尋食記

尋晚放工約左 KK 同 老頑童去揾食, 試左一間由 I 同事介紹的 “三小姐海鮮小菜館” (位於大埔市政大樓 2/F 熟食中心)。

我o地三個人 order 左
1) 籠仔糯米蒸羔蟹 (招牌菜之一, 幾有特色, 附圖)
2) 雞油豆苗
3) 京都骨
4) 兩碗白飯
5) 一個外賣盒 (食唔晒, 打包, 唔好o徒)
埋單總共 $151, 算係 OK 啦!

值得一讚的係D 餸 “碟頭” 夠大, 味道也不錯, 略嫌 「京都骨」 D 肉 刃左D, 「籠仔糯米蒸羔蟹」好足料, 有三隻小羔蟹, (此餸幾特別, 外面不常見), 飯內亦有蝦米等其他材料, 略嫌鹽左少少, 相比之下, 「雞油豆苗」最好食, 唔太老。

眼見都幾多人 order 椒鹽鮮魷、海鮮什菜煲、金牌雞等餸, 雖然怕熱氣, 但下次我都會去試下 「椒鹽鮮魷」先。

嗜賭的女人

哩幾日在街上碰見到幾個 "嗜賭的女人" (並沒有 "性別歧視" 成分)

例子一：上週六, 在街上見到 "一家三口" 在回家途中, 媽媽向小學的兒子說：「你要揍夠一索、九索、一萬、九萬......... 才可以食到十三么架, 此乃麻雀中 "至勁"的, 對吧? 爹地」, 男人點頭和議：「係呀! 重要無人可以截到你糊添」。

我心想, 該小朋友只不過是小學生, 教他打麻雀是否過早? 雖然我都認為如果真係要學打麻雀, 由父母教佢比較好, 以免被人呃, 亦可在家訓練佢的 "牌品", 將來出來社會工作, 也許有需要交際應酬, 但不宜作賭博之用。


例子二：今早在尖東火車站, 碰上四名女士一齊坐接駁巴士到中港城, 果幾位女士一上車, 已不斷大聲講o野, 動作亦十分 "丫榨" (一個人坐兩個位), 而且非常性急, 不斷重覆：「o甘耐都未開車架, 早知行過去無o甘嬲............ 唉! o甘塞車, 早知坐地鐵過中環啦!.............我上次坐果隻大船都好正, 又有得食, 又有得瞓, 好過去賭場呀!」, 期間, 一名女士致電佢丈夫：「我今日約左朋友去旺角行街、打牌, 唔知玩到幾多點, 你攪掂阿仔今晚餐飯啦, 我電話無電啦, 唔講 lu。」收綫後, 另一名女人話：「我尋晚一早同就同老公、仔仔講左, 阿媽要去玩天光, 叫佢地食自己」。

其實小賭可以怡情, 但係沉淪的嗜賭, 卻叫人覺得婉惜，因為佢地除左金錢的損失外, 仲有和親人相聚的時間同埋關懷, 甚至迷失本性, 何不用哩 d 時間同金錢去做更有意義的事呢? 早一排電視的 "賭場風雲" 有一句說話好啱 ─ 苗橋偉所講：「女人爛賭的樣, 真係好醜」 (因為無氣質, 面上只有一副貪婪相)

但願各位女性警惕的提醒自己。

新年新景象

剛剛的週末, 完成左一個大 project, 就係 「新年的裝飾佈置」 同埋 「幫魚缸換上新景象」











今年的新年佈置比較簡單同 「清清地」, 價錢只不過是 $9, 好抵, 又可以靚返一頭半個月 lu, 期待新年時, 也買些鮮花作室內裝飾 (不過要先執執屋)。












由於魚缸養 "水草" 的關係, 所以水草泥需要一年更換一次 (全換, 否則不夠養份供應水草生長), 所以我和阿 Be 趁機重新設計魚缸的場景, 他將水草用魚絲 "植" 上去 "石春" 同 "沉木" 上, 我重特登買了紅色的水草賀年呢!

小魚好似幾享受新環境, 不過由於我o地製作需時, 有兩條小魚因為忍受不住o甘長的等候時間, 覺得好悶, o係外面的水盆 "玩笨豬跳", 壯烈犧牲了, 善哉! 善哉! (雖然傷心, 但唯有安慰自己, 舊的不去, 新的不來吧!)

KK 的 "暗語"

尋晚落堂後, 同 KK 行左一陣街、 揾o野食, 再返屋企。 大家都知道 "旺角" 人多車又多, 一條好短的街, 有時都要迫好耐先行完呀! (人多擠迫) 。 哩排天氣寒冷, 街上不時見到有人著住 "臃腫大褸", 活像一個 "米芝蓮" 公仔般。

o係我地閒逛期間, 前面正有兩個"米芝蓮"阻住去路 (還要打橫"霸晒" 成條路慢步呢!)
KK 忍不住嘆了一句：「唉! Snow Man (雪人)」
我回應說：「你想說 Slow Man (慢人) 嗎?」
佢話：「醒喎! 正有此意, 不過廢事講得 "太揚" 被人打呀!」

哈!哈!哈! 我地之間的默契又再昇華啦。

在火車站回家途中, 又碰上了"米芝蓮", 不過哩位人士比之前的兩位行動快左少少, 兼無 "霸晒" 成條路, 唔知可唔可以叫佢做：Snow Ball (雪球) /Slow Ball (慢球) 呢? (因為 "球" 滾得快過 "人")

迷 “宮”

啱啱睇完一套韓國的連續劇 “宮”, 從此不能自拔, 令我愛上左哩套戲內的種種, 首要的當然是戲內的男主角 “信皇子” (韓星 “朱智勛”- 最左邊果位)。


哩套戲的好睇之處係：
1) 製作認真, 遠赴泰國及澳門拍外景
2) 4 位主角均年青貌美, 令人賞心悅目
3) 男女主角每次出場均用左唔同的服裝配搭及不同做型, 尤如睇緊有劇情的時裝 Show。
4) 配樂好正
5) 劇情緊湊, 有張力, 令人好想追看

阿 Be 都同我一齊追劇集, 吸引力可想而知啦! 我會向身邊的朋友推介哩套劇架!

大吉大利 (利是袋)

哈哈! 哩個週末又完成左一項創作啦, 就係 "大吉大利 - 利是袋" 啦!
專誠整比小朋友去 "逗" 利是架。一個整比姪仔, 一個整比朋友的姪女。可愛嗎?

你睇! 小姪仔用 "佢" 黎 "逗" 利是幾o甘開心。

"巧合" & "猜一猜" (Part II)

揭曉答案啦!!

"巧合" 係我踫見到契媽呀, 雖然我知道佢有跳舞的習慣, 不過之前佢提及是跟 "工聯會" 架, 所以無諗過會遇到佢, 真係有緣啦。 剛剛的星期一, 契媽被阿 Sir 邀請了做舞伴示範比同學睇, 嘩!!!!!! 原來佢真係真係好厲害架, 失敬失敬, 唔知我幾時先可以好似佢o甘勁呢?

"猜一猜" 其實佢係一個有 "底盤" 的公仔裝飾, "底盤" 係可以按上去 keybroad (鍵盤) 架, 你睇! 係咪好得意呢, 不過無 mug 實際用途 lor。

打野戰

尋日小妹跟左阿 Be 同埋佢D槍會朋友去左元朗的逢吉鄉 “三軍外展中心” 打野戰 (War Game)。今次係小妹的第一次野戰經歷, 好刺激喔! (不過亦好鬼累)

原來打野戰都要好 Pro 的裝備架, 基本的包括；帽、面罩 (或者眼罩 – 保護範圍少 D)、迷彩衫褲、護墊 (保護手踭及膝頭)、手套、手槍、子彈 同埋 彈匣。唔好睇少任何一樣裝備, 佢地看似簡單, 但有好大的作用架。

過程頗刺激, 但運動量好高, 尋日玩完上晝, 已經腳仔 “冤” 痛, 下晝只能玩到一陣咋 (已經無mug 力), 晚上勁累 (好早瞓), 今早成身, 尤其是肩膊同背脊, 十分“冤” 痛啊!

成日以為 D 人打 War Game 為左靚同型先至著迷彩衫, 但原來真係好有用架, 當你匿藏o係叢林之中的時候, 別人好難睇得到你的藏身之處架。

今次我都有 D 戰績架, 但唔係損傷, 只係 “豬手一對”, 因為被蚊針得一雙手都又紅又痕又腫 (縱使我已經搽左 “蚊怕膏” 同埋用左 “蚊怕貼”), 好彩唔係針我塊面咋, 唔係點見人哩!

大手指, 小意思

大約o係一個月之前, 唔知點樣, 大意整親隻右手食指關節, 可能係伸直手指 "硬實實" 的撞到, 當時痛左一下, 之後不了了知。隨住時間的過去, 關節越在越痛, 尤其是 "屈曲手指" 和 "掂水" 的時候, 最痛時, 甚至連揸筆亦痛至無力。

結果o係 07 年的 1 月 1 日去左睇跌打醫師 A, 佢診斷為 "扭傷關節靭帶", 要睇多幾次跌打及敷藥才能好, 結果睇左四次, 無 mug 起色。 尋晚轉去睇跌打醫師 B, 佢的診斷都是一樣, 話而且手指的 "筋膜發炎, 腫起來", 都係要睇多幾次才能好返晒, 希望快d攪掂啦。 (因為要敷藥12個鐘, 手指不能屈曲及掂水, 好唔方便, 拆藥後, 隻手又 "黃甘甘" & "一陣強烈的跌打酒味"- 好尷尬)

講起大手指, 我又諗起我的兒時往事。話說媽媽天生畏血, 見血易暈, 一晚爹地去左飲宴, 家中只得媽咪同我三兄妹 (當時哥哥也是小五、六), 當時媽咪在廚房切親手, 大叫一聲, 小朋友應聲跑去, 見佢血流如注, 大家也驚到 "驚惶失措", 唔知點算, 媽咪也開始見暈的從廚房走出廳中躺下來。

那時傳呼機並不流行, 而且仲未有手提電話 (唔知點聯絡爹地, 而從電視中知道, 如果失血過多而唔理, 係會有性命危險), 結果我地兄妹無報警 (唔知係咪唔識?), 我用櫈仔爬高去藥箱取 "雲南白藥"-止血良藥 (因為見每次媽咪受傷流血, 爹地都用此藥幫佢止血, 故有樣學樣), 姐姐去斟熱水 (因為媽咪失血後覺得好凍), 哥哥取藥油 (搽o係媽咪的額、耳背、鼻等位置, 以防佢暈低), 最後我同哥哥扶住媽咪坐在地上, 姐姐手持藥粉 (一大撮, 慌忙中幾乎倒晒成樽藥粉o係手) 包實媽咪隻受傷手指幾分鐘去止血。

據姐姐所講, 媽咪應該傷得幾深, 因為佢的手掌感覺到媽咪手指在 "跳下跳下", 好彩最終大步檻過, 媽咪止左血, 我地合幾人之力幫佢包紥好, 再扶佢上床休息。

然後醒目的哥哥話怕爹地夜晚回家瞓覺時 (因為我地應該已在睡夢中), 唔知媽咪受傷, 會整親媽咪的手指, 最後我地幾經思量, 諗左一個方法去通知爹地, 就係.............. 寫紙仔, 然後放o係佢的櫃中 (因為每天返家, 佢一定開櫃, 這是佢的習慣)。 我地只係好簡單的寫上：爹地, 媽咪X手, 小心!

因為小朋友識字唔多, 唔識寫個 "切" 字, 所以我地畫左一隻包左紗布的手指, 希望佢明白 = 手指受傷, 不要整親媽咪。

回想起來, 我地三個 "反斗星" 都幾有急才架, 邊個諗到幾個小朋友識o甘多o野呀? 要知道 "我個年代" 的細路是一個 "大蕃薯", 無而家d小朋友o甘叻架。我永遠都會記得哩個經歷的 (大手指, 小意思), 哩個經歷亦見証左我一家人的團隊合作精神!

訓練的機會

我好開心公司最近提供左一個訓練的機會比同事 (包括我在內)

因為工作的關係, 有時係會接觸到信用狀 (LC)的, 因為同事和我也對此不太熟悉 (過往只接觸過一小部分的流程)。 公司有見及此, 在坊間選出一些課程比同事就讀, 如果同事附合以下兩個條件, 公司會全數回饋同事 (即係同事而家自資就讀先)

1) 出席全數課堂 (10堂) 或 出席不足者, 但能考試合格
2) 一份簡單的報告 (就讀課程後的報告)

其實課程的時間比較差, 逢星期六的晚上 1900-2130, (10 個星期), 所以部份的同事放棄就讀機會 (有些因為已經修讀左幾個學科, 負擔不來, 有些因為撞其他課程的返學時間, 有些因為夜, 有些因為星期六想陪家人)。最終只剩下我 和 同事 J 二人報讀。

對我而言, o甘難得公司肯比錢陪訓, 而且學成的知識及証書又是屬於自己的, 我梗係唔會錯失機會, 一於報讀。但就錯失左陪舅父晚飯的機會啦 (佢逢星期六放假, 到我家中晚飯), 但 10 個星期, 好快過啫。

希望公司將會繼續提供唔同的課程比同事啦, 如英文口語 或 普通話就最好 (我發緊夢呀............)

"巧合" & "猜一猜"

尋日晚上跟同事去左大角咀跟第二個導師學社交舞 (因為有區議會贊助, 價錢平, 所以又當去做下運動), 大家估下我遇到邊個? (仲有幸同佢成為 "同學仔" 添), 真係巧合啦! 以後又有機會同高手砌磋、交流一下 (因為佢的舞齡比我長, 是前輩喔!)


另外你地估下附圖是什麼? 它係同事 J 剛去日本渡蜜月後的小手信, 你地知唔知道哩樣o野有 mug o野作用架? 遲 d 先至開估.............. :p

新照片發佈

Hi o甘多位 Uncle, Auntie, 我係 Henry 仔呀, 已經兩個半月大啦, 比個近照你地睇啦, 我 "大個仔左好多啊!"

新攪作

八卦妹如我, 梗係百足o甘多爪, 又有新攪作啦!

就係新年新開始 / 新願望, 今年我已經 apply 左大約三、四個唔同的 course啦, 不過全部都係術科的興趣班, 繼舊年讀完學科 diploma 後, 要輕鬆下, 抖下先。

尋晚係我第一堂的社交舞, 我地學左 "牛仔舞 (六步)" 的基本步, 一個鐘的課程, 都可以換來一身汗, 真利害, 最開心的係仲有3個志同道合的朋友一齊玩, 我同KK 又有機會做同學仔啦。(商科畢業後都未試過)

最意想不到的係, 我同KK上完堂, 練習了一段時間, 也是有時可以、 有時唔可以的連續跳幾個 cycle, 但今朝 KK 教了媽媽一陣子, 再加上練習, 佢已經可以跳到幾個 cycle 了。(原來媽媽一直在 "扮豬食老虎", 果然係真人不露相), 勁!!!!!!!!!!!!!!!!!!!!

充實的聖誕節

今年的聖誕節, 是小妹過得最充實的。我做左好多未完成 / 想做的事, 真開心, 縱使每日睡眠的時間唔多, 但卻難掩完成使命的興奮同滿足感。

這是我在假期製作的 Tiramisu, 我整左兩個, 一個與好友在大哥家中開 P 時分享, 另一個在27號 (第一天返工) 和同事分享。 大家的食評也是幾好食, 好在不太甜。我會努力, 多謝各位。

這是我在12月14日之後開始織的 3歲小朋友裙仔, 對象是在台灣朋友的女兒, 希望佢會啱著同鍾意啦!













在聖誕假期中的其中一日, 我路過一間穿珠的手工藝店, 見到 "迷你著衫史納莎" 好得意, 決心學識點整, 然後送比身邊的朋友, 結果我暫時整左 7 隻 (重覆的顏色唔上鏡啦), 遲 D 仲要整多幾隻才夠送比人哩! 我覺得好靚架 (唔係讚自己, 而係話隻狗仔好靚), 成本不過係 $18 / 1隻, 幾抵! (物輕情意重)

原想在27號上網寫 Blog, 偏偏遇上地震影響的網站故障, 真係無諗過地震的威力o甘勁呀! 全公司的運作近乎癱瘓, 擔心一旦線路回復正常, 工作便會排山倒海的湧過來。

超低能, 勁攪笑 VS 蕭低倫, 近狗笑

尋晚好多謝靜宜家姐同小肥皇子請我去睇 “林海峰是但up踎低噴飯” 的 talk show (小肥皇子因有事未能出席, 益左我), 其實係我第一次現場睇 talk show 咋, 好好睇! 兩個鐘的 show 內, 完全沒有悶場。 好彩我o地早左去咋, 結果唔駛點排隊就買到紀念品 同埋 可以上台同 “文化古蹟 Lambear” (一共九隻) 影相。 (Jan 話完晒 talk show之後, Lambear 便沒有價值, 可以攞去填海, 故稱為文化古蹟, 就好似天星碼頭一樣)。

佢個 show cover 的範圍好廣泛, 除左娛樂圈的病人、受害人(藝人), 如：阿嬌、官恩娜、Yumiko等等; 又講到政治方面, 如：何俊仁被襲、香港孕婦生仔無床位等等; 仲有講到上流社會, 如：報紙啟示 = 名人用作溝通的 SMS 短訊 (何鴻燊 VS 十姑娘), 大劉同亨亨的追女方式 (全版生日廣告 The One VS 嘉亭灣)

最後果 part quote 左一個實例： 一對年青男女在壽司舖門外等位, 中途女生接到電話, 與友人談話間, D 懶音同口頭禪勁多, 最經典的係 “蕭低倫, 近狗笑”, 最後男生也禁不住說句：唉…食壽司要等成個幾鐘, 真係蕭低倫呀!

當中比我o地的啟示係：原來哩個世界有好多o野, 我o地係無法控制得到的, 與其因此而唔開心, 不如我o地轉個角度, 覺得哩d o野係 “超低能” 同 “勁攪笑”, 不問得失, 只管繼續做, 一樣可以輕鬆的去面對。

*PS: 阿 Jan 佢o地的改編歌好攪笑

不吐不快

好耐無寫 BLOG 啦, o係哩段時間除左忙於溫習 (考試, 已經結束啦), 仲有的去唔同的留言版上睇一d有關 “爭取港人 (孕婦) 優先使用本地醫療資源”的留言或文章。

眼見各個媽媽將自己的親身經歷 (血淚史) 寫出來同大家分享, 真係讀到個心都酸埋。

1) 有準媽媽覺得肚內30幾週的胎兒越來越唔郁, 要求醫生照超聲波, 醫生話：由於資源緊拙, 過多內地孕婦湧來, 唔可能每個病人稍有少少唔妥, 便照病人的意思去做, 請見諒。 (最後該準媽媽的BB胎死腹中, 死因是體積過大, 超過10磅, 而準媽媽亦患上抑鬱症, 成日怨自己點解唔識花少少錢去睇私家醫生)

2) 另一位準媽媽已經ready好上產房自然分娩, 結果等左幾個鐘, 才被推上產房, 其間眼見有孕婦因等不及, 在電梯內產子的景象, 嚇得這位媽媽十分緊張。正當在產房生產其間, 電話響起, 陪產士及醫護立即說外出有緊急症, 趕了出產房, 最後哩位媽媽在無人陪同下自己產子, 幸好一切平安。 留院其間, 佢才知道在 lift 內生產的是內地孕婦 (內地孕婦是室友), 因為該孕婦在最後關頭才入院生產, 所以趕不及入產房, 孩子已經出世了。

3) 有第二任媽媽因為第一胎是正常嬰兒, 被評定為低風險, 將原先二至四週一次的例行檢查, 延長至四至八週, 保障不足。

4) 順產的香港媽媽被要求第二日便要落床, 然後出院, 至於開刀的香港媽媽留至第三至五日, 也被要求出院 (即使發燒未退, 醫院也會叫你 "如有事, call 急症", 佢地的理由係唔夠床位, 已經加帆布床在走廊, 但都不足以應付大量緊急入院的內地孕婦, 因為佢地的產前檢查不足, 故此產後要多加化驗和觀察, 留院期自然較長)

唔知幾時開始, 人命變得毫不重要? 我諗唔係香港的出生率低, 而係我地的香港孕婦得不保最基本的保障同權益, 那有人願意用自己和十月懷胎的孩子性命去做賭注?

如果真的有大遊行, 我一定會去參加, 支持本地孕婦, 維護佢地的權益。請你地通知身邊的親戚朋友去關於哩件事。唔單止係女人或孕婦的事 (男士的老婆、子女也受影響), 日後哩批內地父母的港產 BB 會享有居港權, 亦會申請佢地的父母來港團聚。(公屋、綜援、就讀、人口規劃等問題將會陸續衍生)

台灣之旅 (三)

手信篇

今次去台灣買手信最滿意的是以下三樣：


1) 七彩繽紛散紙包 (好 cute, 不過買得少, 自己同屋企人都無份)

在台北的 "忠孝敦化" 的商店購買, 我還好叻的 "講價" tim, 不過講得少少咋!



2) 豹腳和黑熊掌毛毛拖鞋 (做型得意, 既可保暖, 價格亦合理, 不過佢o地 "霸" 左我半個喼呀!)

為左佢地同埋我o地買的其他漫畫書、咖啡蒸煮機等等其他手信, 我o地需要臨時臨急o係台灣買一個超巨型背包, 將咖啡蒸煮機揹返香港, 而毛毛拖鞋則放喼內不斷被我o地按壓, 才能把喼合上。

* PS: 我o地用的布喼已經放大左一個碼啦! oh my god!



3) 懷舊玻璃蒸餾咖啡烘焙器, 右邊的是古銅仿古手動磨咖啡豆機, 真係用得架, 不過煲咖啡就要加 "工業用酒精" 在酒精燈內燃燒來煮咖啡。

即使唔 "好" 飲咖啡, 買來裝飾家居也是一個唔錯的選擇呀! 而且台灣賣此類的咖啡、茶道或花茶烘焙用品也比香港平一大截喔!

圖中全套咖啡蒸煮用具及磨豆器, 也不用港幣 $500。我同阿 Be 也很滿意哩樣禮物, 不過返來香港o甘耐, 仲未有時間可以試用呀! 所有星期六、日差不多被婚宴、壽宴、公司活動佔用了時間, 而週一至五, 只得晚上有空, 但夜晚唔敢飲咖啡呀, 怕瞓唔著, 睇怕要等到聖誕先試得。 (同樣聖誕及之後一日, 我身邊都有人擺酒喎! 真係 "不可思議" 呀! 揀d o甘特別的日子)

又到聖誕 ^o^

嘩! 話o甘快又到聖誕啦!

街上商場處處也掛住聖誕裝飾, 商舖也播住聖誕歌, 節日氣氛濃厚, 唔多唔少也激起各人的購物意慾同埋 holiday mood (掛住諗放假的節目, 而唔想返工 :p)

小妹早兩日到吉之島購物時 + $20 換購左一棵聖誕樹 (點知返到屋企先知有三層, 成五尺o甘高, 拿拿淋改短佢, 只要最頂個層, 成為迷你聖誕樹 - 都有半隻門o甘高呀!), 加上舊年佈置聖誕的裝飾, 將大宅的大門添上了一點氣氛。

哈哈!! 正所謂成人不要氣氛, 也要氹小朋友嘛, 邊個小朋友? 在此 blog 內只見過名, 未見其樣架...... 各位觀眾, 我的小 BB ─ 豬女 (左) & 豬仔 (右), 佢地係一對 twins 來架, 出世相差五分鐘, 由於每年都會 auto reset, 所以年年都係一歲。為左佢o地, 身為媽咪的我 (我自稱為 "豬咪咪"), 梗係攪d小動作氹下佢啦。正如小時候, 媽媽也會在大時大節為家中佈置一番, 好有氣氛, 小朋友會好開心, 果時的聖誕節佈置, 多數是在天花掛上各式各樣的聖誕卡 (因為媽媽每年也收很多卡, 廢物利用吧!)

台灣之旅 (二)

文化差異

未去台灣之前, 一向對台灣的印象一般 (不太好) , 因為覺得：
1) 阿扁「面皮厚」, 貪污也不下台, 亦不回應 (之後好耐才有反應)
2) 電視上經常見到議會內打交的場面, 令我覺得台灣人是 「野蠻民族」
3) 工作上交過手的台灣人, 尤以男士居多, 好多也很「孤寒」, 為省一個幾毫, 扭盡六壬, 出盡辦法, 即使抓爛面也在所不計。

今次到過台灣旅遊後, 發現大部份的台灣人好 nice (平易近人), 當我有需要時, 佢地會好樂意幫助我。佢地亦唔係好似大陸的打扮o甘 “娘”, 後生的甚至可用 “潮”來形容, 同一般香港旺角、銅鑼灣的青年打扮無異。

佢地的步伐 (生活) 比香港人慢, 所以舉止也比香港人優雅 「例如：佢地唔會因為趕時間而在扶手電梯上 “橫衝直撞”, 而係唔行的人自動靠右企, 不會阻礙需要步行上電梯的人(靠左行)。 撞到人會講：對唔住。 會讓座比有需要人士 (捷運內設有 “博愛位” 專 for 此等有需要人士)。) 我覺得哩樣o野同社會文化好有關係, 台灣人比我想像中有禮貌得多了。反之我為香港人(尤其是年青人) 和老人與孕婦爭座位者而感到汗顏。

記得細個果時, 社會上都經常出現幫人、讓座等場面, 而家卻越來越少見, 是什麼原因令人與人之間的關係變得越來越冷漠和陌生? 因為太多騙案? 因為太多新移民將國內 「爭左先, 怕蝕低」的心態傳到香港? 還是香港人被同化了 (不排隊, 不守規矩)?

我好懷念細個時的 “獅子山下” 大家同舟共濟, 唔怕蝕低、艱苦一齊去拚博的香港精神。現今太多人”練精學懶” 走精面了, 太可惜啦香港人!!!!!!!!

台灣之旅 (一)

今晚剛下機了! 舟車勞頓, 很累呢! 同大家分享一下大概的行程先啦!

第一天：中午機從香港到台灣 → 酒店 → 西門町 → 忠孝敦化 → 西門町 → 酒店

第二天：新北投 → 北投溫泉親水公園 → 地熱谷 → 浸溫泉 (水都溫泉會館) → 北投溫泉博物館 → 凱達格蘭文化館 → 西門町(咖啡用品店/ 漫畫書) → 看戲 (體驗當地的戲院-007 Casino Royale) → 酒店

第三天：國立故宮博物院 → 至善公園 → 圓山大飯店 → 國家音樂廳 → 國家劇院 → 中正紀念堂 → 101大樓 → 誠品書店-信義區 → 酒店

第四天：逛書店 → 買手信 → 中午乘車到機場 → 下午回香港 → 旅途完畢

此行最得意的係發現左：放題 (日式) = 任食 (港式) = 吃到飽 (台式) = Buffet (英/美式)
由於趕住執野, 遲d再同大家分享啦! :D:D:D:D:D:D:D:D:D:D:D:D:D:D:D

《我的獅子山下》

尋晚睇電視見到 “獅子山下、人、情、事” 哩個節目, 有少少o野想在此同大家分享。

記得首次播映 “獅子山下” 時, 應該是八十年代, 唔知係因為當時年紀細, 印象模糊, 還是因為太早熄電視瞓覺而錯過左此劇集, 到我再接觸此劇時已經係中學時期 (九十年代) 到公共圖書館的視聽室租播此劇 (太耐無用此服務啦, 記得當時只不過係幾蚊便可以睇一集劇)。

鍾意睇獅子山下是因為勵志式劇情, 每每講奮鬥、鄰里間守望相助、互助互愛等等, 同埋劇中大部份的故事也發生在公共屋村中 (正好讓我懷念兒時的時光), 仲有羅文的那一曲 “獅子山下”, 真係聽o甘多年, 仍然o甘好聽。

只可惜, 隨住社會的進步和發展, 劇中的情懷已變 (人們往往抱怨政府資助不足, 卻不願自力更生, 鄰里間即使見面, 亦不會點頭叫早晨, 彼此之間的關係冷漠), 新型公屋的設計亦十分新穎, 卻減少了 “人情味”。 而陪住我長大的 “獅子山” 卻由往日的 “滿身是毛的獅子” (綠油油, 十分壯健的) 變成而家 “年老色衰的獅子” (岩石嶙峋的病獅子)

真令人感慨啊! 獅子啊獅子, 究竟你何時才能回復以往的樣貌和威武呢? 再帶領住香港人奮勇直前, 再創高峰呢?

網誌休息

好耐無去過旅行啦! (已經三年多了) 雖然出身小康之家, 讀書放暑假時經常會去 "大陸" 旅行, 散下心, 減下壓的。

近哩幾年, 無得去旅行係因為時間唔容許 (讀書中, 有時兩科要返學, 很難去到5日或以上的旅行), 無假 (因為已經放晒假來做功課 & 考試), 無錢 (只怪我唔識理財 :( ), 難約朋友 (因為時間唔啱 or 大家無共同地方想去)

十一月十六至十九日, 小妹將會與 阿 Be 揹背包, 進行我地的台灣 (探險) 之旅自由行, 主力會在台中吃喝玩樂, 同埋到北投去浸溫泉, 希望一切順利, 旅途愉快。已經好期待下次再去台灣的郊區行下, 因為旅遊書中的圖片好吸引呀!

到而家我仲未收拾行裝, 亦無好周詳的 plan 去邊度玩 & 食, 一於行到邊, 食到邊, 玩到邊, 過一個無壓力的假期。

在哩段期間, 網誌會休息一下, 返來再同大家分享旅途之點滴。

*PS: 身邊親朋戚友紛紛勸告我 (切勿) 穿上 "紅色" 或 "綠色" 的衣物, 免得被台灣人民狠狠的打一身。

可愛小公主

上週日開始左另一個大計, 親手做一份小禮物比朋友剛出世的姪女。結果鉤了一件 "二合一" 的披肩 (可變作裙仔)

合共花左週日的下午, 週日、週一及週二的晚上才完成以上作品, 我極滿意, 因為原定的設計是純白色的, 但似乎唔夠白色毛冷去完成整件披肩, 故此配上粉紅色圍邊作配搭, 效果卻出奇地好, 加上 "珍珠衫鈕", 穿起上來一定活像一個 "可愛小公主"。

完成作品及拍照後, 有 D 唔捨得送比人 tim。 :P 可惜我已經係成人啦, 否則我會 "化為己有" 架! 如果成人用此顏色又似乎有點兒幼稚。 唯有望多兩眼啦!

朋友們都很喜歡此披肩, 還紛紛落 order (若日後有子女, 也要一件哩! 計我話：女仔就 "披肩裙仔", 男仔就 "蛤蜊衣" 又或 "水手裝" 好 d 喎 ............. 不過我未學點整, 遲 d 得閒試下先)

要練習多幾款, 如日後提早被淘汰 (退休) 也有細藝 & 賺 d 茶錢幫補一下嘛!!!
(有無人買呢??? --!!!!!)

大鄉里 "出醒"

好耐無同阿 Be 單獨上館子啦, 好多時也是到佢屋企 或 我屋企晚餐, 有時會一大班人外出吃飯, 又或者是我地二人快食 "大家樂" 或粉麵 (由於時間關係)。

尋日我地到左旺角逛街, 之後便四處揾下有什麼好野食, 最後揀左 "沙嗲王" (自從商科畢業後, 一直無再踏足此店啦, 大約都有十年了) 佢的裝修、菜式同埋設施都變左好多。

首先我地被安排的座位是一個類似 "楊貴妃出浴" 木製的大浴盆, 盆中間有一塊木板做桌, 左右兩邊內籠做櫈, 二人相對而坐 (只容得下兩人), 進入座位時, 你需要先開 "率" (類似商場廁所門的 "率"), 然後提起腳跨進內籠而坐, 坐好後, 還得把門 "率" 上, 否則門便會 "掉掉 fing", 阻礙通道。 如果想試的話, 女生千萬不可著短裙啊! (長裙也不方便) , 由於尋晚太多人, 故此不便將大浴盆拍照, 免得其他人以為我影佢地啦。

見到餐牌上有一菜式好特別的, 是冰火榴槤酥 (冷熱) (見圖), 由於我和阿 Be 也 "好" 榴槤的, 而且標榜用 D24 等級的榴槤製作, 仲要係 $6 一客, 梗係唔執輸試下啦! 冷榴槤酥似榴槤雪糕, 不過味道不夠雪糕的濃, 而且真的太凍了, 味蕾也凍僵左 (遲鈍左)。 熱榴槤酥的確係外熱內冷, 但略嫌炸皮太油膩, 滿口是油, 又怎能試得真榴槤味呢? 真失望!

至於我最滿意的是我口中的 "新裝置" (見圖), 我是第一次在館子內見到的, 所以急不及待取相機出來攝下來, 同大家一齊分享。每張桌上的桌號牌也設有紅外線裝置, 客人只需按所需服務的掣 (如：落單、加水、結賬等), 不消一分鐘, 服務生便立即送上該服務, 省卻在館子中常見的客人要一邊食, 一邊顧住招手嗌侍應, 十分不便哩! 尋晚我都咪執輸的按左3, 4 次紅外線裝置, 好好玩呀!

由於阿 Be 公司附近也有"沙嗲王" , 間中也會幫襯, 對此裝置已經見慣不怪嘞! 還笑我像大鄉里一般拍照留念, 如果我唔將此公諸同好 (在此分享), 恐怕還有很多大鄉里哩! heeheehee......... 可能 "你" 就是其中一個lu。 大家如有空, 不妨到此店試下啦, 記住要 試坐特別位 同 按裝置 呀! 總括來說, 尋晚此行有新發現, 好興奮, 就好似小朋友發現新事物o甘, 原來我也是 "童心未泯" 架!!

新玉照登埸

o甘多位 Uncle, Auntie 你地好, 我的新玉照登埸啦, 係咪好靚仔呢?
仲有一款 "woowooo.......無心睡眠"的做型添, 真係盡得我父母的真傳 - 玉樹臨風 是也!!!!!!

中西有別

今日係 “十月三十一號”, 凌晨便是西方的鬼節 – 萬聖節。每年的哩一日, 一群少男少女總喜歡在深夜時份 又或者 學生在放學後, 回家整裝待發, 打扮成女巫、吸血鬼等等出街湊熱鬧, 唔知今晚放學後又會遇上什麼鬼呢? 好期待啊!

其實早在農曆七月, 已經是中國的鬼節, 在傳統上, 中國人對鬼神之說, 一般較避忌, 燒香拜神、避免在深夜外出、在街上聽到別人喊你的名字, 切勿擰轉面等等。

由此可見中國跟西方的社會文化不一樣, 中國人比較保守、隱陣, 寧可信其有, 避開可怕的鬼怪事。而西方人較為樂觀、愛冒險, 將可怕的鬼神之說, 轉化成一個街頭巷尾的 “化妝舞會”, 大家熱熱鬧鬧的玩一晚, 驅除心內害怕鬼神的陰霾。感覺上西方人的 情緒智商 (EQ) 較高, 可將負面 (Negative) 的事 化作 正面 (Positive) 的事去處理。

我也替家中的大門掛上了萬聖節的裝飾, 祝大家萬聖節快樂!!

小姪仔亮相

哈!哈!

各位, 我的可愛小姪兒登場......

哩張相影得老積左小小, 真人BB D, 得意D。

輩份爭霸戰

BB 出世後, 我地一家各人的輩份又升左一級啦, 記得當日係我哥哥親口通知我佢已經添丁的消息, 還不忘提醒我榮升了：姑姐, 我很快的回敬佢一句：爸爸。

之後我見到我的父母, 亦稱佢地為：爺爺、嫲嫲, 和舅父傾電話時尊稱佢為：舅公 (全部都是跟 BB 的叫法, 提示佢地 BB 的存在)。

至於我姐姐亦是姑姐, o甘 BB 點去區分兩個姑姐呢? 因為個人原因, 我唔鍾意 BB 稱我為 "三姑姐" 或 "細姑姐", 最後姐姐決定只要 BB 稱佢為姑姐, 而我就是 "Mac 姑姐" (不過媽媽取諧音為 "叻姑姐"), 錯有錯著, 無啦啦被人讚叻, 梗係好開心啦!

阿嫂 & BB 尋日下午出左院回家休息, 我好期待可以快D去佢地家中探佢地, 可以近距離睇 BB (因為在醫院的 BB 房內, 我地要隔住玻璃窗睇BB, 而且 BB 每次也版編排到很遠玻璃窗的位置, 所以很難睇晒佢的盧山真面), 我好想同佢一齊合照, 然後放在公司的電腦內做牆紙 Wallpaper

幸福感覺

um………… 上週六 21 Oct 06 出席了舊同學 (中學) 的結婚儀式 (行教堂), 晚上再去飲宴, 十年人士真係幾翻身, 一瞬間, 我地都大個左, 成熟左好多。中學的同學至今已經好少保持聯絡了, 只剩下兩位男同學間中約出來相聚。(一年一兩次)

望見當日的黃毛小子, 找到自己深愛的另一半, 在親朋戚友面前宣誓作見證, 真替佢感到幸福, 切切實實的令我感到：我地真的大個啦!! 不再是往日的小書友, 青蔥的歲月不再, 但是彼此的情懷依舊。一下子, 以往讀書的點滴和趣事一湧上心頭。 另一位男同學的女兒也三歲了。

唔知道五年之後, 我地又會否攜同家眷一齊聚下呢? 可能大家也是別人的爸爸媽媽了。

我們的心肝錠

二○○六年 十月 十九日 下午時份, 我地家中誕生左一個心肝錠呀! 佢足足有五磅二安士,真係開心, 嫂嫂為我地一家誕下麟兒, 我亦多添了一個小姪仔, 一家人喜氣洋洋。

尋晚去探望小姪仔, 佢皮膚白晢、眼睛大大、鼻高高, 雖然個子不高, 但係十分健康、精靈, 成日張開眼睛, 十分好奇的四圍望 (圍繞住佢的 BB 卻在哭 – 扭食奶, 又或在瞓), 但對佢毫不影響, 佢依然故我的四處望, 很堅強、很乖的模樣, 非常惹人喜愛。仲有呀, 我覺得我同佢零舍有緣架, 因為佢瞓的床仔係.................. 3 號床, 而我是家中排行第三的。 ^^

可惜的是阿嫂在病房內留院觀察 (醫院只限哥哥一人探訪), 故此還未見過佢, 有少少掛心, 希望佢快D康復, 我好想去探下佢, 同埋多謝佢努力帶比我地一家人的禮物啊!

由於尋晚我未有預備相機幫 BB 影相, 所以暫時用以上的 BB相頂替, 當有姪仔相時, 再 POST 上來比大家欣賞下。 (我希望小姪仔日後都好似哩張相o甘開開心心, 成日笑口常開。)

同事回歸 及 大步檻過

今日我有一個放左半個月大假的同事復工啦! 聽到佢去美國 (出席妹妹的婚禮)同埋去日本 (旅遊) 的小趣事, 好戥佢高興呢!

佢仲十分有心去搜羅一份小禮物比我的未來小姪仔添, 非常有心呢! (是一件好趣緻的水手裝BB衫, 由於外國的 Size 較大, 我諗小 BB 要明年夏天才啱著了, 幸好是短袖哩!)



今天晚上便中期考試了, 但我還未預備好呢? 唔知點算好, 雖然筆記上已經有題目, 附上答案, 但我還是溫習時候明白, 再返做題目時又出錯 (有時解錯題, 有時粗心大意錯), 只希望今晚………….. 大步檻過!!!!!!!!!!



另外, 家中訂造左一個幾靚的飾櫃 (因為尺寸特別, 所以要訂造, 但價錢和購買相若), 總算可將零碎的小擺設放進去了, 向完美又邁進一步。

演唱會後記

尋晚睇完演唱會後, 真係令我眼界大開, 未開 Show 之前, 有人抱住一大筒雪糕在座位堆中兜售 (要記住在 “山頂” 的坐位是十分斜的, 真係替佢擔心), 大家紛紛入坐, 好似嘉年華會o甘, 好不熱鬧。

個 Show 真係好好睇, 最好笑果 part 係 “美女廚房” 3 大主持一齊唱 「無賴」, 然後介紹周師傅出場, 佢亦即席混在美女dancer 中主唱一曲 “夏季不不不”, 佢尋晚的金句是 (對住梁炳講)：「你個 Show 好似周師傅煲水o甘喎!」, 梁炳問：「即係點呀!」, 周師傅答：「即係無料到lor。」 (佢講笑啫!!!)

最精彩果 part 係梁炳在台上輪流彈奏 7 台好靚的鋼琴, 邊彈邊唱, 鋼琴有唔同的款式和顏色, 最老果部鋼琴是 1844 年的產物, 全球只得兩台, 其中一台放在蕭邦博物館作展覽, 另一台出現在尋晚的演唱會中, 很是珍貴, 而且琴音仍是好聽哩! (Edmond 用它來彈奏 “漣漪”, 十分動聽)

上台的嘉賓包括有陳奕迅、楊千嬅、鄭中基、方力申、周師傅、林海峰等。另外蘇永康和女友 Karen 在台下 support。稍嫌快歌太多 (因為我唔熟佢的快歌, 一向都鍾意佢唱慢歌情歌多d), 好彩我鍾意的歌曲都有唱, 例如：纏綿遊戲、我需要的只是愛、不願一個人、移情別戀、衣櫃裏的男人、傷了三個心、七友 和 Hey June 等等。

以前唔明白點解d人o甘鍾意去演唱會, 覺得好o徒錢 (因為自己唔係一個追星的人), 而家才明白除左內容豐富幾多o野睇之外, 最重要的是 「集體回憶」 和氣氛, 當萬幾人聚集在一起, 為某一首歌而投入去唱、去打拍子, 心內泛起的卻是過去的情懷 同 點滴的回憶 (意指該首歌流行的時侯), 大家也很有共鳴, 所以尋晚的觀眾大部分都是和我差唔多年紀的 (我想梁炳的歌流行時, 我們該是中學生吧!) 我地一齊憑住佢的歌, 穿越時空, 返回學生時代去懷緬過去。

以我山頂 $100 的飛來計, 我覺得也算是抵睇 (3個小時的 show), 下次一定要預埋 KK 先至得。

萬分期待的約會

唔好見笑, 今晚係小妹一生人第一次到紅館聽演唱會, 今晚的主角是 梁漢文, 其實並不太喜歡佢, 只係未聽過演唱會 (只試過兩次在九龍灣展貿中心聽過 903迷你拉闊音樂會, 不過我只是臨時 ”鄧腳”, 有人臨時去唔到), 而我欣賞歌星的演唱會必定要撲飛 (好似學友、克勤同Eason), 好多時都買唔到平飛 (因為我只想聽現場及感受一下氣氛, 唔想太過花費買貴飛)。

唔知今晚個 show 正唔正呢? 我好期待呀! KK 今晚要返工不能出席, 下次補返數啦! 我都好想同 KK 一齊嗌下, 重溫我地少年時的癲狂, 發洩一下心內的鬱悶 (記得讀商科學校時, 一群同學、KK 和我一齊起睇音樂劇 – 雪狼湖, 大家一齊嗌一齊大笑, 好開心哩!!! 而且學生飛仲好抵添。)

大功告成

在今年的三、四月時, 收到一個好開心的消息, 就是我快將成為某君的姑姐啦! 很是開心。雖然嫂嫂的預產期是十一月頭, 但我已急不及待的去報讀課程學鉤一套 BB 衫褲連頭巾 (原先還打算鉤埋手套及小襪子的, 但因為實用性不高, 加上在街買亦十分平, 故此放棄了這念頭)

原來BB的毛冷絕不便宜 (因為質料較靚, 以防刮到佢地幼嫩的皮膚)。 合指一算共用了八個毛冷 (其實是七個半), 毛冷費用共 $224, 再加上學費 $200, 最後總共花了 $424 才完成小姪子的 "見面禮"。 我想在百貨公司內也可以用這價錢買一套靚衫仔 (因為我對自己的手工有些懷疑), 但卻內藏我的一點點心意, 希望佢大個仔時會鍾意啦!

其實哩套衫仔可以快D完成的 (因為我六至九月停左工, 太熱啦! 要抖暑, 免得將鉤物一拿上手, 便沾上一手手汗), 而且近十一月才完成 (得知BB的性別), 好讓我不會開錯鈕門 (男性和女性的鈕分別放左和右邊的)。

特別鳴謝：鮑叔叔、媽媽 & KK 提供意見 (裝飾的花花放在哪裡), 另外媽媽 & KK 仲幫 BB 去揀樓 (鈕) 添, 人仔細細就有5疊樓, 我都無佢o甘威呀!!!!

遇上香港先生時

大家還記得今屆的香港先生 ─ 黃長發 嗎?

話說早前我替公司到尖沙咀的郵局辦事, 在漢口道附近, 與香港先生迎面碰上, 當時佢身邊還有兩個洋妞, 等我講下我眼中對這位香港先生的感覺先。

驟眼望佢, 並不十分出色 (即是像品評女子一樣, 並沒有驚艷的感覺), 樣貌和上鏡的差不多, 皮膚蜜糖色的, 真的十分平滑, 就像女士們補左粉一樣 (通常男士的皮膚一般較粗糙, 毛孔大), 當時佢正在和朋友談天說笑, 露出的牙齒也十分白淨, 他並唔算十分高 (可能當日我著上了兩寸半的鞋, 我自已用五尺七, 八寸去與他比較, 而且男女的身高標準並唔一樣, 對男士要求會高d)。

對佢印象最深的是........................ 佢的骨架不算 "橫" (即不是天生很大隻), 但胸肌卻頂到上鎖骨, 胸肌的 cup 數頗大 (胸肌很厚), 行起路時 "盪下盪下" 的, 相比之下佢的腰就十分幼啦, 上身活像一個倒三角型。

小妹將以上對 香港先生 的印象描述比阿 Be 聽, 之後阿 Be得出一個結論：「如你所講的說, 這位香港先生應是一個............「變性人」, 因為佢有齊晒女性的特點 (皮膚細緻同平滑、唇紅齒白、 骨架不大、胸肌肥厚得盪來盪去、加上腰枝幼), 這還不算是女人?????」 (我覺得好好笑 :D)

蝴蝶蛻變

上週日蛋糕班教授左 台式卷蛋 (內含青瓜, 甘旬, 碎蛋, 吞拿魚及沙律醬做餡料) 和 迷你蝴蝶酥 (千層酥皮 + 砂糖)。

個人不太喜好台式卷蛋的味道 (怪怪的), 因為餡料令蛋糕皮頗濕「林林的」, 故此口感不太好。但學懂它的製作方法也不錯, 因為我可以改變一下餡料, 等我下次試用紫菜肉鬆做餡料先。（令我諗起澳門手信　－　紫菜肉鬆鳳凰卷）

另外迷你蝴蝶酥真是勁好味呀! (尤於配給關係, 每個同學得一小塊咋), 故此額外豫貴, 顯得份外美味, 家人也紛紛讀好呢!

以上兩種糕點不難製作, 而且蝴蝶酥還可預早製作放冰格待用, 所以大家放心吧! 你地一定有機會再食到的。等著瞧吧!

紙紥藝術

上週四、五 (21-22 Sep 06)請了兩天年假抖抖, 假期過後, 心情輕鬆不少, 縱然滿桌文件, 仍可一鼓作氣、 十分衝勁的完成每一項工作, “假期” 的魔力真厲害啊!

上週四約了媽媽和 KK 去拜祭先人, 事前去了香燭舖買祭祀的用品, KK 還提議買 “月餅” (見圖) 提早送先人, 以便中秋佳節可享用; 及後我見到一隻十分小巧可愛的 “七彩小白兔” 花燈 (見圖), 也忍不住的買了下來 (讓先人能提著花燈去賞月)。

不得不嘆一句: 現在的商人認真有生意頭腦啊! 如果我唔話你知, 只看圖片的話, 你會知道這是紙紥祭品嗎? 幾可”以假亂真”呀!

外遊熱門地

泰國 – 令人諗起陽光與海灘、假期、刺激的機動或水上遊戲、東南亞美食、白龍王、 四面佛、泰傭同埋賣廉價家居用品的跳蚤市場。

台灣 – 一個街頭巷尾都有好多小食的地方, 令你感到熱鬧, 諗起溫泉旅館、阿里山、電視中常見的台灣議會打鬥、地震和颱風等天災、沒有風度而市僧的台灣男士。

以上兩個皆是港人愛去短線旅遊的熱門地方, 最近亦不約而同的發生政治動盪。台灣有 ”挺扁” 和 “倒扁” 兩大陣形, 雙方熱哄哄的鬧得滿城風雨, 甚至大打出手, 波及香港的採訪記者, 雖然我也不認同阿扁的貪污腐敗, 但也唔希望台灣人民為此而有任何損傷。

另外泰國方面的政變也來得頗突然, 昨晚睇夜間新聞的時候, 才得知軍方奪權, 一方面干擾住電訊系統 (包括電台播放), 另一方面又駕駛坦克進入曼谷首都, 形勢似很危急。而總理他信卻身在紐約進行外訪, 由於一切發生得太急, 故此很多事情也不清楚。

只希望以上兩個地方的干戈盡快平息, 唔好影響外地遊客 (尤其是香港的旅行團) 就好了。亦唔希望佢地爆發內戰, 否則生靈塗炭, 會影響我日後外遊這兩個地方的景點。

笑笑小笑話

早前, 阿 Be 同佢的朋友去放遙控車, 地點在粉嶺火車站附近的遙控車場, 四周都是山嶺草叢, 而且之前一日還傾盤大雨, 可想而知, 蚊患指數極高。回家以後, 佢向我詐嬌, 一邊投訴被蚊咬, 令佢好痕, 一邊掀起衭管比我睇。 嘩!!! 佢密茂的雙腳 (腳毛) 滿佈鮮紅色一點、一點的蚊癩, 怪可憐的。 佢仲話雖然已經塗上止痕藥膏, 但晚上還是痕癢難耐, 一晚因此醒左幾次, 睡得不好。真戥佢慘!!

上週日一早我便去藥房, 向掌櫃的名叔求教嘞, 對話如下：

小妹: 阿叔早, 我想問一下如果o靚仔走入草叢, 被蚊咬到一腳都係, 痕到不能睡, 有無什麼可以煲來飲、要來清洗蚊癩 又 或塗上皮膚去止痕? (因為怕被阿叔笑阿 Be年紀不輕, 也如此大意, 故此說他是o靚仔)
阿叔：個o靚仔幾大? (我冷不防他這樣一問, 我諗佢是想計算藥的份量)
小妹：哎.............................. 十幾歲啦!!! (其實掉轉就差不多, 我講的時候都忍不住笑了出來, 又怕講出真相更笑大人個口。)
阿叔：哎呀!!! 十幾歲都o甘唔小心丫, 去邊攪到一身蚊癩架?
小妹：嗄.......................... 唉........ 打 war game lor (打野戰, 繼續講大話中 ~~!!! 因為洗濕左個頭。)
阿叔：我執d茶比你煲水, 哩d茶既可飲 (治濕熱), 亦可以洗患處 (解毒), 仲比多一包藥粉你, 叫佢當爽身粉o甘塗患處啦, 好快好架啦!
小妹： 唔該阿叔。
阿叔： 你呀! 睇住 D o靚仔ma, 叫佢地玩時玩, 做d防蚊措施, 要戒食鵝、牛、蝦同蟹呀!
小妹： 係..... 知道啦.....唔該晒!! ^^

就係o甘, 果個阿叔大概以為我已經有一個十幾歲的o靚仔添!!! (真無辜嘞!!) 如果我真係有一個o甘大的仔, 大概我十幾歲時便結婚生子了。

你地話好唔好笑呢???

小蠱惑 (二部曲) 之 盧山真面

登….. 燈….. 燈….. 櫈….. 今日揭曉小蠱惑 (二) 的盧山真面啦! (見上圖)
「鮮果黑森林蛋糕紙巾套」 是也。

在左邊的是送比 Ching Yi ma 一家的 「士多啤梨黑森林蛋糕 (芒果夾心) 紙巾套」; 而右邊的是送贈朋友 K 的「士多啤梨、芒果黑森林蛋糕紙巾套」

希望大家都鍾意啦!!! 唔知大家有無「望糕止餓」 (抄: 望梅止渴) 的感覺呢?

小蠱惑 (二部曲)

要忍口保守秘密真係一件唔容易的事呀! 而且仲要維持左大概兩個月添 ! (其實主要是隱瞞其中一位朋友, 真係少d定力都唔得呀! 好驚見得佢太多, 唔覺意 "爆響口") 好彩哩個只係屬於我自己的秘密(大家唔駛怕我爆大镬喎)!

較早前安排左一件 ”小蠱惑(二)” 送比朋友K 作新屋入伙之用, 效果唔錯 (自己也禁不住要讚下自己做得幾好), 一路以來唔向外公怖 (唔寫在blog內), 是為左要埋下一條伏線比另一位將要搬新屋的朋友 (所以隱瞞佢), 令佢有個意外驚喜。(不過佢地二人的小蠱惑並非完全一樣), 究竟係咩野黎架呢?

大家估下先, 答案將會稍後揭曉。

在此希望被隱瞞的朋友唔好介意我故作神秘, 目的也只是讓佢有d驚喜啫! 另外要特別鳴謝 ching yi 家姐的協助, 好讓我能入屋佈局 (引狼入室?????????) 嘻嘻嘻嘻嘻嘻!!! 感謝晒!! ^^

雨中的狼狽相

今早起床落大雨 (還以為會有黑色暴雨警告, 怎知空歡喜一場), 再加上一號風球, 已深知交通情況不妙 (可能四處塞車兼人多), 快快梳洗趕出門, 避免遲到。

怎知人算不如天算, 到了太和火車站入閘後, 才聽到廣播說 「由於大學火車站一列車發生故障, 列車服務將受影響」, 我在車站月台等候了差不多四十分鐘亦未有車埋站, 後來終於有列車到, 不過由於人數眾多, 我未能擠身上車, 而列車亦太疏落, 各人也紛紛迫上去, 列車在站停泊很久也不關車門, 乘客的身子也濕透了, 很是狼狽。最終我亦選擇改搭巴士返工。

返到公司已經差不多十點九啦!! (仲要係最遲一個到公司), 其他乘火車的同事因為遲出門, (當時列車服務正回復正常) 反而約九點九回到公司。啊…..……..哩d 係咪叫做 「遲來先上岸」呢? (我卻為意外得到一小時在巴士上睡眠而暗喜)

出門時我十分醒目的穿上三個骨牛仔衭 + 涼鞋 (用作落雨濕透下身也不怕), 回到公司安頓好及抹好身子, 才換上一早預備的西衭, 免得濕著身子涼冷氣而著涼, 算是不幸中之大幸呀!!

戥 「爸爸」 高興

何解題目名為"戥 「爸爸」 高興"?

因為上週日我的整餅課程教授左 "德國黑森林蛋糕", 這是我上蛋糕課o甘耐以來, 爸爸"第一次"試食我的作品咋(除了曲奇餅外), 之前的課堂都是教授"芝士蛋糕", 而爸爸是不吃芝士的, 所以沒有口福了。每次我地在分享我的成品時, 見爸爸只可遠觀, 而不能參予, 我的心總有一絲絲的歉疚, 但又不能強迫佢試食唔喜歡食的東西, 所以今次分 "大份d" 比爸爸補返數。

原來黑森林的蛋糕不難製作, 不過也要買頗多的材料 (尤其是中間一層的"黑車厘子夾心"餡料), 坊間的餅店有的是用 "羅拔臣" 提子味啫喱去代替, 成本低而沒有口感。

ching yi ma 今次有口福了, 因為 ching yi 家姐上完蛋糕課後不用再上其他課, 可以取蛋糕回家比佢一齊分享, 好吃嗎?

我自己認為味道和市面上的黑森林蛋糕分辨不大, 比較喜歡自製的少甜黑森林。但眼見爸爸食到手指都吮埋, 卻令我感到十分欣慰, 姑勿論是否真的好吃, 至少佢肯交足戲去氹我, 在我而言, 梗係開心啦! 下次都會分大份d比佢先。 ^^

*P.S. 附上黑森林寫真一張(好似影得黑了少少)

瑜珈 "大冬瓜"

上週五係我第二課的瑜珈堂, 今次教左少許新動作, 始終我也未能完成上一課的其中一個舊動作呀! 式子的名稱好似叫做「吊天秤」, 動作是雙腳向橫屈曲坐在地上, 雙手捉住"腳趾公", 吸一口氣, 然後慢慢的用雙手提起雙腳 (直至雙腳向橫凌空伸直), 其間要呼氣, 肚不要用力, 維持姿勢大約30秒。

我深明原理, 但當雙手提起雙腳凌空伸直時, 卻時常前仆後碌 (顧得提起腳, 卻顧不得平衡), 不能維持姿勢, 頗似一個「大冬瓜」呢! 成班同學(計算埋我和阿 Be 在內), 約有十個人, 只得我一個未能完成咋, 真羞!! 所以我星期日在家中苦練, 雖不至可以完成動作, 但卻有所進步, 可算安慰。

當上完上一課的瑜珈堂之後, 我深深的感覺到少許肌肉酸痛(尤其是腹腔位置), 我想應該是我姿勢正確, 扭動得到肚部的肌肉。同時間, 膊上的肌肉亦 "鬆" 了不少, 沒有o甘緊繃。真是要趁而家keep 住郁動先至得, 否則又變回 "生秀的機械" 一副了。

"噩夢" 的開始 “”>_<””

幣傢伙!! 尋晚上左第一堂的 Financial Management (財務管理), 發現真的真的真的太深啦!! 完全唔知點算好。

記得我在校時的數學科成績一向也是中下水平, 而且離校工作之後, 大部分只需要用計數機去計算 “加減乘除” 等簡單算式, 並唔需要用腦去諗怎利用公式去 “移項” 同埋要十分十分熟習個人的計數機, 以便去計算較深的算式。

睇怕我每個週末也要下一些苦功去溫習和勤力d做習作, 去冒險考埋這最後一科吧! (因為以我的資質, 相信合格就等於 “超額完成” 呀!) 只可以盡量的 “將勤補拙” 吧!

* P.S. 一上堂, 阿 Sir 就話：「你地要比d心機呀! 這一科的合格率一向偏低, 在坐部份的同學已經讀過 3-5 次架啦! 如果唔想重讀的話, 你就要小心d做數 (因為好多同學衰 “粗心大意”) 同埋要自己做功課, 不要抄同學, 否則學唔到o野」

尋晚驚到瞓覺發噩夢添, 點算呢??? “”>_<””

嬌俏的 "阿茂"

上週六及日 (2-3 Sep 06) 真是忙得不可交關呀! 不過只是為興趣而忙, 而且都是開心事, 故此今日帶住疲累的身驅返工, 但卻懷住興奮的心情啊!

上週六我大約上午 07:30 起床, 08:00 約了 KK、 媽媽 和 阿 Be 一齊到屋苑會所游水及焗桑拿, KK 仲好鬼醒的帶齊晒焗油, 面膜, 身體按摩油, 一邊焗桑拿一邊享用 tim, 真不愧為 “扮靚皇后”呀! 吃過午餐後, 我便開始我的 「阿茂大計」 (爸爸成日話 "整餅的" 就是 "阿茂" :P ), 由下午二時至六時 (整好兩個八寸的紐約芝士餅), 晚飯過後, 再由晚上九時至凌晨二時 (做了約 80 至 100 塊曲奇), 口味包括：
1) 原味牛油 + 朱古力粒
2) 原味牛油 + 朱古力粒 + 杏仁片
3) 朱古力味 + 朱古力粒
至於味道如何, 留返比試食者在此留言喇, 我自己略兼曲奇雖夠鬆化, 但不夠脆, 朱古力味曲奇不夠香, 杏仁片那一款最好味。

* 當天晚上睡在床上之際, 才驚覺雙腳小腿已經麻痺又實左, 腳掌好冤, 頸又梗左 (因為差不多企了近 10 個鐘頭去做 “阿茂” 了。

星期日上午 09:00 十分艱難的撐起床 (因為實在太累, 萬分不情願的早起床), 之後便返工聯會學 “雲石芝士蛋糕” (附圖, 是凍餅, 不用焗), 賣相幾靚, 但工序頗為煩複, 而且所需材料頗多, 所以我並不打算在家多整一次啊! 午飯過後, 忙於清洗前一晚 “大戰的廚房” 和做少許家務, 便變身化作 “速遞員” (運送半個 8寸紐約芝士餅 、 半個課堂製成品 - “雲石芝士蛋糕” 和 兩袋曲奇餅) 到 Ching Yi Ma 處去。晚上到醫院去探望阿 Be 的 grandma, 佢情況唔錯喎!

至於食評, 又是留待試食者在此留言!

「鼻涕蟲」

離校踏入社會工作之後, 已經太耐無運動了, 只是偶然郁動一下 (約一至兩個月一次)。由於少運動, 再加上工作勞損, 經常感到 “頸梗膊痛”, “腰骨又冤”, 真是 「少不中用」!

其實自己一向發覺少運動會引至身體弱d, 不過一來無時間 (難安排), 二來無人陪 (就唔到時間), 三來想儲錢 (每月已經 “掹掹緊”)。本來打算過報讀公司附近的瑜珈課程 (因為貪其運動量輕及可以舒緩壓力, 放工又可立即趕去) 做過資料搜集後, 發現一些課程太貴, 一些又有人評論會遊說你參與其他美容、修身等產品。

最後和阿 Be 路過屋苑的會所, 見到有舉辦瑜珈課程, 仲 “平平地” 添, 即管報左 “9月課程” 試下先, 今晚就係第一堂啦! 希望慢慢做返d運動, 有強健的體魄啦! 因為最近的空氣實在太差了, 令小妹時時成為 “鼻涕蟲” (因為鼻敏感所致), 嚴重起來, 眼會腫及痕, 十分狼狽呢! 有時只能靠敏感藥暫時控制住, 但就極度眼瞓啦。

係喎! 今日是 9月1號學生開課日, 但我又唔覺今朝的交通零舍擠迫喎。

長青樹

最近迷上聽電台節目 903 的 “架勢堂” , 因為主持人森美同小儀真係好攪笑。同埋我想聽下古巨基的新歌 (愛得太遲), 因為d人都話好聽同埋d歌詞好有意思。

其實佢地個節目都幾好笑架喎, 尤其是 (星級遊戲 之 It’s a 反) 果部份, 有時真係 “笑爆肚”, 另外 (星級遊戲 之 砰砰砰砰砰) 令我不得不佩服佢地個腦轉得好快。

聽左一排佢地的節目, 發展自己的心態好似 “開通左 / 開心左”, 例如成日心裡叫自己回想佢地節目的好笑處, 個人放鬆d, 不要因為太過認真引致太大壓力。好似幾有效喎。

最慘卻是因為節目在深夜 12:00 – 凌晨 2:00, 所以要化身做 “貓頭鷹” 才可收聽, 第二日又要變成小熊貓了, 真係對佢地 “又愛又恨” 呀!

有時當聽到佢地接聽 “聽眾” 電話時, 我又可以從傾計的內容去了解時下年青人的心態 (就好似有個大學生話： 嘩!! 第二樣野唔認真都得, “玩” 就梗係要認真架啦! 博到盡添呀!) 足以反映年青人對 “玩得開心” 睇得比一切更重要。所以真係好佩服同羨慕主持人離校o甘耐仍能保持 “長青” 的心態同埋靈活的腦筋。

"小丸子" 現身記

27/8/06 星期日, 我的蛋糕班教授了 “紐約芝士餅” 及 “朱古力曲奇”。 當中發生了一段 「小插曲」。

話說落堂的時候, 一班同學都提住製成品 “歸心似箭” 的與親人分享。當日我拿著一個 4.5吋的“紐約芝士餅” 及 一袋 (四塊) 剛出爐超級熱辣辣的“朱古力曲奇” (正打開袋口散熱中, 否則焗出的水氣會令曲奇變 “林” ) 怎知……..一出大廈門口便發現落大雨, 街上的途人紛紛走進大廈的簷蓬內避雨, 我立即打開背包取出雨傘, 然後冷不防一個男途人突然向後踏一步, 我立即敏捷地躲身避開, 而手上的 “朱古力曲奇” 卻隨萫我輕巧的小跳步 “跳落” 地面上, 而且內裏兩塊小曲奇立即 “奪袋而出”, 我一聲大叫：「哎呀!」 (面上一瞼無辜, 來不及反應, 只是好像 “小丸子” 般 瞇晒眼, 扁晒咀, 額上有很多間線 -_-!!!!! , 眼中忍著熱淚 …~ ~….不捨的望住那兩塊可憐的墮地小曲奇, 同時蹲下去搭回地上僅有的 “生還者”。(好彩還在袋中, 沒污染)

這時 Ching Yi 家姐和她男友出手給予協助, 她男友幫我拿著手上的物品, 好讓我取出傘子, Ching Yi 家姐一邊安慰我：「唔緊要啦! 唔好唔開心! 我分返一塊比你呀!」, 一邊從佢自己的食物袋中取出一塊曲奇, 放到我的袋中。真是十分感動哩! 可惜當時我 “驚魂未定” 未有言謝, 而家籍此機會講聲：多謝你呀Ching Yi 家姐 及 小肥皇子, 如果當日無你地o係身邊, 我都唔知點算 lu。

又係時候講下食評啦! 首先KK 和媽媽 覺得 “紐約芝士餅” 的芝士味太濃, 容易感到膩, 但加在內裏的酸忌廉及檸檬皮卻很 “釣味”, 很香 (尤其是檸檬皮),佢地始終都係鍾意上次的 Tiramisu 多 D。 而 “朱古力曲奇” 呢……… 由於太 “珍貴” 的關係, 所以覺得額外好味 (加了無限的同情分), 當中媽媽的攪笑食評是： 「um………. D “朱古力曲奇” 呢…………….真係好……….. 朱古力呀!!!!!」 (多謝媽媽的攪笑意見。)

唔知Ching Yi 家姐 及 小肥皇子對上課的蛋糕又有 d 什麼意見呢?

愛不太遲

昨晚去左醫院探望朋友的嫲嫲 (她剛在上週二, 22/8/06 做手術), 佢復原得很快, 24/8 已經可以吃粥, 25/8 晚就已經可以吃飯了)。27/8 上午還下了床, 坐在床邊的椅子休息 (嫲嫲還笑說佢的私人坐墊的圖案很 “小孩子” ─ 因為的確是小孩子的水泡嘛!)

昨晚去探望佢時, 佢氣色很好, 而且還好像小孩子的詐驕
嫲： 我pat pat 痛呀!
我安慰佢說：阿 Be細個頑皮被打 pat pat 時, 應該和你一樣痛喔!
怎知嫲嫲竟淘氣的話：無打, 我一直都唔捨得打佢, 所以佢變得o甘曳lor。
我道：佢曳唔緊要, 最緊要佢對你乖, 錫晒你咪得lor。

估唔到病榻中的嫲嫲轉數也如此的快, 而且既淘氣又詐驕, 仲要話醫院的食物不好吃, 睇黎佢康復的進度真是十分好, 令人樂觀喔!!! 我想經此一役, 大家也感受得到 “在家千日好, 出外半朝難。” (平日在家以為見到家人是理所當然的事, 沒想到當家人離家數日才發現自己會經常掛住佢, 擔心佢)

聽到朋友嫲嫲的淘氣詐驕對話後, 令我想起我的婆婆 (已經在天國了), 她也是很疼我們的, 而且盡量公平 (需知道上一代比較 “重男輕女” 的), 她雖有缺憾 (中度失聰), 但真的很仁慈, 而且心地善良, 自己經常節檢省錢來買零食比孫兒 (仲要係價錢貴而且一人一份的零食)

Tiramisu

尋晚同 Ching Yi 家姐、Ching Yi 媽同埋阿 Be 一齊晚飯, 席間傾起上星期日的蛋糕班製成品 – 意大利芝士蛋糕 (Tiramisu)。

該堂還有教授意大利杏仁圈 (這是 Bonus ─ 賺左, 因為筆記大網上沒有提及, 但內文卻提供左食譜, 阿 Sir 焗住要教埋啦!!! YEAH!!! 賺到了, 彌補返小妹上一次的 “蝕左” 被騙的遭遇)。小妹的蛋糕有幸同KK、媽媽和阿 Be分享 (因為爸爸唔食芝士, 所以得到我親手唧的 “心型” 杏仁圈一塊)。

經試食後, KK同 媽媽 覺得這個意大利芝士蛋糕 (Tiramisu) 實在太太太太……….. 好味啦! 蛋糕分左6件, 佢o地每人食左2件就知有幾好味啦! 媽媽仲立即話：「掂啦!! 我打本比你開 Café (咖啡店), 賣埋蛋糕ga 喎。」 (當然我知佢係講笑啦, 不過真係好開心, 多謝食家媽媽的食評, 令我信心大增。) 佢地話比起之前的 “美國芝士餅” 來說, Tiramisu 味道濃淡適中, 口感鬆軟, 總之回味無窮啦! 而 “美國芝士餅” 的牛油味太濃太搶, 口感較 Tiramisu 實, 食完之後好口乾。 但阿 Be卻喜歡 “美國芝士餅” 或 “紐約芝士餅” 多一點, 因為佢鍾意芝士味夠重及口感好 creamy 喎。o甘我覺得點?????????? Um………… 好難答, 因為我的答案唔夠客觀, d o野係我整的, 我一定話好味 ga la, 係咪先?

Ching Yi 家姐話佢d朋友試過 Tiramisu 都大讚, 仲話好過 “美國芝士餅” 添。Ching Yi 媽立即說：「你地講得點好味都無用啦, 我都無得食。」阿 Be 搭咀話：「係呀, 我試過, 真係好好味ga。」我地的談論引到桌上的每位朋友也 “口水長留” 呀!!

十年前後

哈!! 哈!! 哈!! 終於又過了一關啦! 昨晚考完本科的末期試, 雖然考試成績要等待約兩個月後才發放, 但據我估計, “合格” 應該沒有問題的 (我很沒大志喔!!!), 在此特別鳴謝 KK 協助我溫習。

昨日突然與家人談及傳呼機 (call 機), 記得傳呼機在八十年代尾, 九十年代初是極為流行的 (尤其是工作於金融行業者), 甚至是 “潮人” 的指標。因為當時的手提電話並未普及 (只有 “大哥大水壺” 或 “和記 CDMA電話”), 而且未有手機短訊 (SMS) 的出現, 傳呼機正正發揮到它的作用 (用作間接溝通, 因為機主可有效的接收訊息, 亦有權選擇是否回覆發訊者)。

我就讀商科學校時 (約十年前) 也曾擁有一部傳呼機, 用作上課時又或在家時接收訊息 (免和家人爭電話)。回想起頑皮的我也經常整蠱同學(擁有傳呼機者), 致電 call 台扮作她們的男友, 留下 “肉麻” 短訊, 如：”我好掛住你”, “我愛死你了”, “點解我一想起你, 心中就有十萬個衣架?” 等等。 每次留言時, 也令call 台的接線生十分尷尬, 同學收到留言後又萬分開心, 而我卻露出勝利又邪惡的笑容, 真好玩哩!!

回想起來, 真是不知何解當時面皮o甘厚, 只顧整蠱朋友, 而絲毫不覺得尷尬和怕羞呢? 如今的我就一定做不出來了。可幸的是而家我們有手機短訊 (SMS)代勞去傳達 “骨痺肉麻” 短訊。

不得不嘆一句, 科技發展得真快, 而家十歲以下的小童擁有手提電話的比比皆是, 唔知道十年之後又會流行什麼傳送方式又或其他新科技呢?

我要進步 ^^

最近感覺到自我個人應該要成長 (修為方面), um……… 例如話：控制好d (EQ) 情緒智商, 因為覺得人大左, 應該有所進步, 而且 “和氣生財” 丫ma (我太貪心了!!!!!!!)

而家要開始訓練自己面對住 “不公平的事” 和 “不志同道合的人” 也會有禮的笑 (即使心中不忿 / 不認同他們的所作所為), 而且要多在心中評估他們, 而不是宣之於口 (用心觀察旁人), 希望籍此避過被人 “加盬加醋” 的情況啦!

我要多多努力, 同時, 亦希望身邊的人每日也有所進步啦! 今日的自己勝過昨日的自己也不錯喔!!!!!!!!!! 一齊加油吧!!!

"無言感激" - 更深的體會

還記得在○五年母親的生日卡上, 寫有一句 ：「無言感激」, 照字面睇, 可解作萬分多謝, 但相信卻在我和媽媽心目中, 覺得這幾個 “刻骨銘心” 的字, 還有它背後的心意。

寫上此幾個字的是我阿姨 ─ 亦即是媽媽的妹妹, 佢在○四年証實患上了肺癌末期, 期間已退休的父母多番陪伴佢進出醫院, 兩老又在家中合作炮製靚湯好餸, 為佢的身體儲備能量去打杖 (當然我也得益不少啦)。這段艱辛的歲月, 令我們更團結, 更體會到親情的可貴。

當時媽媽講過因為阿姨的病, 令她自己沒有心情去慶祝生日, 所以決定不大攪, 但我們子女卻認為趁阿姨還健在, 就當是一個美好的回憶吧! 最終我們也一家人外出吃飯 (還代阿姨申請了一天假期出院哩! 佢真的好興奮)。

當我請她在卡上簽名及留言時, 佢話：「我最想同你媽媽說 “無言感激”, 因為她真的很鍚我, 當我如子女般看待, 就好像是我第二個媽媽, 但是我現在寫的字很難睇, 你代我寫可以嗎?」佢時誠懇的態度和滿眶淚水的目光, 使我印象深刻。

最後阿姨在○五年的六月去世了, 但她堅強地與病魔作戰的精神卻長存我心, 我為佢而感到驕傲。

已經一年多了, 我的爸、我的媽, 你地的傷口痊癒了嗎? 我想你地振作起來, 一如以往的去做晨運、飲早茶、買餸和閒逛, 不要消沉。 (因為人總需要勇敢生存)

超感動 .....^^.... 多謝支持

建立左自己的 blog o甘耐, 一直以來只是寫的多, 收到的回應少, 但我對於寫網誌的心並沒有動搖過。很喜歡在此空間與大家分享自己的所見所聞、日常遭遇和感想。

宜家 blog 上除了 KK, Be, ching yi 家姐 之外, 還有 匿明朋友的留言, 令我更有推動力去寫好自己的網誌, 你們的支持, 真是令我超感動 丫, 衷心說句：「無言感激」....^o^....

此外, 請大家留言時盡可能用中文, 因為此 blog 的讀者, 亦包括左我的父母、 Auntie, 日後好可能增加到其他長輩朋友, 如: 舅父, 佢地的英文水平唔高, 但我唔想因此而打垮了佢地學習新科技的心 (上網、 電郵、網誌在他們而言是很新的虛擬世界), 佢地既是有心去學習、去認識的話, 就請大家多多幫忙, 令佢地容易明白及投入我地啦!

* 簡單的英文單字應該 ok 的

痛楚的體會

唉..........交上了惡運, 最近因為 「病從口入」, 染上了腸胃炎, 還入了急症室診治, 幸好一切也快將回覆過來。

痾、嘔乃是腸胃炎的主要病癥, 本來並無不妥, 但由於事發突然, 又在清晨時份, 原以為我可以忍受肚痾至天光才到私家醫生診治, 卻想不到是我忍受不到肚內"五臟六腑"扭曲之劇痛, 它並不是長久的痛, 而是一陣又一陣的 "陣痛", 一次比一次來得兇, 到最後也得投降, 送院治理。

還記得那天真是 "痾" 得腳軟兼太累, 身體十分虛弱、寒冷, 但陣痛卻一次又一次的令我不由自主的彎起腰骨 (好像蝦米一般), 肚內抽搐得十分厲害, 想必是 "腸" 跟 "胃" 在抽筋。那時我用氣若浮絲的聲音向男友詐驕：「原來陣痛是那麼難受, 我現在也只是幾小時而已, 怎能想像到我們的 "媽" 是如何的忍受此等痛楚, 再誕下我們, 我想生孩子比起我此時的痛楚, 真是九牛一毛了。」

經過一天的休息及男友細心照料, 身體慢慢的恢復起來, 真是要向他說聲： 「十分感激!」,再者, 經此一役, 我也深深感受到母親的勇敢和偉大, 也想再此講一句：「想不到我的媽會聰明一世, 也會愚蠢一時的忍受三次的痛楚, 誕下了我們三兄妹。」另外還想為快將成為母親的 "嫂嫂"及 "朋友的弟婦" 講聲：「加油啊! 你們真勇敢, 日後子女一定為你們而感到驕傲的。」

女人啊! 你們真的不簡單。