感咋)!

事後我又想：「唔知今晚 D 雀仔回家時, 無左個巢, 又會點呢?」 (心中為了拆它們的家而感到不安內疚)。

提前的 「兒童節禮物」

多謝朋友 I 及其老公的慷慨, 小姪子有一份提前的 「兒童節禮物」, 那是一個 Fisher-Price 出品的玩具蛋, 適合 18 個月以上的兒童玩的。 你睇..............顏色幾 sharp (鮮艷)!!! 真係未開封, 已令人興奮了。











突然間..................既羨慕又妒忌亨亨添, 點算好呢?? 唯有假期入去揾佢, 作狀打o下佢先得!! 一於o甘話啦!

預祝大家明日 "兒童節快樂"!!!

豐盛的 lunch, 開心的人生!!

尋日相約一眾同事 (有新有舊的) 今天一齊去尖沙咀海洋中心 4/F (舊海洋皇宮酒樓) 處試新菜。

E 間日本食店經香港郵政寄左宣傳單張比我地, 內容好吸引架!

午市套餐有和燒 (日式燒烤) 及普通的午市套餐, 價錢介乎 $68-$88 (加一另計), 所有 午市套餐均包括：洋風野菜沙律、前菜 (今日係九菜餃)、御飯、味噌湯及綠茶雪糕。

我和同事分別點左 4 款不同的 午市套餐 (大家可撈亂食) , 包括：

和燒套餐

1) 精選牛肋骨

2) 特上海鮮拚盤 (大蝦、鮮魷、青口、大蜆、銀雪魚)

3) 特選宮崎黑豚肉 (肉眼)

午市套餐

4) 炸蝦什錦天婦羅

比你地睇o下 d 想啦!! 唔錯架, 除返開每位 $85, 雖然有少少貴, 不過的確食得好滿足、好開心呀!!

夢想成真, 真開心!

今日心血來潮無無聊聊同 KK 講：「悶悶地, 好想食 Buffet!!」
誰知 KK 也有同感, 之後我地各自尋找心水食店。

最後我地揀選左 "口碑" 唔錯的 The Greenery 雅苑座 (位於尖沙咀的帝苑酒店), 仲特登上 Openrice 網址處下載優惠劵添 (平日 75 折 或 8折 優惠, 假日 85 折優惠)。

雖然只係 lunch buffet, 但也教我興奮啊!! 因為「食」和「瞓」最能氹得我開心 (我懷疑自己係 "豬" 托世的), 最近瞓得唔好, 一於用食來補補數!!

下次再同大家分享我的美食之旅啦! 今日下午的心情零舍好, 因為正熱切期待週末的美食佳餚。

無聊的生日儀式

小妹在 12 月 24日出生的, 在讀書時期, E 個日子多數正在放聖誕節假。

話過你知, 小時候我有一個 "好無聊的生日儀式" 趁著 E 一日做的 ── 我會在一早起床後, 走到媽媽 (正躺在床上) 的身邊, 縮起身子 (蝦米瞓的) 躺下來, 然後頭靠媽媽的肚皮, 扮著 BB 的哭聲在呱呱大哭。

其實此舉只係想給自己同媽媽紀念, 回憶一下 N 年前我出生的日子, 重溫一下那份溫暖的親切感。 及後人大了, 也感覺此舉太無聊, 不知不覺得無 "舉行這個生日儀式" 了。

假如人人也會在 "生日的那一天" RESET (重新設定) 變回嬰兒, 而下一日又回變回原來樣貌, 那都幾得意喎!! 不過如果和父母同日出生的人便弊了, 彼此也是嬰兒, 那.................誰照顧誰呢?? (餓足一日??)

生命何價??

廣告說：「要養大一個小孩子, 需要 $400 萬」 這麼說我的父母該是 "千萬富翁" 了 (因為有 3 名孩子)

其實父母養育子女又何只用左 $400 萬o甘少? 至少當中的心血就不止 E 個價錢 (亦不是用錢可以買到和衡量的)

最近沙田第一城的三屍命案, 死者疑欠債約二十萬所致。 原來 「人命」 只需平均 $7 萬蚊 / 1人, 幾o甘悲哀。

原來人脆弱的時候, 一想唔通, 便會做出愚蠢的決定, 試想想自己係一個 $400 萬的人, 卻為果少少數目的欠債而犧牲, 值唔值得?? 尋死需要莫大的勇氣, 如果你有 E 份尋死的勇氣, 點解唔將它用作解決問題身上??

唔好以為 「死左便一了百了」, 你活著的親人要幫你執手尾, 那些害你的人, 不會因你的死亡而內疚, 卻只會心涼及笑你蠢。 你該示範一下何謂 "絕地反彈", 活得比佢地好, 令人對你 "另眼相看" 才是 "最積極的生活方式"!

生命...........該是「無價」的, 因為是上天賜予給你的, 如果不好好珍惜自己, 便愧對你的父母!!

創意思維

媽媽說：「以前的人文學修養較現代人好, 我以前在課堂前 15-20 分鐘要背默舊課文, 溫故而知新, 現代人根本無得比。」

我同意佢的講法, 之不過現代的教育年年改革, 又說 "求學不是求分數", 更揚言不應著眼 "死背課文", 要大家發揮創意思維, 從多角度去思考。 攪 "文學藝術" 項目的人, 根本 "開不了飯" (揾唔到食), 又或者要 "死後才可揚名立萬" (揾鬼做咩!!), 因為文學對現代人來說, 只係 "茶餘飯後" 的一個奢侈玩笑吧!

在此等我發揮一下我的 "創意思維" 同 "多角度思考" 啦!
就以 "李白" 的 <<靜夜思>> 為例：
原文：
床前明月光
疑是地上霜
舉頭望明月
低頭思故鄉

改篇文：
尋晚眼光光
何事心慌慌
舉頭食肥肉
低頭無米穀

改篇文反映在而家的市道, 港元跟隨美元購買力貶值, 再加上瘋狂的通貨膨脹, 人們紛紛為 "基本生活所需" (稻米) 而憂愁, 而且食埋今餐, 下餐也不知如何是好, 幾o甘無奈!!

古時候人們常說：「積穀防肌」. 現代人刻下想搶購白米也甚艱難, 那倒不如 「積鼠防肌」 吧! 君不見旺角街市附近的 "鼠患厲害", 不如大家一齊參予搜捕行列, 潔淨社區之後, 又可以發揮你的創意思維, 想個辦法將 "老鼠" 泡製得既衛生又美味, o甘咪一石二鳥囉!!

「文學」 在前人眼中係高尚雅氣的, 當中投影左大家心中的思想冀盼。而在現化人心中, 卻是逆境中的 "開心果", 用作 "苦中作樂" 和 "反映現實" 之無奈也!

讓我感動

最近有興趣去睇舞台劇 <<攣到爆>> 「不能拗直版」, 據說今次已經係第四次公演了, 前三次也爆滿, 而且口碑極好。

《攣到爆》以「楝篤笑」混合「Camp到爆懷舊喜劇」的形式，講你知香港基佬的愛與哀愁。三度公演均迅速爆滿，觀眾人次過萬，一眾攣攣直直的觀眾均認為爆笑又感動，叫好叫座，更勇奪第十四屆香港舞台劇獎「最佳男主角（喜／鬧劇）」及「十大最受歡迎劇目」獎項。今次公演的（不能拗直版）更配合全新的佈景及服裝，加入更啜核抵死的對白，務求攣到爆~炸！ 大家可在此參考詳情：
http://www.wtheatre.org.hk/queershow4/about1.html

雖然劇中笑位很多 (好多人說 "好爆笑"), 但 「非同性戀」的觀眾也被深深感動, 認真笑中有淚。加上主角梁祖堯極具名氣, 兼且好演技, 故事寫實, 非常吸引。

希望買到飛睇啦!

*** 好o野!!!!!! 多謝 KK 幫我到通利琴行買飛, 有得睇啦。 仲要係 "貴飛" (前座添), 好開心, 睇完再同你地分享感受啦!

睇你點死!!!

某日同朋友傾起計來, 大家在研究著 "那種的死亡" 比較辛苦, 如：哽死、笑死、餓死、飽死等等。

依我的愚見認為 "笑死" 及 "飽死" 比較幸福, 因為可以完成死前的心願才離世, "哽死" 和 "餓死" 則比較慘, 離世前還有牽掛 (未有野落肚)。

如果比你選擇的話, 你想點死呢??


我就想..................瞓死 (既滿足又安樂的走, 幾好!!)

信任破產

今日在報紙上睇到一套愛情笑片的影評, 其中一段是這樣的：

「嫁個有錢人是當下不少女孩流行願望, 物質至上, 加上相互信任破產, 愛情遂淪為消費活動, 雖然沒有明顯一買一賣, 卻可由個體戶重覆生產, 男女關係愈趨廉價, 堅貞仿成神話, 只是愈廉價變得愈不快樂, 到頭來吃香或是未經減價促銷的愛情新丁, 經驗值增強不一定好!」

讀完以上一文, 不禁心寒暗嘆：「此乃正正是現實的寫照啊! 由於太多人曾受傷、受騙, 因此大家也懷疑身邊的人和事, 變得不容易信任別人。 又或者伴侶並無尊重、交帶過敏感舉動, 令人生疑。 總之, 如果 "對人失了信心", 甚至連身邊的人也得懷疑, 那種感覺係何等的 "恐怖", 可能會患上 "被害妄想症"」

若果套用於愛情、友情的層面上, 如你要懷疑那人說的每一句話, 猜不透佢的動機思想, 那倒不如不和那人成為伴侶或朋友了, 因為 "要日防夜防" 是多痛苦的一件事啊! 至於家人, sorry!!! 我地無得揀, 只希望大家以 "真心" 相對吧!

希望大家 "對你珍惜的人" 負責, 不要雙方弄得 "信任破產", 因為那是一件好可悲的事!

青春....真可愛青春

「青春....真可愛青春, 珍惜你光陰似金, 青春.......真可愛青春, 應心向書本 努力發奮 ...」 相信大家對 E 一首歌曲絕不陌生, 就係粵語片時代的青春劇歌曲 「惜青春」了。

尋日我又找回 "失去已久" 的青春心態了, 因為對上一次玩保齡球該係 8年之前和同事在大陸玩的, 再再之前的卻是中學的 2, 3 年班跟同學玩的, 哈哈!!! (時間真係眨o下眼就過左了)

尋晚一群朋友大約 7:30 在九龍灣德福的稻香酒樓打邊爐, 一行 8人卻被編坐 6人桌 (攪到桌面好鬼迫)! 大家有講有笑, 不知不覺間食左兩個幾鐘, 好彩友人有 "X打銀行" 信用卡, 享有 88 折優惠, AA 制也是每位 $113 !

之後我地便去左九龍灣展貿的 "香港保齡球中心" 打保齡, 原來............當中有 4個 "超級猛人" (包括朋友 C)、2 個 "飄忽人" (包括朋友 J)、 同埋 2個 "屎波人" (包括我)。 唔講唔知, 而家的保齡球消費唔係 "以 Game" 計算的, 而係 "以鐘" 計算的 (真係眼界大開), $200 / 1 個鐘 (假日晚上 9:00 後價), 我地總共打左兩個鐘。

我地分左 2隊 (4 人 1 隊), 第 1 個鐘裏我地以 "飲品" 打赌 (輸的一方請贏的一方飲野), 當時大家競爭得好激烈 (我卻輸得好慘烈, 包尾), 結果因為我而累事, 害我隊的 "隊長" 要請大家飲野 (因為其餘的 3 位隊友同敵方的其中成員分數差不多, 而我卻..........被對方最差的一位以大比數拋離) 噢!!! 我的天, 真羞家啊!

結果勝方 "誇下海口" 要在第2 個鐘的比賽裏, 以 "波鐘" 作赌注 (輸的一方請贏的一方打這個鐘的保齡, 即係比晒 $200), 由於在頭 1 小時大家太落力, 結果 E 一盤波, 有 D 人打到累而失準, 而我隊卻有 "超水準" 的表現 (就連我也打破了自己的舊紀錄, 總算對隊友有交代), 我方獲得最後勝利, 每人只需付 $25, 而負方卻要每人付 $75 呢!

雖然比賽成績同以往的戰績差距甚遠, 我卻為 "情懷回到從前" 而暗地高興呢!! 原來...不管你年紀變得如何? 只要心態長青, 即使結果不如以往, 享受此刻的過程就足以讓你滿足、興奮。(好似返回中學時代, 人也變得青春有活力呢!)

我要高呼 「青春.....我愛你」!!

忠實日本迷

今晚約左我個 "忠實日本迷" 舅父晚飯, 我地去左好耐無去過的 「和民」, 對上一次同佢去 和民 已經係幾年前了 (當時和阿姨在沙田食的)。

我地點左：
1) 七式刺身 (包括：吞拿魚、三文魚、甘蝦、立魚、蟹子魷魚、墨魚鬚、帶子)
2) 海膽壽司
3) 花魚燒
4) 清酒煮蜆
5) 鰻魚豆腐鍋





























刺身的帶子好鮮甜, 其他的味道一般。海膽壽司麻麻地, 紫菜 "林晒"。花魚燒幾美味, 有海鹽的鮮味, 口感又幾好o趙。清酒煮蜆的蜆好鮮甜, 蜆略細隻, 無 mug 肉食, 舅父卻愛 "清酒也可以飲埋"。鰻魚豆腐鍋味道一般, 豆腐好滑 (食到 E 一味時, 我已經好飽了。

埋單時盛惠 $308, 整體來說也算唔錯的一餐飯, 下次約埋多 D 人, 叫多幾款菜色就好了。

守護神

午夜 12:00 屋外傳來響亮的 "連.........................." 聲, 我立即從睡床上彈跳下來, 推著在廳欣賞電視的爸爸出外探過究竟 (不忘提佢穿著外套)。

打開門, 望出走廊, 幾伙人不約而同的探頭張望, 爸爸好機警的行樓梯下樓問過明白, 當時我的心 15、16 的, 因為.........

1) 若真的火警, 要先叫醒睡夢正甜的媽媽逃生
2) 我要執拾什麼走呢? (一下子腦內浮現起：証書、護照、銀包、保單、存摺等等)
3) 火警嚴重嗎? 會徹夜不能回家嗎? 記得多穿幾件衫先。

數分鐘後爸爸乘電梯上來, 一邊蹣跚的走回家, 一邊微笑搖頭 (代表無事發生), 說：「是警鐘誤鳴吧!」 望見爸爸的得意神情, 就像戰士們凱旋而歸的模樣, 因為佢剛執行神聖的任務, 就係 「保衛家園」!! 真正是我們的守護神。

一個家, 真的需要一位男主人把握著, 才令女性不 "騰雞"、 不擔心、也讓女性感到有一個可靠的肩膊可依賴 (有安全感)。 今天如果你身邊的那位男士肯為你擋風擋雨、肯為你深夜拍蚊、肯為你共同承擔家中的瑣事, 記住這一切不是必然的, 要好好敬畏你的守護神, 同時你亦是佢最愛的守護女神呢!

我的守護神啊 (爸爸), 願你多保重身子, 長壽健康, 繼續守護著我們的家!

女性和婚姻

上次在深圳按摩期間, 聽到兩位技師傾計, 談起其中一位的婚姻狀況。

A 技師說：「我的父母都貪錢的, 將我嫁給一個盲的。」
B 技師問：「那你老公對你好嗎?」
A 技師說：「萬幸! 還算可以, 不然我早跟他離婚了。」

***********************************************************
某日在街上聽到一位婦人和別人呻訴不如意的婚姻

婦人說：「不是我 "太愛" 那男子, 只係睇在 "子女" 份上, 不想佢地活在破碎家庭, 才得啞忍那拈花惹草的老公吧!」

***********************************************************
婚姻離我似遠又近, 但細聽以上的種種無奈, 卻不得不教我心驚, 我會是幸運的一個嗎? 幸福真的靠人去爭取嗎? 只有我一人努力有用嗎?

其實男性對婚姻又有什麼想法的呢? 跟自己不愛的人 / 又或者變心的人生活可以嗎?

人生如無經歷婚姻、生兒育女也可算得上完整嗎? 如果可以, 為什麼女性o甘 "著眼" 時限將至, 就得把自己當作月下貨般 "推出去" (將要求降低得過份), 日後卻感到委屈, 那樣「人有我有的婚姻」好嗎?

雖然我不想孤芳自賞, 但如果人有我有般自尋煩惱, 又苦了自己, 何必呢?? 我相信只要多行好事, 上天定會待你不薄的, 而家未發現, 只係 "時辰未到" 吧!

科學怪人

今早起床不用照鏡, 也知道自己成為了「科學怪人」了, 何解??

尋日我的鼻敏感嚴重發作 (受隔壁公司裝修所影響), 回家晚飯後, 立即食藥早睡 (大約 10:00), 後來因為覺得房間太焗 (濕氣太重), 便開房門睡 (讓空氣流通一點, 呼吸暢順一些), 估不到此舉便相等於 "引狼入室" 了。我被侵襲的過程如下：

凌晨 2:00 幾 顴骨

凌晨 3:00 幾 手指 (中指)

凌晨 4:00 幾 眉骨

凌晨 5:00 幾 眼皮

凌晨 6:00 幾 下巴 及 面頰

每次被蚊侵襲後也痕痒難耐, 立即起身迎戰敵人, 可惜敵人的 "輕功" 實在太厲害了 (沒有 vi vi 聲的), 嚇得我戴住眼鏡不敢除, 邊瞓邊等它的出現, 其間只打過兩次照面, 卻捉它不到。

為免它在我面上的戰績越來越彪炳, 我想出一個計劃, 就係 「美人計」, 我特意褪開身上的被, 利用我的肉體去引誘它別襲我的面, 結果幾乎凍親不特止, 還亳無成效。 (我想它該是女性, 又或者妒嫉我的天生麗質)。

7:00 起床, 連睜開雙眼也有困難 (眼皮太腫太重了), 面上活像科學怪人般, 又似人家打拳被轟 (捱足全場), 焗住取一日有薪年假在家睡一覺好的兼消腫。

一杯水的幸福

尋日整日在室外活動, 為免四出揾廁所, 好少飲水, 結果晚上回家梳洗後, 才發現超級 "頸渴", 又唔敢飲太多水 (既怕整晚去廁所, 亦怕明早 "水腫眼" )。

結果去斟左一杯熱水, 一小啖一小啖的呷著, 心中暗叫：「好彩家中有媽媽把持, 要起熱水時, 即要即有, 媽媽真是又勤快又溫柔呢!」

其實 「幸福」不是遠在天邊, 而係 「近在咫尺」的, 視乎你發唔發覺、感唔感受得到吧! 嘗試凡事感恩, 不要當作老馮的。 那麼你的天空會廣闊一點, 你發現自己比別人 "幸福" 多一點。

一杯水就教頸渴的我感到幸福, 亦感受到媽媽照顧我那顆愛心! 「幸福」不是用金錢可追求的, 而係可以隨心所欲、用心感受的, 原來就係o甘簡單!!

深圳一日遊

今早同朋友 M 相約 9:00 在大埔墟火車站集合, 食過早餐後, 便乘火車到羅湖。

過關之後, 我地去了朋友 L 介紹的按摩中心 (位於交通樓 8 樓的廣益子桑拿中心) 接受按摩服務。該店的面積頗大, 環境也算乾淨企理, 技師手勢亦 OK, 我地做左 1小時腳底按摩 + 2 小時全身中式按摩, 總共花了 RMB114 (每小時 RMB38), 額外給予技師小費每小時 RMB10, 埋單也不用 RMB150, 便可享有 3 小時的按摩服務, 尚算唔錯!

之後我地行左去旁邊的羅湖商業城打算度身訂造返工套裝, 可找不到惜朋友介紹的店, 我地便乘地鐵到 "大劇院站" C2 出口。

我地先到朋友介紹的 Tasty (西堤牛排) 店去訂位 (晚餐), 然後再尋小食 (下午茶), 再步行至東門, 可惜今日的東門已經今非昔比了, 好多野你睇得上眼的, 卻 "貴" 得不堪, 售價跟香港的差不多, 甚至有過之而無不及, 算吧!! 當省回一筆!

我地再步行至 "深圳書城", 購買了 3本編織及湯水的書, 也不過是 RMB63, 然後便回到晚飯餐廳晚膳。

Tasty 位於世界金融中心 1樓, 那兒的裝潢很時尚、漂亮, 而推廣的晚餐正是 RMB98 (不設加一) 有七道菜色的套餐 (西式、意式及法式混合的新派菜), 比個餐牌大家睇o下先。

結果我地 Order 左兩客套餐, 包括：

1) 前菜： 意式牛肉簿餅 及 焗烤磨菇配奶油麵包

2) 沙拉： 焗烤海鮮南瓜 及 紅酒醋鮭魚生菜沙拉

3) 湯： 法式牛尾湯

4) 百香雪酪 (無得揀, 類似雜果賓治的物體)

5) 主餐： Tasty 菲力牛排 及 海陸大餐 (烤羊膝及香草魚排)

6) 甜點： 焦糖南瓜布丁 及 黑森林慕絲

7) 飲料： 熱柚香果茶 (類似柚子茶)

晚餐好飽 (D 肉食到有點膩), 味道亦 OK! 抵唔抵就見仁見智啦! 不過試一下就無妨。 今日大約消費左 RMB350 (未計港幣支付的車費及早餐), 享受左一日愉快而無險的深圳一日遊, 多謝朋友 M 的相陪, 我好滿足啊! (尤其是享受按摩 及 我的戰利品 ── 書)

詩意的閒遊

今早都瞓得好晏, 大約 9:45 才起身, 食過麵包後, 我和媽媽就出發去 "行街街" 了。

我地有幾個景點選擇的, 包括：
1) 行旺角花墟
2) 行尖沙咀九龍公園
3) 行九龍灣 Mega Box 商場
4) 行九龍站附近的圓方 (Element)
5) 從大埔海濱公園出發, 沿住單車徑步出沙田區

最終媽媽選擇了 5 號景點, 雖然今日天色陰暗 (我都擔心會落雨), 幸好涼快的風迎面而來, 但始終無落過半滴雨。

沿途同媽媽傾心事, 講o下兒時往事, 人生哲理等, 仲欣賞吐露港的明媚景色 (雖然有少許煙霞, 令能見度稍低), 媽媽還不時研究沿途種植的植物品種添!! (我就完全唔識了)。

一口氣從大埔行至大學附近的 "科學園", 我地入園內尋食, 作過小休先 (已經 12:30), 原本媽媽還想行至沙田區, 可惜我見天色更似黑黑的, 而科學園又有小巴等客 (科學園往沙田火車站的), 於是我便拉媽媽上車, 到沙田再逛一圈, 然後買餸, 再打道回府。

回到家後, 小睡一陣, 嘩!!!! 運動過後睡得零舍甜的, 還附送了幾個美夢添。

可惜可能被風吹親, 頭又有少少痛了, 今晚又要早 D 抖, 因為...........明天我又有節目啦! (好期待啊!)

"癩野"!!

尋日郊遊左全日之後, 的確好好瞓, 一直瞓到今早 10:00 才起床, 哈哈!!

之後同媽媽一齊去揾 KK 及黑俠王子一齊食晏, 然後睇電影 (now TV) 及煮上一次的 "薯丸"。 原來薯丸並唔難煮, 只要將它倒入已煲好的鹽水內, 煲至浮起, 再加上自己超好的醬汁便成。









煮好啦煮好啦!!! 快 D 試食先 (薯丸配羅宋湯), 點知.................「癩晒野」!! 薯丸一 D "薯味" 都無, 只係一舊舊無味的 "粉團", 好難食, 結果我地每人食左少少便棄掉了。

絕對無下次!!!

東涌一日遊

今早爸爸、媽媽和我約左 KK 及 黑俠王子 12:15 在東涌東薈城集合, 展開我地一天的旅程。

首先我地去飲茶 (東薈軒) 直至大約 1:30, 然後便去了 "聞名已久" 的 「昂坪 360」纜車, 雖然遊人也不少, 但排隊過程尚算順暢, 而且也頗多外籍人士乘坐呢! 不過車費也絕不便宜, 纜車來回程 ─ 假日成人票價 $98, 假日長者票價 $78, 我覺得成人 $68, 長者 $48 就比較合理。










行車需時 (單程) 大約 25 分鐘, 雖然今天都算大風, 但並不覺車廂過份搖擺, 抵達 "昂坪市集" (面積和海洋公園的集古村差不多), 形形式式的店鋪包括：食肆、零食及便利店、與佛同行和靈猴共舞展覽館 (入場費另計)、多間紀念品售賣店等。我地逗留了約 45 分鐘便開始回程。










下山後已經差不多 5:00, 我地乘巴士去機場二號客運大樓的航天探知館, 想參加 $65 套票的優惠 (可睇 2 套 4D 的電影 及 免費入另外兩個展覽館參觀, 遊戲另收費), 其實這是我地今日的 「重點旅程」, 只可惜............4D 影院已經 full (滿座), 下一場要等到晚上 7:00 及 9:15。

結果我地好失望, 但瞬眼間又見到了希望啦!!! food court (美食廣場) 就在眼前, 我地奔過去 "化失望為食量", 好快心情就平復了。 今天的最後節目就係去找亨 BB 玩, 然後一家人食飯, 回到家時已經係晚上 11:00了。

雖然去不到重點節目, 在東薈城也無時間逛 Outlet, 亦享受不到諾富特酒店的自助餐 (full - 滿了), 但也玩得好開心, 而且好累, 今晚一定會好好瞓。 至於那些未做的項目, 唯有留待下次了。

囍訊 - 陳 X 萬

小妹今日收到一個囍訊 , 是什麼?? 先在此賣個關子........

小妹的僱員合約只得 12 個月薪酬, 代表著無雙糧 (無商量), 但會按業績及表現發放花紅的。

今日公司的最高領袖按照往年慣例, 個別電郵各位同事發放花紅的金額, 結果..........比我預期中的好 (因為今年的業績及個人表現均一般), 我得到了 "陳 X 萬" 的美譽, 真高興!!! (如果和陳方安生一樣就更好了)

令我更開心的是.........朋友 J 終於守得雲開, 苦盡甘來.........因為我收到了上頭通知要幫 4 位同事印製 "新卡片" (代表同事升職了, 加薪當然唔少得, 至於加幾多? 而家佢同我也未知, 希望符合佢的預期啦!!) 真戥佢高興。

今年世界性的經濟環境, 你和我也在股市上略知一二, 我明瞭來年生意額比今年差 (意味住花紅也較差), 唯有...........積穀防飢, 好天斬埋落雨柴啦!

無論如何, 也是一份好的 "復活節禮物", 多謝先人保祐!!

各人頭上一片天

「各人頭上一片天」係形容每個人也有自己心中的一個宇宙, 在各自的領域內, 又會否明白旁人的世界呢?

家人和你的成長背景最密切不過, 你希望佢地會在乎你的感受, 了解你的思想, 愛護和包容你。 朋友和你出自唔同的成長背景, 大家要經過摸索溝通, 才能了解對方。感情要好的會成為知己, 道不同的則屬點頭之交。

對於家人及知己, 你預期你在佢地的心中佔一席位, 因此你的喜怒哀樂會和佢地分享, 亦期待佢地作出相關的反應, 如：安慰你。如果佢地忘記了你眼中的大事件, 你有何感覺呢? 當然會感到 "失望", 因為你發現你在佢心中, 竟遭逢如此的冷落, 變得尤如無關重要的陌生人般。(而佢也好似對你的事 "無心裝載", 才令你氣憤。)

換個角度去睇, 假如：要見工面試, 你估家人或知己會忘記了嗎? 不會!!!! 因為那關係佢的前途, 其實佢係自私的. 又或者說佢的頭上只有自己的一片天空, 容不下部份別人的天空。

有些事, 究竟能不能做, 不在乎 "能力", 只在乎 「不能」還是「不為」吧! (有心還是無意)

如果天下間人人也只容得下自己的天空, 而又想旁人去了解佢、支持佢 (不作付出, 只問收獲), 那多恐怖啊! (E 個世界上, 係 no free lunch 架) (無免費午餐的)

懷孕

懷孕究竟係什麼一回事? 就是男生跟女生結合, 而孕育出新的細胞嗎?

昨晚躺在床上, 用上我最喜歡的屈曲側卧 (蝦米睡姿), 忽然感到這個睡姿的確帶比我安全感 (因為習慣了多年), 尤其是每逢身體不適、肚痛時, 這個睡姿更能減輕我的痛楚。

在母體內新孕育的細胞, 經過 10 個月的成長, 一直都在母親的體內屈曲而睡 (就像蝦米睡姿一樣), 也許我的安全感就從那個時間開始, 停留在我的潛意識裏, 而真正提供安全感比我的, 卻是 "陀著" 我、保護著我的媽媽。

懷孕除了帶給新體驗、責任感給新父母外, 還有提供安全感和愛給孩子。

一角

今個週末總是懶洋洋的 (學完車之後, 時間比較輕鬆), 卻瞓不得o甘晏, 總係早起床陪媽媽飲茶, 之後閑閑的盪來盪去, 又或是揾 "周公" 談心。

其實我可以外出約會朋友, 又或者多抽時間陪家人, 但心內總是提不起勁 (魂遊太空的) 雖然我知道 "我的立場" 和 "放下的道理", 但人非草木, 還得等待.........

等待我去懷緬那些舊記憶, 再慢慢的隨時間洗刷, 直至它變得褪色、渺小、不再重要, 我才可徹底的放下。在這些時間, 我偶然需要躲起一角, 讓自己默默的哀悼過去 (說起來也奇怪, 想起往事時, 有時會不期然傻笑, 有時又莫名的想哭)。

我需要重新整理自己的情緒, 儲存足夠的勇力及力量, 才可令自己繼續向前行。 所以請原諒我最近的自私, 需要多一點時間獨處思考。

齋之奇想

「齋」令人想起素食、宗教、恬靜、初一十五觀音誕等連繫。

食齋有時為了清腸胃 (果排食得太多肉), 所以食品不能太油膩、太味精, 其次坐得舒服也好緊要架 (環境舒適), 那你可以自在的享受 E 一頓美味的齋, 心境也會平和起來, 易於滿足。

今日我和朋友 I 去左尖沙咀海防道蘇杏旋的齋舖午膳, 一入舖內便被 "質問" 有否訂位? 然後安排我地入坐, 卻又再 "三番四次" 的追問我地叫什麼食物 (即使我地已點好菜), 令人討厭啊!

蘇杏旋在店內大聲嗌伙計做事, 又高聲問顧客食什麼, 只得一個忙字 (睇見佢"超級緊張" 的工作態度, 令旁人感受到好大壓力, 抖不過氣), 原只想舒服的食齋清腸胃, 卻害得被迫急速的完成午膳, 感覺很不爽啊!!

記得蘇杏旋好似係佛教教徒, 難道佢地沒有靈修頌經的嗎? 還是佢的修為不夠高, 仲係令人感到佢 "心浮氣燥"的呢! 所以說在香港這個國際大都會, 要開店謀生, 就不能做 "世外高人"。

說穿了, 天下間又有幾多人可以 "不為五斗米而折腰" 呢?

感謝天

這些年來多次在天堂與地獄之間遊走, 當中所經歷的的快樂和辛酸, 不足為外人道, 故事的開頭當然令我走在天堂上較多, 而後期則常困在地獄裏。

繼 "沉下去" 事件之後, 今早我望著觀音像, 心裏細問：「上天呀上天, 為何我要經歷 "沉下去" 之苦呢? 你的用意何在呢?)

空氣中十分沉寂, 猛地心頭 "浮起" 一個想法 (對比和成長)!!!!!

「如你無經歷過痛苦, 又怎知快樂滿足, 此為對比。 如你經歷痛苦後, 學懂了一些道理, 已令你的個人更成熟, 此為成長。你不需為身邊發生的人和事感到沮喪、憤怒, 因為 他 / 她 / 它 乃你上天安排的一些道具, 令到這一埸戲的誕生, 令你有所領悟、得著, 如果你因為痛苦而困著了自己, 甚至困於仇恨, 你是一個小心眼的 "失敗者", 你的人生會因此 "懦弱" 的行徑而給絆住, 不得前進。 如果你看輕一點, 學懂了固中道理, 放開包袱, 你的人生將有更美好的一頁, 上天會將機會留給 "勇者"。」

痛苦乃係人生必然的配菜, 碰上它, 看你用什麼的態度去面對, 才是你的練歷和造化。因此我要 "化痛苦成智慧", 智慧將伴我一世去解決日後的各種難題, 至於以往的小道具........管它吧!!!

感謝上天, 我領悟到你的旨意, 我會堅持自己認為對的信念, 如： "寧人負我, 我莫負人" (不是因為我蠢, 只是我在為自己 "積福"吧!) 日後大家就會見到我 "多腹多壽" 了, 哈哈!!!!

禪話人生

宇宙冥冥之中有一定的軌跡, 在你的人生中的某一個時間, 一定會碰上那一個人, 發生某些特定的事。即是不是他 / 她, 命運中總安排著一個人去等著你的出現, 發生既定的故事, 因此也不用執意是否那一個他 / 她了。

在此測試一下大家 (選擇題)：
問：如果你無故地比你認識的人打了一巴, 你會有何反應?

1) 你會報仇, 打返佢
2) 雖然你唔開心 及 有少許不忿, 可是你 "算數", 無奈接受

選擇 1) 的朋友, 在你的世界 "非黑即白", 沒有灰色的地帶, 如果你會打返仇人, 那麼你便要 a) 記住 e 一個仇恨, b) 精心的計算復仇大計, c) 去找機會尋仇, d) 尋仇後你得到了滿足感, 可是要記住那份滿足感, 就必須要記得 "仇人、仇恨、報復" 才能留住感覺, 肩上多沉重啊! (亦封鎖住自己沉淪於此痛苦之中, 仇人一直住在你的心房。)

如果你選擇了 2), 雖然你感到不快, 可是隨著時間的沖洗, E 一份感覺好快便褪去, 而 "仇人" 在你心中亦沒有留下太大的位置, 因為你懂得 "放過別人 = 放過自己" 的道理, 你的天空變得豁然開朗。

上天派來的那個人, 對你作的那件事, 如果結果是好的, 佢便成為你的好朋友, 如果結果係壞的, 也不打緊, 佢只係你人生路上的其中一個可惡過客吧! (最重要係你會因佢所作的成長呢!)

考牌成功了, YEAH!!!!!!!

今早 8:20 抵達了沙田駕駛學院 (我考 9:00), 今次考試的心情比上一次緊張, 因為..........上一次 "衰左" 之後, 唔想再衰了!!

結果成程車也揸得好小心 同 好緊張, 我試過 Cut 完線後唔記得熄指揮燈, 彎位轉不出平日的駕駛水準 (但可接受), 最重要係當我路過 "黃格仔" 路口時 (黃格代表不能停車), 怎知..........後面的紅綠燈放車前進, 一駕小巴 "極速" 的從我右邊 Cut 入我的左前方 (在黃格前面停下上落客), 我的心立即沉了下去 (15、 16 的, 停唔停車好呢? 點算?) 結果........我在黃格內停了車 3、4 秒等小巴落客, 再前進行車。

由於小巴的極速出現, 事出突然, 好彩考牌官無剔我 "肥佬" 咋!! 實屬萬幸。 終於考牌成功了, 多謝媽媽的心靈雞湯 (鼓舞小利是), 同埋 KK 的精神支持啊! 多謝晒。 而家要麻煩黑馬王子代我去領車牌。 考完試知道成績後, 緊張的心情也久久未能平復, 好似發緊夢o甘喎!!! (究竟係咪發緊夢呢?? 因此我一次又一次的取出成績單望完又望 "及格" 兩個字, 哈哈。)

孟婆湯

最近身邊的幾個同事也有親人離世, 除了戥佢地難過外, 也忽發奇想的有以下妙論：

1) 我相信 "前世因"、" 今世果" 的道理, 因此做人 "要對得人、對得住自己"。
2) 我認同人係會輪迴轉世的, 在轉世之前, 必先在 "奈何橋" 前飲下 "孟婆湯" 去清洗今世的記憶
3) 如果天下界真的有 "孟婆湯" 出售, 大家會嘗試嗎? (也許可以選擇性的清洗記憶)
4) 生、老、病、死、喜、怒、哀、樂乃係人生必經的 "配菜", 如果選擇性清去其中一環的記憶, 會活得愉快實在嗎? 還是感到若有所失呢? (因為無對比, 如你無經歷 "苦", 知道何謂 "快樂" 嗎?)
5) 其實每個人心中也存在著"孟婆湯", 這並不能 "清洗" 你的痛苦、你的記憶, 但它能叫你放下 "包袱", 重新生活, 至於這一碗湯幾時才會出現, 就睇你幾時 ready (預備) 好心理去放下包袱 (不甘心)了。

骨牌效應

大家有無玩過 "堆沙" 同埋 "砌骨牌"? 兩者都需要一人, 又或是一群人花上好多時間、心血去營造美好的結果。

但原來只要稍一不慎, 一根指頭就足以摧毀一切, 多年來的心血完全毀於一旦, 旁人除了為此結果感到婉惜, 也只有無可奈何了。

請大家好好珍惜身邊辛苦建立的一切, 別任意的讓它被摧毀, 就如我在此 blog 內珍惜各位的瀏覽和留言一樣。

沉下去

最近的心情一般, 尤其昨晚及今日, 總係 "沉下去" 的, 講一個故仔比大家聽：

病人受傷後入住療養院, 本以為只要打針服藥, 好好休養, 就會好快痊癒的, 其間身邊的親人好友紛紛探望支持, 令病人好感動, 更暗自許下承諾, 要堅強的撐下去, 才不枉別人的苦心啊!

怎知身邊突然來了一個大鐵鎚, 猛的將病人雙腳敲碎了, 再也站不起來, 甚至連心也嚇得跳了出來, 場面多震撼!!! 其實只要打石膏、駁骨及物理治療, 總能夠再次站起來的, 只係要花上更多時間和更大的努力去康復吧!

只係病人感到累了, 短暫的不想再強擠笑容, 也想謝絕探訪好好療養, 佢有信心一定會好的, 只係腳上的疤痕將隨佢一世, 而對大鐵鎚亦感到害怕了。

如果大家諒解, 就由得佢沉下去吧! 亦無謂追問詳情, 也許只要幾個月的時間便可以 "浮返起來"。