愛的紀念品

今日的畢業禮, 認真 "大豐收", 除了家人及朋友的支持之外, 還有佢地送上的點點心意, 令我甜在心, 暖在身。

首先圖左係 大家 送的百合鮮花花束, 圖右係阿 Be 送的玫瑰小花束。
















仲有圖左 KK 特意去租的 "四方帽" (另有色帶的), 同埋圖右 KK 同黑俠王子的 "畢業女生" 原子筆。

我的畢業禮

哈哈....今日係小妹的大日子 ── "畢業禮" 是也。 話說畢業生要於早上 8:45 抵達香港大學 (薄扶林) 校舍作綵排, 而持入場劵的喜賓 (每名學生只可帶兩名嘉賓入場, 我的名額當然係 老頑童 及 童伴啦) 就會在 10:45 入場參加儀式, 整個儀式也很流暢, 大約在中午 12:00 左右完成。

老頑童、童伴 及 我先到小吃部排隊取食物及飲品 (免費供應, 但食物一般), 然後匯合孖大舅父、King King、KK、黑俠王子、阿 Be 及 阿華等人一齊拍照留念 (用 KK 之靚相機, 因此我暫時無相在手)。 阿 Be 送我一束畢業花束 (好靚架, 我鐘意它夠小巧, 容易攜取), KK 與黑俠王子也送我一束花、一支靚筆 及 神秘禮物 (KK 知道我的心願係 "戴四方帽" 影畢業相, 因此特意租左一套畢業袍、連帽及彩帶的, 給我拍照留念), 好開心啊! (雖然不是靠實力得到, 但總算 "還" 了自己一個心願)
















比大家睇下我的畢業相啦, 在屋苑的花園影架! 在此多謝各方好友的出席 及 大家的心意, 今早我 "突然感觸", 可幸我尚算早完成學業, 而父母仍健康, 可以自己從遠道乘車而來, 不用靠別人接送, 亦可親眼目睹我的畢業禮。 多謝晒!!

踏單車

尋日農曆九月初九, 我無去到登高, 反而約左阿 Be、靜宜家姐、小肥皇子、靜宜媽媽、東尼及東尼 BB 一行七人去踏單車。

由於我地出發比較遲, 而尋日又極多人踏單車, 因此部份車店無車租, 有得租的卻比平時週末貴, 最終我地也在下午 3:30 從大埔出發 → 沙田石門 (回頭) → 大埔。 途中發生左一些小插曲, 令到今之的旅程好難忘。

在一條隧道內, 東尼 BB 由於人太多, 而一不小心, 在隧道內 "炒車", 撞瘀雙膝及擦損左手 (手指公附近的 "雞脾仔" 位置), 由於損得有小小 "爛肉", 而我地又找不到單車徑上的 "醫療輔助隊" 幫手, 最終在 "科學園" 內請職員代叫白車, 送往沙田威爾斯醫院打 "破傷風針"。

而剩下來的 6 個人要解決 "運送單車" 返大埔交車的任務, 由於靜宜家姐不懂駕駛 "單人的單車", 因為她一直和小肥皇子踏 "孖車 (情侶前後座位的)", 而剩下的 4人便要運送 5 架車。 點算呢??? 經一輪商議後, 東尼決定我地自行駛車回大埔, 剩下他自己及兩架車在原地等候, 而我地到達大埔後, 再由兩名成員駕駛孖車回原地匯合東尼, 最後由 1 名成員踏孖車, 另外1 名成員和東尼各自駕駛1架單人單車回大埔。

由於當時已經下午 6:15, 而我地要趕在 7:30 左右交車, 因此恐怕唔夠時間 "踏兩轉" (因為各成員都累, 因此速度將更慢), 最後一輪爭辯, 我突然想起：「係喎! 我踏的係 "私家車 - 私人單車, 不是租的", 只要我泊低它在科學園, 由我取代東尼BB駕車不就 OK 嗎?」最終我地按 E 一個方案實行。(而今早阿 Be 駕駛私家車送我到科學園取車, 我已將私人單車取回泊在住處。)

不料回程途中, 突然殺出一個 "程咬金", 將阿 Be 從單車上摔下來, 當時大家也有小小 "火藥味", 而的確係該男子妄顧道路安全, 突然殺出。大家冷靜下來後, 該男子也有替阿 Be 整返好 "甩左" 的單車鍊及陪罪。事件終於告一段落, 但阿 Be 晚上發現條腰好痛, 原來傷左, 腫了一大塊。 尋晚當大家忙著去應付 "炒車" 的突發事件時, 竟遺忘了通知正在大埔火車站等候我地食晚飯的靜宜爸爸, 害佢乾等差不多一小時, 真係 sorry!

而晚上我地又去左大美篤上次介紹的食店晚餐, 今次叫左 1) 燒羊馬安 (幾好味), 2) 侏羅紀雞 (好特別, 雞夠嫩), 3) 雞油糯米花雕蒸羔蟹 (好好食, 好香酒味的飯) 4) 炒爸爸菜 (爸爸菜係 mug? 咪就係阿爸的阿爸的菜 lor - 即係 「椰 (爺) 菜」)。美味的晚餐總算替 "一波三折" 的一天劃上完美的句號。

總結：今次我學懂了遇上突發事時要鎮定、冷靜、沉著氣去應付, 先去解決事情, 才表達自己的情緒 (否則自己" 太騰雞、太燥" 非但對事件無幫助, 反而影響大家一齊 "忟憎、唔開心", 又何必呢?) 再者事故發生之後, 並不是找出問題所在的 "最佳時機", 應先互相幫忙解決, 之後才加以研討, o甘才能互相幫忙, 團結事成。

我又學懂了如何組織得好一點, 下次碰到意外時, 相信我會處理得更成熟的。經一事, 長一智, 人生就是這樣, 縱使發生意外大家也唔想 (會唔開心), 但當中也會有得著, 只是你把握到得著, 其實 "意外" 對你來講, 只係 "學習" 當中的一個小章節。 只有抱o甘的態度, 你的人生才會 "看得開, 愉快一點"! (反正也發生了, 不如樂觀一點去面對)

愛不是佔有

愛一個人唔等於要擁有佢, 如果你愛佢, 你會自然的為佢著想, 想佢好 (但要緊記 "你眼中的好, 唔代表佢眼中的好")。

最近睇的一本書講：「如果你愛那個人, 你應該無私的奉獻、付出你的愛, 而不該著眼去計較回報」 現實可以做得到嗎? 因為我眼中的 "愛" 該是雙向的, 雖然兩人之間的付出和回報可以不一樣, 但至少也要有回應, 關係才可持續, 否則獨個好難捱下去。

也許我的 "道行" 未及書中的作者高深, 因此我還未能辦到, 要多多努力改善自己先。另外我又認為兩個人一齊, 互相總會對對方有期望的 (如：即使普通朋友, 也會期望志趣相投) 所以真的可以毫不計較回報嗎?

我只知道愛佢, 係應該讓佢感到幸福 (如：有私人的空間), 而佢感到的幸福 "未必" 會包括我的存在。因為人係有情緒的, 每一天的狀態也會唔同, 彼此需要互相調節才可。

亨 BB 生日快樂

Happy Birthday to Henry!!

亨 BB 今日滿 1 歲啦! 佢爬得好快, 行路唔隱, 又有兩隻小門牙添! 最近佢 D 動靜仲越來越趣緻, 例如創意無限的攞住 "盒蓋" 扮豬鼻, 又赤裸上身扮大隻 (你睇佢個樣 "谷" 得幾恆) , 好攪笑架。
















願我的開心果天天健康、快樂、 日日無憂 和 孝順父母。

哭

今早在報紙上睇到一篇專欄係關於 「哭」的, 當中某一些的理據我好認同, 好似：

1) 人越大、淚越少：當人生的閱歷多左, 處事成熟左, 眼中的天空大左, 會發現當中的 "唔如意、波折" 根本不算什麼, 不值得哭, 還是省下眼淚吧!

2) 「哭」是別有用意：有時候, 傷感的事情雖然已經事過境遷, 但奈何心底的那種心酸極希望利用 "哭" 去宣洩出來, 說到底, 最終的目的也是想撒嬌、想別人關注及疼自己。

3) 哭也要看時候：有些事情雖然難過, 但由於事態緊急, 要即時處理, 根本就要極速的將難過埋在心中, 先去應付事情, 當事情冷卻下來, 卻發現經已哭不出來, 只有萬般的心酸, 極無奈。

成年人慣於喜怒不形於面上, 只埋藏心中, 因此心中往往壓抑著千千個未解開的結, 當一日心中負荷過重時, 便會精神崩潰, 亂發脾氣和情緒失控。

「哭」並不代別你軟弱, 它只代表你懂得處理情緒 (適當的宣洩心中抑鬱), 是情緒健康的象徵。君不見 BB 與生俱來便有 E 一種表現嗎? "哭" 只係表達方式之中的一個渠道, 因此不要帶 "有色眼鏡" 去看它。 小孩每天能夠隨意的哭與笑, 去表達自己心中所想, 是多難得啊!

希望大家天天也情緒健康, 活得開心!

讓 "活著" 的人解脫

今早突如其來的壞消息, 不禁令心情沉了下來!

想深一層, 如果佢的嫲嫲係愛我的, 還健在的, 願意見到我地傷心的樣子嗎? 為求令自己盡快振作起來, 去支持我的朋友及其家人, 我唯有安慰自己 「她堅持得太辛苦了、她覺得累了, 如果我也是愛她的, 又何必強求她在我身邊但被病魔纏擾而活受罪呢?」

以下的一首詩係我在中學時代學的, 正好讓我安慰自己, 願佢的家人也能放下傷痛, 早日得到解脫。


也許── 葬歌 作者：聞一多

也許, 你真是哭得太累，也許，也許你要睡一睡，
那麼叫夜鷹不要咳嗽，蛙不要號，蝙蝠不要飛；

不許陽光撥你的眼簾，不許清風刷上你的眉，
無論誰都不能驚醒你，撐一傘松陰庇護你睡；

也許你聽這蚯蚓翻泥，聽這小草的根鬚吸水，
也許你聽這般的音樂，比那咒罵的人聲更美；

那麼你先把眼皮閉緊，我就讓你睡，我讓你睡，
我把黃土輕輕蓋著你，我叫紙錢兒緩緩的飛

默哀

今天早上大約 7:15 接到朋友的口訊, 說醫院要求親屬去見佢嫲嫲, 當時已心感不妙。朋友和我心急如焚的趕到醫院時, 才知道佢嫲嫲已經仙遊了, 不禁心酸起來。

回想起來, 佢的嫲嫲也很疼錫我, 視我就如自己的孫女一樣。在佢患上胰臟癌的時候, 看到佢被痛楚折磨得死去活來, 吃不下、瞓不著, 日漸消瘦的樣子, 令人不忍, 唯一可做的只是陪伴佢, 和佢傾計, 替佢按摩等, 令佢過得舒服一點。

其實我不太懂說話, 不懂安慰佢的一家人, 只知道我可以靜候的預備幫忙。再者, 無論今次佢嫲嫲在醫院的情況是好是壞, 我地皆會 "不忍" 及 "不捨"。

若果情況係好的, 我地會 "不忍" 繼續見佢嫲嫲被癌細胞折磨得半死, 痛得連求生的慾望也沒有。
若果情況係壞的, 我地會 "不捨" 得佢嫲嫲的離開。

人生真係有好多無奈同矛盾啊! 但生、老、病、死乃係 "每個人" 的必經之路, 只希望 "繼續活下去的人" 能夠釋懷, 保重身體, 重新生活, 不要令離去的親人擔心啊! (也可當 "轉別的方式" - 好好活下去, 去回饋逝去的親人)

萬分期待的日子

今日放工後趕去 "金鐘" 的 「香港大學專業進修學院」的校務處領取以下物品：

1) 畢業禮袍
2) 畢業典禮入場券 (除了我之外, 只有兩張, 此名額當然係爹地、媽咪架啦!)
3) 臨時學生証
















收齊以上物件後, 便極度期待本週日 (10月21日) 的大日子來臨 ── 我的畢業禮, 由於入場嘉賓名額只有兩人, 因此其他家庭成員 (如：哥哥、姐姐、舅父、未來姐夫 及 阿 Be) 一律淪為 "佈景板" (即係當完成典禮後, 大家一齊影相留念)。

自小的心願是讀大學、戴四方帽 (心中經常浮起戴著四方帽和家人拍照的畫面) 奈何小妹資質有限, 要達到 E 個夢想, 似乎有 D 距離及難度 (而家也可當做 "無個橙, 揾個吉" 的心態), 不是學位畢業, 只是高級文憑畢業吧! 希望我的家人也不會失望啦! (尤其是學業成績好的媽媽, 幾位子女也未能繼承佢的智慧及衣砵, 真是 Sorry! 但我地也盡左力架啦!)

如果禮袍的衣領, 多一條顏色邊, 就靚好多了, 影相時也會 sharp (搶眼) 得多呢!

邊個係 「為食豬」?

Hi Hi....大家仲記得 "佢地" 嗎? 佢地就係我同阿 Be的活寶貝 - 豬女 (Piggie-左邊) 同 豬仔 (Pigson-右邊) 嘞! 雖然佢地係 twins (孖生龍鳳胎) 不過佢兩姊弟外型上最大的分別就係：豬女比較肥, 雙眼距離 "開 d", 而豬仔卻整天用一臉無辜的眼神望住別人, 怪可憐的樣子, 惹人憐愛。 (佢地的招牌 "兜風耳" 係遺傳自爹地的)

性格上, 豬女最喜歡 "食...食...同埋食", 為左食, 佢會不摘手段, 出盡法寶的, 而豬仔卻喜歡 "玩...玩...同埋玩", 有得玩, 老豆姓 mug 都唔記得的。(有時佢會嬲老豆自己去玩, 唔帶埋佢架!)

上週五放工, 由於病後好返少少, 同阿 Be 放工去街, 在歸家的火車車廂中, 阿 Be 向我講：「我覺得你的面色 (面上的氣色) 唔係o甘好, 帶點青黃色, 唇也沒什麼血色。」我道：「是的, 我也感到未完全康復, 身子較弱, 面及唇無血色, 好樣衰啊呵?」 他說：「又不是說好樣衰, 只是擔心你身體差一點吧!」

及後我地去左食粉麵作晚餐, 食飽後, 我說：「食飽真好, 這幾天無胃口食野, 而家個人覺得 "暖和" 一點, 喂!! 我而家 d 面色係咪好左 d, 無o甘樣衰呀?」 阿 Be 認真的審視說：「係的, 面色好返 dd, 喂!! 你好似 "阿女" (豬女) 呀! 只要有野食, 個樣就會靚架啦! 唉..........阿女真係似足你。」

哎呀!! 豈有此理!! o甘都被佢借題發揮, 戲弄我添。阿女知道爹地o甘講佢, 一定 "嬲死" 爹地呀!

萬千寵愛在 Big Mac

E 一排雖然病得較多, 但 "得著" 也很多, 周邊的人很關心自己, 經常致電問候我, 縱使在返工時耗盡元氣, 只要放工一回家, 飲一口 "阿媽靚湯", 足以精神百倍, 真的領略到 "世上只有媽媽好, 有媽的孩子像個寶" 的道理。

King King 及 靜宜家姐除了問候我之外, 還不約而同的送上禮物給我, King King 送的係 Gucci 手錶 (今年生日及升職的禮物, 雖然生日還未到, 不過由於價錢 "抵", 機不可失, 預早送定先)。

靜宜家姐的禮物係 "極有心思" 的, 因為係佢自己親手穿的 "斯華洛水晶" 手鍊 及 頸鍊套裝 (給我配襯 KK 大婚當晚的飲宴服裝 - 墨綠色的絲絨裙), 水晶套裝真係好閃架! 相信當晚一定閃耀全場, 影我相也不用閃光燈了。 E 份禮物除左用料昂貴之外, 還有那一份親手製作的心意, 萬令我好感動啊! (相信比在我, 穿兩粒水晶便感到 "眼累", 因為太細緻了, 好費神!)

別忘了一提我媽媽好細心, 知道我 "飲中藥的苦況", 刻意去買左一包 "糖冬瓜" 給我 "送口" (小時候由於我常咳, 糖係完全 "禁絕"的, 又一次偶然的機會下食到糖冬瓜, 覺得它是 "人間極品", 從此愛上了), 只不過 「媽媽, 你的小寶寶長大了, 知道 "苦口才是良藥", 再也不用要糖冬瓜送口了, 多謝你的心意。」

在此說聲：「多謝你地, 就係因為你地o甘錫我, 才令我感到溫暖 及 萬千寵愛在 Big Mac!!」我會繼續努力加油架!!

五行欠...........?

尋日放工, turbo (極速) 腳趕住走, 因為早前睇中醫好左少少 (已經無瞓醒流汗, 亦無o甘多 "沾寒沾凍" 的情況), 快快趣又去覆診, 希望服藥 + 本週末再抖抖會好返啦。

去到醫師處, 當然又係 "望、聞、問、切" 幾個步驟啦, 之後我同醫師講 "偏頭痛" 同埋 "條頸梗晒的痛" 幾嚴重, 因此睡得不好, 睡極也不夠精神。醫師話我有寒氣入侵, 尤其肝 (太虛寒), 肺偏燥, 而血熱 (聽落都幾複雜, 正一係 "佢識我唔識")。

開藥方後, 佢話 "針灸" 會對 "頭痛" & "頸痛" 有效, 問我試唔試, 反正也要等煲藥, 咪試一下 lor (另外收費的), 大家睇o下, 都幾恐怖架, 我共針左 6 針, 包括：
1針左邊 "暈精" (因為經常左邊偏頭痛, "吉" 得幾入架, 都咪話唔驚, 醫師話有瘀血喎)
1針右手手腕內側
2針右腳背
2針右腳趾
(我仲以為只會針 "頭" 及 "頸", 懶醒的束起頭髮添!!)

當 "吉" 暈精的時候, 佢吉入少少支針, 便問我: 有無反應, 覺得麻痺嗎? 我說：少少麻, 佢再插入 d 支針, 問: 而家呢? 我: 好麻了 (個心有 d 驚, 因為佢都 "轉" 得幾大力去入針), 點知我講完之後, 佢還轉入多d 支針 (正一 "唔痛死都嚇死我"!! 認真見識 mug 野叫做 「一額汗」, 直頭係全身因緊張而冒汗呀!)

人地話 "五行欠打", 我就係 "五行欠針", 針過後, 頭痛頸痛好似鬆左 d, 輕微左, 仲瞓得幾好添, 不過我認真怕怕 lor, 如無必要, 我真係唔想再針, 好驚啊! (唯有當預早過 "萬聖節" 啦!)

我的開心果

E 一排個人病到無晒心機, 做什麼也提唔起勁! 只想睡、睡、睡、睡, 連食也唔想。

本週遇上忙碌的時候 (因為上司下星期將會放一週大假, 因此這星期較忙), 總會覺得 "有心無力", 因為體力跟唔上心力去行動。但係當我望見我的 "醒神開心果" 的時候, 也可幫我去除一些勞累及 無 mood 的感覺, 各位觀眾...........我的開心果

我好鍾意 E 一張相, 因為佢的表情好 "趣怪", 活像被人責罵時, "扮乖" 的樣子, 勁可愛!! 我用此相片做公司電腦內的 Wallpaper (桌面), 因為真係好得意呀!!!




Henry 仔的 "萬聖節 - 南瓜仔" 造型 look, 得意呢? 全靠 King King 幫佢打扮咋! o甘樣在萬聖節當日去遊街, 的確幾威喎! 真係好羨慕呢!











膠騎上的英姿 look (用鐵造的電單車稱為 "鐵騎"), E 一份就係 Henry 的外父外母預早送的生日禮物 (還未到正日, 真巴閉呢!) 你睇........佢玩得幾開心, 就快連 "老豆" 姓 mug 都唔知了。

小朋友的 "魔力" (影響力) 認真驚人, 足以讓 "病到無 mood" 的人 "起死回生", 不得不佩服 Henry 仔魅力沒法擋。

嘩!! 好 high 啊!!

嘩!! 好 high (興奮) 啊!! o甘大個女都未試過......................... (究竟係 mug 東東呢?)

o甘大個女都未試過 "一次過" 同時 擁有 "兩部新手機" 在手架!!! (雖然唔係我的) :P

話說過往韓國和日本的手提電話制式係同其他國家的制式唔同, 因此旅遊或公幹的時候, 往往要到當地買電話儲值卡作聯絡。最近日本可以使用 3G 網絡, 意味著你只需手持 3G 手機, 便可暢遊日本無阻。

公司的高層便買左兩部最新型號的 3G 手機 (Samsung U708),

賣點係超簿, 只得 12 mm,
還附有 320 萬像素相機,
支援 micro SD 記憶卡,
支援多種音樂及影像格式,
支援 HSDPA 3.6 Mbps 高速數據下載












比張相大家睇o下啦, 唯有安慰自己「唔能夠真正擁有, 至少可以摸上手! 」(仲一次過摸兩部添, 因為要幫佢地 "差飽電")

碰上好男人

E 一排天氣 "時冷時熱", 空氣質素又差, 身體弱一 D (如我) 都會頂唔住。其實我總唔明白, 點解我會容易生病呢? (因為我已經 "好窮", 無理由財多身子弱的) 想必係心理及壓力因素吧!

最近經常患上傷風、感冒、頭痛、時冷時熱 及 鼻敏感等症狀, 好返少少, 又再病過, 成日都 "精神差、周身骨痛、頭痛、鼻水長流", 週而復始, 無窮無盡的, 食藥過後又再出現此症狀, 唉..............

上星期六早上我瞓醒起來, 噢........渾身是汗, 從頭濕到落腳趾, 都唔知做什麼? 只知道身體 "好唔妥" 同埋 "好頭痛、骨痛"。找來媽媽陪我睇中醫 (因之前睇太多西醫, 始終好唔晒, 成日翻發), 中醫說有 D 內感, 氣血因此行得唔好, 影響我會時冷時熱。比左 3 日藥我回家休息。

我好乖的在週末長期休息, 在週一早上起身時, 又係全身汗, 連枕頭也濕晒, 無辦法, 也要頂返工 (因為今天有工作要做, 不能請假), 踏出家門時, 已經覺得空氣好差, 連呼吸也感到心口被壓著。好在早出門口 (睡得不好), 火車車廂中不算擠塞, 當火車至沙田站時, 我的肚突然好痛, 身體開始 "標冷汗", 頭也開始暈, 因此我立即走出車廂到月台 "坐著休息"。

感到身體好一點的時候, 我繼續上班, 點知...........當火車並未駛進九龍塘站時, 我的身體又在出現頭先的現象, 今次豆大的汗珠在面上滴下來 (我深知自己面青唇白), 手也開始微震。

我厚著面皮向一個坐著的男人問：「先生, 唔好意思, 我見頭暈, 你可唔可以讓個位比我?」
那位先生：「好! 無問題 (並二話不說的起來讓坐給我)」轉頭還問我：「要唔要幫你叫車長幫手?」

好彩休息過後, 我也無驚無險回到公司上班去。如果昨日早上無遇上 "好男人", 我想我也會好辛苦呢!

互動

何謂互動? 理應解作 "互相牽動", 即係你的舉動會影響著別人的情緒, 而別人的情緒又會影響著佢的行為。

舉個例：妻子工作過後, 在晚上滿心歡喜的去煲靚湯, 打算和丈夫二人分享, 誰知卻要苦等上四小時丈夫 (工作中) 才歸來, 呷一口湯卻說：太辣了, 我飲不下去。雖然這湯是妻子的失敗之作, 難度果份 "氹老公" 的心意及苦候的時間不值得讚一句?

現實生活中, 我地每每對 "別人" 有著各式各樣的 "期望", 關係越親密的, 期望便越高, 一旦對方達不到我地心中的期望, 我地便會失望、傷心。

就如以上例子：妻子煲湯及苦候 = 氹老公 = 期望老公會歡喜, 會稱讚
誰知老公非旦沒有稱讚, 還說: 太辣了 = 負面評價 = 妻子失望

我地要時常警惕自己, 在說出真相 (負面) 的同時, 要預留一些 "緩衝區" 以作舒緩, 如：丈夫可說：在外工作真辛苦, 我真幸福, 有老婆煲的靚湯侍候。然後才說出：只不過辣左少少。 那妻子會好過一點。

如果基於互動關係的影響, 當你撞口撞面的給予別人負面評價時, 你想別人又會作出何等的舉動呢? 此乃是一個 "惡性循環" , 大家也要 "引以為戒" 啊!

回復自由了

仲記得早幾個月忙得不可交關, 一星期幾乎只得一日休息, 其他的日子, 還要在工餘時間上課, 幾乎捱病。

10 月係一個比較輕鬆的月份, 因為新的課程將於 11月開課, 學車又延遲至 KK 結婚後才再繼續, 因此 10月份我可以盡情投入的陪伴家人 (難得的回家吃飯, 佢地幾乎三個幾月未撞過我在星期一至五晚上食飯了), 好開心哩!!

另外, 亦要開始幫 KK 打點一切婚禮事宜, 又要趁空閒時清理房間及家居 (其實早該清理的, 不過之前無時間做得仔細, 只是 "得過且過" 的交待了), 在清理房間書櫃時, 才發現原來我也 "飽覽群書" 的 (讀過很多科目, 只是學歷不高吧 :P !) 回顧過去的功課及筆記, 重溫當時努力求學的那份熱情, 不禁令我懷念 (歲月催人老) 及感到驕傲啊!

願大家也齊來 "不怕羞, 活到老, 學到老, 求學之心不會老"! 讓 "自我增值" 成為你生活的其中一個動力吧!

生日快樂 to King King

幾十年前的今日, 有一個嬰兒呱呱落地, 那個便是我的大哥 King King 了。記得細個的時候, 成日同佢 "狗咬狗骨", 人大了, 慢慢變得 friend 起來。

舊年大約 e 一個時間, King King 終於嘗試到初為人父的滋味, 因為小姪仔係遲佢約半個月出世的(10月19日), 今年差唔多剛滿1 歲的姪仔必定係 King King E 一世人的 "最佳禮物" 。

雖然 King King 今日身體唔舒服, 不能賞面和我吃晚飯慶祝, 在此祝佢 "父慈子孝、身體健康、夫妻恩愛、和氣生財 同埋 事事如意" 啦!

** 圖中的 "栗子蛋糕 + 朱古力裝飾" 乃係我以前在觀塘跟導師學習的製成品, 因為 King King 腸胃一般, 在此請佢食蛋糕補數啦!

避風港 (II)

較早前的篇幅已經說明了父母 (夫妻) 在家庭的角色是十分重要的, 當佢地誕下小朋友之後, 便會努力的共同建設一個溫暖、美好而安全的 "家" 比小孩成長。

小娃娃在孩提時代, 當然唔懂性, 唔知道溫暖的家係來自父母努力而得來的庇蔭, 只以為是理所當然的。佢地只知道 "接受" 父母所給予的, 不懂去 "付出" 力量去建設家庭。

小孩長大了, 受教育後, 學懂了知識、待人處事及禮貌, 知道人是應該合群, 自己在家庭中也有自己的角色和崗位, 如子女在家中應聽父母的話, 好好讀書, 孝順長輩, 幫助做家務, 以盡自己的本份。

如果家中上下各人 (父母、子女) 均盡其責, 家中事務由大家分工去處理, 那便不會只依賴其中一員, 即使那人不介意無限的付出, 但佢也會累、佢也要空間去喘氣、佢也有情緒、佢也需要避風港去避靜。一家人, 不是應該互相幫助的嗎? 那麼避風港才能保持其服務質素, 繼續放開於有需要人士, 這個家才會溫暖, 而不是 "冷冰冰" 的 "各家自掃門前雪" (彼此沒有交流的)。

請緊記, 自己在家中所擔當的角色及責任, 盡自己的本份去做好, 共同建立一個優秀的避風港。

電髮、電髮、草菇都去電髮

記得小時候睇 IQ 博士, 有一個小村姑, 佢的口頭嬋就係：「電髮、電髮、草菇都去電髮」當時覺得好得意、好攪笑。

仲記得 80 年代的香港, 成年人一般流行著鬈曲的髮型 (可能當時的電視劇流行鬈髮, 如：洛琳), 爹地媽咪也趕上新潮一族, 在家中自行電髮, 那陣電髮藥水的味道, 而家還記憶尤新呢。

終於我上星期六走左去電髮, 圖中的E 一種髮芯乃我第一次用的, 電出來的效果頗大波 (不太鬈的), 但我卻即時想起 IQ博士的小村姑。

避風港

何處是你的避風港?

家庭必然是我的選擇, 在外工作累的時候, 無論自己睡房中是如何的凌亂, 我也愛躲起來避靜, 因為家人對我的包容係好大的, 而且相處起來又有默契, 佢地知道我需要支持, 不會胡亂打擾, 總會遷就著我, 因此在家中會感到溫暖而安全, 亦是我可以卸下面具, 以真面目示人的地方。

大家又有無想過 "一個家" 係如何形成的呢?

必先要有兩夫妻做主導, 再有其他成員。 兩夫妻是大家 (家庭成員) 的首領, 由於角色十分重要, 因此佢地處事必需成熟, 關係亦要融洽, 彼此努力的付出, 去維繫一個溫暖的家比其他成員。如果夫妻雙方也怕付出, 只問回報呢! 那代表佢地未夠成熟, 不適宜做領袖, 有機會提供不到好的成長環境給小孩, 隨時釀成家庭糾紛。

因此不論男或女, 在組織家庭之前, 應好好了解一下家庭角色, 衡量一下自己的能力, 如果未達標準, 便應該盡快彌補, 免得遺禍下一代。大家準備好做避風港的領袖未呀?

同事的手信 (II)

上回講的同事尷尬手信, 今回讓我 "揭曉答案啦", 係............綿花糖o黎o架!! 絕對唔尷尬, 男女老幼都啱食。

小刺蝟看世界

畢業之後, 出來社會做事, 當中碰過不少釘子, 哭過不少次。 或多或少同本身的個性 (性格) 有著極大的關係。小妹天生是個 "悲觀主義者"、做事性急 (反應快, 但一刻也不能等)、對於不公平事敢言、而且有果句講果句 (真性情、容易信人, 卻不懂防範別人), 以致易於被 "別有用心" 之人利用及出賣。 之後開始醒覺了, 學懂收歛真性情, 裝出一副 "戴著面具" 的樣子上班去。由當初求學時期的 "小毛蟲", 逐漸演變成出來社會工作後, 滿身是刺的 "小刺蝟"。

小刺蝟的 "刺" 只用於防範別人, 而不會用於危害他人, 有時候, 面具背後的自我也會投訴 "感到疲累", 奈何活在「辦公室政治」當中, 即使你沒有害人之心, 也不得不提防別人, 面具在上班的時候是不能卸下的。只有在午飯或碰上知心朋友 (公司內的同事)時, 才可間歇的除一除面具, 抖抖氣。

年少氣盛的時候, 遇著不公平, 總會想盡辦法去舉報 (活像別人眼中的小刺蝟, 不能得罪, 否則便會被投訴, 而在我的心內, 自覺得是為著 "大局" 好, 為工作著想)。 可悲的是在現實裏, 管理層並沒有太多人喜歡 "聽真話", 大家也愛看 "表面粉飾著的太平" 假象 (當中可能是勾心鬥角的), 結果 "忠言" 往往是逆耳的, 而舉報者便被標籤上 "攪事之人", 得不到預期的結果之餘, 還為工作道上搬上了更多的絆腳石, 把自己摔得 "體無完膚", 也沒有人會可憐自己。

人大了, 隨著一次又一次失敗的經驗所得, 小刺蝟變得成熟了, 知道繼續保持「真我」只會 "百害而無一利", 懂得自覺的把身上的刺 "磨平", 又會靜靜的在皮膚下裝出一身盔甲去 "暗地裏" 的防範, 碰上不公平事, 即使知道, 也會別過面的 "視而不見"、 "見而不聞"、 "聞而不知", 盡量做到 "事不關己, 己不勞心", 口中學懂了 "滑頭", 只會說出 "粉飾著的好事", 不會說出 "真相的醜惡"。

有時會問自己：「感到埋沒良心而迷失嗎? 這還是自己嗎?」開解自己之後想通了：「在朝九晚六裏, 我的角色是一名演員, 落力的去演老闆愛看的戲, 下班過後的還是 "真" 的自己, 社會之上, 有哪個人不是 "為了五斗米而折腰", 想要骨氣耍脾氣的, 可以.............只要有一天你升得夠高, 你不再為生活而煩惱, 或者你 "中左六合彩", 既然現在還在博殺的階段, 就得跟著遊戲的規則活下去」這樣才可不再被絆腳石摔倒, 不再阻礙自己的事業發展。

說實在的, 世界上盡是 "物競天擇、適者生存", 如果自己想不開, 只會令你活得不快樂, 而旁人亦會標籤著你, 那麼 "好像很笨" 的行為啊!

雙囍臨門

今日發生左一件囍事, 仲要係 "打孖" 上添。

話說上午十點鐘, "有幸" 被傳召入會議室 "面聖" (獨自見大老闆), 記得獨自見佢的機會並不多, 好多時也是透過直屬上司去報告我的工作比佢聽, 因此心內十分疑惑, 未知所為何事呢?

一輪談話後, 始知將會被 "升仙" (升職為 Senior (高級)), 心裏暗呼好彩。(好彩不是因表現不佳而被傳召), 又暗暗喜悅有升職的機會。

至於「雙囍」乃是指 1) 升職加薪 及 2) 將會 "加辛" (辛苦的辛), 因為下午直屬上司卻我公佈加薪的幅度及公司對我未來的期望, 以我所知, 肩上的責任將會重左好多。

我要好好努力才可, 還是經常要幫自己打氣：「我要努力向上, 我要奮勇自強。」, 令自己常常保持著 "士氣高昂" 的狀態。 還要十分感謝經常在身邊支持我的家人及朋友呢! 如果無你地的支持、鼓勵同包容, 相信我當初碰上困難、感到沮喪的時候, 一早便選擇放棄了。 多謝你地!

同事的手信 - 好尷尬喔!

同事 PH 剛從台灣旅遊返港, 今日返工, 便送了我地一 D "小禮物" (附圖)。

男同事見到當堂尷尬 "彈開", 而女同事也 "極不好意思的" 在男同事面前 "接受 PH 的 "小禮物"。記得當時我也面有難色呢! 唯有轉移話題問 PH：「粉紅色的和粉紫色的有什麼分辨呢 (有兩款包裝)」 PH 說：「物料有所不同, 你試o下先啦。」 (當時, 其中一個男同事正在我地附近, 勁尷尬的謝過 PH 便返回坐位)。

大家估o下係 mug 東東來的?

提示 - 包裝上的字寫著：

1) 全天用 / 雙色,

2) 前所未有的潔淨,

3) 魔力超厚棉層

4) 4 pcs / 包

小孩不笨

姪仔小 Henry 雖然人仔細細, 但係一點也不笨, 點解?

如果只係樣貌似爹地, o甘其他人咪無o甘錫佢 lor, 所以佢一 D 都唔偏心, 似足晒爹地、KK 同我 (分 3 個成長階段), 唔信? 有相為証架：

圖左係 KK 的兒時照 (肥啫啫及怕怕羞羞的, 很可愛), 圖右姪仔肥胖及含情脈脈的神情極似 KK, 大家留意一下佢地的面型、鼻及咀係一模一樣架, 只係 KK 對眼大過 Henry 少少。

圖左係小妹 Big Mac 的濃密 "棟篤企" 頭髮 look, 同圖右姪仔的玩水 look 根本就係同一人啦。

你地話既然 Henry 仔 o甘識做, 我地又點可以唔錫佢先得架, E 個小孩果然 "不笨" 呀! 抵佢 "萬千寵愛在一身" 的。

限期

世界上係咪任何o野都有限期的呢?

食物有賞味限期 (幾時會過期)
申請時有限期 (截止日期)
証件的限期 (幾時夠期換証)
繳費的限期 (賬單到期日)
人生也有限期 (總有離世的一天)

o甘 「愛」 又有無限期呢? 答案係：「有」

試想一下, 如果父母好疼錫你, 但你唔珍惜, 以為是理所當然的事。 當有一日, 你突然良心發現, 想去回饋佢地的時候, 誰知 "生命之神" 卻說佢的的生命限期已到, 你想彌補也來不及 (想待佢地好 D), 你會後悔嗎?

假如兄弟姊妹間感情一般, 大家 "河水不犯井水", 少有來往及關心相方, 甚至一日因小事爭拗而傷了和氣, 至到反目, 難道兄弟姊妹間果一份 "關愛" 的限期是到了嗎? (從此反目而互不相干?)

人海中, 兩個獨立的個體有緣的走在一起, 互相愛慕, 當感情走至趨於平淡之際, 一方著緊, 而另一方卻唔緊唔緊, 莫不關心, 這証明著兩人感情的期限到了嗎?

由於萬物皆有時限, 因此我地要珍惜當下所擁有的, 也要經常反思自己的行為。 因為 "機會" 唔係時時有, 也許當你醒覺的時候, 有一些事情, 已經無法補救, 人生亦只能帶著遺憾而終老了。

孖仔孖心肝?

最近在一次偶然的機會下, 睇返一 D 舊相片, 發現哥哥的舊照同姪仔的樣貌好相似, 究竟係 Henry 似爸爸, 定係爸爸似 Henry 呢? 佢地活像孖仔一樣, 認真 "孖晒" 我地的心肝啊!


















左邊的相片攝於三十幾年前 (哥哥的兒時舊照, 由於相紙質素麻麻, 而保存不當, 因此有點兒褪色及相面變白), 右邊的是姪仔的近照, 大家睇下似唔似。

鬆晒

E 一個星期係我的 "考試週", 總共要一連應付三日的考試

星期二：學車中期泊位試 (請左一日假, 上午上課, 下午考試)
星期三：英語會話 (放工趕考試)
星期四：英語專業寫作 (放工趕考試)

終於尋晚 "考完晒" 啦, E 個考試週認真辛苦, 因為幾日之間完全沒有停頓的空間, 無時間去 "洗腦" (忘記舊知識), 去吸受新知識, 又怕將幾個科目的資料混淆左。

尋晚考完試後, 情況尤如 "虛脫無力", 頸、膊、背及眼累到不得了 (多晚捱夜的骨火湧上來, 又再上 E 幾日的空氣質素差, 鼻敏感發作。), 整個人不想吃、只想睡, 考完試後, 人的精神還停留在 "緊張" 的狀態中, 未完全恢復。希望抖夠之後會回復 "活潑跳脫" 的真我啦!

學車中期考試 及 慶祝

今日係我同 KK 學車考中期試的 「大日子」, 我地上午上左一課 SOLO 堂, 下午便會應考中期試, 中期試主要考以下 4 個項目


1) 基本操控汽車 (油門、腳掣、軚盤及轉彎等操控)
2) S 型泊位
3) 窄路調頭
4) 斜坡停車及開車


在 SOLO 課後, 由於練習唔理想, 因此信心大減, 好擔心考試會 "唔合格", 而且心情早在星期日開始緊張起來, 越接近考試時間, 便越緊張, 心內好像被有幾斤重的物件壓著, 呼吸也漸趨沉重, 經常 "抖大氣"。 我和 KK 緊張得連午飯也吃不下, 胡里胡塗的不知扒著什麼入口, 好像快要 "行刑" 一樣。


終於考試的時間快到了, 我地要步入 "應考報到室" 等待安排試車及考試, 在考車上等待考官來臨的時間, 簡直像 "幾年" 般的漫長, 極力強忍著心內的緊張, 跟足程序的 "盡情發揮", 也顧不得結果是好是壞, 只知道 "機會" 只有一次, 否則便需要比錢 "重考" 了。



大約 20 分鐘後, 判決終於出來了, 我和 KK 也 "安然" 的步過這一關, 真好彩! 臨走時, 我地禁不住的在校門前拍照留念。
































然後我地出左旺角食 "發記甜品" 慶祝, 包括有 "榴槤飄香" (啖啖榴槤肉, 勁 yummy) 及 "焗酥皮榴槤酥"。




























好o野!! 我地距離領取 "駕駛執照" 又近一步了, 希望他日正式考取之時, 會有更美味的大餐慶祝便好了。 原來 "食物" 對 "為食豬" 的我頗有 「推動力」的, 嘻嘻!!


** 在此特別鳴謝 "黑俠王子" 仗義相陪及幫助 (練習時的睇位提示), 分擔左我地部份壓力。

相愛很難??

最近聽過一些舊歌, 不禁發現當中的曲和詞也很有意思。 試想想人生究竟在追求著什麼?

1) 家人關係和諧, 父母健在, 子女孝順
2) 朋友滿天下, 需要幫忙時, 無人托手踭
3) 身體健康, 天天面露歡顏
4) 尋找到和你有緣又有份的人去分享喜與悲
5) 事業步步高陞, 大權在握
6) 家財萬貫, 優質的生活隨你選

以下 E 一隻歌正正道出人們在追求 4) 的同時, 當中所遇著的矛盾, 亦可反映男與女的愛情觀之不同。

相愛很難
張學友 / 梅艷芳
作曲／編曲：陳輝陽 填詞：林夕 監製：陳輝陽／蔡一智

女：最好　有生一日都愛下去　但誰人　能將戀愛當做終生興趣
男：生活　其實旨在找到個伴侶　面對現實　熱戀很快變長流細水

*女：可惜我　不智或僥倖　對火花天生敏感　
男：不過　兩隻手拉得太緊　
合：愛到過了界那對愛人　同時亦最易變成一對敵人　
女：也許相愛很難　就難在其實雙方各有各寄望　怎麼辦　
男：要單戀都難　受太大的禮會內疚卻也無力歸還　
女：也許不愛不難　但如未成佛昇仙也會怕　愛情前途黯淡　
男：愛不愛都難　　　未快樂先有責任給予對方面露歡顏　

女：得到浪漫　又要有空間　
男：得到定局　卻怕去到終站　
合：然後付出多得到少不介意豁達　又擔心 有人看不過眼

*Repeat　

*合：無論熱戀中失戀中　　都永遠記住第一戒　別要張開雙眼


你覺得相愛難嗎? 你揾到和你長廂廝守的人沒有?

學車記之 「艷遇」

尋日同 KK 去鴐駛學院上兩課：
1) SOLO (獨立鴐駛訓練 - 沒有導師在旁, 只有操控員看管你鴐駛, 如遇緊急情況, 操控員會搖控剎停你的車)
2) 第 11 課 (重覆練習中期試之測驗項目, 導師在旁指導)

由於我和 KK 的 SOLO 課時間相距一小時 (我先佢後), 因此我先到學院內輪候上課, 期間有一個男學生和我並肩而坐一排櫈, 之後我地開始對話：

男同學：(狀甚緊張的) 咦......你幾時考中期試啊?
我：下個星期二, 你呢?
男同學：我明天便考了, 很緊張呢! 我今次已經係第二課 SOLO了 (*註：在中期試之前, 同學需要上兩課 SOLO 堂)
我：唔好o甘緊張啦, 你一陣比 D 心機練習便 OK 了。

之後我地開始個別上 SOLO 課, 每人各自有自己的駕駛範圍去重覆練習 "S 型泊位" 及 "窄路調頭", 不過也可看到左右 (連我共三位學生的鴐駛情況), 終於一小時的課完結了。各同學步出車廂向操作員取回學生手冊及離開 SOLO 課地區, 返回主校舍。又跟那男同學碰面了。

男同學：我見你剛才泊車唔錯喎, 你考試一定無問題啦。
我：泊車一般, 你呢, OK 嗎?
男同學：我泊車就唔得啦, 越練越無信心, 你知啦, 貨 VAN 泊車的車尾要在黃格 "卸貨區", 因此有一定難度
我：o甘又係, 我覺得私家車易一點, 而且 E 個場地都不太標準, 如："窄路調頭"中的窄路比起 "考試區" 的闊得多了, 好難去 "就位" (評估唔到自己有無做錯)。
男同學：我也覺場地有分別, 攪到我好似唔識泊車o甘, 唉.......我諗聽日我都係唔得架啦
我：唔好o甘擔心啦, 比 d 心機便 ok, 而且你仲o甘後生
男同學：我唔細架啦, 我 23 啦, 你呢, 讀緊書定做緊野?
我：我做緊野啦
男同學：做 mug 野呢?
我：文職工作
男同學：即係文員呀?
我：係呀
男同學：o甘有無 8、9千呀?
我： (感到十分唐突, 亦無打算講真話) 嗄..........你講緊人工?
男同學：係呀
我：差唔多啦, o甘你做 mug 架?
男同學：我剛畢業 (讀酒店), 不過打算揾銀行工, 發展好 d
我：(遠處KK 已經到了學院), 我 D friend 到了, o甘你考試比心機啦, bye bye!

就係 o甘, 我的 "艷遇" 隨著 KK 和黑俠王子的出現而結束了, KK 和黑俠王子更笑我, 說以為那位男同學係我好久不見的舊人, 因此o甘好傾喎!

跳舞之意外驚喜

大家仲記得我在七月時參加左一個義工的跳 "西班牙舞" 活動嗎?


活動過後, 主辦機構向我們發售該兩日活動的精美製作 DVD, 每晚活動 DVD 為 $30 / 隻, 小妹買左決賽當晚的 DVD 作為留念。

原來還有一個特別驚喜架, 就係主辦機構為每位參與演出者送上 "紀念金(色)章" 一枚 及 "感謝狀" 一張, 果真意想不到。 一瞬間, 思緒又返回艱苦的跳舞排練之中, 用那些汗水來換回此等紀念品, 我要好好留念先。(証明我不單止見證香港回歸十週年, 更為此出過力去跳舞慶祝添)

BB 在酒樓做mug 好?

當一家大細去酒樓飲茶食飯時, 小朋友通常覺得無聊透了, 因為佢地的食量十分少, 所以好快完成用餐, 會跑落地去玩耍。

但係無牙的 BB 又可以點樣去渡過 E 一 D 無聊的時光呢? 佢地既無牙食野, 亦未懂行, 離不開餐桌, 請睇以下片段便自有分曉：

好笑嗎? 佢地竟然會利用柔軟的身驅去玩弄腳仔, 還扮吃得 "津津有味", 令身邊的成人也被引誘得爭吃一份, 勁攪笑喔!

** 由於影片係利用手機拍攝的, 因此解像度極低, 但至少見到外型和動作。

跳舞記趣

尋晚我同阿 Be 去左跳 Tango (探戈), 上一課我地有事無返學, 好彩所授的舞步亦不多, 因為我地好快便追上進度了。

由於過去我地學過 "探戈" 及 "華爾滋", 因此今次翻學特別快上手 (因為已有基礎及印象), 導師們亦認為我地跳得不錯。 導師說阿 Be 的 "架" 唔夠 "挺" ("架" 即是伸直晒整條脊骨, 像有條繩扯住個頭在天花般, 左右手踭屈曲在心口展開, 與脊骨成一個十字的模樣), 同埋我倆的默契不夠, 因此轉頭的動作唔夠勁及唔夠齊。

經過導師多番指導 和 我倆多次練習之後, 情況大有改善, 不過由於太盡力的關係, 左邊肩頸有點痛 和 右腳有點兒抽筋呢。 (我想大概熱身運動不足所致)。 我確實感到翻學係易上手好多的, 人都跳得輕鬆D。

父子 / 父女情

一向以來, 媽媽總係比人溫柔、體貼的感覺, 而爸爸就係嚴肅而有安全感的。由於女性天生比男性善於表達, 好多時母子 / 母女間的感情比父子 /父女的好一點, 因為爸爸不善表達自己, 子女無法了解佢的內心世界, 彼此間沒有交流、共鳴。

其實父親也很疼自己的子女, 只是 "不懂如何讓子女知道吧"! 以下 E 一首歌獻給為人父親或子女的你, 讓你地回想一下 "爸爸" 除了威嚴的外表外, 也曾努力的為你付出過, 不要只疼愛媽媽啊! 希望大家珍惜此刻與父母親相處的時光, 不要等到一天他們卧在病床上, 才起想這一首歌。

單車 - 陳奕迅
曲：柳重言　詞：黃偉文　編：柳重言

不要不要假設我知道 一切一切也都是為我而做
為何這麼偉大　 如此感覺不到
不說一句的愛有多好 只有一次記得實在接觸到...
騎著單車的我倆　懷緊貼背的擁抱

* 難離難捨想抱緊些　茫茫人生好像荒野　
如孩兒能伏於爸爸的肩膊　誰要下車　
難離難捨總有一些　常情如此不可堆卸　
任世間再冷酷　想起這單車 還有幸福可惜
（任世間怨我壞　可知我只得你 承受我的狂或野）*

經已給我怎會看不到 雖說演你角色實在有難度
從來虛位以待　何不給個擁抱
想我怎去相信這一套 多疼惜我卻不便讓我知道
懷念單車給你我　唯一有過的擁抱

難離難捨想抱緊些　茫茫人生好像荒野
如孩兒能伏於爸爸的肩膊 哪怕遙遙長路多斜
你愛我愛多些　讓我他朝走得堅壯些
你介意來愛護　又靠誰施捨

Repeat *

大美篤尋食記

阿 Be 早前和客人到大美篤一間 "休閒式" 的餐廳尋食, 佢覺得味道不錯, 而且上次還未試到同事極力推介的 "珍寶生蠔" (當日唔靚, 無入貨), 因此週日特意和我、老頑童及媽媽一齊入大美篤尋食。

首先如果閣下係無耐性的話, 千萬別走進這家店, 因為只得店主兩公婆 + 一個外籍員工 + 店主的一對年幼子女 (8-10 幾歲), 共五人去照顧廚房及樓面共六桌人 (顧客差不多三十人), 所以招呼確實不週, 好多時需要自助。由於等得太久, 整餐飯由 6:30吃到晚上 9:30, 我地 order 左：

1) 珍寶生蠔 及 蒜茸焗珍寶生蠔
2) 鹽燒鯖魚
3) 醬燒牛骨扒
4) 蒜茸炒西蘭花 (由於等得太久, 兩個幾鐘佢地仲未整, 因此取消此菜)
5) 芭蕉炒飯








































由於等得太久、太肚餓的關係, 因此忘了幫炒飯影相, 牛骨扒也是食到尾才醒起要影相, 因此食物樣貌不佳, 請諒。

總括而言：場地無冷氣、有少少蚊、人手不足、週日根本不能應付o甘多桌客人、食物質素一般、價錢頗貴。 如果只是想感受一下到郊區或 "扮到國外旅遊" 的氣氛, 就最好趁星期一至五前去試菜, 才不至於浪費了。

農曆七月撞鬼記

星期六晚上和 KK 學車後, 乘火車歸家, 在車廂內, 我地見到一家三口的 "鬼" (外籍人士) 坐在車廂的椅子上, 仔仔 (約2-3歲) 坐近玻璃屏風, 爸爸坐中間, 媽媽坐在外。

一路上, 爸爸情深款款的輕擁媽媽纖腰談心, 感覺十分甜蜜, 仔仔坐在一旁十分無癮, 故此拿著玩具車逗爸爸玩, 將玩具車繞著爸爸的頭髮游走, 又將它插進爸爸的耳朵玩耍。爸爸不但沒有責罵, 還任仔仔隨意地玩, 一邊繼續和太太談心。 忽然太太背部感到十分痕癢 (身穿露背裝), 她一邊抓背, 一邊叫老公幫忙查看究竟, 爸爸從她背部捉下一條已掉落的頭髮, 交比仔仔玩, 仔仔好開心的把玩頭髮。

仔仔玩完媽媽的脫髮後, 無聊的感覺又再起, 佢一邊搖著爸爸的手臂, 一邊鬼鬼馬馬的盤算著, 冷不防佢突然隨手一搣, 搣下爸爸一大撮汗毛 (前半臂), 正在談心的爸爸突叫痛, 隨手捽兩下又繼續與媽媽談話, 仔仔好開心的研究爸爸的汗毛 和 媽媽的頭髮作比較 (為何汗毛會比媽媽的頭髮短?)

忽然仔仔雙手用力地拓起爸爸的手踭, 然後用小手伸向爸爸腋下, 爸爸一發現仔仔的行動, 立即中止對話, 用力將手臂夾緊身驅, 和仔仔互相鬥智鬥力, 場面十分好笑及尷尬, 終於佢地一家人到站下車了, 仔仔先跳下椅子及踎下, 突然伸出手向爸爸那 "毛茸茸" 的飛毛腿 (身穿短褲) 作出攻擊, 爸爸被突擊後出言責怪及一齊下車。

整個故事也很好笑, 當中如換上是 "唐人" 家庭, 相信兒子老早就被責備 (用玩具車繞著爸爸的頭髮游走, 又將它插進爸爸的耳朵)。而 "鬼家族" 的兒子又確實叻仔, 懂得在身體唔同的部位拔毛玩, 好有 creation (創意)

生娘不及養娘大

早幾日睇到一則新聞, 令我感到震驚。就係 26 歲媽媽涉嫌疏忽照顧及虐待三名兒子, 佢地被發現的時候, 已經身心疲累, 營養不良, 情況在下列圖示展示 (轉刊 from 太陽日報)
真慨嘆天下間有這樣的父母, 佢地憑著年輕, 不顧後果的誕下小生命, 卻沒有負起責任去照顧佢地。可憐天下間經過深思熟慮才結婚, 並打算生育的夫婦, 卻因為各種問題而未能擁有自己的 BB。 正形成 "擁有的不懂珍惜, 沒有的卻想得到" 的局面。

難怪自古以來也流傳著 "生娘不及養娘大" 這一句說話。可幸的我的生娘及養娘也是同一個 「好媽媽」, 也不忘要讚一下我的好爸爸喔! (至少佢無像新聞主角中的男友般虐待我), 原來父母對子女的愛也不是必然的, 我真幸福。希望故事中的孩子早日趕上正常的生長進度, 並且經輔導後治療佢地對人的 "不信任" 及 "被害" 感。

亨仔新肉照 & 我好開心 - lucky

亨仔著上新泳衣啦, 係咪好 cute 呢? 不過似乎頂泳帽 "逼" 得佢太緊, 壓住對眼, 令佢唔係幾滿意喎! Anyway 「你好靚仔呀!」

另外前日晚上睇電視, 見到 Eason 陳奕迅的演唱會賣廣告, 立即上網 search (搜查) 有關資料 (如：場數、地點、門票何時開售等等), 原來9月6日開始發售, 我在當日凌晨上網時, 只長期遇上 "系統繁忙", 要遲d再試過。

翌日唔信邪再試過, 終於比我尋日食晏時在網上買到飛啦, 仲要係好難遇上的 "孖位" 添 (之前經歷多次失敗, 因為係由 "系統隨機抽位, 不由你去揀位" 的), 因此實屬萬幸。 事後打算幫同事 KL 網上購票 (佢想買最貴果隻門票), 不過卻未能成功, 往往只得 1張飛, 又或有 2 張飛, 不過是要分開好遠坐的 (無意思)。

我覺得自己好好彩 & 好開心呀! BU 的學科功課已經完成 (等考試), 老師對我的評價唔錯, 此部份下次再同大家分享, 但下星期三卻臨時有一個小測驗, Oh no...........想抖抖都唔得, 這週末又要溫習一下了。

朋友

同大家分享下一以下 E 一首歌, 係講 "朋友" 架, 我好鐘意 D 歌詞, 因為有意思, 而且 Eason 都唱得好好。回顧過去, 的確一些舊人 (舊同學、舊朋友、舊同事) 不知不覺的變得疏離, 也許的確係人大了, 各自被推著走跟著生活流, 然後各有隊友。


最佳損友 - 陳奕迅 曲： Eric Kwok 詞：黃偉文

朋友 我當你一秒朋友 朋友 我當你一世朋友
奇怪 過去再不堪回首 懷緬 時時其實還有
朋友 你試過將我營救 朋友 你試過把我批鬥
無法 再與你交心聯手 畢竟 難得有個最佳損友
從前共你 促膝把酒傾通宵都不夠 我有痛快過 你有沒有
很多東西 今生只可給你保守至到永久 別人如何明白透
實實在在 踏入過我宇宙 即使相處到 有過裂口
命運決定了 以後再沒法聚頭 但說過去 卻那樣厚

問我有沒有 確實也沒有 一直躲避的藉口 非甚麼大仇
為何舊知己 在最後變不到老友 不知你是我敵友 已沒法望透
被推著走跟著生活流 來年陌生的 是昨日最親的某某
生死之交 當天不知罕有 到你變節了 至覺未夠
多想一天彼此都不追究 相邀再次喝酒 待葡萄成熟透
但是命運入面每個邂逅 一起走到了某個路口
是敵與是友 各自也沒有自由 位置變了 各有隊友

問我有沒有 確實也沒有 一直躲避的藉口 非甚麼大仇
為何舊知己 在最後變不到老友 不知你是我敵友 已沒法望透 被推著走跟著生活流
來年陌生的 是昨日最親的某某 早知解散後 各自有際遇作導遊
奇就奇在接受了 各自有路走 卻沒人像你 讓我眼淚背著流 嚴重似情侶講分手
有沒有 確實也沒有 一直躲避的藉口 非甚麼大仇

為何舊知己 在最後變不到老友 不知你又有沒有 掛念這舊友
或者自己早 就想碰頭 來年陌生的 是昨日最親的某某
總好於那日 我沒有沒有遇過某某

"大鼻阿叔" 玩殘記

昨日早上, 被人激嬲到震, 影響了一早的心情, 事緣昨日早上收到 "專業寫作技巧" 一科內的男組員 J (以下簡稱 "大鼻阿叔") 電郵, 唔睇由自可, 一睇 "幾把火", 真的 「可怒也」, 等我同大家講一下佢的罪狀先：

1) 寫作功課
在課堂內討論功課如何做時 (寫作時), 佢毫不參與, 又或是只講佢自己專項的題外話, 與功課無關。(原本佢應 "拍住"男組員 D一齊完成一份長功課, 結果由男組員 D 個人 "哽" 左)

2) 演講影片設計
在 Powerpoint (演講影片) 設計時, 佢也不參與討論, 只說很忙, 沒空閒做。(結果我做埋佢果份)

3) 演講影片修改
當我地大家對 Powerpoint有更改時, 會用最後的 Version (版本) 去作修改, 然後更改檔案名稱, 如：Powerpoint 修改後變成 Powerpoint-1, 如此類推。

正當大家推出左約 5 個版本後 (幾經修改), 大鼻阿叔一直沒出現、沒發言。誰知昨日早上收佢的電郵, 的確嚇左我一驚：

a) 由原本 8 頁的 powerpoint 變成 14 頁 (老師說過最多 8-10 頁就好了)

b) 佢加插的影片有至少三頁係重覆別人的影片, 只是修改部份字眼 (結果要致電佢, 去確認刪減重覆之影片)

c) 佢負責的 "開頭" (opening) 及 "結尾" (ending) 均用太多篇幅, 其實重點應該在內文 (3 項寫作題目)。 而佢影片中的每一頁只放 2-3 個重點, 太多 "空白位"。 (由於唔好意思 "再" 刪減佢的構思, 因此只替佢改動排版, 以縮短篇幅)

d) 唔知佢係用左之前 "邊一個版本" 的 powerpoint 去作佢個人的修改, 因為 D 同學的影片與最新版本不同。(致電佢查問時, 佢竟道："我只負責自己果 part (部份), 我係唔會改你地 d 野架!" 真係比佢激死, 又要重新的核對一次了)

明晚便要作 presentation (演講) 了, 今日要努力的背誦一版 A4 紙的講稿先。 過埋聽晚, 便不用再煩功課了, 真好!!! "大鼻大鼻好難頂, Big Mac 投訴咋晒形"

當 "老頑童" 遇上 "史諾比"

話說星期日同 KK, 媽咪 & 老頑童 去左沙田飲茶, 然後我便和 KK 去學車。

當行經沙田的 "史諾比世界" 時, 童心未泯的老頑童, 一展佢攪笑的本色, 一於同隻公仔擺甫士 (Pose) "腳撐撐" 的留倩影, 比你地欣賞一下啦。

睇來 Henry 仔也要急起直追 (擺甫士), 否則下一次合照時, 風頭會被老頑童蓋過啦!

偏心記

今日中午外出食晏後, 見有時間剩, 走左去行公司附近的 "特賣場", 買左以下物品比亨 BB：

1) 連身泳衣一件 (可以將佢肉騰騰的健碩身材表露無遺)

2) 浴袍一件 (只影背面的圖案, 因為正面淨色唔特別) (可以比佢 "嬲" 住個身去會所游水)

希望快D 見到佢的新肉照啦! 我都知我偏心亨 BB, 我承認................我係偏心 :P

改篇詩句

E 幾日跟個朋友學左幾句改篇詩句：

1) 留得青山在, 那怕無牙簽
2) 此處不頭痕, 自有頭痕處

我覺得幾攪笑喎! 朋友說係跟麥o麥果套卡通學架, 果真 "童心未泯"。 不過如果 d 細路仔睇左 e 套卡通, 學識左而返學用出來咪弊?

計我話, 用於我的姪仔 Henry , 應該係：「留得 "阿 Li" 在, 那怕無人搣」。

點解????? 因為佢人仔細細, 但成日好鬼馬的扮柔情望住你, 然後暗地裡 "搣" 你一個措手不及, 被佢搣得最多的, 自然係湊佢的工人 - 阿 Li 姐姐啦。

你身邊又有無改篇詩句呀? 一齊分享啦。

更正啟示

本人有一事要更正, 早前我 "收錯風, 報錯料", 尋晚我偶爾逛書局期間, 發現其實果一系列的勵志式單元故事書, 總共係一書八冊架。

E 一套書係 萬里機構出版的 (每本 $25), 包括：

想說我愛你
朋友就是朋友
我要成功 (我自己買的)
在你心裡掛星星
矛盾中的幽默
停不了的感動
最難遺忘的愛
快樂方程式

除左一本書係自己買之外, 其他的書鳴謝 KL 同事借閱, 令我獲益良多啊!

亨 BB 新肉照登場

上週日去左探望好耐無見的嫲嫲, 佢的身體一般, 今年 "鄧" 親 (跌左落地) 幾次之後, 人也衰老得快, 雙腳快將 "行不了" (無力), 而且不能控制去廁所 (失禁), 人的記性差左許多, 想必有點兒 "老人痴呆" 的跡象。

大家望見佢, 也不禁黯然、無奈。 不過 "生、老、病、死" 乃係凡人必經的階段, 唯有珍惜而家同佢相處見面的每一刻, 盡一點綿力讓佢好過。

好彩當日亨 BB 也在場, 因此大家可以借和 BB 玩樂, 來減輕憂愁傷感的感覺, 你地睇下當日的亨BB 幾得意 (左), 另外佢在家中床上的趴趴照也很可愛啊! (右)

人生就係這樣, 有人 "上車", 就會有人 "落車"。 BB 一天一天的長大至成熟, 老人一天一天的衰老至離開, E 個循環, 他朝你和我也必需要經過, 因此 「不要難過」!

我的 "好運"

今日下午幫公司外出買郵票 及 去惠康 shopping (購物, 添置廚房用品, 如：茶包、抹手紙等)。

當我在惠康買o野買到一半時 (已經取好晒購物表內的一半物件), 突然間 "卜" 一聲, 成間惠康漆黑一遍 (只得部份 "緊急照明系統" 開著), 我以為係跳 fuse, 諗住好快會無事, 於是利用手機燈光繼續購物, 打算一陣盡快付款走人。

點知當我繼續購物之際, 聽到惠康職員阻擋外面的客人入內, 同時亦向我地講：「唔好意思, 各位客人, 由於停電關係, 我地的收銀機最快也要半小時後才復原, 請你地半小時後才回來繼續購物啦。」

我唯有黯然的離開, 聽日再去過, 不過因為此惠康位於尖沙咀大型商場內, 理應唔會o甘失策, 因此我 "忍唔住" 幫佢拍照留念先。(因為係 "偷拍" 的關係, 因此 "蒙" 左少許), 我都算 "好好運" 了。

智者啟示錄 (六)

一億一千萬的遺產

一對中年的恩愛夫妻陰陽相隔了, 妻子未能接受事實, 終日以淚洗面, 關起自己, 沉醉於悲傷之中, 睹物思人。 她的奶奶看不過眼, 要佢振作起來, 又說政府的財務局要計算兒子的遺產, 迫媳婦外出, 到銀行的保險箱一起點算遺物。打開盒子, 內有一封 "給妻子的信", 原來丈夫早料到妻子會沉淪悲傷之中, 因此寫下一個笑話逗佢笑, 笑話是這樣的：

一個寡婦向朋友申訴：我的老公死去後, 什麼也沒留下, 只剩下兩億三千萬給我。
朋友們說：嘩...那不是很好嗎? 至少你不用為生活而憂心吧!
寡婦：你錯了, 那兩億是：回憶及失憶, 而三千萬是：千萬要照顧小孩、千萬要孝順翁姑 及 千萬別改嫁。你說這些遺產好嗎?

在笑話的後面, 那老公繼續向妻子說：「我比較窮, 只能留下一億一千萬給你。 一億是我倆一齊美好的回憶, 而一千萬是：千萬要忘記傷痛, 好好生活下去。你會接受嗎?」
妻子默然的緊握著信, 流著淚笑了, 沒想到老公死後也會為佢著想, 逗佢笑。

讀後感：
也許愛不在乎時間的長短, 而是在於彼此相愛的深淺。就以當中的丈夫而言, 縱然他不能長久的擁有妻子, 但佢也設法在死後去安慰佢, 繼續以別的方式去守護佢、愛著佢。 只要我地學會珍惜刻下和戀人相處的時光, 又何需理會對方將於何時離開自己呢?

智者啟示錄 (五)

今次睇的勵志書係關於愛情方面, 睇完之後教我 "自形慚愧", 因為活左o甘多年, 似乎我還未懂得 "愛" 是什麼一回事, 我想我也要好好進修一下這方面的修為了。

以下 E 個故事令我尋晚放工, 幾乎在車廂中哭了出來 (流淚), 真的很感動, 亦很無奈。 希望你地讀後亦會有所得著


五年來的早餐

在一個忙碌的早上, 大約 8:30, 一個年約 80 歲的伯伯趕到醫院, 想找醫生幫佢的傷口拆線, 但醫生們正是忙著, 及後一個護士先幫佢拆紗布及洗傷口。

她好奇的問伯伯：「點解你o甘趕時間?」
伯伯：「係呀! 我要在 9:00 左右趕去老人療養院, 陪我太太食早餐。」
護士道：「老太太入住療養院, 沒什麼事吧?」
伯伯：「啊! 沒什麼, 只是柏金遜 (老人痴呆症) 罷, 已經好一段時間了。」
護士望一望錶道：「哎呀! 也許你會遲到, 怕唔怕佢擔心, 要不要先打個電話呢?」
伯伯：「不用了, E 五年來她都唔認得我。 即使我去唔去, 其實她都不知道。」
護士：「嗄?? 已經五年都不認得了嗎? 那你每朝還要去?」
伯伯：「她不認得我, 我認得她, 就已足夠了。」

讀後感：
我想這便是真正的愛情, 它不只建築在身體上、不只講求浪漫的氣氛, 而是接受、包容, 接受過去、現在及未來的情人。它不用計算是否 "對等 (=)", 即使對方所付出的比自己少, 而自己覺得愉快、值得, 便已經足夠。 "愛" 係希望被你愛的人得到幸福、被保護 / 被照顧的感覺, 而唔係自己付出多少及回報是否相對的計算結果。

學車記 (一)

尋晚到駕駛學院上左三節課, 包括一節理論課 (1 小時) 及 兩節實習課 (每節 45 分鐘)。

理論課的得著不十分多, 因為講解汽車的結構 (技術性) 及 講解手動波 (棍波) 的原理較多, 相反卻令到學自動波的同學感到混亂 (唔知邊一D 屬於自己要學的, 邊一D 係棍波同學要學的)。

至於兩節的實習課堂也是同一個導師跟進, 我的導師個子矮小的, 四眼的, 對於佢其他的印象並不深刻, 因為我要專注去操控軚盤及看緊前路駕駛, 昨晚我已學左以下事項：

1) 調較物件以切合駕駛者 (因為每課均使用唔同的車, 因此上車後要調較坐位、椅背、車前倒後鏡 及 左右兩側的倒後鏡) (我兩節課也用同一架車, 而阿 Sir 講解時已經調較好晒各樣物件, 因此我坐上司機位時, 也不用再次調較了。)

2) 撻匙 及 預備開車之程序 (撻匙、踩 Break 、轉 D 波, 鬆手掣, 放開 Break時, 車便會郁) (較早前的模擬駕駛已經試過, 不過係四個月之前的事, 已經遺忘了。 再者, 真車的手掣係 "實" 好多, 左手要費很大力才控制得到)

3) Break 及 油門之控制, (轉彎) 推拉軚之控制 (右腳操控Break 及 油門, 而雙手要靈活的推拉軚以控制車之轉彎) (我的右腳控制都 ok, 不過推拉軚略嫌 "生硬" 及 "慢", 不夠靈活。)

4) 駕駛在行駛道的中間 (在本港, 最窄的行車道為 3.3 米, 而一般私家車車闊 2.5 米, 因此應該有足夠的位置給汽車走在行車道中間, 但初學者卻偏偏經常在行車道上 "左搖右擺"。) (我也經常將車操控得在行車道上 "走埋一邊", 甚至試過因此而令車呔走在坑渠蓋上, 發出巨響, 好 "瘀皮" 呢! 阿 Sir 話：係因為我的雙眼望得太近 或 凝視某一點過久所致, 需要多練習自己的視線。)

5) 左右轉彎 及 回軚 (要在轉彎前收油 (鬆開油門 及 踩 Break)、決定何時扭軚轉彎, 及何時回軚修正架車) (我掌握到 "收油" 及 "何時扭軚轉彎", 但掌握唔到扭幾多 (深) 軚去轉彎 及 何時回軚修正架車, 我又試過因回軚太慢 及 踩 Break 不及而令車剷上石級, 勁醜!!!! 好彩阿 Sir 及時停得住車。 當我向阿 Sir 求教時, 他道：基本上駕車係無任何 "方程式" 去計算的, 因為每條道路的情況均唔同, 亦要配合你當時的速度去決定。 因此最好 "憑感覺" 及 "你雙眼" 去做決定, 才最正確, 你試多幾次, 練習多 D, 就會熟能生巧, 感覺得到當中的要訣了。) E 位師主, 你好 "玄" 啊, 阿彌陀佛!!!

對於第一課駕駛實習的我, 在短短 1.5 個鐘內已經學左以上o甘多o野, 其實已經算唔錯啦。 只不過對以上技術運用得唔算純熟, 真的要多多練習才可, 阿 Sir 有叫我多 D 去 機舖 "打賽車 game", 以熟習 "扭軚" 的靈活性 及 "練習望遠 D 的視線", 「感覺多D」喎!!

智者啟示錄 (四)

快樂的鑰匙

一名年青人和朋友在報攤上買報紙, 朋友禮貌的向報販說聲謝謝, 報販卻冷口冷面, 沒發一言。
年青人說：「嘩....這傢伙的態度真差」
朋友說：「啊.... 他每天晚上也是這樣的」
年青人：「那為什麼你還對他那麼客氣?」
朋友：「為什麼要由他去決定我的行為? 每個人心中都有一把 "快樂的鑰匙", 但我地經常不知不覺的把它交給別人掌管」


讀後感：
一個成熟的人能握住自己快樂的鑰匙, 他不期待別人使他快樂, 卻希望將自己的快樂及幸福帶給身邊的人。 我地身處的地方, 不論是環境、人、事、物都容易影響自己的情緒, 可是千萬別忘了, 決定快樂的鑰匙, 只在你自己的手中。

智者啟示錄 (三)

多謝同事 KL 借我其他的勵志單元故事書 (原來一套六冊), 那我可慳錢不用買啊!

預支明天的煩惱

小和尚每天早上也在園庭打掃落葉, 週而復始, 掃極也掃不完, 很是氣餒。
一天, 他的師弟向佢道：「只要你今日大力的搖樹, 把葉子全部搖下來, 掃好它, 明天便可以休息。」
小和尚依法去做, 但明早起床後發現方法是 "行不通" 的, 葉子依舊遍地皆是, 小和尚十分沮喪。
老師父見後：「傻孩子, 無論今天你怎樣努力, 明日的落葉始終會掉下來的。」


讀後感：
世上有很多事是無法提前的, 我地應認真的活在當下, 才是正確的人生態度。因此, 我地不要庸人自擾, 不用預支明天的煩惱, 煩惱該到的時候它自然會到, 不然你也無法可以預早去解決它, 只是令你自己提早加添煩惱而已。

冥冥之中, 上天自有主宰, 不由得凡人去阻撓 (走 "精" 面去解決), 還是乖乖的接受安排, 好好的面對當下的好與壞, 隨遇而安吧!

難得平庸

最近社會上的一個熱門話題："資優兒童", 不時在街上聽見為人父母者慨嘆：「唉......... 為什麼別人的子女o甘叻? 而我的子女卻唔肯讀書呢?」 父母又有無諗過, 資優兒童的父母花費左多少心血和金錢去栽培佢地的子女呢? 不要光去羨慕別人, 先細心剖析一下資優兒童的成長路程先, 唔係 "人人都受得起" 架。

E 一群資優兒童入讀大學的年紀, 由 9 歲至 16 歲 不等, 比常人早 10 年入讀大學, 但究竟對佢地來講 "是福還是禍" 呢?

各大院校為左增加本身的暴光率同埋人氣, 紛紛向此等兒童招手, 部份更以獎學金、宿舍及度身訂做的課程作招徠, 但本人卻為佢地擔心, 因為和別的同學年紀上的差異, 往往會有以下分岐：

1) 心理發展：由於和別的同學年紀唔同 (同學 = 學習上的伴侶), 佢地對 "待人接物" 的發展易有障礙。
2) 遭排斥：因為係 "資優兒童" 的關係, 難免 "樹大招風", 令人妒忌, 因而排斥佢。
3) 遭高度關注：佢地雖然係資優兒童 (在學業上某一範疇較厲害), 但也想過正常人的生活, 卻受到傳媒過份的吹捧, 令佢地長期活在被監視之中, 丁點私隱也沒有, 就像藝人讀大學一樣, 不過藝人係受薪的, 食得咸魚抵得渴, 而 E 一群兒童卻不知何解私隱要被侵犯。
4) 由於太早完成大學課程, 而心智上卻可能未追得上, 因此到社會工作時, 萬一碰上挫折, 佢地未必學懂如何處理, 容易因此而意志消沉, 一沉不起。
5) 社會上各人對佢地的期望太高, 容易令佢地產生過大的壓力, 萬一處理情緒不好的話, 可能有另一些危機產生。

可幸我卻是一個資質平庸的人, 不必要經歷佢地的成長路, 可以自由自在的做自己想做的, 不受監視。

原來....................... 平凡也是福, 只要你珍惜自己所擁有的, 便是美好! 上天公平得很, 各人自有自己的天資 (有自己的強、弱項), 而我未必係讀書叻, 卻叻在懂得 "自我安慰 和 氹自己開心"。

高手過招 - 教我面紅啊!!

尋晚的跳舞課程, 由於有某幾個動作, 我和阿 Be 都做得唔好, 因此導師分開我地, 個別的教授和練習, 趁空檔期間, 難得有機會與高手 "有心人" 過招, 真係榮幸啊!

"有心人" 係女性跳男步的, 雖然我地身形上有少許差異 (身高), 難得的卻是出奇的 "夾"。

佢的拍子感極強, 而我則比較弱 (易亂), 所以跳舞的全程均由 "他" 帶領我 (亦乎合標準舞的宗旨：由男性主導, 女性配合), 而且因為彼此係女性的關係, 我地之間並無任何芥蒂, 我地的身體貼得十分近, 跳舞期間, 我完全感到佢肚皮的起伏 (我倆的盤骨好像有磁石般牽引住), 相反我和阿 Be 之間卻有一大條罅隙, 因此跳舞時腳步要跨大一點才可追上對方。

今次跟高手過招真係令我獲益良多, 令我知道自己應該如何配合 "男步", 我會好好練習的。 多謝 "有心人" 令我嘗試到 「前所未有」 的跳舞感受, 在那共舞的一瞬間, 完全 feel (感受) 到自己 lady (女性) 的一面, 想起來, 不禁讓我面紅啊!

智者啟示錄 (二)

建做城市

A、B、C 三人一齊在砌磚牆, 旁人問佢地, 你在做什麼?
A 答：「見不到嗎? 我正在砌磚牆」
B 答：「我正在建築一幢大廈」
B 答：「我正在興建一個城市」

轉眼間, 幾年過去了, A 仍是一個砌磚牆的泥水工人, B 是一個建築師, 而 C 卻是地產商人, 更是 A 和 B 的老闆。


我的讀後感：
「只要有夢想, 凡事可成真」E 句說話係好啱的, 即使 E 一刻你無能力向理想進發, 如果你連理想都沒有, 生活會變得枯燥而乏味, 很是可悲。

另一方面, 千萬別少看自己的能力, 即使你作的事係何等的卑微, 但仍有它的作用, 因此, 不妨心存感激和欣賞自己的能力啊!

智者啟示錄

由於最近心情好 down, 故此買左一本勵志式的單元故事書睇, 以作心靈的慰藉, 令自己放開一點, 以下的故事同大家分享：


不過一碗飯

A 和 B 二人在工作上十分唔如意, 佢地去揾大師求教, 大師道：「不過一碗飯」

A 聞言立即遞信辭職, 回鄉耕種, 又作技術改良, 終於在農務商品上有一番作為。
B 卻回到公司內, 對各種唔如意的事吞聲忍聲, 埋頭苦幹, 最終被上司器重, 升為經理。

二人在幾年後重遇, 談起近況, 卻唔明點解對方領悟出大師的道理和彼此際遇有所不同? 他們再去揾大師細問, 大師道：「不過一念間」


(讀後) 我的得著：
只要將眼光放遠, 避免和 "唔如意" 正面的硬碰硬, 令自己別過面去做一些你可以做得到 (控制到) 而又令自己快樂的事情 (如：跳舞、學習等), "唔如意" 的事終歸會事過境遷, 總會過去的。

失望而回 - 西田 BB 餐廳

趁假期, 同 KK 及媽媽飲茶後, 出左沙田逛一圈, 雖然只是星期六的中午, 但已經人頭湧湧了。

特意去左西田的 BB 餐廳, 到此一遊, 感覺十分失望, 因為實在太..................細了, 難道餐廳認為出生率下降便唔需要 o甘大的地方? 該地方讓人感到焗促, 只得6個 BB 坐位及 2間母乳餵哺室。 比 D 相片大家睇一下啦!

公平?

分享一下 BU (浸大) 的學習生涯比大家啦! 首先講一下我現學習 2 個學科：
1) 高級商業英語 (講的) 逢星期三晚
2) 專業寫作技巧 (寫的) 逢星期四晚

以上兩科都需要做功課, 而且仲係 group presentation (小組演講), 我有以下經歷

高級商業英語：
1) 三人為一組, 今堂比功課, 下一堂便要演講,
2) 由於時間倉猝, 我地於課堂上討論好題目、大綱、時間分配等, 及後我地每人負責一部份的 powerpoint (演講影片)、講詞 及 道具。
3) 小組內 T 同學比較乖 (雖然個性較被動), 不過依時完成工作, 至於同學 D 則推說我地講得唔清楚, 令佢唔明白要做什麼等等 (佢話：「佢以為我會完成埋佢的那一個部份喎」 其實我已經將討論過後的會議紀錄給予各組員了),
4) 於是佢臨演講前的那一個晚上才做好本份, 而且還把我地的powerpoint (演講影片) 次序調亂, 仲多番申訴自己的工作係 "如何忙碌"。

專業寫作技巧：
1) 四人一組, 要舉一個實況, 依照此實況做三項寫作。
2) 組員 (除左我) 為兩男一女, 男組員 D 性格內向, 沉默寡言, 男組員 J 則自私自大、而且臉皮厚, 女組員 T 比較積極進取。
3) 當大家商議好實況及大綱後, 便開始分配工作, 我負責大綱及項目三之寫作, 女同學 T 負責項目一之寫作, 兩位男同學負責項目二 (因為項目二內容較深, 而且較長篇)。
4) 怎料同學 J 後來說：「我唔明點可以幫D同學手, 不如我負責揾資料吧。」 要知道這是一個寫作的學科, 總不能只負責揾資料卻唔落筆做, 那對其他同學唔公平喔!
5) 經過各組員輪流向 J 同學施壓, 佢由最初的 "抗拒" 變成 "應承", 再由 "應承" 變成 "唔明" (然後坐著唔理), 最後同學 D 唯有 "啞子吃黃蓮的" 做埋佢果份, 真戥同學 D 可憐！

原來在 HKU (港大) 的學習內, 常常都係 "個別" 交功課係可以避免 "有一D唔負責任兼攞著數" 的同學架! 希望黎緊的學科唔好有o甘多 group (小組) 形式的功課, 又或者拍著一 d 好同學啦! 就係因為撞著兩個學科的小組功課都有麻煩, 因此最近心情麻麻, 而且真的被弄得身心疲累。

週期

據加拿大心理學家莫斯考維茨的研究發現, 打工仔在每星期的工作, 有以下的週期性表現：

星期一：由於身體的生理時鐘未完全回覆 (經過假期的洗禮), 打工仔魂不符體, 所以 E 一日病假特別多, 故又名 "星期一症候群"。
星期二：身體開始恢復過來, 精神維持在興奮的狀態 (狀態大勇), 令工作效率提升
星期三：E 一日係一週的轉捩點, 因為已經返左兩日工, 精神有 D 累, 狀態一般, 這天安排會議係最好的, 可以安然 (無風無浪的) 過度 8 小時。
星期四：將近假期, 人的情神比較放鬆, 情緒也較緩和, 係處理矛盾和商討談判的最佳時機, 打工仔爭取加升職加薪, 不妨就選這一天吧!
星期五：雖是最接近假期, 但身體卻不由自主的出現 "作病" 狀態, 因為抑壓左一週的壓力將要緩和, 身體卻較先發出休息的訊號。

了解完打工仔一週的週期 (心路歷程), 係咪覺得好準呢?

愛恨交纏

仲記得細路仔扭計失敗的時候, 往往被氣得淚流滿面, 還要狠狠的加上一句：「媽咪好衰架, 我憎死你呀!」轉個頭, 卻又忘記得一乾二淨, 倒在媽媽的懷中撒嬌。

又或者同哥哥姐姐玩耍時, 遇上唔公平, 又或者被欺負, 便會搭上一句：「你o甘奸茅, 我唔"侵" 你玩呀!」(然後鼓氣泡腮, 坐在一旁 "嬲") 不過一瞬間, 又大夥人一齊玩起來。

小朋友既純真、 亦率直, 一切喜惡愛恨, 全都顯露在面上, 不留半點在心中。 有時候, 也許你會怪佢太真我, 太不懂 "大體", 但這正是小朋友可以獨享的 "專有權利" 和佢地的 "可愛之處"。

今日如果我地將喜惡放在面上, 會被評為唔成熟, 唔顧全大局。 如果我地講過而做唔到的 (如：我憎死你地), 又會被認為 "言而無信"。 E 個就係責任, 每個人都要為自己的成長而揹負責任, 分別在於責任的多少各有不同吧!

懷念往日年少無知而又率直自我的 "我"!

彩虹的啟示

上一次同大家分享左我遇見的 "幸福彩虹", 其實當中我得到以下啟發:

當日雖然整個天空都烏雲滿佈, 濕度奇高, 而且似將要下傾盆大雨般, 而天空的另一角卻透著白雲及彩虹。正正好比我地的人生, 唔如意的事情就似烏雲滿佈的天空, 快要下傾盆大雨就好像我地的煩亂心情 (遇著唔如意事時)。 只要你學懂 "退一步, 轉個臉將眼光轉移, 不難發覺其實另有好事 (彩虹) 在等著你呢!"

別要 "立心" 尋找容易遇見的 "唔如意", 放眼去 "發現" 身邊的 "好事", 讓難得的彩虹每天跟你打招呼喔!